ဗၟာ  ၊ အၚ်္ဂလိက် ၊  Font ၊  Converter

Breaking News
Home / သၟာန်သွဟ် / သၟာန်သွဟ် ဥက္ကဌ ဂကောံညဳသၟဟ် ဂကူမန် နာဲသုန်ဓုန်

သၟာန်သွဟ် ဥက္ကဌ ဂကောံညဳသၟဟ် ဂကူမန် နာဲသုန်ဓုန်

သၟာပရိုၚ်ချူ:

ခြာဟွံလအ် ပ္ဍဲသၞာံ ၂၀၁၀ အိုတ်ဏံဂှ် ဂကောံညဳသၟဟ် ဂကူမန် ကော် (MUL) ကၠောန်သ္ပသဘၚ်သဳကၠဳ အလန်ဆဌမတုဲ ကလေၚ်ရုဲစှ်လဝ် ကမ္မတဳကေၚ်ကာတၟိရ။ စပ်ကဵုပရေၚ်ဒတူလိုၚ် ဂကောံညးတံကီု၊ စပ်ကဵုလစွံစိုတ် လတူဗော်ပရေၚ်ဍုၚ်ကွာန်မန်တံကီု၊ စပ်ကဵုပရေၚ်ကမၠောန်ညးတံ အဓာန်ဂတတေံကီု ဂွံတီကေတ်မာန်ဂှ် နူဌာန်ပရိုၚ်ဗၠးၜးမန် နာဲအာကာ သၟာန်သွဟ်လဝ် ဥက္ကဌ ဂကောံညဳသၟဟ် ဂကူမန် နာဲသုန်ဓုန် ရ။

သၟာန် ။        ။ ခြာဟွံလအ်ဏီဂှ် ဂကောံညဳသၟဟ်ဂကူမန် (MUL) သ္ပသဘၚ်သဳကၠဳ အလန်ဆဌမတုဲကၠုၚ် ပိုဲဂွံမိၚ်ကေတ်၊ စပ်ကဵုသဘၚ်သဳကၠဳဏံဂှ် လဴထ္ၜးကဵု သောဲသောဲဗြောဲဗြောဲညိ။

သွဟ် ။        ။ ကောံဓရီုသဘၚ်သဳကၠဳ ဂကောံညဳသၟဟ်ဂကူမန် အလန်ဆဌမဏံဂှ် ကၠောန်ဗဒှ် ပ္ဍဲကွာန်ဝၚ်္က မွဲဒၞာဲ။ နူကဵုဂိတုဒဳဇြေမ်ပါ ၂၇ စဵုကဵု ၃၀၊ ပိုဲက္ညဘိက်နၚ် မၞိဟ်စၞး နူဍုၚ်သေံဏံ မန်ဍုၚ်သေံကီု မန်ပိုဲကၠောန်စမံၚ် ပ္ဍဲဍုၚ်သေံဏံ နူဟာတ်ယာဲတေံကီု နူဒေသနာနာကီု သီုကဵုမၞိဟ်အပ္ဍဲဍုၚ်ပိုဲတေံကီု တိုန်စိုပ်မၞိဟ် ၜိုတ် ၉၀ တၠ၊ အပ္ဍဲကောံဓရီုဂှ်တှေ် ပိုဲသဳကၠဳဏာ ပရေၚ်မန်နာနာရ၊ စပ်ကဵုပရေၚ်ဍုၚ်ကွာန်ကီု ပရေၚ်ပၞာန်ကီု ပရေၚ်ပညာကီု ပရေၚ်ထတ်ယိုတ် ပရေၚ်အခေါၚ်အရာမၞိဟ် ပရေၚ်ပရိုၚ် နာနာသာ် စပ်ကဵုပရေၚ်မန်။ ကၞောတ်တဲဂှ် ထပ်ရုဲစှ် ကမ္မတဳကေၚ်ကာ၊ ကမ္မတဳဗဟဵုတၟိပၠန်။

သၟာန် ။        ။ ဂၠံၚ်တရဴ ဂကောံညဳသၟဟ် ဂကူမန် ပြံၚ်လှာဲမံၚ်ရောၚ် ဂွံမိၚ်ကေတ် ပရိုၚ်ရ။ သာ်လဵုပြံၚ်လှာဲကီု လညာတ်မူဝါဒတၟိကီုဂှ် သောၚ်ထ္ၜးကဵုညိ။

သွဟ် ။        ။ ဂကောံညဳသၟဟ်ဂကူမန်ဂှ် စတမ်ဒက်ပတန်လဝ် နူကဵုသၞာံ ၁၉၉၆ တေံ နကဵုဂကောံပံၚ်ကောံ၊ မုဂကောံပါလုပ်ရော ဟီုတှေ် ဂကောံအပ္ဍဲဍုၚ်တေံကီု၊ ဂကောံဍုၚ်သအာၚ်တေံကီု၊ ဂကောံပ္ဍဲဍုၚ်သေံဏံကီု ပါလုပ်မံၚ်၊ ဆဂး ဗွဲကြဴဏံဂှ် ဟိုတ်နူဗော်ဇၞော်ဇၞော်လ္ၚဵုဂှ် နုက်တိတ်ထောံတုဲတှေ် သှေ်မံၚ်သွာၚ် အပ္ဍဲဍုၚ်သေံသၟး၊ အကြာဂှ် ဒပ်ပၞာန်ရပ်လွဟ်တံ ပြးဇးအာတုဲတှေ် လညာတ်ဍေံလေဝ် ပြးဇးအာ နွံမံၚ်ကီုတုဲတှေ် ပရေၚ်ချဳဒရာၚ်ဂှ်လေဝ် ယအ်စှေ်အာ။ ဗီုပြၚ်ဂကောံဂှ်လေဝ် ဖဍောတ်ဖျေံထောံ။ သ္ပပတံနူ သက္ကရာဇ် ၂၀၀၁ စိုပ်ဒဵုသက္ကရာဇ် ၂၀၀၆၊ ဆဂးဂှ် ကောံဓရီုဂှ် နွံမံၚ်လၟိုန်လၟိုန်ရ၊ ပ္ဍဲသက္ကရာဇ် ၂၀၀၆ ဂှ် သ္ပသဘၚ်သဳကၠဳတုဲတှေ် လၟုဟ်စိုပ် ၂၀၁၀ မှ ဂွံကလေၚ်သ္ပ သဘၚ်သဳကၠဳ မွဲဝါပၠန်။

လၟုဟ် ပ္ဍဲကဵုပရေၚ်ဂကူမန်ဏံဂှ် ဒှ်ကၠုၚ်ဂကောံပံၚ်ကောံတၟိမွဲ အာမ်အေယူ MAU၊ အာမ်အေယူ ဏံဂှ် အုပ်ဓလီုမံၚ် ဗီု MUL (အာမ်ယူအေဝ်) ကၠာတေံ၊ ဂကောံပံၚ်ကောံဖအိုတ်၊ လၟုဟ်တှေ် အာမ်ယူအေဝ် ဂှ် ပါလုပ် ပ္ဍဲအာမ်အေယူ။ တာလျိုၚ် အာမ်ယူအေဝ် ဏံဂှ် နွံၜိုတ်လဵုရော ဟီုတှေ် နွံဆသွာၚ်ဍုၚ်သေံဏံဟေၚ်၊ ဂကောံမန်ဍုၚ်သေံဏံကီု ဂကောံမန်ပိုဲ ကၠုၚ်ကၠောန်စ ပ္ဍဲဍုၚ်သေံဏံကီု ဂကောံလိက်ပတ်ယေန်သၞာၚ်ကီု ညံၚ်သ္ဂောံကၠောံဍ ညးသကအ်၊ ဗီုပြၚ်ဂကောံပံၚ်ကောံ ဟွံသေၚ်၊ ဗီုပြၚ်ဂကောံဆက်စၠောံညးသကအ်၊ ဗီုပြၚ်သ္ၚိဇာဖိုၚ်၊ ဂကောံညး ဂကောံအဲ ညးသ္ဂောံကၠောံဍ ညးသကအ် ဖျေံလဝ်ဗီုဂှ်၊ အေဂှ်တှေ် ဍေံဟွံတုပ်ကဵု ကၠာတေံရပုဟ်။

သၟာန်။        ။ ဂၠံၚ်တရဴ ဂကောံညဳသၟဟ် ဂကူမန်တအ်ဂှ် ဟွံစွံအာရီု လတူပရေၚ်ဍုၚ်ကွာန်ကွေံကွေံ ဒှ်သာ်ဂှ်တှေ် ပ္ဍဲကဵုဂကောံညဳသၟဟ် ဂကူမန်ဂှ် ပရေၚ်ချဳဒရာၚ်တၞဟ်တၞဟ်ဂှ် မုနွံကီုရော။

သွဟ်။        ။ ပိုဲဂှ် ၜိုတ်လညာတ်ရ၊ လ္ၚတ်တုဲတှေ် ကဵုကသပ်ကဵု ညးတံ၊ စပ်ကဵုပရေၚ်ပၞာန်လေဝ် ကဵုကသပ်ကဵု ဗော်ချဳဒရာၚ် ပရေၚ်ပၞာန်ဏောၚ်၊ ပရေၚ်ဍုၚ်ကွာန်တှေ် ကဵုကသပ်ကဵု ဗော်ချဳဒရာၚ် ပရေၚ်ဍုၚ်ကွာန်ဏောၚ်၊ ကဵုကသပ်ဟီုဂှ်လေဝ် ညံၚ်ကမၠောန် ဂွံဒှ်ရ ကဵုကသပ်၊ စဵုကဵု ကၠောန်ဟွံမာန်ဂှ်လေဝ် ကဵုကသပ်ဟွံဂွံပုဟ်၊ ၜိုန်ရဇကု ဟွံကၠောန်ဒှ်ကၠာရလေဝ် ကသပ်ဂၞန် ညံၚ်ဂွံကဵုကေတ်ညးကအ်မာန်၊ မုဒှ်ရော ဟီုတှေ် ပရၚ်ကမၠောန်ဏံဂှ် ဍေံကၠောံဍမံၚ် ညးသကအ်ဖအိုတ်ရ၊ ဍေံအာမွဲဓဝ် ဟွံဂွံပုဟ်၊ ဟိုတ်ဒှ်သာ်ဂှ်ရတှေ် ၜိုန်ရဇကုကၠောန်ဓမံက်ရုပ်ရဴ ဍိုက်ဍိုက်ပေၚ်ပေၚ် ဟွံမာန်ကၠာရလေဝ် ကသပ်ဂၞန်ဂှ် ကဵုကေတ်အာညးကအ်ဏောၚ်။

သၟာန်။        ။ နူကဵု စဒက်ပတန် ဂကောံညဳသၟဟ်ဂကူမန်တေံ ဒဵုကဵုလၟုဟ်ဂှ် ပ္ဍဲဂကောံညဳသၟဟ်ဂကူမန် ဂကောံလဵု နုက်တိတ်အာ နွံကီုရော။

သွဟ်။        ။ ဗွဲတၟေၚ်တှေ် ဗော်ဍုၚ်မန်တၟိရ မံက်မံက်ဂတဝ်ဂတဝ် နုက်တိတ်အာ၊ ဂကောံပရေၚ်ဍုၚ်ကွာန် အပ္ဍဲတေံကီု ဂကောံလိက်ပတ်ယေန်သၞာၚ် အပ္ဍဲတေံကီုဂှ် နူအခိၚ်တေံလေဝ် မံက်မံက်ဂတဝ်ဂတဝ် ညးတံ ဟွံပါလုပ်မံၚ် ပ္ဍဲကဵု အာမ်ယူအေဝ် ရ။ ဂကောံဍုၚ်သအာၚ်ဂှ်လေဝ် ဖျေံလဝ်ဗီုဂှ် ဗီုပြၚ်ဂကောံပံၚ်ကောံရ၊ ဆဂး ဍေံဟွံဒှ်ကၠုၚ်ပုဟ်၊ လၟုဟ်တှေ် ဂကောံဍုၚ်သအာၚ်ဂှ် ဍေံဒှ်အာ ဂကောံပံၚ်ကောံ ဍုၚ်သအာၚ်ဖအိုတ် OMCC  တုဲ လုပ်အာ ပ္ဍဲအာမ်အေယူ၊ အာမ်ယူအေဝ် ဂှ် သှေ်ဆတာလျိုၚ်ဆက်ဆောံ သွာၚ်အပ္ဍဲဍုၚ်သေံ ကဵု ပယျဵုသၟးရ။

သၟာန်။        ။ လတူဂကောံပံၚ်ကောံ ပရေၚ်ဂကူမန်၊ လတူဗော်ဍုၚ်မန်တၟိ၊ လတူဗော်ဒဳမဵုကရေသဳ ကောန်ဂကူမန်၊ လတူဗော်ဒဳမဝ်ကရေဇြဳ အလုံရးမန်တံဂှ် လညာတ်ဂကောံညဳသၟဟ် ဂကူမန် နွံသာ်လဵုရော လဴထ္ၜးကဵုညိ။

သွဟ်။        ။ ဇေတ်ဇေတ်တေံဂှ် ဂကောံညဳသၟဟ် ဂကူမန် (အာမ်ယူအေဝ်) လေဝ် ပါလုပ်မံၚ် ပ္ဍဲဂကောံပံၚ်ကောံ ပရေၚ်ဂကူမန် (အာမ်အေယူ) ကီုရ။ နကဵုဂကောံပံၚ်ကောံဂှ်လေဝ် ဖျေံလဝ်ဂၠံၚ်တရဴဍေံ နွံမံၚ်ရ၊ ကမၠောန်တုပ်စိုတ်တုဲ ဓမံက်အာရုပ်ရဴဂှ်လေဝ် နွံမံၚ်ရ။ ပ္ဍဲဂကောံပံၚ်ကောံ ပရေၚ်ဂကူမန် (အာမ်အေယူ) ဂှ် သွာၚ်ဍေံနွံမံၚ် ပန်သွာၚ်၊ ပ္ဍဲပန်သွာၚ်ဂှ် ဂကောံညဳသၟဟ်ဂကူမန်လေဝ် ပါလုပ်မံၚ်မွဲသွာၚ်၊ ဆဂး မွဲသွာၚ်ကဵု မွဲသွာၚ်ဂှ် ကမၠောန်ဍေံ ဟွံတုပ်ညးသကအ်ပုဟ်။ ဂကောံပရေၚ်ဍုၚ်ကွာန် အပ္ဍဲတေံဂှ် ညးတံ ကၠောန်ပရေၚ်ဍုၚ်ကွာန်ဏောၚ်၊ ဗော်ဒစဵုဒစးကဵု ပေဲါရုဲမာဲ ဗော်ဒဳမဵုကရေသဳ ကောန်ဂကူမန်ဂှ် ပံၚ်ကောံကဵု ဗော်ပရေၚ်ဍုၚ်ကွာန် ဒစဵုဒစး အပ္ဍဲတေံတုဲ ညးတံ ချဳဒရာၚ်အာဏောၚ်၊ ဗော်လုပ်ဒုၚ်ရုဲမာဲ ဗော်ဒဳမဝ်ကရေဇြဳ အလုံရးမန်ဂှ် ဗီုညးတံကဵု ညးတံ ညးတံချဳဒရာၚ်အာဏောၚ်၊ ဗော်ဍုၚ်မန်တၟိဂှ်လေဝ် နကဵုဗီုပြၚ်ရပ်လွဟ် ညးတံချဳဒရာၚ်အာဏောၚ်၊ အေဂှ်တှေ် ဗီုပြၚ်ဍေံ ဟွံတုပ်ညးသကအ်ပုဟ်၊ မန်ဍုၚ်သအာၚ်လေဝ် ကမၠောန်ညးတံ campaign (ပရေၚ်ဆဝ်မ္ၚုဟ် ဗတိုက်ဖအောဝ် ဍုၚ်ရးဂၠးသအာၚ် လုပ်ပေဲါဗတိုက်) ဂှ် ညးတံ ကၠောန်အာဏောၚ်၊ အေဂှ်တှေ် ကမၠောန်ဍေံ ဟွံတုပ်ညးသကအ်ပုဟ်၊ ဒၞာဲလေဝ် ဟွံတုပ်ညးသကအ်ပုဟ်၊ ကမၠောန်ဖအိုတ်ဂှ် ပၟိက်ဇၞော် ကိစ္စဇၞော်မံၚ်ဖအိုတ်ရ။ ကမၠောန်ရပ်လွဟ် ဗော်ဍုၚ်မန်တၟိဂှ် ဍေံပြာကဋ်ညိ၊ ကမၠောန်ဂကောံညဳသၟဟ်ဂကူမန်ဂှ် ပရေၚ်ပညာကီု ပရေၚ်ထတ်ယိုတ်ကီု ပရေၚ်ယေန်သၞာၚ်ကီု နွံဗီုဂှ်။ ကဏ္ဍညးကဵုညး သွာၚ်ညးကဵုညး စိုပ်မံၚ်တရဴဖအိုတ်ရ။ ကၠောံဍမံၚ်ဖအိုတ်ရ စှေ်စိုတ်ဗီုဂှ်။

သၟာန်။        ။ တုဲပၠန် ပ္ဍဲပေဲါရုဲမာဲ ၂၀၁၀ ဏံ ဗော်ဒဳမဝ်ကရေဇြဳ အလုံရးမန်လေဝ် လုပ်ပြိုၚ်ပကာန်တုဲ ဇၞးလဝ် ၁၆ ဒၞာဲကီု၊ ခြာဟွံလအ် ပ္ဍဲဂျာန္နဝါရဳ ၃၁ ဏံတှေ် အလဵုအသဳပၞာန်တံ ဍေံကော်စၠတ်ထဝ် ပါလဳမာန်ဏောၚ်၊ အမာတ်မန်ပိုဲဂှ်လေဝ် တိုန်ပါလဳမာန်ဏောၚ်တှေ် ညးတံဂှ် နွံဂုဏ်ဖဵု သွက်ဂကူပိုဲဟာ၊ ဒှ်လလေၚ်ဖဵု သွက်ဂကူပိုဲဟာ နကဵုဥက္ကဌ ဂကောံညဳသၟဟ်ဂကူမန် သ္ၚဳဂၠိပ်ပါ်ပဲါထ္ၜးကဵုညိ။

သွဟ်။        ။ လညာတ်ပူဂဵုလေဝ်ဒှ်၊ လညာတ်ဂကောံညဳသၟဟ်ဂကူမန်လေဝ်ဒှ် ဒးဟီုတှေ် ဗွဲမဂၠိုၚ်တှေ် ဟွံဒစဵုဒစးကဵု ဗော်မန်ပိုဲပုဟ်၊ ထံက်ဂလာန် ထံက်ပၚ်ညးတံလေဝ် ဟွံသေၚ်ပုဟ်။ လညာတ်ညးကဵုညး အကာဲအရာ ညးကဵုညး အပ္ဍဲတေံ ညးတံတီမံၚ်ဏောၚ်။ နူကၠာညးတံ ဟွံဂွံလုပ်ပေဲါရုဲမာဲဂှ်ရ ဂကောံညးသၟဟ် ဂကူမန်ဂှ် လတူညးတံ ထံက်ဂလာန်လေဝ် ဟွံထံက်ဂလာန်ပုဟ်။ ဒစဵုဒစးလေဝ် ဟွံဒစဵုဒစးပုဟ်၊ သွက်ဂုဏ်ဖဵုဂကူမန်ဏောၚ် ညးတံကၠောန်၊ မိက်ဂွံလုပ်ပံၚ်ကဵု အလဵုအသဳတုဲ လုပ်ပေဲါရုဲမာဲ ဟွံသေၚ်ပုဟ်။ နဲညးကဵုညး ညးလုပ်အာဂှ် ပိုဲညာတ်ကေတ်မံၚ်ရ၊ ကၠိုဟ်ကေတ်မံၚ်ရ။ ပရေၚ်ဍုၚ်ကွာန်ဏံ ဟီုဂှ် ဗွဲကိုပ်ကၠာဏံ အခေါၚ်အရာ ဂွံဟီု ဒးကၠုၚ်ကၠာဏောၚ်၊ ဓမံက်ရုပ်ရဴ ဂွံဟာ ဟွံဂွံဟာဂှ် စွံလဝ်ကၠာ၊ အခေါၚ်ဓမံက်ရုပ်ရဴဂှ် ဍေံဝါတ်မံၚ်ညိဏီ။ ၜိုန်ရဂွံမာဲဂၠိုၚ်လေဝ် ဓမံက်ရုပ်ရဴ ဟွံမာန်ပုဟ် အတိုၚ်ပဝ်လဇြဳဂှ်။

ဆဂးဗော်ပရေၚ်ဍုၚ်ကွာန် ဟီုတှေ် ပဝ်လဇြဳဗော်ညးတံဂှ် ကောန်ဗော်ညးတံ ဒးကၠးမးဏောၚ်၊ ဥပမာတှေ် ညးတံဟီုလဝ် အဓိက ပရေၚ်လိက်ပတ်ယေန်သၞာၚ်တံဂှ် ပရေၚ်ပညာတံဂှ် ပရေၚ်ပိုန်ဒြပ်ညိညတံဂှ် ၜိုတ်ဂွံကဵုဂွံ ဒးလုပ်ပေဲါဗတိုက်ဏောၚ်၊ ဂွံညိဂှ်လေဝ် ခိုဟ်ဂှ်ရ၊ ညးတံဂှ် ဂွံတိတ်ကၠုၚ် လပါ်မ္ၚးဏံတုဲ ဂွံလုပ်ပေဲါဗတိုက် သကာတ်သကာတ်မြဟ်မြဟ် ဂွံရပ်လွဟ်ဂှ်လေဝ် ဟွံဒှ်မံၚ်ရတှေ်။ ၜိုတ်ဒးရး ညးတံကၠောန်ဂွံမံၚ် အပ္ဍဲတေံတှေ် ဒှ်ဂုဏ်ဖဵု သွက်ဂကူမာန်ဏောၚ် ပိုဲစှေ်စိုတ်။

သၟာန်။        ။ ခြာဟွံလအ်ဏီဂှ် အလဵုအသဳပၞာန်တံ စၞောန်ကၠုၚ် ဇၟာပ်မၞိဟ် ဟွံယိုက်ဂၠေၚ် မံၚ်ဟွံဂွံ ဒးယိုက်ဂၠေၚ်တာလျိုၚ်ပၞာန်ဏောၚ် သၞောဝ်ဍေံမံက်ကၠုၚ်၊ လတူဏံဂှ် နကဵုဥက္ကဌ ဂကောံညဳသၟဟ်ဂကူမန် ဗီုလဵုညာတ်ကေတ်ကီုရော။

သွဟ်။        ။ ပိုဲဒးပတောံကဵု ဍုၚ်သေံတုဲ ဒးဟီုတှေ် ကၠာတေံဂှ် ဍုၚ်သေံလေဝ် ဗီုဏံကီုရ၊ လၟုဟ် ဍေံဟွံဒးဓရတ်ကေတ် ဗီုဏံရ၊ ပ္ဍဲသေံဂှ် ပၞာန်ဍေံ ပရေၚ်ဂွံဒုၚ်စဂုဏ်ဖဵုဍေံ ဂၠိုၚ်မံၚ်ညိ၊ ပ္ဍဲဍုၚ်ဗၟာတေံဂှ် ဆဵုမံၚ်ရ ကောန်ပၞာန်ဍေံ ဝါတ်ဒိုက်မံၚ် ဇၞော်ကဵုဇြဟတ်၊ ဂွံစလေဝ် ဟွံရုမ်ဂပ်မံၚ်ရ၊ တုဲတှေ် ဂလိုၚ်လေဝ် ဂလိုၚ်မံၚ် ကောန်ပၞာန်ဏောၚ်၊ တုဲပၠန် ကဆံၚ်ဒၟံၚ်ကီု ပရေၚ်ပညာကီု ဍိုန်လျမံၚ်ဏောၚ်တှေ် ကေတ်ကောန်ပၞာန် ဝါတ်အာ ဍေံဒှ်ကၠုၚ်ဗီုဂှ်။ ဍေံဒှ်ကၠုၚ်ဗီုဂှ်တုဲတှေ် လၟုဟ်ဍေံဓရတ်ကၠုၚ်ဗီုဂှ်။ ဍာံဍာံတေံဂှ် ကဆံၚ်ဒၟံၚ်ဍေံ ပလေဝ်ကဵုခိုဟ်ခိုဟ်၊ သၞောတ်သၞောဝ်ဍေံ ပလေဝ်ကဵုခိုဟ်ခိုဟ်၊ ပၞာန်အပ္ဍဲဍုၚ် ဟွံမွဲမံၚ်ရတှေ် ဒပ်ပၞာန်ဂှ် ဟွံဒးဂလိုၚ်ပုဟ်၊ ဆၜိုတ်ရံၚ်စံၚ်ထိၚ်ဒဝ်အာ ဍုၚ်ညိ ဆၜိုတ်ဏံရ။ တုဲတှေ် ကောန်ပၞာန်တံဂှ်လေဝ် ဒးဍိုက်ပေၚ်ကဵု ပရေၚ်ပညာဏောၚ်၊ ဆၜိုတ်ဗတောန်လဝ်ကဵု ပန်သေနာတ် ကြမ်ကြစကဵု မၞိဟ်သၟး ဟွံဂွံပုဟ်၊ ပရေၚ်ပညာ စပ်ကဵုဒးရီုဗၚ် ညးဍုၚ်ကွာန်တံဂှ်လေဝ် ဒးနွံဏောၚ်။ ဂလိုၚ်ပတိုန်ပၞာန်လေဝ် ဍေံဟွံခိုၚ်ပုဟ်၊ ကောန်ညးဍုၚ်ကွာန်တံလေဝ် ဒဵုကဵုပေၚ်စိုတ်ကဵု ပရေၚ်ပၞာန်ဂှ် ဍေံဟွံဒှ်ပုဟ်တှေ် ဍေံအာဍာ်ဇမၠိၚ် ဝါတ်မံၚ်ညိဏောၚ်။

သၟာန်။        ။ နကဵုဥက္ကဌ ဂကောံညဳသၟဟ် ဂကူမန် မုမိက်ဂွံဟီု စပ်ကဵုပရေၚ်ညဳသၟဟ် ပ္ဍဲကဵုဂကူမန်ရော။

သွဟ်။        ။ ပ္ဍဲဂကူပိုဲဂှ် မွဲဂကောံကဵု မွဲဂကောံ ၜိုန်ရပရေၚ်ဒတူလိုၚ် ပရေၚ်ကမၠောန် ဟွံတုပ်ညးသကအ်ကီုလေဝ် ညံၚ်ဂွံကၠောံဍညးသကအ်ဂှ် ပၟိက်ဇၞော်ကွေံကွေံမွဲတဲ၊ တုဲတှေ် မွဲသာ်ပၠန်ဂှ် ဒးအေၚ်ဒုၚ်ညးသကအ်၊ ကမၠောန်ဟွံတုပ် ညးသကအ်တုဲ ပိုဲအာမွဲစွံ ဟွံဂွံပုဟ် အေဗီုဏံ ညံၚ်ဟွံဂွံဒှ်၊ ကမၠောန်ဖအိုတ်ဂှ် ကမၠောန်ဂကူသီုဖအိုတ်ရတှေ် ကဏ္ဍညးကဵု ကဏ္ဍညး ဒးကၠောန်ဏောၚ်၊ ကမၠောန်လ္ၚဵုဂှ် ဇကုကၠောန်ဟွံဂွံတုဲ ညးကၠောန်မာန်ဂှ် ဇကုဒးကေတ်စဂုဏ်စရာဲဏောၚ်၊ တုဲမွဲပၠန်ဂှ် လညာတ်မွဲကဵုမွဲ ပါ်ပဲါမံၚ် ညးသကအ်၊ အေဒၞာဲဏံဂှ် ရဲဒးဒုၚ်ပါ်ပဲါဂှ်လေဝ် ဒးအေၚ်ဒုၚ်၊ ရဲပါ်ပဲါဂှ်လေဝ် လ္ပပျုတ်ဗဒေက် ကဵုကသပ်ညး ကဵုဂၠံၚ်တရဴညး၊ ကဵုဂွံဒှ် ပါ်ပဲါညံၚ်ဂွံခိုဟ်တိုန် ညံၚ်ဂွံပလေဝ်ပတိုန်တှေ် မွဲဂကောံကဵု မွဲဂကောံ ဍေံညဳသာကၠုၚ် ဍေံဇၞော်လှဲတိုန်တုဲတှေ် ကမၠောန်ပိုဲဂှ် ဍေံဂွံပေဲါအံၚ်ဇၞးမာန်ဏောၚ်။

မွဲသာ်ပၠန်ဂှ် လၟုဟ်ပရေၚ်ဍုၚ်ကွာန်မွဲဓဝ်လေဝ် ဟွံသေၚ်ပုဟ်၊ ပရေၚ်ပၞာန်မွဲဓဝ်လေဝ် ဟွံသေၚ်ပုဟ်၊ နူသဇိုၚ် မပ္တံကဵု ပရေၚ်ပညာတံဂှ် ပရေၚ်ထတ်ယိုတ်တံဂှ် လိက်ပတ်ယေန်သၞာၚ်တံဂှ် ပရေၚ်ပိုန်ဒြပ်တံဖအိုတ်ဂှ် ပိုဲဒးကၠောန်အာ ညဳညဳမွဲဒမြိပ်ဓဝ်ဏောၚ်၊ ဂွံမွဲတုဲမှ ကၠောန်မွဲ ဟွံဂွံပုဟ်၊ ယဝ်ရဇကုကၠောန်မံၚ် ပရေၚ်ဍုၚ်ကွာန်မွဲဓဝ် ပရေၚ်ပၞာန်မွဲဓဝ်တှေ် ပရေၚ်ပညာဇကု ပရေၚ်ပိုန်ဒြပ်ဇကုတံဂှ် ဍေံယအ်စှေ်အာဏောၚ်။

သၟာန်။        ။ မုမိက်ဂွံထပ်ဗပေၚ်တုဲ ဟီုကီုရော။

သွဟ်။        ။ ဂကောံညဳသၟဟ် ဂကူမန်ဂှ် လၟုဟ်နူဂကောံဇၞော်ဂှ် ကလေၚ်ခ္ဍိုဟ် ကလေၚ်ဖဍောတ်ဖျေံတုဲတှေ် ပတဝ်က္ဍိုပ် မွဲမွဲ၊ ကမၠောန်ဇကု ခံၚ်၊ ကမၠောန်ဇကု ကၠောန်ဂွံ၊ ကမၠောန်ဇကု ကၠောန်မာန်ဂှ်ရ ကၠောန်အာဏောၚ်။ ကမၠောန်ဂကောံညဳသၟဟ် ကောန်ဂကူမန်ဂှ် မုရော ဟီုတှေ် ပရေၚ်ပညာသဇိုၚ် ကောန်ဂကူမန်ပိုဲ နွံမံၚ်ပ္ဍဲဒေသ ပိုဲချဳဒရာၚ်ဂွံဏံဂှ် ပိုဲကၠောန်အာဏောၚ်။ မွဲပၠန်ဂှ် ပရေၚ်ပိုန်ဒြပ်၊ ကောန်ဂကူမန်ဇကု ဖအိုတ်ဂှ် ပိုန်ဒြပ်အိန်ထံၚ်ညးကဵုညး ညံၚ်ဂွံယာပ်ယာတိုန်ညိ ညံၚ်ဂွံခိုဟ်တိုန် နူကဵုကဆံၚ်ဝါတ်ဒိုက်မံၚ်ဂှ် ပ္ဍဲဒေသ ပိုဲဍဟောဝ်စိုပ်ဂှ် ပိုဲကၠောန်အာဏောၚ်၊ တုဲတှေ် ပရေၚ်ထတ်ယိုတ်၊ ပရေၚ်ယေန်သၞာၚ်၊ ပရေၚ်သာသနာတံလေဝ် ပ္ဍဲဒေသပိုဲ ပ္ဍဲကောန်ဂကူမန်ပိုဲဏံ ညံၚ်ဂွံဇၞော်မောဝ်အာဂှ် ဂကောံညဳသၟဟ် ဂကူမန် ကၠောန်အာဏောၚ် လညာတ်ဂၠံၚ်တရဴ ဂကောံညဳသၟဟ် ဂကူမန် သၞာံ ၂၀၁၁ ဏံ ဖျေံလဝ်နွံ။

ဗှ်မာန်မံၚ်

ကမၠောန်ၜဵုတွဵုရးမန် ဗီုလဵုဂွံကလေၚ်ယာဍိုပ်မာန် ဆဵုဂဗသၟာန်သှ်

သယံဇာတတွဵုရးမန် ပရေၚ်ပိုန်ဒြပ်ကမၠောန်ၜဵုယအ်သဝ်စှေ်ကၠုၚ်မံၚ်တံဂှ် ထမံက်ကမၠောန် SME ကဵု ပရေၚ်ဂၠေံသြန်ဗါန် Bank ကီု သၞောဝ်လ္ၚဵုလပါ်အလဵုအသဳတံပလေဝ်ကဵုမာန်မ္ဂး ကလေၚ်ခိုဟ်တိုန်မာန်ရောၚ် အေဝ်ဒဳတာ ဗညာအံၚ် ဆဵုဂဗသၟာန်သှ်လဝ် တၠဖဴၜဵု ကောန်ဂကောံ …

Leave a Reply

%d bloggers like this: