မာံအဲ – ရးတနၚ်သဳ ဂၠံၚ်ကွဳစက်ဇၞော် ရေဝ်-ထဝဲါ အကြာဍာ်ဗုကဵု ဍုၚ်ရေဝ် ဒၞာဲဒဵုဟလဲဂှ် ပ္ဋဲဂိတုအဝ်ဂေတ် သတ္တဟတုဲကၠုၚ်တေံ စဵုကဵုတ္ၚဲဏံ ဒပ်ပၞာန်ဗၟာ ခမရ (၂၈၂)၊ ခမရ (၂၇၃) ခမရ (၂၉၉) မဖျေံလဝ်သဇိုၚ် ပ္ဍဲသၞေဟ်ဒဵုဟလဲတံ ကၟာတ်လဒဵုထောံ ပွမဖျေံသ္ၚု လ္ပာ်ဍာ်ဗုတေံတုဲ ညးဒေသဍာ်ဗုတံ ဒှ်အခက်အခုဲကဵု သ္ၚုရ။
“ဒပ်ပၞာန်ဗၟာတံ ဟွံကဵုဖျေံသ္ၚုရပုဟ် ဍေံကၟာတ်လဝ် သ္ၚုဖျေံဂၠံၚ်သကုတ်ဍာ်ဗုဏံဟွံဂွံ ကၠာတေံဂှ်တှေ် အရၚ်စမွဲရိုက်တှေ် ဍေံကဵုဖ္ဋိုက် ဍေံကေတ်အကံက် လၟုဟ်ဂှ်ဍေံကၟာတ်လဝ် ဖျေံနၚ်တှေ် ဍေံတံသီထောံဖအိုတ်” သာ်ဝွံ ကောန်ကွာန်ဍာ်တူ ပွိုၚ်ဍုၚ်ဍာ်ဗုမွဲတၠ ဟီုရ။
ဟိုတ်နူဒပ်ပၞာန်ဗၟာတံ ကၟာတ်ထောံသ္ၚု ဂွံဖျေံလ္ပာ် သကုတ်ဍာ်ဗုတေံတုဲ ရဲဒေသဍာ်ဗုတံကီု သီုကဵုရဲဖျေံဒၟံၚ်သဇိုၚ် ပ္ဍဲတိဍာ်ခရိုၚ်ထဝဲါ တိဍာ်သၟဝ်တဲဗော်ဍုၚ်မန်တၟိတံကီု ကွာန်မၞုံ ပ္ဍဲပွိုၚ်ဍုၚ်ဍာ်ဗုသီုဖအိုတ်ဂှ် ဒှ်အခက်အခုဲကဵု ပရေၚ်ဇွောံမသ္ၚုရောၚ်ဂှ် ဂွံတီကေတ် နူဂကောံအုပ်ဓုပ်ညးဍုၚ်ကွာန်တအ်ရ။
“လၟုဟ်ဂှ် ဒပ်ပၞာန်ဗၟာတံ ကၟာတ်လဝ်သ္ၚု ဟွံကဵုဖျေံသကုတ်သၟဝ်ဏံတုဲ ပိုဲတံဒှ်အခက်အခုဲကဵု ပရေၚ်စသုၚ်ကွေံကွေံဏောၚ်၊ ယဝ်ရဍေံတံ ဆက်ကၟာတ်အာအတိုၚ်ဏံရတှေ် ဆလအ်ဂွံစိုပ် အခိၚ်သြောံဂူတေံတိတ်တှေ် ဆဵုဂဗ ဒဒိုက်ကွေံကွေံဏောၚ် ရဲကွာန်သကုတ်ဒေသပိုဲတံဏံ” သာ်ဝွံ ညးဂကောံအုပ်ဓုပ်ကွာန်ဂှ် ဟီုရ။
လောန်ကၠုၚ်တုဲတုဲကၠုၚ်တေံဂှ်မ္ဂး ညးဍုၚ်ကွာန် ဖျေံနၚ်သ္ၚုသကုတ်ဍာ်ဗုတံမ္ဂး ကဵုအကံက်ကဵု ဒပ်ပၞာန်ဗၟာတံတုဲမှ ဖျေံဂွံလောဲလောဲရောၚ် လ္ၚုဟ်မ္ဂး ဗီုအတိုၚ်တြေံတေံ ဟွံဂွံရပုဟ်ဂှ် ညးဆက်ဟီုရ။
အတိုၚ်ညးလ္ၚတ်ပရေၚ်ပၞာန်မွဲတၠ ဟီုဂှ်မ္ဂး “သကုတ်ဒေသဍာ်ဗုဂှ် ဒပ်ပၞာန်ဗၟာကဵု ဂကောံရပ်လွဟ်မ္ၚးတံ ကတဵုဒှ်မံၚ် ပေဲါဟတိုက်မွဲနှေအ်နှေအ်တုဲ ဒပ်ပၞာန်ဗၟာတံ ထေဲပၞေတ်တိုန်ကဵုညးဍုၚ်ကွာန်ဒေသတံ ကောန်ကွာန်လ္ၚဵု ပလံၚ်ပတိတ်မံၚ်သ္ၚုကဵု ဂကောံရပ်လွဟ်မ္ၚးနွံမံၚ်ဂှ်ရ လၟုဟ်ဍေံတံ ကၟာတ်ထောံ အခေါၚ်ဖျေံသ္ၚု ဒှ်မာန်မံၚ်” သာ်ဝွံ ညး ဟီုရ။
ၜိုန်ရဒပ်ပၞာန်ဗၟာတံ ကၟာတ်လဒဵုထောံအခေါၚ်ပတိုန်ဖျေံသ္ၚုဏောၚ်ဟီုကၠာလေဝ် သွက်သၟာကူသာန်သွံရာန်တံ ကဵုအကံက်တုဲ ပတိုန်ဖျေံမံၚ်ရောၚ် ညးလ္ၚဵုတံ ဟီုမံၚ်ရ။
သကုတ်ဒေသဍာ်ဗုဝွံ လောန်ကၠုၚ်ဂိတုဧပရာအိုတ် ဂိတုမေမံက်ဂှ် ဒပ်ပၞာန်ဗၟာတအ် ကေၚ်ကၟာတ်လဝ်သ္ၚု ဟွံကဵုပတိုန်သကုတ် ခရိုၚ်ထဝဲါကေၚ်နွံကၠုၚ်လဝ်ရ။