အာကာ– ကွဳစက်တၠမန် ဓရိပ်မံၚ် တွဵုရးမန် ကဵု လ္ဂုၚ်ဂှ် ပ္ဍဲအကြာဂၠံၚ် ဒးဒုၚ်စၟဳစၟတ် ဂၠိုၚ်နူကွဳစက်တၞဟ်တၞဟ်တံဏီရောၚ် ညးမအာတရဴ ဍိုက်ကွဳစက်တံ ဟီုအိုတ်ရ။
“ကွဳစက်တၞဟ်တၞဟ်ဂှ် ဒးဒုၚ်စၟဳစၟတ် စှ်မိနေတ် စှ်သုန်မိနေတ်တှေ် ကွဳစက်တၠမန်ဂှ် ဒးဒုၚ်စၟဳစၟတ် ၜိုတ်ဘာ်နာဍဳ” သာ်ဝွံ ညးမတိုန်ဍုၚ်လ္ဂုၚ် နူဍုၚ်မတ်မလီုမွဲတၠ ဟီုရ။
ဟိုတ်နူဒှ်မံၚ်အခိၚ် ကြပ်ကဵုပေဲါရုဲမာဲတုဲ အလဵုအသဳတံ စၟဳစၟတ်ဂၠိုၚ်ကၠုၚ်မံၚ် နူအခိၚ်ကၠာတေံရောၚ်၊ ၜိုန်ဂှ်လေဝ် ကွဳစက်တၠမန်ဂှ် ဒးဒုၚ်စၟဳစၟတ် ဂၠိုၚ်နူကဵု ကွဳစက်တၞဟ်တၞဟ်တံဏီရောၚ်” ဂကောံဒါရာ်တာ ကုမ္ပဏီတၠမန် မွဲတၠ ဟီုရ။
“ကာပိုဲဂှ် ဒှ်မံၚ်ကာမန်တှေ် ဒးဒုၚ်စၟဳစၟတ်ဂၠိုၚ်” သာ်ဝွံ ညးဗြဴဂှ် ဟီုရ။
တၠမန် ကုမ္ပဏီ လိမိတက်ဂှ် ပံၚ်ကောံဒက်ပတန်လဝ် နကဵုသၟာပရေၚ်ပိုန်ဒြပ်မန်တံဟေၚ်တုဲ ကောန်ဂကူမန်တံ ကဵုဇြဟတ်ဂၠိုၚ်ရောၚ်၊ ဟိုတ်နူစၟဳစၟတ်ဂၠိုက်ဂၠာဲ ဂၠိုၚ်နူကွဳစက်တၞဟ်တၞဟ်တုဲ ညးမအာတရဴ ဍိုက်ကွဳစက်တၠမန်တံ ဖေက်လကိုတ်အာမာန်ရောၚ်ဂှ် ညးမလုပ်လဝ် ရှေဝ်ယျာ ကုမ္ပဏဳတၠမန် မွဲတၠ ဟီုရ။
“ဍေံတံသ္ပဗီုဏံဂှ် အဓိကဍေံ ဍေံတံ မိက်ဂွံဓရတ် သၟာပရေၚ်ပိုန်ဒြပ်မန်တံရောၚ်” သာ်ဝွံ ညးဟီုရ။
ကုမ္ပဏဳဝွံ စဒက်ပ္တန်ကၠုၚ် ပ္ဍဲသၞာံ (၂၀၀၉) ဂိတုဒဳဇြေမ်ပါ (၂၀) ပ္ဍဲ Traders Hotel ဍုၚ်လ္ဂုၚ်တုဲ သွက်သ္ဂောံဒှ်အထံက်အပၚ် ကောန်ဂကူမန်တံကီု၊ ကောန်ဂကူမန်ကေုာံရေၚ်သကအ် သ္ဂောံပံၚ်တောဲ ကၠောန်အာကမၠောန် ဍုက်ဍုက်ကေဝ်ကေဝ်မာန်တုဲ ဂွံဒှ်အာ ပွဳပွူပရေၚ်ပိုန်ဒြပ်မန် ဇၞော်ဇၞော်လှဲလှဲမာန်ကီု၊ သွက်သ္ဂောံထံက်ပၚ်အာ ကမၠောန်ဒတုဲဖဵု မဟာဇန်ကီု ရန်တၟံမပ္တံသာ်ဝွံတုဲ ဒက်ပတန်လဝ်ရောၚ် ညးဖန်ဇန်ပြုပြေၚ် ကိစ္စကမၠောန်နာနာ ကုမ္ပဏဳတၠမန် နာဲချေတ်ဖေ ဟီုရ။
ကုမ္ပဏီဝွံ သအာၚ်နူ ကမၠောန်ပလံၚ်ဗစိုပ် ညးအာတရဴဂှ် ကမၠောန် ကပေါတ်ဂဥုဲ နာနာ၊ ကမၠောန်ပလေဝ် ကပေါတ်ကွဳစက်နာနာ၊ ကမၠောန်သိုၚ်ခၞံသ္ၚိနာနာ တံလေဝ် ဆက်ထမံက်ရုပ်ရဴ ပံက်ကၠောန်အာပၠန်ရောၚ် သ္ဂောံတီကေတ်ရ။
ရှေဝ်ယျာမွဲမ္ဂး ခုတ်လဝ် (၅) ကိုဋ်တုဲ လှုၚ်အိုတ် ညးမွဲတၠ စဵုကဵု (၁၀) ရှေဝ်ယျာ (၅၀) ကိုဋ် စုတ်မာန်ရောၚ်၊ ဒုၚ်အာတဲ စဵုကဵု (၂၀၀၀၀) ရှေဝ်ယျာရောၚ်၊ ဇၟာပ်ကောန်ဂကူမန်တံ ပါလုပ်ရှေဝ်ယျာမာန်ရောၚ် နာဲချေတ်ဖေ ဟီုရ။