မာံအသး
ဒပ်ပၞာန်စဵုဒၞာကောန်ဂကူမန် နာဲအံၚ်နာၚ်တံဝွံ ပ္ဍဲသတ္တဟဏံ သွက်သြန်ဂအုံကောန်ရဲ တဝ်သွာညးတံဂးတုဲ ဗက်ကေတ်မံၚ်အကံက် ပ္ဍဲအကြာကွာန်မန် မၞုံဒၟံၚ်တွဵုရးမန် ကေုာံ တွဵုရးကရေၚ်တံရ။
နာဲအံၚ်နာၚ်ဝွံ သွက်ဂွံသ္ပဒပ်ပၞာန်မၚ်ကွာန် အတိုၚ်အလဵုအသဳတံ စၞောန်လဝ်ဂှ် ဗက်ဗပေၚ်မံၚ်ဇြဟတ်ဒပ်ညးတံ ပပ္တံကဵု နူမွဲဂွံဒှ်ၜါ နူၜါဂွံဒှ်ပိရ။ ဟိုတ်ဂှ်ရ သွက်ဇွောံမ ကောန်ရဲတဝ်သွာညးတံ ဂွံသၠဲလးဂှ် ဂၠာဲသၠုၚ်ပ္တိုန်အသိၚ် ပ္ဍဲကွာန်မန်တံရ။
ကွာန်မန်မၞုံဒၟံၚ်ပ္ဍဲပွိုၚ်ဍုၚ်မုဟ်ဍုၚ် မပ္တံကဵု ကွာန်အၜတ်၊ သၞေဟ်ဗ္ဒဝ်၊ ဆက်တဲ၊ ကအ်ဟပုၚ်၊ ကွာန်ဟဗုဲ၊ ထုံမၚ်၊ ကလအ်သတ် ကေုာံ တံၚ်ပိုအ်တံဖအိုတ်ဂှ် နူဒပ်ပၞာန်စဵုဒၞာကောန်ဂကူမန် ဗလးနၚ် နာဲယှိုဲဗြိုၚ်ကေုာံ ကောန်ရဲတဝ်သွာညးၜါတၠ အာစိုပ်ပ္ဍဲအကြာကွာန်တုဲ ကော်ညးဇၞော်ကွာန် စကာ ကဵုအာတ်လှုဲ ပ္ဍဲတၠကၠအ်ဗၜိုတ်တံရဂှ် ညးဒေသတံ ဟီုရ။
ညးကြပ်ကဵု ညးဇၞော်ကွာန်မွဲတၠလေဝ် “ညးတံ ကော်ညးဇၞော်ကွာန်တုဲ စကာကဵုဥက္ကဋ္ဌကွာန် အာတ်လှုဲ ပ္ဍဲတၠကၠအ်ဗၜိုတ်တံ မွဲဧကတှေ် ၁၀၀၀ ဒကေဝ်၊ ညးတံကဵုအခိၚ် ပိတ္ၚဲရ၊ ယဝ်ရ အတိုၚ်ဖျေံလဝ် အခိၚ်ဂှ် ကဵုဟွံမာန်တှေ် ဗီုဂွံဂှ် ညးတံကေတ်အာဏောၚ် ဟီုလဝ်ရ” သာ်ဏံ ညးဟီုရ။
က္ဍိုပ်နာဲအံၚ်နာၚ်တံဂှ် သွက်သြန်ဂအုံညးတံ ဗက်အာတ်မံၚ်လှုဲပ္ဍဲတၠကၠအ်ဗၜိုတ်တံသၟးဟွံက သ္ၚိပဇူလဝ် ဖုၚ်ကဝ်လေတ် ဍုၚ်သေံတံလေဝ် ဒပ်ညးတံ ဗက်အာတ်မံၚ်လှုဲဂှ် တၠသ္ၚိပဇူလဝ် ဖုၚ်ကဝ်လေတ်သေံမွဲတၠ ဟီုရ။
“ညးတံ ကၠုၚ်အာတ်လှုဲ ပ္ဍဲသ္ၚိပိုဲရ၊ မွဲဂိတုတှေ် ၅၀၀၀ ဒကေဝ် ဒးကဵုဏောၚ်၊ သွက်သြန်ဂအုံ ညးတံဂးတုဲ ဟွံကဵုဟွံဂွံ ညးတံ ဘပဠရ၊ ပိုဲတံလေဝ် ညာတ်လွဟ်ဂၠေံ ဆတ်လဝ် ပ္ဍဲဂၞိၚ်ညးတံတုဲ ဖေက်က်ဂှ် ဒးကဵုဏာရ” သာ်ဝွံ ညးဟီုရ။
တုပ်တဴသာ်ဂှ်ကီု ကွာန်မန်မၞုံဒၟံၚ်ပ္ဍဲတွဵုရးကရေၚ် မပ္တံကဵု ကွာန်ကအ်ဗိန်တံလေဝ် နူကဵုက္ဍိုပ်နာဲအံၚ်နာၚ်တံ ဗက်ကေတ်မံၚ်အကံက်ကီုရောၚ်ဂှ် ဂွံမိၚ်ကေတ်ရ။
နူကဵုက္ဍိုပ်နာဲအံၚ်နာၚ်တံ ဗက်ကေတ်မံၚ်အကံက် အကြာကွာန်မန်တံဗီုဗီုဏံဂှ် ခမဳသၚ်တံကီု သၟတ်တံကီုဂှ် ဟွံစှေ်စိုတ်ရ သာ်ဝွံ ခမဳသၚ်မွဲဇကု ဟီုမြော်ရ။
“ကၠုၚ်အာတ်မံၚ် ဗီုဗီုတဏံဂှ် ဗီုလဵုလေဝ် ဟွံမွဲပၟိက်ရ၊ စှေ်လေဝ် ဟွံစှေ်စိုတ်ပုဟ်၊ ယဝ်ရ ဆက်အာတ်မံၚ်အတိုၚ်ဏံရတှေ် နူကဵုခမဳသၚ်ပိုဲတံ ပ္တိုန်လိက်ကဵု ဗော်ဍုၚ်မန်တၟိ (ဝါ) ညးတာလျိုၚ်ဒေသတံဏောၚ်” သာ်ဝွံ ခမဳသၚ်ဂှ် ဆက်မြော်ရ။
က္ဍိုပ်သ္ကိုပ် ဒပ်ပၞာန်စဵုဒၞာကောန်ဂကူမန် နာဲအံၚ်နာၚ်ဝွံ ဒှ်သ္ကိုပ်ဗိုလ်ဇၞော်တြေံ ဗော်ဍုၚ်မန်တၟိမွဲတၠတုဲ ပြဟ်ဟ်ဏံ ယဲဗျုအန္တရာယ်ဇဳ ထၞေန်စိုပ်မံၚ်တုဲ မၞုံဒၟံၚ် ပ္ဍဲဒပ်ဗဟဵုညး ပ္ဍဲကွာန်ကအ်ယက္ခ၊ ပွိုၚ်ဍုၚ်ဘာအၚ်၊ တွဵုရးကရေၚ်တေံရောၚ် ဂွံလဝ်ပရိုၚ်ရ။