နာဲမာန် – သွက်ဂွံကၠောန်ပေဲါရုဲမာဲ သှေ်မံၚ်ပွိုၚ် (၃၀) တ္ၚဲပြၚ်ဂှ် ညးဍုၚ်ကွာန် စိုတ်လုပ်စကဵု ပေဲါရုဲမာဲလ္ၚဵု ညးစၞးအလံၚ်အမာတ် ဒေသေဇက ဂွံရုဲစှ်ဂှ် ဟွံတီဏီတုဲ ဗီုပြၚ်လဵု ဂွံစုတ်မာဲဂှ်လေဝ် ဟွံကၠိုဟ်တုဲ ဒှ်ဓဝိၚ် ဖေက်ဒှ်မာဲပဲါဂၠိုၚ်ရ။
ဗော်ပရေၚ်ဍုၚ်ကွာန် လုပ်ဒုၚ်ရုဲမာဲဂမၠိုၚ်ဝွံ သ္ပဟိုတ်နူကဵု ဂွံအခိၚ်အောန်လောန်ကီု စရိတ်ပရေၚ်ဘဏ္ဍာ သ္ပဟွံမာန်ကီု က္တဵုဒှ်ပရေၚ်အခက်အခုဲ အကြာနာနာသာ်ဂှ်တုဲ သ္ဂောံစှေ်ပရေၚ်စန္ဒက်မာဲဂှ် အခေါၚ်အရာအောန်လောန်ကွေံကွေံရ။
“ ဂွံစှေ်ပရေၚ်စန္ဒက်မာဲ ပ္ဍဲအကြာညးဍုၚ်ကွာန်ဂမၠိုၚ်ဂှ် ကေတ်အခိၚ်ဟွံဂတာပ်ရ။ တုဲပၠန် ယဝ်စှေ်ပရေၚ်စန္ဒက်မာဲ အကြာညးဍုၚ်ကွာန်တအ်ပၠန်တှေ် အခိၚ်ဟွံရုမ်ဂှ် မွဲသာ်၊ တုဲတှေ် ပရေၚ်ဘဏ္ဍာ သ္ပဟွံမာန်ဂှ် မွဲသာ် သောၚ်ဂှ်ရ ပိုဲစဳဇန် ကၠောန်လဝ် တၞး (A4) ပိဟလပ်ဏံ သွက်ဂွံလလောၚ်တြး အမာတ်အလံၚ်ဇကု အကြာညးဍုၚ်ကွာန်တအ် ဗီုဏံရ” သာ်ဏံ ဂကောံကေၚ်ကာဗဟဵု ညးကောပ်ကာဲရုၚ် ဗော်ဒဳမဝ်ကရေဇြဳ အလုံရးမန် မွဲတၠ ဟီုလဴထ္ၜးကဵုရ။
တၞးစက္ခော ညးစၞးအလံၚ်အမာတ်ဂမၠိုၚ်ဂှ် မွဲပွိုၚ်ဍုၚ်မ္ဂး စၠတ်ထဝ်ကောန်ဂကူ၊ စၠတ်ထဝ်ညးဍုၚ်ကွာန် ကဵု စၠတ်ထဝ်တွဵုရး ဟွံသေၚ် စၠတ်ထဝ်ရး နွံရ။ မွဲပွိုၚ်ဍုၚ်မ္ဂး ညးစၞးစၠတ်ထဝ် သီုပိဗၠိုၚ် စုတ်လဝ် ပ္ဍဲကဵုတၞးစက္ခော (A4) ဂှ်တုဲ သီုရုပ် သီုဝၚ်ပူဂဵု ဓမံက်ထ္ၜးလဝ် ဗွဲခ္ဍန် ဆဵုကေတ်မာန်ရ။
“တၞးစက္ခော အလံၚ်အမာတ်ဂမၠိုၚ်တအ်ဂှ် တက်လဝ်တုဲတုဲမံၚ်ရ၊ ဆဂး ဒၞာဲလ္ၚဵု ဗၠေတ်မံၚ်နွံတုဲ ပိုဲဒးကလေၚ်စၟဳစၟတ်မံၚ်ကီု တုဲတှေ် ပိုဲဒးအာတိုန်တက် ပ္ဍဲလ္ဂုၚ်ရောၚ်၊ ကာလဂှ်မှ ခရိတ်ဂွံသက်သာ ပိုဲဒးတက်တၞး တၟာဂလိုၚ်ရောၚ်” သာ်ဏံ ကေၚ်ကာဗဟဵုဂှ် ဆက်လဴကဵုရ။
ပေဲါရုဲမာဲ ကၠောန်ဗဒှ် ပ္ဍဲကဵုနဝ်ဝေမ်ပါ (၇) ဂှ် အခိၚ် ၜိုန်ရသှေ်မံၚ် ဟွံလအ်ရ ဒှ်ကၠာလေဝ် ညးဍုၚ်ကွာန်ဂမၠိုၚ် ညိလေဝ်စိုတ်ဟွံချဳ ပရေၚ်ပေဲါရုဲမာဲလးလးရ။
ညးဗွဲအောန်ဂှ်ဟေၚ် စိုတ်နွံ လ္ပာ်ပေဲါရုဲမာဲတုဲ ဒှ်ဓဝိၚ် ဖေက်ညးဍုၚ်ကွာန်ဂမၠိုၚ် စုတ်မာဲဟွံဒးတုဲ ဗက်သဳကၠဳသၟာန်သၟုက်ဒၟံၚ်နွံကီုရ။ ညးသှေ်ဗွဲမဂၠိုၚ်ဂှ် အခါရကၟိန်ဍုၚ်ဇကု ပွိုၚ်ကာလ (၂၀) သၞာံမှ ပေဲါရုဲမာဲဇၞော်ဇၞော်ဗီုဏံ ဂွံဆဵုဂဗမွဲအလန်ဂှ် ညိလေဝ်အာရီုဟွံလုပ်တုဲ ပရေၚ်ကမၠောန်ဓမ္မတာမွဲဟေၚ် စွံလဝ်စိုတ်အိုတ်ရ။
ဗီုပြၚ်စုတ်မာဲအလန်ဏံဝွံ သၚ်္ကေတ တဆိပ်ဗော်ဒဳမဝ်ကရေဇြဳ အလုံရးမန်ဂှ် ၜိုန်ရဓမံက်လဝ် သောၚ်သောၚ်ကၠးကၠး နကဵုရုပ်ၜိုပ် တဆိပ်အလာံဗော်ဇကု ဒှ်ကၠာလေဝ် ဟိုတ်နူညးဍုၚ်ကွာန်တအ် ဒးရုဲစှ်စၠတ်ထဝ် ဒှ်အာပိဗၠိုၚ်ဂှ်ကီု တုဲပၠန် ညးဍုၚ်ကွာန်ဂမၠိုၚ်တအ် ဆဵုဂဗပရေၚ်စုတ်မာဲဂှ် ပွိုၚ် (၂၀) သၞာံမှ ဂွံဆဵုဂဗမွဲအလန်ဂှ် ခရက်ဟွံဒး ဒှ်မာဲပဲါဂၠိုၚ်ရောၚ် သၟာပါ်ပဲါပေဲါရုဲမာဲတအ် သ္ၚဳဂၠိပ်အိုတ်ရ။