ဌာန်ပရိုၚ်ဗၠးၜးမန် – အပ္ဍဲတွဵုရးဍုၚ်မန် ညးစၞး ဂကောံခိုန်ကၠိုက် လုပ်ဒုၚ်ရုဲမာဲတံ ဟိုတ်နူဒးဒုၚ်ရုဲမာဲ ဇၞးမာဲအောန်တုဲ ပရေၚ်ဖောအ်ဗြေဝ် သွက်တွဵုရးဍုၚ်မန် ယုတ်ဒေါက်စှေ်မာန်မံၚ်ဏောၚ် ဥူအံၚ်မျေတ်ဟီုရ။
“ဂကူမန် မန်ရ က္ဍိုက်က္ဍိုပ်ဂှ် မန်တံ ဟွံမိက်ကဵုဒှ်ပုဟ်ဟာ မန်လ္ၚဵုတံ အထေၚ်ဗၠောတ်တုဲ မၞိဟ်ဇာတိမန် မၞိဟ်ခိုဟ်လ္တူမန် မၞိဟ်ကၠောန်ကဵုသွက်မန်ဍာံဍာံဂှ် မန်တံ ဟွံရုဲကဵု နဒဒှ်ညးစၞးဏောၚ်ဒှ်တှေ် ဇီုကပိုက်ကၠုၚ်ကဵု ပရေၚ် ဖောအ်ဗြေဝ်ဍုၚ်မန်ဂှ် စိုတ်ဟွံမိက်ကွေံပုဟ်” သာ်ဏံ နူဥက္ကဌ ဂကောံဖောအ်ဗြေဝ်ဍုၚ်မန် ဥူအံၚ်မျေတ် ဟီုပတိတ်အကြာညးဍုၚ်ကွာန်မန်တံရ။
လ္တူ ဥူအံၚ်မျေတ်ဟီုဂှ် ညးဍုၚ်ကွာန်မန်တံ ဟွံစှေ်စိုတ်တုဲ ယဝ်ဒဒှ် ဥူအံၚ်မျေတ် စှေ်စိုတ် ကၠောန်သွက်မန် သ္ပစၞးသွက်မန်ဍာံဍာံဏောၚ်ဒှ်တှေ် သက်ဂွံဒးလုပ် သ္ပညးစၞး ဗော်ခိုန်ကၠိုက်ဖောအ်ဗြေဝ်ဂှ်ဟွံမွဲပုဟ်၊ အပ္ဍဲကောန်ဂကူမန်တံလေဝ် ဗော်သ္ပစၞးကောန်ဂကူမန် မၞုံဂး မန်ဒီမဝ်ကရေဇြီအလုံရးမန်လေဝ် နွံမံၚ်ရောၚ်ဂှ် ကောန်ကွာန်ကမာဝက်မွဲတၠ ဟီုရ။
“ယဝ်ခါရ ကၠောန်သွက်မန်ဍာံတှေ် မုပ ဒးလုပ်ပြိုၚ် သွက်ဂကောံခိုၚ်ကၠိုက်ရော ဗော်မန်လေဝ်နွံမံၚ်ကီုရ လုပ်ပြိုၚ်ရဒှ်” သာ်ဏံ ညးဟီုရ။
ဗော်ခိုၚ်ကၠိုက်ဝွံ မဒှ်ဗော် ကေတ်ဗဓာန်ကဵု အလဵုအသဳတုဲ ပ္ဍဲကဵုပေါဲရုဲမာဲဂှ် ဗီုကဵု ဗော်ပရေၚ်ဍုၚ်ကွာန် ကောန်ဂကူ ကောန်ဍုၚ်အရၚ်တံ လုပ်ပြိုၚ်ဂှ် ယဝ်ခါရ ဗော်ညးတံလေဝ် လုပ်ပြိုၚ်ကီု နကဵုသြန်ဘဏ္ဍာဍေံတံဟေၚ် လုပ်ပြိုၚ်မ္ဂး အတိုၚ်ဍေံတံ ရန်လဝ်ဂှ်ဂှ် ဒှ်ကၠုၚ်ဟွံမာန်ပုဟ်ဂှ် သၟတ်လ္တူဍုၚ်မုဟ်ဍုၚ်မွဲတၠ ဟီုရ။
“ဗော်ခိုၚ်ကၠိုက်ဂှ် ယဝ်လုပ်ရုဲ ဗီုဗော်တၞဟ်ဟ်တံကီု အခေါၚ်အရာလေဝ် ဗီုဗော်တၞဟ်တံဂွံ ယဝ်ဍေံတံဂွံကီုဏောၚ်တှေ် နအလဵု ဗော်ဍေံတံ ဂွံဇၞးဂှ် ဒှ်ဟွံမာန်ပုဟ် လၟုဟ်ဂှ် သုၚ်စောပၠန်လေဝ် သြန်ဘဏ္ဍာ အလဵုအသဳ အခေါၚ်အရာပၠန်လေဝ် ဗီုဒးစိုတ် ဍေံတံဖန်ဂွံမံၚ်” သာ်ဏံ သၟတ်ဂှ် ဟီုရ။
ဂကောံခိုၚ်ကၠိုက်ဖောအ်ဗြေဝ်ဝွံ အပ္ဍဲကွာန်မန် ကွာန်ကမာဝက်ဂှ် လုပ်ကဵု ကျာ်ဇၞော် ဘာလွဳမာန်ထဝ်တုဲ မွဲနဲမွဲဗီု ကဵုဇြဟတ်ဓရိုဟ် ညံၚ်ကဵုသၚ်တံ ဂွံကဵုဇြဟတ်ကဵု ဗော်ညးတံရ။ ဆဂှ်သၟးဟွံက သုၚ်စောဲဇြဟတ်သြန်တုဲ ပွမကဵုဒါန်အပ္ဍဲဘာဂှ်လေဝ် ကၠောန်သ္ပမံၚ်တုဲ စန်ဒဏ်မံၚ် သၚ်အပ္ဍဲဘာဂှ်ရ။
ဗော်ခိုၚ်ကၠိုက်ဖောအ်ဗြေဝ်ဝွံ အပ္ဍဲတွဵုရးဍုၚ်ကရေၚ်တေံလေဝ် ဗော်ကရေၚ်ဖလုံ-စဝေါ်ဒဳမဝ်ကရက်တေတ် ဇၞးလဝ်မာဲ ညးစၞး ၆ ကဵု ဗော်ပရေၚ်ဍုၚ်ကွာန်တၞဟ်ဟ်တံ ညံၚ်ဂွံပံၚ်တောဲအာကဵု ဗော်ညးတံဂှ်လေဝ် ဗက်စန်ဒဏ်မံၚ်ရောၚ် ဂွံတီကေတ်ရ။