Categories
ပရိုၚ်

သွက်သ္ဂောံရာန် သြောံဇွောံမ ဒပ်ပၞာန် ကော်တေန်ဍာဂှ် ပါသီုဍုၚ်မန်

မာံတဵုလွဳ – သွက်သ္ဂောံရာန် သြောံဒေါဝ် သွက်ဇွောံမဒပ်ပၞာန် သၞာံ ၂၀၁၃-၂၀၁၄ နကဵုသၞောတ်တေန်ဍာ (သၞောတ်ကော်ဘိက်ကတိပါၚ် သွက်သ္ဂောံပၠုပ်ကပေါတ်၊ ကၠောန်ကမၠောန်) ဂှ် တွဵုရးမန် ပါလုပ်မံၚ် သီု ၁၀ ပွိုၚ်ဍုၚ်ရောၚ် ဂွံတီကေတ် အတိုၚ်လိက်ပရိုၚ် အလဵုအသဳတံ ချူလဝ် ပ္ဍဲဂိတုဒဳဇြေမ်ပါ ၃ ဂှ်ရ။

သြောံခံက် ပ္ဍဲတွဵုရးဍုၚ်မန်မွဲဒၞာဲ
နူဂိတုဂျာန္နဝါရဳ ၁၊ သၞာံ ၂၀၁၃ ဂှ် စရာန်အာ နကဵုသၞောတ်တေန်ဍာ တွဵုရးညးကဵုညး၊ ရးညးကဵုညး အတိုၚ်ဖျေံဆိၚ်လဝ်ဒၞာဲရောၚ် ဂွံတီကေတ်ရ။

“ပ္ဍဲစရၚ်တွဵုရး၊ ရး (၈) ရာန်ကေတ်သြောံ သွက်ဇွောံမဒပ်ပၞာန်ဂှ် တွဵုရးမန်တှေ် ပါသီု (၁၀) ပွိုၚ်ဍုၚ်” သာ်ဝွံ ညးမကူသာန်သွံရာန်သ္ၚု လတူဍုၚ်မတ်မလီုမွဲတၠ ဟီုရ။

ၚုဟ်နူဒပ်ပၞာန်ကဵုဂှ် အောန်နူၚုဟ်မ္ၚးကီု၊ သ္ဂောံပလံၚ်ဗစိုပ် စဵုကဵုဒပ်ပၞာန်ဂှ် ခက်ခုဲကီုတုဲ အစဳအဇန် ရာန်သြောံသွက်ဇွောံမဒပ်ပၞာန် ပ္ဍဲခရိုၚ်မတ်မလီု (၆) ပွိုၚ်ဍုၚ်ဂှ် ဟွံလောဲသွာရောၚ် သာ်ဝွံ ညးမကူသာန်သွံရာန်သြောံ နူဍုၚ်မုဟ်ဍုၚ်မွဲတၠ ဟီုရ။

“သၞာံအာဏံဂှ် ဗက်ရာန်အကြာအရာပ် အကြာကွာန် ဟွံဂွံတုဲ ဒးကဵုဗက်ရာန် ညးကူသာန်သွံရာန်တံ မွဲကဆံၚ်တုဲ ပၠုပ်ကဵုဒပ်ပၞာန် နကဵုသၞောတ်တေန်ဍာ” သာ်ဝွံ ညးဟီုရ။

ၜိုန်ဂှ်လေဝ် လပါ်ခရိုၚ်သဓီု ပွိုၚ်ဍုၚ်ပံၚ်၊ ပွိုၚ်ဍုၚ်သဓီုတံဂှ် ယဝ်ရကၠုၚ်ရာန် သြောံဇွောံမဒပ်ပၞာန်မ္ဂး သွံကဵုရောၚ် သၟာဗ္ၚတံ ဟီုရ။ ဗွဲတၟေၚ် နူဒပ်ပၞာန် ဖျေံသဇိုၚ် ဍုၚ်မတ္တမတံ ကၠုၚ်ရာန်ကေတ်ဒၟံၚ်ရောၚ်ဂှ်လေဝ် မိခိုၚ်မျေတ် တၠဗ္ၚ နူကွာန်ဝါကပိုဟ် ပွိုၚ်ဍုၚ်ပံၚ်ဂှ် ဟီုရ။

“သၞာံအာဏံ ကၠုၚ်ရာန်ဂှ် နူကွာန်ဝါကပိုဟ်ဏံ သွံကဵုကီု။ သြောံပရဟ် (၁၀၀) နတှေ် အနှေန် ပိကိုဋ်ဘာ်။ သၞာံဏံလေဝ် ၚုဟ်ဍေံကိတ်တှေ် သွံပၠန်ဏောၚ်” သာ်ဝွံ ညးဟီုရ။

ပရေၚ်ရာန်ကေတ် သြောံဇွောံမဒပ်ပၞာန်ဝွံ ဗွဲတၟေၚ် ပ္ဍဲဒေသသြောံသ္ၚုတိတ်ဂၠိုၚ် ရးဨရာဝတဳ၊ ရးဗဂေါတံဂှ် သၟာဗၞိက်တံ ရာန်ကေတ်တုဲ နူဂှ်မွဲကဆံၚ် ညးတံပၠုပ်ကဵု ဒပ်ပၞာန် နကဵုသၞောတ်တေန်ဍာအိုတ်ရောၚ်ဂှ် ညးတာလျိုၚ် နူဌာနသွံရာန် ကပေါတ်ဝါဗ္ၚ နူပွိုၚ်ဍုၚ်မုဟ်ဍုၚ်မွဲတၠ ဟီုရ။

ပ္ဍဲတွဵုရး၊ ရး ကော်လဝ်တေန်ဍာ သွက်သ္ဂောံရာန် သြောံဇွောံမဒပ်ပၞာန်ဂှ်မ္ဂး တွဵုရးကချေၚ်၊ တွဵုရးသေံ သၟဝ်ကျာ၊ တွဵုရးသေံ ဗၟံက်၊ တွဵုရးမန်၊ တွဵုရးယခေၚ်၊ ရးလ္ဂုၚ်၊ ရးသေတ်ကာၚ်၊ ရးမကွေ၊ ရးဗဂေါ ဗၟံက်၊ ရးဗဂေါ ပလိုတ်တံ ပါလုပ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.