နာဲမာန်
လၟိုန်အရိုဟ်ဒဒှ်တ္ၚဲ ဗြဲၜိုန်ရဂူဖျေံဒၟံၚ်ကီုလေဝ် အခိၚ်ဗ္တံဂှ် မၞိဟ်တအ်ဒးဒုၚ်စသိုၚ်ဓါတ်ဂမ္တဴတုဲ တၞံဆုဂ မၠိုၚ်လေဝ် ချိုတ်ကှ်အေဲဇြဒှ်ကၠုၚ်ရ။
အရိုဟ်ဟ်သၞာံမ္ဂး ဗြဲဂူဆက်တုဲ ဓါတ်ဂမ္တဴ သက်သာစှေ်ကၠုၚ် ဥတုဓဝ်ယာကၠုၚ်ကီု မၞိဟ်တအ် မံၚ်စံၚ်လၟေၚ်ၜိုတ်ဓမ္မတာ ဟွံကရောတ်မွဲသာ်ရ။ သၞာံဏံ ဗြဲဂှ်ၜိုန်ဟွံကရိုပ်စှေ်ဂၠိုၚ်ကီုလေဝ် ဗြဲဂူဖျေံကဵုဆက် ဆက်ဗ္တံဟွံသေၚ် တ္ၚဲဂူဒၟံၚ်ဆက်က်နွံရ။ ၜိုန်ဂှ်လေဝ် မၞိတ်တအ် ဒးဒုၚ်စသိုၚ်ဓါတ်ဂမ္တဴဂၠိုၚ်ဒၟံၚ်တုဲ ကရောတ် ဟီုဂးဒၟံၚ် ဥတုရာသဳဍုၚ်ပိုဲဏံ ဗီုလဵုဒှ်အာယျရော ညးဇၞော်ဇၞော်တအ် ပ္တိတ်ဒၟံၚ်တၚ်သၟာန်အိုတ်ကီုရ။
“ဓါတ်တိလီုအာယျဏေါဝ် တၞံဆုကၠအ်ပုဴတဵုလဝ် တၞံဒူရေန်၊ ဟဗုၚ်တအ်လေဝ် ချိုတ်ဒၟံၚ်ဂၠိုၚ် တၞံ ဒူရေန်တှေ် ချိုတ်ဂၠိုၚ် ဟွံဂွိုအ်ချိုတ်ဏီ အဃောဒှ်ဒၟံၚ်စၟလေဝ်နွံ အာစာသုတေသနတအ် ကော်စၟ (ဗက် တီးရီးယား) မွဲဂကူကီု ဂွံပဠေဝ် လွဳကဵုဂဥုဲလေဝ် ဂဥုဲဟွံမွဲ ဒှ်ကဵုဓါတ်တိလီုဏေါဝ်” သာ်ဏံ ညးကၠောန် ပရေၚ်တဵုလွဳ နာဲဃံၚ် ပွိုၚ်ဍုၚ်ဇြပ်ဗုဂှ် ဟီုထ္ၜးရ။
ဆဂှ်ဟွံက သၟာကၠောန်ကၠအ်ဟၜိုတ်တအ်လေဝ် ကရောတ်ဒၟံၚ် တၞံဟၜိုတ်ချိုတ်ဂၠိုၚ်ကွေံကွေံရောၚ် သာ်ဏံ ကရောတ်ဒၟံၚ်အိုတ်ရ။ “အဵု သၞာံဏံ ဗီုလဵုဒှ်ဟွံတီ ဗြဲဂူဆက်ဂှ် အဲထပ်လဝ် မဟၜိုတ် ဂွံၜိုတ် (၂၀) တ္ၚဲ အဲကၠုၚ်ရံၚ် ချိုတ်ဂၠိုၚ်၊ ဂျိုၚ်အောန်ကွေံကွေံ ဗီုလဵုဒှ်အာဟွံတီ” သာ်ဏံ ညးတၠကၠအ်ဟၜိုတ် ပွိုၚ်ဍုၚ်မုဟ်ဍုၚ်မွဲတၠ ဟီုရ။
ဥတုရာသဳကၟိန်ဍုၚ်မန်ဗၟာပိုဲတ္ၚဲဏံဝွံ မွဲသၞာံကဵုမွဲသၞာံ လီုလာ်ကၠုၚ်ဒၟံၚ်တုဲ သတ်ဆုမပ္တံ ဒူရေန်၊ မၚ်ဂေါတ်၊ ပၞဴ၊ ကြုက်၊ ဟနေၚ် သတ်ဆု နွံကဵုၚုဟ်မးနာနာတအ် သတ်အောန်ကွေံကွေံရ။
ဟိုတ်နူဥတုရာသဳတုဲ ညးတၠသတ်ဆု ပ္ဍဲဍုၚ်ကွာန်မွဲဓဝ်ဟွံသေၚ် ကရောတ်မံၚ်တုဲ ရဲညးဒိုက်ဝါတ် သၟာၜှ်ပလှ်စသတ်ဆု သတ်ဒုန် ပ္ဍဲဌာန်ဂြိုပ်လေဝ် ကရောတ်ဒၟံၚ်ကီုရ။
“သတ်ဆု ပ္ဍဲကၠအ်မွဲဓဝ်ဟွံသေၚ်လီု၊ သတ်ဆု ပ္ဍဲဂြိုပ်လေဝ် သၞာံဏံ ဟွံသတ်ပုဟ် စပ္တံနူ ဟနေၚ် သတ်ချ တၞံသတ်ဂှ် နွံအောန်ကွေံကွေံဏေါဝ်” သာ်ဏံ သၟာၜှ်ပလှ်စသတ်ဆုဌာန်ဂြိုပ်မွဲတၠဂှ် ထပ်ဟီုပၠန်ရ။
ဓါတ်ဂမ္တဴဂှ် ကၠာဟွံစိုပ်အခိၚ်ဗြဲဂူက္ဍၚ် အဃောဓါတ်ဂမ္တဴဂၠိုၚ်ဂှ် ဒေသလ္ပာ်ကတဴဂၠိုၚ်တအ် ဗၞတ် (45) ဒဳဂရဳဇြေန်ဒဳဂရုက် ပြၚ်ၚ်နွံတုဲ လၟုဟ်လေဝ် (30) ဒဳဂရဳဇြေန်ဒဳဂရုက်ပြၚ်ၚ် သှေ်မံၚ်ဖိုဟ်ရောၚ်။
အပ္ဍဲကၟိန်ဍုၚ်ဗၟာဝွံ ညးထိၚ်ဒဝ်ဂြိုပ်ဆုဟွံမွဲ ဟိုတ်နူဂြိုပ်ဟရာတ်လောန်တုဲ ဥတုရာသဳလီုလာ်တုဲ ဓါတ်ဥတု ဟွံ ဓဝ်ယာဖံက်ပၠန်က္တဵုဒှ်ကၠုၚ်ရောၚ် အစာသုတေသနလိုက်တအ် ဟီုဒၟံၚ်အိုတ်ရ။