အာကာ
ပ္ဍဲတရဴဗော်ဒဳမဝ်ကရေဇြဳ အလုံရးမန် စှေ်မံၚ်ပရေၚ်စန်ဒက် သွက်သ္ဂောံပကောံပကေဝ် ကောန်ဂကောံဂှ် ကလိဂွံပရေၚ်ထံက်ဂလာန် ညးဍုၚ်ကွာန်တံတုဲ ပရေၚ်စန်ဒက်အံၚ်ဇၞးရောၚ်ဂှ် ညးဒေသတံ ဟီုအိုတ်ရ။
ဗော်ဂှ်ဝွံ ပ္ဍဲသတ္တဟဒုတိယ ဂိတုဏံဂှ် စှေ်ပရေၚ်စန်ဒက် အပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်ပါ်လၟိုၚ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်မုဟ်ဍုၚ်အိုတ်ရ။
ပ္ဍဲတရဴပရေၚ်စန်ဒက်ဂှ်ဝွံ သောၚ်ကလး လးထ္ၜးကဵု ဂၠံၚ်တရဴဗော်၊ မူဝါဒဗော်ညးတံတုဲ ကလိဂွံပရေၚ် ရီုဗၚ် ထံက်ဂလာန် ကသပ်ညာဏ် နူခမဳသၚ်၊ ညးဍုၚ်ကွာန်တံရောၚ်ဂှ် က္ဍိုပ်သကိုပ်ဗော် နာဲဇၞူမန် ဟီုရ။
“ဂွံဇြဟတ် ကွေံကွေံ၊ ညးကဵုဇြဟတ် ဂၠိုၚ်ဂလိုၚ်ဏံဏောဝ် အဲဟွံထေၚ်လဝ်ပုဟ်” သာ်ဝွံ နာဲဇၞူမန် ဟီုရ။
တရဴပရေၚ်စန်ဒက်လၟုဟ်ဝွံ ဒှ်အလန်ကိုပ်ကၠာအိုတ်တုဲ ဆအယာံမာတ် စှေ်ပရေၚ်စန်ဒက် အကြာဂကောံနာနာ မၞုံလတူဍုၚ်ဟေၚ်ရောၚ်၊ ဟွံဂွံစှေ်ပရေၚ်စန်ဒက် အကြာညးဍုၚ်ကွာန်တံဏီရောၚ်ဂှ် ညးဆက်လဴထ္ၜးရ။
ပ္ဍဲတရဴစှေ်ပရေၚ်စန်ဒက် ဍုၚ်မုဟ်ဍုၚ်ဂှ် ညးတိုန်ကလၚ်တံ မၞုံၜိုတ် ၁၀၀ တၠ မၞုံတုဲ ညးမတိုန်စိုပ်တံဂှ်လေဝ် သွက်လၟေၚ်ဂၠံၚ်တရဴဗော် အဓာန်ဂတ ဂပ်ဝ်နွံပၟိက်တံဂှ် ရီုဗၚ်ဖဍိုက်ဗပေၚ်အာရောၚ်ဂှ် ကဵုလဝ်ကတိပါၚ်နွံရောၚ် ညးမတိုန်စိုပ်မွဲတၠ ဟီုရ။
“သွက်ဗော်ဒဳမဝ်ကရေဇြဳ အလုံရးမန် ဂွံဗပေၚ်ဇြဟတ် ကောန်ဂကောံတံကီု၊ အရီုအဗၚ်တၞဟ်ဟ်တံကီုဂှ် ညးတိုန်စိုပ်တံ ရီုဗၚ်ဖဍိုက်ဗပေၚ်အာဏောဝ်ဂှ် ကဵုလဝ်ကတိပါၚ် နွံ” သာ်ဝွံ ညးဟီုရ။
ဗော်ဒဳမဝ်ကရေဇြဳ အလုံရးမန်ဝွံ သ္ပအဓိကကဵု ပွိုၚ်ဍုၚ်ရေဝ်၊ ပွိုၚ်ဍုၚ်မုဟ်ဍုၚ်တုဲ ပကောံပကေဝ်အာ ကောန်ဂကောံရောၚ်၊ အလုံဒေသရးမန် ညံၚ်သ္ဂောံဂွံ ကောန်ဂကောံ ၁၀၀၀ တၠပြၚ်ဂှ် ရန်လဝ်နွံရောၚ်ဂှ် သ္ဂောံတီကေတ်ရ။
ဗော်ဒဳမဝ်ကရေဇြဳ အလုံရးမန်ဝွံ ပ္ဍဲဂိတု အေဗရာ (၇) သၞာံ ၂၀၀၇ ဏံဂှ် စဒက်ပတန်ကၠုၚ် နကဵုသၞာဲဒါအလဵုအသဳ ဒေံါဇူဂမၠိုၚ်၊ တၠပညာမန်ဂမၠိုၚ်၊ ကောန်ဂကောံ ဗော်ဒဳမဝ်ကရေဇြဳ ကောန်ဂကူမန် လ္ၚဵု ကေုာံ ကောန်ဗော်ဒေံါဇူ နူဗော်ဍုၚ်မန်တၟိ လ္ၚဵုတံရ။
ပ္ဍဲဂိတုမေ (၂၄) ဂှ် နူကဝ်မရှေန် ပေဲါရုဲမာဲ အလဵုအသဳပၞာန် ကဵုအခေါၚ် ပတိုန်စရၚ်ဗော် ကုဗော်ဒဳမဝ်ကရေဇြဳ အလုံရးမန် နကဵုလၟေၚ်ပတိုန်စရၚ်ဗော် (၁၃) ရ။
ရုၚ်ဂအုပ်ဗော်ဂှ်ဝွံ ပံက်လဝ် ပ္ဍဲအရာပ်မျာၚ်သာယာ၊ ဍုၚ်မတ်မလီုတုဲ လုပ်ပြိုၚ်ပကာန် ဒုၚ်ရုဲမာဲ ပ္ဍဲပွိုၚ်ဍုၚ်မန်၊ ပွိုၚ်ဍုၚ်ကရေၚ်၊ ရးဗဂေါ ကေုာံ ရးတၞၚ်သဳတံရောၚ် ရန်လဝ် နွံရ။
ဗော်ပရေၚ်ဍုၚ်ကွာန်မန် ဇၞော်ၜါ မတွံဂး ဗော်ဍုၚ်မန်တၟိ ကေုာံ ဗော်ဒဳမဝ်ကရေဇြဳ ကောန်ဂကူမန်တံဂှ် ဟွံစှေ်စိုတ်ကဵု သၞောဝ် (၂၀၀၈) တုဲ ဟွံလုပ်ဒုၚ်ရုဲမာဲ ပ္ဍဲပေဲါရုဲမာဲ (၂၀၁၀) ရောၚ်ဂှ် ဟီုလလောၚ်ထမံက်လဝ် နွံရ။