Categories
ပရိုၚ်

မၞိဟ်မ္ၚး အခေါၚ်လုပ် အပ္ဍဲဗွိုၚ်တက္ကသိုလ် ဟွံမွဲ

ပရေၚ်ဒစဵုဒစး ပေဲါရုဲမာဲ ၂၀၁၀ လတူဂၠံၚ်ကွဳစက် မတ်မလီု-ရေဝ် ပ္ဍဲဂိတုဂျာန်နဝါရဳမံက်ဏံ

ဌာန်ပရိုၚ်ဗၠးၜးမန်။  ။ သ္ပပတံနူဂိတုဂျုန် အခိၚ်ဘာတက္ကသိုလ် ကလေၚ်ပံက် သကုတ်ဒုတိယတုဲ ညးဟွံကွက်လဝ် ကာဒ်ကွးဘာတံဂှ် ဟွံဂွံအခေါၚ်လုပ် အပ္ဍဲဗွိုၚ်တက္ကသိုလ်ရောၚ် ကွးဘာတက္ကသိုလ်တံ ဟီုရ။

ဟိုတ်နူကွဳလိုန်ဓါတ် ကၠေံမံၚ် အပ္ဍဲဗွိုၚ်ဘာ မွဲနှေံမွဲနှေံတုဲ ဒးသ္ပသာ်ဏံရောၚ်ဂှ် ၜိုန်ရအာဘာတံ ဟီုကီုလေဝ် သွက်သ္ဂောံစဵုဒၞာ ညးဒစဵုဒစးကဵု ပေဲါရုဲမာဲတုဲ ကၠောန်သာ်ဏံရောၚ်ဂှ် ကွးဘာတက္ကသိုလ်တံ ညာတ်ကေတ်အိုတ်ရ။

“ကွဳလိုန်ဓါတ်ကၠေံဂှ် နူလၟုဟ် ဟွံသေၚ်ရ၊ ဒှ်ကၠုၚ်မံၚ် နူသၞာံတုဲကၠုၚ်တေံရ၊ ကွဳလိုန်ဓါတ်တုဲ ဒးကၠောန်ဗီုဏံဏောဝ် ဟီုတှေ် ဒးကၠောန် နူသၞာံတုဲကၠုၚ်တေံရ။ မုဟီုဟီု ဣဏံဂှ် ဆေၚ်စပ်မံၚ်ကဵု ပေဲါရုဲမာဲဏောဝ် ပိုဲညာတ်ကေတ်လဝ်” သာ်ဝွံ ကွးဘာ သၞာံလက္ကရဴအိုတ် ကေတ်လဝ်ဘာသာ ဓာတုဗေဒမွဲတၠ ဟီုရ။

ယဝ်ဟွံကွက်လဝ်ကာဒ်မွဲသာ် လုပ်အာ အပ္ဍဲတန်ဗ္တောန်လိက်လေဝ် ဒးဒုၚ်ဗျိဒေါန်ကဵု အာၝောံဗ္တောန်လိက်တံတုဲ သီုဒးဒုၚ်တပ်ဒဏ် (၅၀၀) ဒကေဝ်ရောၚ်ဂှ် ညးဆက်လဴထ္ၜးရ။

အပ္ဍဲဗွိုၚ်ဘာသၟး ဟွံသေၚ်၊ ပ္ဍဲဗဒမ်ကွးဘာတံ ဇူဒီု မၞုံပွဳဗွိုၚ်တက္ကသိုလ်တံလေဝ် စေဝ်ပၞောန်တေၚ်ဂြတ်မံၚ် နူသၞာံတုဲကၠုၚ်တေံရောၚ်ဂှ် ညးမဇူဒီု ပ္ဍဲဗဒမ်တံ ဟီုရ။

သၞာံအာတေံဂှ် ညးမဇူဒီု ပ္ဍဲဗဒမ်တံ “အတိုၚ်စေဝ်ပၞောန် မဖျေံလဝ် ပ္ဍဲဗဒမ် မံၚ်စံၚ်အာရောၚ်” ဂှ် ဒးဒုၚ်ကတိပါၚ် ထပက်စၟတ်တဲ ပ္ဍဲလိက် (၃) တၞးကီုလေဝ် သၞာံဏံဂှ် ဒးထပက်စၟတ်တဲ (၇) တၞးရ။ တၠဗဒမ်တံလေဝ် ကေတ်တာလျိုၚ် ကုညးမဇူဒီု ပ္ဍဲဗဒမ်ဇကုရောၚ် ဒးဒုၚ်လျိုၚ်ထပက်စၟတ်တဲရ။

လိက်ဒုၚ်ကတိပါၚ် (၃) တၞးဂှ် သၞာံကၠာတေံ ဒးပလံၚ်ဗစိုပ်ကဵု (မရက)၊ ဌာန်ဂအုပ်ပၞာန် ရးဒိုဟ်အဂၞဲ ကေုာံ ဗဒိုပ်ဗၠာဲသၟိၚ်တံတုဲ သၞာံဏံဂှ် သီုဒးပလံၚ်ဗစိုပ် မပ္တံကဵု (စရဖ)၊ ဒပ်ဗၠာဲသၟိၚ်တၟေၚ် ကေုာံ ဌာနပၟိက်ဇၞော်တၞဟ်တၞဟ်တံကီုရ။

ပ္ဍဲဂိတုဂျာန်နဝါရဳမံက် သၞာံဏံဂှ် ပရေၚ်ချဳဒရာၚ် ဒစဵုဒစး ပေဲါရုဲမာဲ ၂၀၁၀ ဂစတ်ဍာ်ဂဥုဲမွဲ ကၠောန်ဗဒှ်ကၠုၚ် မွဲဒမြိပ် လတူဂၠံၚ်ကွဳစက် ရေဝ်- မတ်မလီုရ။

ပေဲါရုဲမာဲ အလဵုအသဳပၞာန် မကၠောန်သ္ပ ပ္ဍဲ (၂၀၁၀) ဏံဂှ် နူကဵု ကံၚ်ဇြဳ ကောန်ဂကူ ကၟိန်ဍုၚ်ပံၚ်ကောံ-ဍုၚ်ဗၟာ (NCUM) ဒစဵုဒစးအာ ပိုတ်ပိုတ်သကုတ်သကုတ်တုဲ ပ္ဍဲပရေၚ်ချဳဒရာၚ် ဗၠးၜးကောန်ဂကူ ဒစဵုဒစးကဵု ပေဲါရုဲမာဲဏံဂှ်လေဝ် ညးဍုၚ်ကွာန်တံ ညံၚ်သ္ဂောံပါလုပ်ဂှ် နူကံၚ်ဇြဳဂှ် ဗတိုက်ဖအောဝ်လဝ် ပ္ဍဲဂိတုမာတ်ချ် (၁၈) ဏံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.