နာဲမာန် ။ ။ အကြာဗော်ပရေၚ်ဍုၚ်ကွာန်တအ် ချဳဒရာၚ် ဒးဒုၚ်ဘဲကရေပ်ဓရတ်နာနာဂှ် ဂကောံချဳဒရာၚ်အ ပ္ဍဲဍုၚ်တအ် ကၠောန်ဗဒှ်အခန်ကၞာ စၟတ်သမ္တီ တ္ၚဲသၟာပရေၚ်ဍုၚ်ကွာန်ဒှ်ဒဒိုက် လ္တူဍုၚ်မတ်မလီုမွဲဒၞာဲ ဗွဲမ အံၚ်ဇၞး တုဲဒှ်အာရ။
ပ္ဍဲအခန်ကၞာ စၟတ်သမ္တီ တ္ၚဲသၟာပရေၚ်ဍုၚ်ကွာန် ဒှ်ဒဒိုက်ဂှ် က္ဍိုပ်သ္ကိုပ်ဗော်ဒဳမဝ်ကရေဇြဳကောန် ဂကူမန်ဂမၠိုၚ်၊ ဂကောံသၚ်သၟတ်ဂမၠိုၚ်၊ ဂကောံလိက်ပတ်နူကဵုပွိုၚ်ဍုၚ်ဂမၠိုၚ်၊ ဂကောံသၟတ် ကေုာံ ဂ ကောံကွးဘာတက္ကသဵုဂမၠိုၚ် ဗၞတ် (၇၀) တၠ တိုန်စိုပ်ကီုရ။
တ္ၚဲသၟာပရေၚ်ဍုၚ်ကွာန်ဒှ်ဒဒိုက်ဂှ်ဝွံ စပ္တန်ကၠုၚ်နူ သၟာပရေၚ်စန္ဒက်ဗော်ဍုၚ်မန်တၟိ နာဲယက္ခ ကေုာံ နာဲဆီဂကူ လုပ်အာပးဒၞက်အလဵုအသဳပၞာန် ပ္ဍဲကဵုသၞာံ (၂၀၀၃) ဂိတုဂျူလာၚ် (၁၇) တေံတုဲ တ္ၚဲဏံမ္ဂး တ္ၚဲညးတအ် ဒးထံၚ်ပေၚ်ကၠုၚ်ပွိုၚ် (၇) သၞာံရ။
နူကဵု နာဲယက္ခ ကေုာံ နာဲဆီဂကူတအ် ဒးထံၚ်ပးဒၞက်အလဵုအသဳပၞာန်ဂှ်တုဲ စိုပ်တ္ၚဲဂျူလာၚ် (၁၇) မ္ဂး ဂကောံသၚ်သၟတ် ကေုာံ ဂကောံသၟတ်တအ် ကၠောန်အခန်ကၞာ တ္ၚဲစၟတ်သမ္တီ နာဲယက္ခ ကေုာံ နာဲဆီဂကူတအ် ဒးထံၚ်လၟိုန်ရ။ အခန်ကၞာစၟတ်သမ္တီဂှ် စနူသၞာံတုဲကၠုၚ်ဂှ်တုဲ ဂကောံချဳဒရာၚ်တအ် ကလေၚ်ခုတ်ပ္တိုန် စၟတ်သမ္တီ တ္ၚဲသၟာပရေၚ်ဍုၚ်ကွာန် ဒှ်ဒဒိုက်ရ။ နူဂှ်တုဲ သၞာံ (၂၀၁၀) ဂိတုဂျာန်နဝါရဳ (၇) ဂှ် တၠဂုဏ်အဇ္ဇမွဲဇကုလေဝ် ဒးဒုၚ်ရပ်ဏါ နဘဲပရေၚ်ဍုၚ်ကွာန်ပၠန်ရ။
သၞာံဏံမ္ဂး သ္ပစၞးကဵု ညးမချဳဒရာၚ်လုပ်ကၠုၚ်ပေဲါဗ္တိုက်ချိုတ်တ်ဂျိုၚ်ၚ် အကြာအန္တရာဲပရေၚ်ဍုၚ်ကွာန် ကရေပ်ဓရတ်နာနာဂှ် ရန်တၟံကဵု နာဲယက္ခ နာဲဆီဂကူ ကေုာံ သီုကဵုတၠဂုဏ်မွဲဇကုပၠန်တုဲ ဂကောံ နာနာအပ္ဍ္ဍဲဍုၚ်တအ် ကၠောန်သ္ပအခန်ကၞာ စၟတ်သမ္တီ တ္ၚဲသၟာပရေၚ်ဍုၚ်ကွာန်ဒှ်ဒိုက်ရ။
“အဃောပိုဲတအ် ကၠောန်တဴဒၟံၚ်ပရေၚ်သွက်ဂကူ ဂွံဗၠးၜး ဗီုကဵု ဂကောံနာဲယက္ခတအ် ဒးဒုၚ်ဏါ ဘဲတဲအလဵုအသဳပၞာန်တုဲကၠုၚ်ဂှ် ဍုၚ်မန်ပိုဲ လအ်ဂွံဂွံပရေၚ်ဗၠးၜး ဗီုဗီုဏံ ဒးဒုၚ်ဏာဂှ် ပိုဲတအ်စိုတ်ဟွံမိပ် ရ၊ ညးမသှေ်သၟေဟ်ဒၟံၚ် ရဲညးကၠောန်ဒၟံၚ် ပရေၚ်ကောန်ဂကူအိုဿီုတအ် တ္ၚဲဏံ ထေက်ကဵုဒးကေတ် ဂုဏ်စရာ ညးတအ်ကွေံကွေံရောၚ်” သာ်ဏံ ကျာ်ဇၞော်အစာ ဘာပုပ္ဖါရီု ဍုၚ်မတ်မလီု ဟီုတွံကဵု ဂကောံနာနာ ညးမတိုန်စိုပ် ပ္ဍဲအခန်ကၞာဂှ်ရ။
အစဳအဇန်အခန်ကၞာ စၟတ်သမ္တီ တ္ၚဲသၟာပရေၚ်ဍုၚ်ကွာန် ဒှ်ဒဒိုက်တ္ၚဲဏံဂှ် ဟိုတ်နူအသိၚ်ဒးဇီု ပါ်ကၠုၚ်ဒၟံၚ် စပ်ကဵုပရေၚ်ပေဲါရုဲမာဲ အလဵုအသဳပၞာန်တုဲ ညးမတိုန်စိုပ် နူကဵုဒေသနာနာတအ် သ္ပပရေၚ်သဳကၠဳ သၟာန်သၟုက် လ္တူအကာဲအရာပရေၚ်ဍုၚ်ကွာန်တ္ၚဲဏံကီုရ။
“တၚ်ဒတူလိုၚ်ပိုဲတ္ၚဲဏံဂှ် သၞောဝ် (၂၀၀၈) ဂှ်လေဝ် ပိုဲဟွံတုပ်စိုတ်ပုဟ် ပေဲါရုဲမာဲ (၂၀၁၀) တ္ၚဲဏံလေဝ် ပိုဲဟွံဒုၚ်တဲပုဟ် ဟိုတ်ဂှ်ရ ပိုဲတအ် ဆက်ဒစဵုဒစးအာ ပေဲါရုဲမာဲ (၂၀၁၀) ဏေါဝ်” သာ်ဏံ ညးအုပ်ကာနာနာ ဗော်မဝ်ကရေဇြဳကောန်ဂကူမန် အစာသဝ်နာဲစောန်တၟး ဟီုထ္ၜးကဵု ဂကောံညးမတိုန်စိုပ်ပ္ဍဲအခန်ကၞာ စၟတ်သမ္တီ တ္ၚဲသၟာပရေၚ်ဍုၚ်ကွာန် ဒှ်ဒဒိုက်ဂှ်ရ။