သၟာဗ္ၚမန်တံ စောဲဂဗုတ်ကဵု ကုမ္ပဏဳ ဇြေကပါရောၚ်

ဂျူရဳဆာဲ – တိဗ္ၚ ၈၁၅ ဨက သၟာဗ္ၚမန်တံ ပိုၚ်ပြဳလဝ်ဂှ် နူကုမ္ပဏဳ ဇြေကပါ ဂွံအာအခေါၚ်ကၠောန်တုဲ သၟာဗ္ၚမန်တံ ဟွံပေၚ်စိုတ်ဂှ်ရ ထပ်စောဲအာဂဗုတ် ပ္ဍဲဌာနမဆေၚ်စပ်တံပၠန်ရောၚ် ဂွံတီကေတ်ရ။
 
သၟာဗ္ၚတံကဵု ကုမ္ပဏဳ ဇြေကပါတံ ဂရၚ်ပ္တီ သွက်သ္ဂောံဂွံ အခေါၚ်ကၠောန်တိဂှ်တုဲ နူကုမ္ပဏဳ ဇြေကပါ ဂွံအာအခေါၚ်ဂှ်ရ ဒးထပ်စောဲဂဗုတ်ပၠန်ရောၚ်ဂှ် သၟာဗ္ၚမန် နာဲကျဝ်သိၚ် ဟီုရ။
 
“တိဏံဂှ် ပွိုၚ်ၜါစှော်သၞာံပေၚ်ပေၚ် ပိုဲကၠောန်ကၠုၚ်အဆက်ဆက်၊ နူကုမ္ပဏဳ ဇြေကပါ နူသၞာံအာတေံရ လုပ်သီထောံ၊ လၟုဟ်လေဝ် ညးတံ ဂွံအာအခေါၚ်ကၠောန်ပၠန်ရ။ ညိလေဝ် ပိုဲဟွံပြေစိုတ်ပုဟ်၊ ဆက်စောဲအာအမှုဏောၚ်” သာ်ဝွံ ညးဟီုရ။
 
တိဗ္ၚ ၈၁၅ ဨက သၟာဗ္ၚမန်တံ ပိုၚ်ပြဳလဝ် မၞုံအပ္ဍဲအုံကွာန် (ရေႊနံ႕သာ) ပွိုၚ်ဍုၚ်မၚ်္ဂလာဍုၚ် လ္ဂုၚ်သၟဝ်ကျာတေံဂှ် နူကုမ္ပဏဳ ဇြေကပါ ဥူဃောန်ယှိုဲ သွက်သ္ဂောံသိုၚ်ခၞံ ဇြုၚ်စက်ဏောၚ် ဂးတုဲ ပ္ဍဲသၞာံ ၂၀၁၀ ဂိတုဖေဖေဝ်ဝါရဳဂှ် စသီကၠုၚ်လဝ်ရ။
 
သွက်အခေါၚ်ကၠောန်တိဂှ် ပ္ဍဲဂိတုမေ ၂၈ နူခရိုၚ်သၟဝ်ကျာ ရးလ္ဂုၚ် ပတိတ်ကဵုလဝ်လိက် ကုကုမ္ပဏဳဇြေကပါ နူအုပ်ဓုပ်ကွာန် မွဲကဆံၚ်ရောၚ်ဂှ် နာဲကျဝ်သိၚ် ဟီုရ။
 
အခိၚ်စသီတိဂှ် နူကုမ္ပဏဳ ဇြေကပါ သိုၚ်ဇြုၚ်စက်ရောၚ် ဟွံဟီုဂးကဵု သၟာဗ္ၚတံမွဲသာ်၊ နူအလဵုအသဳကၟိန်ဍုၚ် သီကေတ်ဏောၚ် ဟီုတုဲ သီကေတ်ထောံ နကဵုၚုဟ် မွဲဨက ၃ ကိုဋ်ရ။ သၟာဗ္ၚတံဂှ် ဟွံပေၚ်စိုတ်တုဲ တေၚ်ပလံၚ်လိက်ကဵု ဌာနမဆေၚ်စပ်တံ ဂၠိုၚ်ဂၠိုၚ်ကဵုဝါတုဲ သီုကေၚ်စောဲကၠုၚ်ဂဗုတ် နွံကီုရ။
 
တိဗ္ၚ ဒးဒုၚ်သီလဝ် လၟုဟ်ဏံဂှ် လောန်ကၠုၚ်ၜိုတ် ၂၀ သၞာံတေံရ သၟာဗ္ၚမန် ပြံၚ်ဆုဲကၠုၚ် နူပွိုၚ်ဍုၚ်ဇြပ်ဗု၊ မုဟ်ဍုၚ် ၜိုတ် ၈၀ တၠတံ ပိုၚ်ပြဳလဝ်တုဲ ဖျေံသဇိုၚ် ကၠောန်ကၠုၚ်သြောံမွဲဂကူဓဝ်တုဲ ဂယိုၚ်ကၠုၚ်ဗုၚ်ဂၞဴအိုတ်ရ။
 
ပ္ဍဲဂအာၚ်တိ ဒးဒုၚ်သီလဝ်ဏံဂှ် နူကုမ္ပဏဳ ဇြေကပါ သွက်သ္ဂောံသိုၚ် ဇြုၚ်စက် (၁၊ ၂၊ ၃) တုက်ပလီုမံၚ် ကၟိုန်၊ ဇုက်ဗၞၚ် အပ္ဍဲခံက်တုဲ ဖံက်ဂၠံၚ်ကွဳစက်၊ ပတူတိုၚ်ပၟတ်တုဲ စဳဇန်မံၚ် သွက်သ္ဂောံကလေၚ်သွံ နဒဒှ်ဂအာၚ်သ္ၚိအိုတ်ရ။
 
ပ္ဍဲသၞာံ ၂၀၁၀ တေံ သွက်သ္ဂောံ ဒုၚ်တဲၚုဟ်လေဲ တိဗ္ၚဂှ် ၝောံမၞိဟ်အရာပ်တံ ကော်သၟာဗ္ၚတံတုဲ ပရာန်စကာကဵုသၟာဗ္ၚတံ ထပက်စၟတ်တဲ ပ္ဍဲလိက်ပလး ဂၠိုၚ်ဂၠိုၚ်ကဵုဝါရ။
 
ပ္ဍဲဂိတုမေ ၁၀ ဏံဂှ်လေဝ် သၟာဗ္ၚမန်တံ ကၠောန်သဘၚ်မ္ၚဵုထဲတိတုဲ လပါ်ကုမ္ပဏဳ ဇြေကပါတံဂှ်လေဝ် သိုၚ်ခၞံမံၚ်လတူတိဂှ်ရ ယဝ်ဟွံဂွံအခေါၚ်ကၠောန်မ္ဂး ညးလဵုမွဲလေဝ် တဵုပလောံ သိုၚ်ခၞံ လတူတိဏံ ဟွံဂွံရောၚ်ဂှ် နူအုပ်ဓုပ်ပွိုၚ်ဍုၚ် မၚ်္ဂလာဍုၚ် ရးလ္ဂုၚ် ကၠုၚ်တာဒၞာလဝ် နွံရောၚ်ဂှ် နာဲကျဝ်သိၚ် ဟီုရ။