မာံအဲ
လ္ပာ်ဒေသရေဝ်သၠုၚ်ကျာတေံ ပွမကၟာတ်လဒဵုအခေါၚ်အာကၠအ်တံဂှ်သၟးဟွံက လၟုဟ်သီုကဵုဟွံကဵုအာကၠုၚ်အခိၚ်ဗ္တံရ။
ပ္ဍဲသတ္တဟဏံဂှ် ဒပ်ပၞာန်ဗၟာ မဖျေံလဝ်သဇိုၚ် ရေဝ်သၠုၚ်ကျာ ပ္ဍဲကွာန်ခေါဇာဂှ် ကဵုစၞောန်ကဵု ညးဒေသ ညံၚ်ကဵုဟွံဂွံအာကၠအ်ကဵု အခိၚ်ဗ္တံ ၉ နာဍဳၜက်တုဲလေဝ် ညံၚ်ဟွံဂွံတိတ်မ္ၚးရ။
ရေဝ်သၠုၚ်ကျာ ပွိုၚ်ဍုၚ်ပါ်ခေါဇာ မပ္တံကဵု ကွာန်ယံၚ်ရေဝ်၊ ကွာန်ယံၚ်ဒိန်၊ ကွာန်တၟိတဴတက်၊ ကွာန်ၜိုပ်ထဝ်၊ ကွာန်ကြုၚ်ကညာတံဂှ် ဒပ်ပၞာန်တံ ဟွံကဵုအခေါၚ်အာကၠအ်၊ အာကၠုၚ်အခိၚ်ဗ္တံရောၚ် ရဲဍုၚ်ခေါဇာ တံဟီုရ။
“လောန်ကၠုၚ် ၅-၆ တ္ၚဲတေံဂှ် ဍေံတံ ကော်ညးဇၞော်ကွာန်တုဲ ကဵုစၞောန် ရဲကၠအ်နွံတံ ညံၚ်ဟွံဂွံကဵုအာကၠအ်၊ အာကၠုၚ်အခိၚ်ဗတံ၊ ၜက်အာနူ ၉ နာဍဳတုဲ ညံၚ်ဟွံဂွံတိတ်ဂၠံၚ်၊ ၉ နာဍဳတုဲ ကိစ္စနွံ ဒးတိတ်မ္ၚးတွဵုဏောၚ်ဒှ်တှေ် ညံၚ်ဂွံရပ်ဏာပၟတ်ပၞာၚ် ယဝ်အာကၠုၚ်ကဵု ပၟတ်ဓာတ်တှေ် ကေတ်အရေဝ်ဏောၚ် ထေၚ်ဂးရဲက္ဍိုပ်မ္ၚးတံတှေ် ပိုဲပန်ဒးဏောၚ်” သာ်ဝွံ ညးကြပ်ကဵု ညးဇၞော်ကွာန်မွဲတၠ ဟီုရ။
“သကုတ်ပိုဲဏအ်ဂှ် ရဲက္ဍိုပ်မ္ၚးတအ် ကၠုၚ်ဗက်မံၚ်လှုဲ ပ္ဍဲကွာန်မွဲနှေအ် မွဲနှေအ်ရ။ ယဝ်ပိုဲ ဟွံကၟာတ် ပရေၚ်အာကၠုၚ်ဗီုဏံတှေ် ရဲအာကၠုၚ်မံၚ်တံဂှ် ညးဂှ်လေဝ် ပိုဲကေတ်ဟွံဒးပုဟ် အကာဲအရာလၟုဟ်ဂှ်လေဝ် ဗှေ်တအ် ဟွံတီ လေဝ်နွံတၟာဂလိုၚ်ဏီ” သာ်ဏံ ပၞာန်ဗၟာတံ ဟီုစၞောန်လဝ်ကဵု ညးဇၞော်ကွာန်တံဂှ်ရ။
ဒပ်ပၞာန်ဗၟာ မဖျေံလဝ်သဇိုၚ် သကုတ်ရေဝ်သၠုၚ်ကျာတံဂှ်ဝွံ ဟိုတ်နူကဵု ပရေၚ်ဂီုကၠီုဍေံတအ်တုဲ ညးဒေသတအ်လေဝ် ဒှ်အာဒဒိုက်တၟာဂလိုၚ်ရောၚ်ဂှ် သၟတ်မွဲတၠ ဟီုရ။
“ဍေံကၟာတ်ပရေၚ်အာကၠုၚ်ဂှ် ဍေံဂွိၚ်ကဵု ဂီုကၠီုဍေံတံဏောၚ် မုလေဝ် ဟွံဆေၚ်ကဵု ရဲကွာန်တံပုဟ် ဍေံတံပဗီုဏံဂှ် သွက်ညးဍုၚ်ကွာန်ပိုဲတံ ဒှ်ခက်ခုဲတၟာဟလိုၚ်ဏောၚ် ညံၚ်ညးဒေသတံဂွံဒှ်ဒဒိုက်ဂှ်ရ ဍေံတံ ဗက်ဖန်ဗဒှ်မံၚ်” သာ်ဝွံ သၟတ်ရဲခေါဇာမွဲတၠ ဟီုရ။
အခိၚ်တမ်သၞာံဏံဝွံ မဒှ်အခိၚ် ညးကၠောန်ကၠအ်တံ အဃောကမၠောန်ဂြိပ်တုဲ ပွမ ကၟာတ်ထောံအခေါၚ် အာဂြိပ်ဗီုဏံဂှ် ဒှ်အခက်အခုဲကဵု ပရေၚ်ကမၠောန်ညးတံတၟာဟလိုၚ်ရ။ ကပေါတ်တိတ်နူကၠအ်တံ ကေတ်ပတိတ်ဟွံဂွံ ကၠောန်ပတိတ်ဟွံဂွံဗီုဏံဂှ်လေဝ် ယုက်ဒေက်စှေ်ကဵု ပရေၚ်ပိုန်ဒြပ်ညးတံရောၚ်ဂှ် တၠကၠအ်တံကရောတ်မံၚ်အိုတ်ရ။
“အခိၚ်ဗြဲစှေ်တၟိတၟိတှေ် ဒှ်အခိၚ်ကၠောန်ဂူခိုဟ်ရဏောၚ် ဒၞာဲဒးကလေၚ်ထပ်တဵုဂှ်ဂွံတဵု၊ ဒၞာဲအုပ်တိုန်မံၚ်တံဂှ် ဂွံၚးတး၊ မွဲပၠန်ဂှ် လ္ပာ်ပိုဲဏံ တဵုသြောံဂူ တမ်သၞာံတှေ် အခိၚ်ဏံဂှ်တှေ် အခိၚ်တဵုသြောံဂူရ၊ ကၟာတ်ထောံအခေါၚ်အာဂြိပ်တှေ် ကမၠောန်အိုတ်သီုဂှ် ယုတ်ဒေက်အာအိုတ်၊ သွက်ပိုဲတံ ဒှ်ခက်ခုဲ ၜိုတ်လဵုရော” သာ်ဝွံ တၠကၠအ် ဍုၚ်ခေါဇာမွဲတၠ ဟီုရ။
ညးဒေသရေဝ်သၠုၚ်ကျာတံဝွံ ဗွဲတၟေၚ်ကၠောန်ကမၠောန်ဟယိုၚ်မံၚ်လမျီုကဵု ပွမကၠောန်ကၠအ်တံတုဲ နူပၞာန်ဗၟာတံ ကၟာတ်လဒဵုထောံဗီုဏံဂှ် ဒှ်ခက်ခုဲသွက်ညးတံတၟာဟလိုၚ်ရော၊ ပွဗီုဗီုဏံလေဝ် ကတဵုဒှ်မံၚ်မွဲနှေအ်မွဲနှေအ်ရ။