စၠန်ထဝ်။ ။ ဒပ်အလဵုအသဳပၞာန်ဗၟာကဵု ဒပ်ကရေၚ်ကေအဲန်ယူတံ ဟိုတ်နူဒှ်ဒၟံၚ်ပေဲါဗတိုက် ဟွံညိၚ်ဝပ်ဏီတုဲ သွက်ဂွံကူသာန် နူပ္ဍဲဍုၚ်ဒဵုကဵု ပယျဵုတံဂှ် ဇီုကပိုက်ကၠုၚ်ကဵု ပရေၚ်ဂီုကၠီု ပရေၚ်ကူသာန်တံရောၚ် သၟာကူသာန်သွံရာန်တံ ဟီုမံၚ်အိုတ်ရ။
အကြာဂၠံၚ်ကွဳစက်ကာ နူဍုၚ်ကျာ်ပိကဵု ဍုၚ်ဇြပ်ဗုဂှ် ဒပ်ပၞာန်ဗၟာ ခမရ ၄၀၉ ကဵု ဒပ်ကရေၚ်ကေအဲန်ယူ ဒပ်မဟာ (၆) တမ်ဒပ် ၁၆ ကဵု တံဒပ် ၁၇ တံ ကၠတ်ဗတိုက်မံၚ်ညးသကအ်ဂှ်ရ သၟာကူသာန်သွံရာန် ဍုၚ်ကျာ်ပိတံ ဒးဒေံါဇူလဝ် ကမၠောန်ညးတံရောၚ် ဂွံတီကေတ် နူကဵု သၟာကူသာန်သွံရာန်တံရ။
ဟိုတ်နူပေဲါဗတိုက်ဒှ်မံၚ်ဂှ်ရ စနူကဵုဂိတုဂျောန် တတိယသတ္တဟတုဲ ကပါတ်ကြိယာ သွက်ဂွံဟပၠုပ်ဍုၚ်ကျာ်ပိဂှ် ဒးဒေံါဇူလဝ်ရ။ သၟာကူသာန်သွံရာန်လ္ၚဵုဂှ် ဟိုတ်နူအခက်အခုဲ ဂၠံၚ်ဍာန်ဟွံခိုဟ်တုဲ ဒေံါဇူလဝ်လေဝ် နွံမံၚ်ကီုရ။
ပ္ဍဲအကြာဂၠံၚ်ဂှ်ဝွံ တုဲကၠုၚ် ဂိတုဂျောန် စၟတ်တ္ၚဲ ၁၀ ဂှ် ဒှ်အာပေဲါဗတိုက် ၃ အလန်တုဲ ပ္ဍဲဂိတုဂျူလာၚ် ၁၁ ဂှ်လေဝ် ပေဲါဗတိုက်ဒှ်မွဲဝါပၠန်ရ။ ဒပ်ပၞာန်ဗၟာကဵု ဒပ်ကေအဲန်ယူတံ ဒှ်ဒၟံၚ်ပေဲါဗတိုက်ဂှ် ကောန်ပၞာန်ဗၟာတံ ချိုတ်အာ ၃၀ တၠပြၚ်အာယျရောၚ်ဂှ် သ္ဂောံတီကေတ် နူဒပ်ကေအဲန်ယူတံရ။
“ကေအဲန်ယူကဵု ဒပ်ပၞာန်ဗၟာတံ ဒှ်ဒၟံၚ်ပေဲါဗတိုက် မနှေံမနှေံတှေ် ပိုဲဂွံတတ်ဂၠံၚ်ဏံဂှ် ပရေၚ်ဂီုကၠီုဟွံၜိုဟ်သြိုဟ်ပုဟ်၊ အခိၚ်ပိုဲတတ်အာ ပေဲါဗတိုက်ဒှ်အာတှေ် သွက်ပိုဲဂှ် အန္တရာယ်ဇၞော်မံၚ်ဏောဝ်၊ တုဲပၠန် ယဝ်ရ ဍေံတံ ဗဒေံါထောံပိုဲတှေ် ကပေါတ်ပိုဲဂွံစိုပ်ကၠုၚ်ကျာ်ပိလေဝ် အခိၚ်ဍေံလဇုဲအာဏောဝ်” သာ်ဝွံ သၟာကူသာန်ကပါတ်ကှ်ကှ် ဍုၚ်ကျာ်ပိမွဲတၠ ဟီုရ။
အတိုၚ်သၟာကူသာန်သွံရာန်ဂှ် ဟီုမ္ဂး သ္ပလဝ် တမ်ရိုဟ် လှုဲသေံ ၁၀ ကိုဋ်ဂှ် မွဲတ္ၚဲမ္ဂး ပရဲ ၜိုတ် ၃၀၀၀/၄၀၀၀ ၜါတ်ဂွံမံၚ်ရ။ ဟိုတ်နူကိစ္စလၟုဟ်တုဲ ဟွံဂံၚ်ဗကန်ကပေါတ် ပ္ဍဲဒၞာဲရုၚ်ကပေါတ်တေံရ။
“ဟွံဂွံကူသာန်ပုဟ်တှေ် လှုဲလေဝ်ဟွံလုပ်ဟဂှ်ရ၊ ကမၠောန်ဂြိပ်မံၚ်တွဵုဂှ် လၟုဟ်ဒးဒေံါလဝ်တှေ် ပြဲလေဝ်ဟွံဂွံ ဒးဂဇအ်စမံၚ် တမ်ရိုဟ်ဏောဝ်၊ လှုဲဟွံလုပ်တှေ် သမ္ဘာဇကုလေဝ် မုက်ဟွံကျေဝ်ရပုဟ်” သာ်ဝွံ သၟာကူသာန်သွံရာန်ဇၞော် လ္တူဍုၚ်ကျာ်ပိမွဲတၠ ဟီုရ။
သၟာကူသာန်သွံရာန်တံ ဟွံဂွံကူသာန်ဂှ် ဇီုကပါ်ကဵုကောန်ဍုၚ် မၞိဟ်ဒးဗ္ဒဗဒါဲမံၚ်ကဵု ကပေါတ်ကြိယာတဏံရောၚ် ညးဆက် ဟီုရ။
“ကပါတ် ဟွံဂွံဟပၠုပ်ပုဟ်တှေ် ဇၟာပ်တ္ၚဲ မၞိဟ်ဒးဗ္ဒဗဒါဲမံၚ်ကဵုကပေါတ်တဏံဂှ် ပရေၚ်စသုၚ်မံၚ်စံၚ် ဒှ်အခက်အခုဲမာန်မံၚ်ဏောဝ်၊ တုဲပၠန် ကပါတ်ဟွံလုပ်တုဲ ၚုဟ်ကပေါတ်လေဝ် က္ဍၚ်တိုန်ကၠုၚ်ဏောဝ်၊ နကဵုပိုဲဂှ် ဂၠံၚ်ဏံ ဟွံဂွံတှေ် ဂၠံၚ်ပြေပြံၚ်ဂှ် ဂၠာဲတုဲ ဒးဟပၠုပ်ဂှ်ရ၊ ဆဂး ဒးရံၚ်အကာဲအရာဏီ” သာ်ဝွံ ညးဟီုရ။
ဇၟာပ်တ္ၚဲကပါတ်ဟပၠုပ်မံၚ် နူကဵုဍုၚ်စဵုကဵုပယျဵုတံဂှ် ဗွဲမဂၠိုၚ် ကပေါတ်စသုၚ်ဂၠိုၚ်တုဲ ကပေါတ်သွက်ဂွံသုၚ်စောဲအပ္ဍဲသ္ၚိကီု၊ ကပါတ်ကျိုၚ်ကျဝ်တံကီုဂှ် ဟပၠုပ်နၚ် နူကဵုဍုၚ်သေံတံရဂှ် သၟာကူသာန်သွံရာန်ဇၞော်ဂှ် ဆက်ဟီုရ။
“ပ္ဍဲပွိုၚ်ဍုၚ်ကျာ်ပိဏံဂှ် လၟိဟ်မၞိဟ်နွံမံၚ် ၜိုတ် ၁ ကိုဋ်ဒှ်မံၚ်၊ တုဲပၠန် ပ္ဍဲလ္တူဍုၚ်ဏံဂှ် ၜိုတ် ၅ လက်ပြၚ်တံဂှ် သုၚ်စောဲမံၚ် ကပေါတ်ကၠုၚ်နူဍုၚ်ပိုဲရ” သာ်ဝွံ ညးဟီုရ။
ပ္ဍဲကဵု သၞာံ ၂၀၁၀ ဏံမ္ဂး အလဵုအသဳဗၟာကဵု ဒပ်ကရေၚ်ကေအဲန်ယူတံ သွက်ဂွံထပ်ဗတိုက် နွံဒၟံၚ်ဏီရောၚ် ညးသ္ၚဳဂၠိပ် ပရေၚ်ပၞာန်လ္တူဍုၚ်ကျာ်ပိတံ ပါ်ပဲါအိုတ်ရ။
“ပေဲါရုဲမာဲဏံညံၚ်သ္ဂောံဂွံဒှ်အာဂှ် အလဵုအသဳပၞာန်တံ ပသောၚ်အာမံၚ် ပြဿနာ ယှုက်မံၚ်ဂတမုက်ဍေံဟဂှ်ရဏောဝ်၊ ပေဲါဗတိုက်ဗီုဗီုဏံဂှ် သွက်ဂွံဒှ် နွံမံၚ်ဏီ၊ ယဝ်ဒှ်ဗီုဏံတှေ် သၟာကူသာန်သွံရာန်တံလေဝ် ဒှ်အာအခက်အခုဲပၠန်ရ” သာ်ဝွံ ညးဟီုရ။
ဒပ်ကရေၚ်ကေအဲန်ယူဝွံ မိက်ဂွံပလီုပလာ် အလဵုအသဳပၞာန် မဒှ်ကၠောန်ဗဒှ်အာ ပေဲါရုဲမာဲဏံကီု၊ သီုကဵု တိဍာ်ဍေံတံ ဍေံတံအုပ်ဓုပ်ဒၟံၚ်ရောၚ်ဂှ် မိက်ဂွံထ္ၜးတုဲ ဗက်ဗတိုက်မံၚ်ဗီုဗီုဏံရောၚ် ဗိုလ်မႉတြေံ နာဲကောတၠရတ် ဟီုပါ်ပဲါလဝ်ရ။