Categories
ပရိုၚ်

ကဵုလဝ်အခေါၚ် ဇက်သ္ၚု ဗွဲမသၠးပွးကီုလေဝ် ဒးကဵုမံၚ် အကံက်သၞေဟ်ကၚ်ဖိုဟ်

မာံသုတ – အပ္ဍဲတွဵုရးဍုၚ်မန် ကဵုလဝ်အခေါၚ်ဇက်သ္ၚု ဗွဲမသၠးပွးကီုလေဝ် ဒးကဵုဒၟံၚ် အကံက်သၞေဟ်ကၚ်ဖိုဟ်ရောၚ်ဂှ် ညးဗက်ဍုတ်ကွဳစက် နူဍုၚ်ရေဝ်မွဲတၠ ဟီုရ။

အဃောပတိုန်ဖျေံ မံၚ်သ္ၚု ( ဗီု - Internet )
အဃောပတိုန်ဖျေံ မံၚ်သ္ၚု ( ဗီု - Internet )

“လိက်ထံက်ဂလာန် အခေါၚ်ဇက်သ္ၚု ဟွံဒးကေတ်ပုဟ် ဟီုလဝ်ကီုရ။ ဆဂး ပ္ဍဲဇၟာပ်ဇၟာပ်သၞေဟ်ကၚ် (ဂိတ်) တံဂှ် ဒးကဵုဒၟံၚ်လှုဲ အတိုၚ်တြေံတေံဖိုဟ်။ ဟွံကဵုတှေ် ကဵုဖျေံကပေါတ်တံ၊ ဂၠဟ်ကဵု ပသဲကေက်ကေက်တံ ကၠောန်သ္ပဒၟံၚ်တုဲ အခိၚ်အိုတ်ကွေံကွေံဂှ်ရ ဟွံမိပ်ကယျာန်ဓဝါတ်တုဲ ဒးကဵုဒၟံၚ်” သာ်ဝွံ ညးဗက်ဍုတ်ကာဂှ် ဟီုရ။

ဇၟာပ်ဇၟာပ်တွဵုရး သွက်ဂွံစသုၚ် သ္ၚုအပ္ဍဲဍုၚ် ကဵုလဝ်အခေါၚ် ဗၠးဗၠးၜးၜးရောၚ်၊ ဟွံဒးကေတ် လိက်ထံက်ဂလာန် ဒေသတံရောၚ်၊ ဟွံဒးကဵုအကံက်အခေါၚ်ရောၚ်ဂှ် ပ္ဍဲဂိတုအံက်တဝ်ပါ ၂၀ ဏံ နူရုၚ်ပရေၚ်သွံရာန် ကပေါတ်တိတ်နူဝါဗ္ၚ တွဵုရးမန် နူဌာနဝန်ဇၞော် ပရေၚ်ပိုန်ဒြပ်ကေုာံ ကူသာန်သွံရာန် လလောၚ်တြးလဝ်ကီုလေဝ် ကာလဇက်သ္ၚုဂှ် ခရိတ်အိုတ်မံၚ် အတိုၚ်ကၠာတေံဖိုဟ်ရောၚ်ဂှ် ရဲကူသာန်သွံရာန်သ္ၚု နူကွာန်ကၟာဝက်မွဲတၠ ဟီုရ။

“သၞာံကၠာတေံတှေ် တတ်အာပွိုၚ်ဍုၚ်ဇကုတှေ် ရပ်သီထောံသ္ၚု နွံမံၚ်၊ လၟုဟ်ဂှ် ဟွံရပ်ရပုဟ်၊ ဆဂး ဒးကဵုမံၚ်လှုဲ ဗီုကၠာတေံဖိုဟ်” သာ်ဝွံ သၟာကူသာန်သွံရာန်သ္ၚုဂှ် ဟီုရ။

တုပ်တဴသာ်ဂှ်ကီု ကွဳစက်ဇက်သ္ၚု နူတွဵုရးမန် ဇက်ဏာဒေသခရိုၚ်ထဝဲါ ရးတၞၚ်သဳတေံဂှ်လေဝ် ပ္ဍဲဒဒန်ဇၞော် ဍုၚ်ရေဝ် ဒးကဵုဒၟံက်အကံက်ဖိုဟ်ရောၚ်ဂှ် ညးဆက်ဟီုရ။

ပ္ဍဲအခိၚ်ကသီုဏံ သွက်ဂွံပတိုန်သ္ၚု ရးတၞၚ်သဳဂှ် ဝန်ဇၞော်ရးတၞၚ်သဳ ဥူဃောန်ဇြဝ် ကဵုလဝ်အခေါၚ်ပၠုပ်သ္ၚု ကုကုမ္ပဏဳ အံၚ်မျေန်တူ (အောၚ်မြၚ်သူ) မွဲဓဝ်တုဲ ပ္ဍဲဒေသ ၚုဟ်သ္ၚုက္ဍၚ်တိုန် ဗွဲမလောန်ရောၚ်ဂှ် ဌာန်ပရိုၚ်ဂမၠိုၚ် ချူကၠုၚ်လဝ်ရ။

သ္ပပ္တံနူ ဂိတုအဝ်ဂါတ် ၁ သၞာံ ၂၀၁၀ တုဲ နူရးလ္ဂုၚ် ကဵုကၠုၚ်အခေါၚ်ပတိုန်သ္ၚု ဗၠးဗၠးၜးၜး ကုဒေသတွဵုရးကချေၚ်၊ ကယျာ၊ ကရေၚ်၊ မန်၊ သေံ၊ ရးမာန္တလေဝ်၊ သေက်ကာၚ်၊ ဨရာဝတဳ၊ ဗဂေါ ကေုာံ ဒေသမၞုံအပ္ဍဲရးလ္ဂုၚ်လ္ၚဵုတံရ။

ပ္ဍဲတွဵုရးဍုၚ်မန်မ္ဂး သ္ပပ္တံနူခေတ်မဆလတေံ သွက်ပရေၚ်ဂီုကၠီု ဖျေံကၠုၚ်သၞေဟ်ကၚ် ဇၟာပ်ဇၟာပ်ပွိုၚ်ဍုၚ်ဂဇအ်ရုၚ်တုဲ ဗက်ကၠုၚ်ဒၟံၚ်အကံက် နူကွဳစက်ပ္ဍိုက်ဗၞိက် ကေုာံ ကွဳစက်ပ္ဍိုက်မၞိဟ်တံဂှ် ဒှ်မံၚ်အလေံမွဲရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.