Categories
သၟာန်သွဟ်

လှေ်သုခုမ ပေဲါဇာတ်ဏံဂှ် ကၠောန်ပရေၚ်ဂကူ မွဲကီုဏောၚ် ကောန်သၟိၚ် ဗြဴဇၞော် ''ဍောၚ်ပ္ကဴ'' ဟီု

နာဲတၠလွဳ ပ္တိုန်ထ္ၜးလဝ်ရ။

သၟာန်။ ။ ကိုပ်ကၠာအိုတ် ဆက်မိက် ကဵုပုရိသာတ်တံ ယၟုပ္ဍဲပေဲါဇာတ်ကီု၊ ယၟုပ္ဍဲကွာန်ကီု၊ သီုကဵုဇာတိကွာန် အာယုက်လေဝ် လဴထ္ၜးကဵုညိ?

သွဟ်။ ။ ယွံ မ္ၚဵုရ။ ယၟုအဲ ပ္ဍဲပေဲါဇာတ်ဂှ် ”ဍောၚ်ပ္ကဴ” ကော်စဒၟံၚ်ပ္ဍဲကွာန်တေံဂှ် ”ချို”၊ မိမၜါဂှ် နွံဒၟံၚ်မိမွဲရ၊ အပါဂှ် ဒးထောံအာ နူကဵု ”ချို” ဍောတ်တ်တေံ ရ။ ဇာတိကွာန်ဂှ် ”ဝါခရူ” လၟုဟ်ဂှ် မံၚ်ဒၟံၚ် ပ္ဍဲကဵုဇြပ်ဗု၊ ဂွံအာယုက် (၂၇) သၞာံရ။ သၟာန်။ ။ ”ဍောၚ်ပ္ကဴ” လှေ်ဂွံလဝ်ပေဲါဇာတ်ဏံ ဂွံပွိုၚ်မူစိသၞာံ စနူသၞာံလဵု လုပ်ကၠုၚ်ဂှ်လေဝ် လဴကဵုပုရိသာတ်တံညိ?

သွဟ်။ ။ လုပ်ကၠုၚ်ပေဲါဇာတ်ဂှ် သီုသၞာံဏံတှေ် ဂွံပွိုၚ် (၈) သၞာံရ။ စကၠာအိုတ်ဂှ် ပေဲါဇာတ် ”မန်သိၚ်အံၚ်”၊ ”မန်ကျေဝ်လာဲ”၊ ”မန်ချေတ်သိုဝ်”၊ ”မ္ၚဵုဍုၚ်မန်” တုဲ လၟုဟ်စိုပ်ကၠုၚ် ပေဲါဇာတ် ”ဆာန်ညဳဆာန်” ဏံကီုရ။

သၟာန်။ ။ ”ဍောၚ်ပ္ကဴ” လုပ်လှေ်ဒၟံၚ်ပေဲါဇာတ်လၟုဟ်ဏံဂှ် မိကဵုဒၟံၚ်ဇြဟတ် ဍိုက် ဍိုက်ပေၚ်ပေၚ်ကီုဟာ တုဲပၠန် အခက်အခုဲ ဗီုလဵုနွံကီုဂှ် လဴထ္ၜးကဵုညိ?

သွဟ်။ ။ ယွံ မိဂှ် ”ဍောၚ်ပ္ကဴ” မုကၠောန်န် ဟွံစဵုဒၞာပုဟ် ကဵုဒၟံၚ်ဇြဟတ် ဍိုက်က်ပေၚ်ၚ်ရ။ မိ ”ဍောၚ်ပ္ကဴ” တံဂှ် စဵုကဵုနွံဗီုညးတၞဟ်ဟွံသေၚ်ပုဟ် စသုၚ်ၜိုတ်ရီုဂပ်ညိညရတှေ် ၜိုတ်နွံကဵုနွံ မိဂွံ ထံက်ပၚ်ကၠုၚ် ဗီုကဵုညးတၞဟ် ဍိုက်က်ပေၚ်ၚ် အိုဟ်တၟိုဟ်မွဲဂှ် ဟွံဒှ်ပုဟ်။

သၟာန်။ ။ ကဆံၚ်တန်ဗ္တောန်ပညာ ”ဍောၚ်ပ္ကဴ” ပ္ဍဲကဵုဘာမန်ကီု၊ ဘာဗၟာကီု နွံမူစိတန်ဂှ်လေဝ် လဴထ္ၜးကဵုပုရိသာတ်တံ ညိ?

သွဟ်။ ။ နူဍောတ်တ်တေံ ပိုဲဝါတ်ဒၟံၚ်တုဲ မံၚ်ဘာလေဝ် ဟွံဂွံမံၚ်ဗီုညးတၞဟ်ပုဟ် အခိၚ်ဂှ် နွံဒၟံၚ်ပ္ဍဲကွာန်ဝါခရူတေံရ။ ဂွံဘာဗၟာ (၂) တန်တုဲ ပြံၚ်ကၠုၚ်လ္ပာ်ဍုၚ်ဇြပ်ဗုဏံဂှ် ဘိုၚ်ကၠောန် ကမၠောန်ကဵုမိတုဲ တိတ်ထောံနူဘာဗၟာရ။ ဘာမန်လေဝ် ဂွံမံၚ် (၂) တန်ကီုရ။

သၟာန်။ ။ ဟီုဟဂှ်တှေ် နကဵု ”ဍောၚ် ပ္ကဴ” ဂွံလှေ်ထ္ၜးကဵု ပုရိသာတ်ကောန်ဂကူမန်တံဂွံဂှ် အ္စာတန်ဗ္တောန်လဵု ဗ္တောန်လဝ် နွံဒၟံၚ်ကီုရော?

သွဟ်။ ။ ယွံ အ္စာကိုပ်ကၠာအိုတ်ဂှ်တှေ် အ္စာၝောံ ”အာဲမန်ဆာန်”၊ လုပ်ကၠုၚ်ပေဲါဇာတ်ဏံ ကၠာအိုတ်ပၠန်ဂှ်တှေ် အ္စာ ”မန်သိၚ်အံၚ်”၊ အ္စာ ”မန်ချေတ်သိုဝ်” တံ ကေၚ်ဗ္တောန်ကၠုၚ်လဝ် လှေ်ကီု၊ ထ္ၜးဇာတ်ကီု၊ သဘာဝအိုတ်ဿီုလေဝ် ပါဒၟံၚ်ကီုရ။

သၟာန်။ ။ ”ဍောၚ်ပ္ကဴ” ချဳဒရာၚ်ဒၟံၚ် ပ္ဍဲကဵုပေဲါဇာတ်ဏံ ပွိုၚ် (၈) သၞာံဂှ်တှေ် သွက် ”ဍောၚ်ပ္ကဴ” ဇၞော်မောဝ်တဴတက်တိုန် ၜိုတ်ဂလိုၚ်လဵုနွံကီုရော?

သွဟ်။ ။ ထေၚ်ကေတ်တှေ် တဴတက်ဒၟံၚ်ညိကီုယျ။ အခိၚ် ”ဍောၚ်ပ္ကဴ” လှေ် ဒၟံၚ်ပေဲါဇာတ် ”မန်ချေတ်သိုဝ်” တေံဂှ် ”ဍောၚ်ပ္ကဴ” လေဝ် ပုရိသာတ်တံ ကဵုကၠုၚ်ဇြဟတ်ဂှ် နွံဒၟံၚ်ကီုရ။

သၟာန်။ ။ ရန်တၟံဓါန်ဂတ ”ဍောၚ်ပ္ကဴ” သွက်ဂွံဗ္တောန်ကဵု အ္စာဒယှ်ဒယှ် နွံဒၟံၚ်ကီုဟာ?

သွဟ်။ ။ လၟုဟ်ဏံ ”ဍောၚ်ပ္ကဴ” ဂွံအာယုက် (၂၇) သၞာံရတှေ် ဂွံဆက်ဗ္တောန်အာ ဗီုညးဍောတ်တ်တံလေဝ် ဒှ်ဟွံမာန်ရလေဝ် ၜိုတ်ဏံလေဝ် ၜိုတ်မာန်ကဵုမာန်လေဝ် ဂ္စာန်ဒၟံၚ်ကီုရ။

သၟာန်။ ။ ကေၚ်ပ္တိတ်ကၠုၚ်လဝ် ကဝး VCD ကီု၊ ကြက္ကဒိန်ကီုဂှ် နွံမူစိကဝးကီုရော?

သွဟ်။ ။ ယွံ ကဝး လှေ်သုခုမပေÌဇာတ်ဏံဂှ် ကၠောန်ပရေၚ်ဂကူမွဲကီု ဏောၚ် ကောန်သၟိၚ်ဗြဴဇၞော် ”ဍောၚ်ပ္ကဴ” ဟီု VCD ဟီုတှေ် ဂၠိုၚ်ကဵုကဝး ကေၚ်ချဳဒရာၚ်လဝ်နွံ။ ဆဂး ကဝး ”ဍောၚ်ပ္ကဴ” ဟွံသေၚ်ပုဟ် ကဵုကၠုၚ်လဝ်အရီုအဗၚ် ကဝးညးတၞဟ်တုဲ မပ္တံကဵု ကဝးဒွက်ကီု၊ ကဝးထ္ၜးဇာတ်တံကီု နွံဂၠိုၚ်ကဵုကဝးကီုရ။

သၟာန်။ ။ ပ္ဍဲကဵုပေဲါဇာတ် ”ဆာန်ညဳဆာန်” ဏံ ”ဍောၚ်ပ္ကဴ” ကေတ်လဝ်တာလျိုၚ် ဒၞာဲလဵုကီု ရောဂှ်လေဝ် လဴထ္ၜးကဵုညိ?

သွဟ်။ ။ ယွံ ကေတ်လဝ်တာလျိုၚ် ပ္ဍဲကဵုဇာတ် ”ဆာန်ညဳဆာန်” ဏံဂှ်တှေ် ကောန်သၟိၚ်ဗြဴဇၞော် ကီုရ။ တုဲပၠန် ဆေၚ်စပ်ကဵု ပ္ဍဲကဵုထ္ၜးဇာတ်ဏံဟီုဂှ်တှေ် ဒၞာဲလဵုဒှ်ဒှ် အဲလုပ်ကေတ်မာန်ဖအိုတ်ရ။

သၟာန်။ ။ အဃောလှေ်ဒၟံၚ်ဇာတ်ဏံဂှ် ယဝ်ရ ပုရိသာတ်တံ ကၠုၚ်ဆက်မိတ်မ္ဂး ”ဍောၚ်ပ္ကဴ” ဗီုလဵုစွံစိုတ်တုဲ ဆက်ဆောံကီုရော?

သွဟ်။ ။ ယွံ ပ္ဍဲကဵုလညာတ်ညးတၞဟ်တံဟီုဒၟံၚ်ဂှ် ”ဍောၚ်ပ္ကဴ” မာနနွံဒၟံၚ်ဏောၚ်။ တုဲပၠန် ကောန်သၟိၚ်ဗြဴဟီုတှေ် လီစညးတၞဟ်ဏောၚ် ညးတၞဟ်ဟီုဒၟံၚ်ဗီုဂှ်တှေ် ယဝ်ရ ”ဍောၚ်ပ္ကဴ” မိၚ်တှေ် အရေဝ်ဏံဂှ် ဒုၚ်တဲဟွံမာန်ပုဟ်၊ ယဝ်ရ ကၠုၚ်ဆက်မိတ်ကဵု ”ဍောၚ်ပ္ကဴ” ခိုဟ်ဟ်တှေ် ”ဍောၚ်ပ္ကဴ” လေဝ် ဆက်ဆောံကဵုခိုဟ်ခိုဟ်ဏောၚ်။ မၞိဟ်လ္ၚဵုတံ ဆဵုကောန်သၟိၚ်ဗြဴပေဲါဇာတ်တှေ် ထေၚ် ဍောတ် ထေၚ်သောဲဂှ် ဂၠိုၚ်ဒၟံၚ်ကီုရ။

သၟာန်။ ။ အဃောလှေ်ဒယှေ်ဒၟံၚ် ပ္ဍဲပေဲါဇာတ်ဏံဂှ် ပရေၚ်ဂကူ ဗီုလဵုစန်ဒက်ကၠုၚ်ကဵု ပုရိသာတ်တံ နွံကီုရော?

သွဟ်။ ။ ”ဍောၚ်ပ္ကဴ” တှေ် စိုတ်ဓါတ်ဆာန်ဂကူဂှ် နွံပေၚ်ၚ်ရ။ ဒယှေ်ဒွက်ပၠန်လေဝ် ဒယှေ် ဒွက်ပရေၚ်ဂကူဂၠိုၚ်၊ တုဲပၠန် ဟီုအရေဝ်ကဵုပုရိသာတ်တံလေဝ် စိုတ်ဓါတ်ဆာန်ဂကူဂှ် ဇၟာပ်ညးအဲ ကဵုဂွံနွံတဴဒၟံၚ်ညိ ဟီုဒၟံၚ်လၟိုန်ရ။ ဟိုတ်ဂှ်ရ ”ဍောၚ် ပ္ကဴ” ရန်တၟံသာ်ဂှ်တုဲ ဒယှေ်ဒွက်ဂကူ ဂၠိုၚ်ၚ် ဏောၚ်၊ ဟီုအရေဝ်သွက်ဂကူဂၠိုၚ်ၚ်ဏောၚ်ရ။

သၟာန်။ ။ တၚ်လက္ကရဴအိုတ်ဏံ သွက်သၞာံ (၂၀၁၁) ဏံဂှ် ဗီုလဵုမိက်ဂွံဟီုပ္ကန်ကဵု ပုရိသာတ်တံရော?

သွဟ်။ ။ ဆက်အာသၞာံဂတနူဏံပၠန်တှေ် တာလျိုၚ်သွက်ဂကူ ၜိုတ်မာန်ကဵု မာန်ကၠောန်အာဏောၚ်။ ကမၠောန်သုခုမမန်ပိုဲ ညံၚ်ဂွံတဴတက်ကီု၊ ယဝ်ရ ညးတၞဟ်သၟာန်စိုပ်တှေ် လဴထ္ၜးကဵုဏောၚ်။ သုခုမမန်ပိုဲဂှ် ဇၞော်မောဝ်ဂကူဇကုရ။ ကမၠောန်သုခုမမန်ဂှ် ဆေၚ်စပ်ကဵုဂကူမွဲ ကီုရ။ ညးဍုၚ်ကွာန်တံ ဟွံတီဟွံကၠိုဟ်ကီုလေဝ် ဆဵုအာပ္ဍဲသုခုမဏံတုဲ တီကၠိုဟ်အာ ဗွဲမဂၠိုၚ်နွံဒၟံၚ်ရ။ ဟိုတ်ဂှ်ရ ဆေၚ်စပ်ကဵု ပရေၚ်ကမၠောန်ဏံ ဂွံတဴတက်ဂှ်လေဝ် ”ဍောၚ်ပ္ကဴ” ဂ္စာန်ဒၟံၚ်လၟိုန်ရ။

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.