Categories
ဂလာန်ညးဒါန်လိက်

ဒက်ပတန် ပရေၚ်အုပ်ဓုပ် ကောန်ဂကူ နူကဵုသဇိုၚ်ကွာန်

ပ္ဍဲကဵုပေဲါရုဲမာဲ ၂၀၁၀ တေံဂှ်  ဒှ်ပေဲါရုဲမာဲအလီကီုလေဝ် ဂကူမန် ပ္ဍဲကဵုအလုံဒေသမန်တအ် ထ္ၜးကၠုၚ်အစောန်စရာဲ ကဵုကၠုၚ်မာဲ ကုဗော်မန်၊ ”ဗော်ဒဳမဝ်ကရေဇြဳ အလုံရးမန်” ဂှ် ဂွံဆဵုကေတ်ရ၊ ဂွံဆဵုဂဗကၠုၚ် စိုတ်ဓါတ်ဆာန်ဂကူ ကောန်ဂကူမန်တအ်ရ။ 

သွက်ညးဍုၚ်ကွာန် ကောန်ဂကူမန်တအ်လေဝ် ဗော်ပရေၚ်ဍုၚ်ကွာန် ဒတူလိုၚ်ဒၟံၚ် သွက်ညးတအ် နွံဒၟံၚ်မံက်က်ဂတဝ်ဝ်မွဲကီုတုဲ စိုတ်ဓါတ်ဂံၚ်သကာ ကၠုၚ် နွံရ။ ခြာဟွံလအ်ကၠုၚ်တေံ ပ္ဍဲကဵုကွာန်မန်တအ် အာတ်မိက်ကၠုၚ် သွက်ဂွံရုဲစှ်ပတိုန် ညးဇၞော်ဍုၚ်ကွာန်တၟိရ။ မုဟိုတ်တှေ် ညးဇၞော်ဍုၚ်ကွာန် တုဲတုဲကၠုၚ်တေံဂှ် နူကဵုအလဵုအသဳပၞာန်နအဖတအ် ပ္တိုန်လဝ်တုဲ ညးဇၞော် ကွာန်တအ်ဂှ် ထံက်ဂလာန်လ္တူဗော် ”ကျဖောအ်ကျခိုၚ်ယျေ” ဂှ် ဂၠိုၚ်ရောၚ်။

တ္ၚဲဏအ် ခမဳသၚ်တအ်ကီု၊ ညးဍုၚ်ကွာန်တအ်ကီု၊ အာတ်မိက်ကၠုၚ် ညးဇၞော်ဍုၚ်ကွာန်ဇေတ်တ် ညးတအ်ရုဲကဵုမာဲရောၚ်ဂှ် ဒှ်လက်သန်ခိုဟ်ရ။ ဣဝွံ တုပ်တဴညံၚ်ရဴ ဒက်ပတန်အခေါၚ်အရာ ဒဳမဝ်ကရေဇြဳ ပ္ဍဲကဵုသဇိုၚ်ကွာန်ရ။ ကဆံၚ်တွဵုရးသၟးဟွံသေၚ်၊ ပ္ဍဲကဵုကဆံၚ်ကွာန် ကဆံၚ်ပွိုၚ်ဍုၚ်တအ်ဂှ် ယဝ်ရ ညးဍုၚ်ကွာန်တအ် အခေါၚ်ရုဲစှ်ကေတ် ညးဇၞော်ဍုၚ်ကွာန်ညးတအ်မာန်တုဲ ပ္ဍဲကဵုသဇိုၚ်ကွာန်ဂှ် ပခိုၚ်ကၠုၚ် ပရေၚ်အုပ်ဓုပ် ဇကုကဵုဇကုမ္ဂး အခေါၚ်အရာ သွက်ကောန်ဍုၚ်ကောန်ကွာန်တအ်ဂှ် ကၠောန်ဂွံ တၟာဂလိုၚ်ရောၚ်။

နကဵုဗော်အလုံရးမန်လေဝ် ထေက်ကဵုဒးကဵုဒြဟတ် စပ်ကဵုပရေၚ်အုပ်ဓုပ် ဒေသကဆံၚ်သၟဝ်တအ် ညံၚ်ဂွံခိုၚ်ဗိုန်ရောၚ်။ ပ္ဍဲကဵုဒေသကွာန်၊ ပွိုၚ်တိုက်ဗွဲမဂၠိုၚ် ယဝ်ရညးဇၞော်ဍုၚ်ကွာန်ဂှ် ဒှ်ဂကူမန်၊ ယဝ်ရညးဍုၚ်ကွာန်တအ် ပ္တိုန်လဝ်ဇေတ်တ်မ္ဂး ညးဇၞော်ဍုၚ်ကွာန်တအ်ဂှ် သွက်ဂွံဒုၚ်အသံ မူဝါဒ ဗော်ဒဳမဝ်ကရေဇြဳ အလုံရးမန်နွံရ။

ပ္ဍဲကဵုဍုၚ်ကွာန်ဂမၠိုၚ် ယဝ်ရညးဍုၚ်ကွာန်တအ် ဂွံအခေါၚ်ရုဲစှ်ပတိုန် ညးဇၞော်ဍုၚ်ကွာန်မ္ဂး မ္ၚးနူပရဲပရေၚ်ဍုၚ်ကွာန်တုဲ ပရဲပရေၚ်ပရူတၞဟ်ဟ် တအ်လေဝ် နွံတၟာဂလိုၚ်ဏီရ။ မပ္တံကဵုထိၚ်ဒဝ် ဂကူ၊ ဘာသာ၊ သာသနာကီု၊ ထိၚ်ဒဝ်ယေန်သၞာၚ်မန်ကီု ကၠောန်ၜိုတ်ဂွံ ဗွဲမသၠးပွးရ။ ဗတောန်ပရိယတ္တိ နကဵုဘာသာမန်၊ ဗတောန်လိက်မန် ပ္ဍဲဘာအလဵုသဳအိုဿီုတအ်ဂှ် ကၠောန် ၜိုတ်အာဂွံရောၚ်။

မ္ၚးနူဂှ်ပၠန် ယဝ်ရညးတာလျိုၚ်အလဵုအသဳကီု၊ ဒပ်ပၞာန်ဗၟာကီု ဖံက် ပကဝ်အခေါၚ်အရာမၞိဟ် သ္ပမာန်လ္တူညးဍုၚ်ကွာန်မ္ဂးလေဝ် နူကဵုညးဇၞော်ဍုၚ် ကွာန်တအ် စဵုဒၞာဂွံရ၊ ယဝ်ရညးတာလျိုၚ်အလဵုအသဳတအ် မိက်ဂွံစကာ ကမၠောန်အဓမ္မ လ္တူညးဍုၚ်ကွာန် ဟွံကဵုသြန်ၚုဟ်မးမ္ဂး နကဵုညးဇၞော်ဍုၚ်ကွာန်တအ် အခေါၚ်ကယျာန်နွံရ။ ယဝ်ရဒပ်ပၞာန်ဗၟာတအ် ကေတ်ပဝ်တာ စကာညးဍုၚ်ကွာန်မ္ဂး၊ ညးဇၞော်ကွာန်တအ် တေၚ်ကဵုအမာတ် ဇကုတအ်တုဲ ကေတ်ပရေၚ်စဵုဒၞာဂွံရ။

တ္ၚဲဏံ ဒးဟီုဂး ညးသ္ကအ်ဂၠိုၚ်အိုတ်ဂှ် ၜိုန်ရ ဒပ်ပၞာန်ဗၟာ အလဵုအသဳ ဗော်ကျဖောအ်တအ် ဟွံပါလုပ်ပ္ဍဲဒၞာဲ သီတိကီုလေဝ် နူကဵုကမ္ပဏဳ ပရေၚ်ပိုန်ဒြပ်တအ် ကေတ်အဝဵု နူကဵုအလဵုအသဳတုဲ သီကေတ်ဒၟံၚ် တိညးဍုၚ်ကွာန် သၟာဗ္ၚတအ်ဂှ် ဂွံဆဵုကေတ်ရ၊ စပ်ကဵုကိစ္စဝွံတုဲ ကောန်ဍုၚ်ကောန်ကွာန်တအ်ကီု၊ ညးဇၞော်ကွာန်တအ်ကီု အခေါၚ်ပတိုန်ထ္ၜးနွံ အခေါၚ်စဵုဒၞာနွံရ။

မုဟီုဟီု ပ္ဍဲကဵုဍုၚ်ကွာန်ဂမၠိုၚ် ယဝ်ရညးဇၞော်ဍုၚ်ကွာန်တအ်ဂှ် ကၠုၚ်နူကဵု မာဲညးဍုၚ်ကွာန်တအ်မ္ဂး လ္တူညးဍုၚ်ကွာန်တအ်ဂှ် ဗွဲဗၞတ်ထေက်ကြိုက် စဵုဒၞာမာန်ရောၚ်။ အဓိက ပ္ဍဲကဵုကွာန်မန်ဂမၠိုၚ် ညးဇၞော်ကွာန် ဂကူမန်တအ် စှေ်စိုတ်ဇေတ်တ် ညံၚ်ဂွံကလိဂွံအဝဵုဂှ် ဗော်အလုံရးမန်ကီု၊ ညးဍုၚ်ကွာန်မန်တအ်ကီု၊ ထေက်ကဵုဒးကဵုဒြဟတ်ရောၚ်။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.