နာဲမာန် – ပ္ဍဲကဵုပ္ၚံက်ပရေၚ်ဍုၚ်ကွာန်တ္ၚဲဏံ ရဲလုပ်ပေဲါရုဲမာဲကဵု ရဲဟွံလုပ်ပေဲါရုဲမာဲ လညာတ်ဟွံတုပ်ညးသ္ကအ်ဂှ် သၞဟွံသေၚ်ရောၚ် သာ်ဏံ နာဲတေန်အံၚ် ဟီုဏာ ပ္ဍဲသဘၚ်အခန်ကၞာ တ္ၚဲက္တဵုဒှ်မၞိဟ် နာဲသိုက်လောန် ပေၚ်အာယုက် (၇၀) သၞာံ ပ္ဍဲဂိတုသေပ်တေမ်ပါ (၂၀) ဂှ်ရ။
“ပ္ဍဲကဵု ဂိတုနဝ်ဝေမ်ပါ (၇) ဂှ် ပ္ဍဲကၟိန်ဍုၚ်မန်ဗၟာပိုဲ ပေဲါရုဲမာဲ နွံမံၚ်၊ မွဲလ္ပာ်ဂှ် ဟွံစှေ်စိုတ် သၞောဝ်ဥပဒေသ္ဇိုၚ် (၂၀၀၈) တုဲတှေ် ဟွံလုပ်ပေဲါရုဲမာဲ၊ လ္ၚဵုမွဲလ္ပာ်ဂှ်ပၠန် ပ္ဍဲပ္ၚံက်ပေဲါရုဲမာဲအကြာဏံ ၜိုတ်ဂွံၜိုတ်ကေတ် ဂွံၜေတ်ကၠောန် ပရေၚ်ကောန်ဂကူတုဲတှေ် ညးတအ် လုပ်ပေဲါရုဲမာဲ၊ ဣဏံဂှ်လေဝ် ရန်တၟံသွက်ဂကူရဏောဝ်။ ရဲလုပ်ပေဲါရုဲမာဲကဵု ရဲဟွံလုပ်ပေဲါရုဲမာဲဂှ် သၞဟွံသေၚ်ပုဟ် မိတ်ရဏောဝ် ကောကဵုဒေံရ ရဲရဏောဝ်။ ပ္ၚံက်ဏံ လညာတ်ဟွံတုပ်ညးကအ်၊ ပ္ၚံက်ဂတတေံတှေ် လညာတ်တုပ်ညးကအ် ပံၚ်ကၠောန်ညးကအ်ပၠန်” သာ်ဏံ နာဲတေန်အံၚ် ကမ္မတဳဗဟဵု ဗော်ဍုၚ်မန်တၟိ ဒေံါဇူ၊ ညးမဒှ်ကောန် ကေၚ်ကာဝန်ဇၞော် ပရေၚ်မန်တြေံ နာဲတေန်အံၚ် ဟီုရ။
သဘၚ်တ္ၚဲက္တဵုဒှ်မၞိဟ် နာဲသိုက်လောန်ဝွံ ကၠောန်ဗဒှ် ပ္ဍဲဇြပ်သဘၚ်ဓဝ်မန် ဍုၚ်မတ်မလီုတုဲ က္ဍိုပ်သ္ကိုပ်ခမဳသၚ် ကျာ်ဇၞော်အာစာဂမၠိုၚ်၊ က္ဍိုပ်သ္ကိုပ်ပရေၚ်ဍုၚ်ကွာန်ဂမၠိုၚ် စပ္တံနူ ဥက္ကဌမန်ဒဳမဝ် နာဲထဝ်သောန်၊ ဒုဥက္ကဌ နာဲၚိုဲသိၚ်၊ ဥက္ကဌ ဗော်ဒဳမဝ်ကရေဇြဳ အလုံရးမန် နာဲၚိုဲသိၚ် (အစာဇၞူ) ကေုာံ က္ဍိုပ်သ္ကိုပ် နူကဵုဒေသဂမၠိုၚ် တိုန်စိုပ် လၟိဟ်ၜိုတ် (၃၀၀) တၠပြၚ်ရ။
ပ္ဍဲကဵုသဘၚ်ကၞာဂှ် ဟိုတ်နူကြပ်ဒၟံၚ်ကဵု အခိၚ်ကၠောန်ပေဲါရုဲမာဲတုဲ က္ဍိုပ်သ္ကိုပ်သၚ်ကီု က္ဍိုပ်သ္ကိုပ်လ္ပာ်ခရှ်ကီု က္ဍိုပ်သ္ကိုပ် နူကဵုဒေသဂမၠိုၚ်ကီု တိုန်စိုပ်စုၚ်လေၚ်လေဝ် ဟီုမာန်ရ။ ၜိုန်ဂှ်လေဝ် ပရေၚ်သဳကၠဳ အကာဲအရာပရေၚ်ဍုၚ်ကွာန် သၠဲသၠဲလးလး မုလေဝ်ဟွံမွဲရ။
“ဆန္ဒအဲ နွံပၟိက်ဇၞော်မွဲသာ်ဂှ် အလုံရးဒေသမန်ပိုဲ မိက်ဂွံကဵုဒှ် ကမ္မတဳလိက်ပတ်ယေန်သၞာၚ်မန် ဗဟဵုမွဲရ၊ တုဲပၠန် နွံပၟိက်ကဵု ပရေၚ်ဓဝ်ၜိုဟ်လလံ အလုံဍုၚ်မွဲ” သာ်ဏံ နာဲသိုက်လောန် မြော်ဂလာန်ကဵု ပုရိသာတ်ဂမၠိုၚ်ရ။
ဂလာန်နာဲသိုက်လောန်ဟီု ဆန္ဒညး မိက်ဂွံပံက် ကမ္မတဳလိက်ပတ်ယေန်သၞာၚ် ဗဟဵုမွဲ ညံၚ်ဂွံဒှ်ဂှ် နာဲတေန်အံၚ်လေဝ် ထံက်ဂလာန် ဆဝ်မ္ၚုဟ်လဝ် ကျာ်ဇၞော်အစာဂမၠိုၚ်ကီုရ။
နာဲသိုက်လောန်ဝွံ ဒှ်ညးသိုက်မွဲတုဲ သီုကဵုဒှ် ညးတၠသဒ္ဓါ စေတနာဇၞော်သၠဲလး ပ္ဍဲပရေၚ်ဂကူမွဲရ။ ပ္ဍဲကဵုသဘၚ်တ္ၚဲကောန်ဂကူမန်ပၠန်လေဝ် ဇၟာပ်ပ်သၞာံ ညးထံက်ပၚ်ဒၟံၚ် သြန်ဂအုံထာဝရ မွဲမွဲသၞာံ (၁၀) ကိုဋ်ပြၚ်ရ။ ညးဝွံ ဒှ်ဥက္ကဌ ထိၚ်ဒဝ် ဇြပ်သဘၚ်ဓဝ်မန် ဍုၚ်မတ်မလီုကီု သီုကဵု ဒှ်ဥက္ကဌ ဇြပ်သဘၚ်ဓဝ် ဍုၚ်ဗ္ဂောကီုရ။
“လောဲသိုက် ဗီုနာဲသိုက်လောန်၊ သဒ္ဓါဇၞော် စပ်ကဵုပရေၚ်ဂကူ ဗီုနာဲသိုက်လောန်ဂှ် ပ္ဍဲဂကူမန် ယဝ်ရဂွံလဝ် ၜိုတ် (၁၀) တၠတှေ် ဆေၚ်ကဵုပရေၚ်မန် ၜိုတ်လဵုဇၞော်မောဝ်ဟွံတီရ၊ ဗီုနာဲသိုက်လောန် ပ္ဍဲမန် နွံအောန်ကွေံကွေံရောၚ်” သာ်ဏံ သၟတ် ကၠောန်ဝေယျာဝစ္စ ပ္ဍဲသဘၚ်တ္ၚဲက္တဵုဒှ်မၞိဟ် နာဲသိုက်လောန်မွဲတၠ ဟီုရ။
ပ္ဍဲကဵုသဘၚ်တ္ၚဲ က္တဵုဒှ်မၞိဟ် နာဲသိုက်လောန်ဂှ် လၟိဟ်အာယုက်ညး ဘိက်နိမန်လဝ် ခမဳသၚ်ကျာ်ဇၞော်အစာဂမၠိုၚ် (၇၀) ဇကုတုဲ ဇၟာပ်ပ်သၚ် နာဲသိုက်လောန် ကေုာံ ကၟိန်အိန်ထံၚ် ကောန်ဇာတ်ညးတအ် ကဵုဒါန် စက်ဟဂိုဟ်ကျာ မှၞုံၚုဟ် (၇) လက်ဒကေဝ်ရ။