ဌာန်ပရိုၚ်ဗၠးၜးမန် – အသေအဟာန် စှေ်ဘာ တန်ဗ္တောန်ကွတ်ပၞာန်သဇိုၚ် ဒပ်ပၞာန်ဗၠးၜး ကောန်ဂကူမန် လၟေၚ် ၁၀၀ ဂှ် နူတနိတေံ ကၠောန်ဗဒှ် ပ္ဍဲကွာန်ပလိုၚ်ဂျပါန်၊ ပယျဵုကျာ်ပိ အာစိုပ်ဒတုဲရ။
တုပ်တဴသာ်ဂှ်ကီု တန်ဗ္တောန်ကွတ်ပၞာန်သဇိုၚ် လၟေၚ် ၁၀၀ ပ္ဍဲခရိုၚ်မတ်မလီု၊ ခရိုၚ်သဓီု၊ ဌာန်ဂအုပ်ဗဟဵုတံလေဝ် ကၠောန်ဗဒှ်အာစိုပ်ဒတုဲကီုရောၚ်ဂှ် ဒု-သကိုပ်ဗိုလ်ဇၞော် ဗညာဆာန်နန် မဒှ်သကိုပ်တမ်ဒပ် လၟိဟ် (၅) ဟီုဂးဏာ ပ္ဍဲဂလာန်စှေ်ဘာဂှ်ရ။
“ၜိုန်ရပါ်ဒၞာဲတုဲ ကဵုတန်ဗ္တောန်ကီုလေဝ် သီုဖအိုတ်ဂှ် လၟေၚ် ၁၀၀ ဖအိုတ်ဏောၚ်ဂှ် နူရုၚ်ဂအုပ်ပၞာန်ဗဟဵု သ္ပလဝ်သမ္တီရ။ တန်ဗ္တောန်ဂှ် လအ်ပွိုၚ် ၜိုတ် ၈ သတ္တဟ” သာ်ဝွံ ညးဟီုရ။
ပ္ဍဲတန်ဗ္တောန် လၟေၚ် ၁၀၀ ဏံဂှ် လၟိဟ်ကောန်သ္ဂံၚ် ၅၀၀ ပြၚ် ပါလုပ်ရောၚ်ဂှ်လေဝ် ဂွံတီကေတ် နူညးလျိုၚ် ဗော်ဍုၚ်မန်တၟိရ။
ပ္ဍဲကာလ ပရေၚ်ကလိုက်ကၟဵု ၁၉၈၈၊ ပ္ဍဲတန်ဗ္တောန်ကွတ်ပၞာန်သဇိုၚ် ဒပ်ပၞာန်ဗၠးၜး ကောန်ဂကူမန် လၟေၚ် ၅၈ ဂှ် လၟိဟ်ကောန်သ္ဂံၚ် ၈၀၀ ပြၚ် ကေုာံ လၟေၚ် ၅၉ ဂှ် လၟိဟ် ရ၅၀ ပြၚ် နွံကၠုၚ်တုဲ လၟိဟ်ကောန်သ္ဂံၚ်ဂၠိုၚ်အိုတ်ရောၚ်ဂှ် ဗော်ဍုၚ်မန်တၟိ သ္ပလဝ်သမ္တီရ။
ညးမအာတ်ဂရၚ်ပ္တီ လုပ်ဗော်ဍုၚ်မန်တၟိတံဂှ် ဒးတိုန်လဝ် ဘာသဇိုၚ်ကွတ်ပၞာန်ရောၚ်ဂှ်လေဝ် ညးတာလျိုၚ်မွဲတၠ နူဗော်ဍုၚ်မန်တၟိ ဟီုရ။
“တန်ဗ္တောန်ကွတ်ပၞာန်လၟုဟ်ဏံဂှ် ကောန်သ္ဂံၚ်တၟိ ဟွံသေၚ်ပုဟ်။ ကောန်သ္ဂံၚ်တြေံ ဟွံဂွံတိုန်လဝ် တန်ဗ္တောန်ကွတ်ပၞာန်သဇိုၚ်တံဏောၚ်။ ကောန်သ္ဂံၚ် ဟွံဂွံတိုန်လဝ် တန်ဗ္တောန်သဇိုၚ်တံဂှ် ဟွံလုပ်စရၚ် ပ္ဍဲရုၚ်ဂအုပ်ပၞာန်” သာ်ဝွံ ညးဟီုရ။
အခိၚ်ဗော်ဍုၚ်မန်တၟိ ဒေံါပန်ပှော် ၁၉၉၅ တေံ ဇြဟတ်ကောန်သ္ဂံၚ် ဗော်ဍုၚ်မန်တၟိ မၞုံကၠုၚ် လၟိဟ် ရ၈၆၀ တၠရောၚ်ဂှ် ချူကၠုၚ်လဝ် ပ္ဍဲလိက်ပရိုၚ် အလဵုအသဳရ။
ဗော်ဍုၚ်မန်တၟိဂှ် စဒက်ပ္တန်ကၠုၚ် နူလဒေါဝ်သၞာံ ၁၉၅၈ ကီုလေဝ် စိုပ်သၞာံ ၁၉၇၁၊ ဂိတုအဝ်ဂါတ် ၂၉ ဂှ်ဟေၚ် ဒက်ပ္တန်ကၠုၚ်မာန် ဒပ်ပၞာန်ဗၠးၜး ကောန်ဂကူမန်ရ။
အခိၚ်ကာလ စဒက်ပ္တန်ကၠုၚ်ဂှ် တမ်ဒပ်ရာဇာဓိရာဇ်မွဲဟေၚ် နွံကၠုၚ်တုဲ သကိုပ်တမ်ဒပ် ဒု-သကိုပ်ဗိုလ်ဇၞော် နာဲသိုၚ်ဖေ (ဥူလေဝ်ကျဳ) မဒှ်တုဲ ဒပ်ပါ် ဇြာန်သူ၊ သာနှေန်၊ မဳခေဝ် နွံကၠုၚ်ပိရ။