နာဲမာန် –
ဟွံစိုပ်တရဴဏီ က္ဍိုပ်သ္ကိုပ်ပိုဲ မွဲတုဲမွဲ ဒးပြဟ်လလုဲအာ
တ္ၚဲဂိတုဇှေ် (၁၁) မံက်၊ June (19) ဂှ် သွက်ဂွံတိုန်အခန်ကၞၛာပန ဒု – ဥက္ကဌဗော်ဍုၚ်မန်တၟိ ဒေသပယျဵု ပ္ဍဲကွာန်ပလိုၚ်ဂျပါန်တုဲ က္ဍိုပ်သ္ကိုပ်ဗော်ပရေၚ်ဍုၚ်ကွာန် အပ္ဍဲဍုၚ်ၜါဗော်ကီု၊ ဂကောံခမဳသၚ် ကျာ်ဇၞော်အ္စာတၠဂမၠိုၚ်ကီု၊ ဂကောံမဟာဇန်ဂမၠိုၚ်ကီု ဇက်ဂၠောဲအာ ပ္ဍဲအကြာဗြဲမဂူတရိုပ်စှေ်ဒၟံၚ်ဂှ်တုဲ ကွဳစက်ဂမၠိုၚ် ကလိတ်ဂၞက် တံၚ်ဓဇက်အာဒၟံၚ်ညးသ္ကံ အလုံမွဲဒမြိပ်ဂၠံၚ်ဍာန်ကျာ်ပိဂှ်ရ။
ဇက်အာဒၟံၚ်ဂှ် ဟွံလအ်ဟွံလအ် ဒးမၚ်လဇဒၟံၚ်ညးသ္ကံရ။ ကွဳစက်မွဲဖ္ဍိုက် ဂၞက်အာမ္ဂး ကွဳစက်သှေ်တံ သွက်ဂွံတံၚ်ဂြဲညးသ္ကံဂှ် မပ္တံကဵုၜံက်တူကီု ဇုက်ပသဲကီု ကပေါတ်စက်တံၚ်ဂြဲ “စက်ဝေန်” လေဝ် ပါဒၟံၚ် ဇၟာပ်ကွဳစက်ရ။ အခိၚ်ဝွံ ဟိုတ်နူဒှ်ဥတုဗြဲဂူဆက်တုဲ ဂၠံၚ်ဍာန်ကျာ်ပိဂှ် ခလံက်ဂၞက် ဂၠံၚ်လီုဂၠိုၚ်တုဲ ကွဳစက် အာတရဴတံလေဝ် သိၚ်အာတၟာဂလိုၚ်ရ။
ဂကောံကွဳစက်တံဝွံ ဂကောံဒပ်ပၞာန်ခရိုၚ်ထဝဲါ ကေုာံ က္ဍိုပ်သ္ကိုပ်ဒေသခရိုၚ်ထဝဲါ၊ ဂကောံဒပ်ပၞာန်ခရိုၚ်မတ် မလီုကဵု က္ဍိုပ်သ္ကိုပ်ဒေသခရိုၚ်မတ်မလီု၊ ဒပ်ပၞာန်ခရိုၚ်သဓီု ကေုာံ က္ဍိုပ်သ္ကိုပ်ဒေသခရိုၚ်သဓီု ဖအိုတ်ကွဳ စက် (၁၃) ဖ္ဍိုက် ဇက်ဂၠောဲအာ အခန်ကၞာၛာပန ဒု – ဥက္ကဌဗော်ဍုၚ်မန်တၟိ နာဲရဿ ဇရေၚ်ဒေသပယျဵု ကွာန်ပလိုၚ်ဂျပါန်ဂှ်ရ။
တရဴဝွံ ဟိုတ်နူဒှ်အခက်အခုဲကဵု ဂၠံၚ်ဍာန်တုဲ အခိၚ်ဗ္တံသ္ဂာ (၂) နာဍဳမှ ဂွံစိုပ်ကွာန်ပလိုၚ်ဂျပါန်အိုတ်ရ၊ စိုပ်ဗက်ဟွံဂတာပ် ဂကောံဒုၚ်တၠုၚ်ဗ္စဖျုၚ်ကၟုဲတံ ကော်ဘိက်စပုၚ်သွတုဲ ညးတံဖျေံကဵုဒၞာဲဒၟံၚ် ပ္ဍဲကဵုကွာန် ပလိုၚ်ဂျပါန်ဂှ် မွဲမွဲဂကောံသ္ၚိမွဲမ၊ မွဲဂကောံမွဲဒၞာဲရ။
က္ဍိုပ်သ္ကိုပ်ဗော်ပရေၚ်ဍုၚ်ကွာန်မန်ၜါဗော်ဝွံ ဗော်ဒဳမဵုကရေဇြဳအလုံရးမန်ဂှ် ဥက္ကဌနာဲၚိုဲတိၚ် (အ္စာဇၞူမန်) ကဵု ဒု – ဥက္ကဌနာဲလှအံၚ် ကၠုၚ်စိုပ်တုဲ ဗော်ဒဳမဝ်ကရေသဳမန်ဂှ် ဖက်ဆောညးအုပ်ကာ အ္စာသဝ်နာဲဟံၚ်ဍုၚ် ကဵု ကေၚ်ကာနာဲသိုက်ဆီတံ ကၠုၚ်တိုန်စိုပ် ပ္ဍဲသဘၚ်သ္ပဂါရဝ္ၚာပန ဒု – ဥက္ကဌ နာဲရဿ ဂှ်ရ။ ကာလအခန် ဖျေံဇၟန်ပ္ကဴကဝးလေဝ် ပ္ကဴကဝးမွဲကဝးဂှ် က္ဍိုပ်သ္ကိုပ်ဗော်ၜါဂှ် ဖျေံမွဲစွံရ။
တ္ၚဲသ္ပဂါရဝ ဂျောန် (၂၀) ဂှ် က္ဍိုပ်သ္ကိုပ်ဗော်ဍုၚ်မန်တၟိ နူဌာနသွာၚ်နာနာကီု ဂကောံဒပ်ပၞာန်ဌာနနာနာကီု က္ဍိုပ်သ္ကိုပ်ပရေၚ်ဍုၚ်ကွာန် အပ္ဍဲဍုၚ်၊ မ္ၚးဍုၚ်ကီု ဂကောံမဟာဇန် ဗွိုၚ်မ္ၚးဍုၚ်၊ အပ္ဍဲဍုၚ်ဂမၠိုၚ်ကီု ဂကောံ ခမဳသၚ်၊ ဂကောံသဳလဂမၠိုၚ်ကီု ရှေ်သှေ်သ္ပဂါရဝ ရုပ်ကလာပ် ဒု- ဥက္ကဌ နာဲရဿ အခန်ညးကဵုညးရ။
မန်နူဍုၚ်မန်၊ မန်ဍုၚ်သေံ၊ သၟာကမၠောန်မန် နူဍုၚ်သေံကီု၊ ကၟုဲတၟေၚ် ဂကောံမဟာမိတ်ဂမၠိုၚ်ကီု၊ ပလံၚ်ဗ္စိုပ် လိက်သဝဏ်လၞီအောန်စိုတ်ကီု ကၠုၚ်သ္ပရှေ်သှေ် သ္ပဂါရဝ ကုက္ဍိုပ်သ္ကိုပ် ဒု – ဥက္ကဌ နာဲရဿ ရ။
ဂၠံၚ်တရဴဟွံတုပ် တိုၚ်ပ္ကဴကေတ်ဍုၚ်မန် တုပ်ပ်ရ
ဗော်ပရေၚ်ဍုၚ်ကွာန်မန်ပိဗော် မတွံဂး ဗော်ဍုၚ်မန်တၟိ၊ ဗော်ဒဳမဵုကရေဇြဳအလုံရးမန်၊ ဗော်ဒဳမဝ်ကရေသဳ မန် သီုပိဗော်ဂှ် တိုၚ်ပ္ကဴကေတ်ဍုၚ်မန် နွံကဵုအဝဵု (သာ်ဂှ်ဟွံသေၚ်) ဒက်ပ္တန်ခၞံဒၟံၚ် ကံကုသဵုဂကူမန် မန်ညံၚ်ဂွံဖန်ဖက်ကေတ်တ်မာန် သီုပိဗော်ဂှ် ရန်တၟံတုပ်ပ်ရ။
ဂၠံၚ်တရဴဗော်ဂှ် တၞဟ်ခြာကီုလေဝ် တိုၚ်ပ္ကဴရန်တၟံကေတ်ဍုၚ်မန် တုပ်တုပ်ရ။ ဂၠံၚ်တရဴ ဗော်မွဲကုမွဲ ဟွံတုပ်ကီုလေဝ် တိုၚ်ပ္ကဴတုပ်မံၚ်မ္ဂး ပွမပါ်ထ္ကးညးသ္ကံရောၚ်ဂှ် ဟီုဟွံမာန်ရ။ က္ဍိုပ်သ္ကိုပ်ဗော်မန်ပိဂှ် ဓမံက်ပရေၚ်ကမၠောန်ဂှ် ပရေၚ်ကမၠောန်ညးကဵုညးရ၊ ဆဂး ကာလဒးဓမံက် ပရေၚ်ကမၠောန် ကောန်ဂကူမ္ဂး သီုပိဗော်ပံၚ်တုဲ ဓမံက်ဒၟံၚ်ရုပ်ရဴရ။
ဗီုကဵုတ္ၚဲၛာပန ဒု – ဥက္ကဌ နာဲရဿ ဂှ် ဗြဲၜိုန်လဵုဇၞော်ဇၞော် တရဴၜိုန်လဵုဝါတ်တ် က္ဍိုပ်သ္ကိုပ်ဗော်ၜါဂှ် သ္ပစၞးဗော် ညးတံတုဲ ရှေ်သှေ်သ္ပဂါရဝ ကရောံညးဍုၚ်ကွာန်ဂမၠိုၚ် ဖျေံပ္ကဴကဝး ကရောံညးဍုၚ်ကွာန် ကောန်ဂကူ မန်ဂမၠိုၚ်ကီုရ။
ၛာပနာ ဒု – ဥက္ကဌတုဲ တ္ၚဲဂျောန် (၂၄) ဂှ် က္ဍိုပ်သ္ကိုပ်ပိဗော်ဂှ်ကီု ဂကောံမဟာဇန်ဗွိုၚ်(၄)ဗွိုၚ် မပ္တံဗွိုၚ်ပယျဵု ကေုာံ ဍုၚ်သေံ၊ ဗွိုၚ်မန်ဍုၚ်သၟာၚ်၊ ဗွိုၚ်ဗော်ဍုၚ်မန်တၟိ၊ ဗွိုၚ်အပ္ဍဲဍုၚ် ဂကောံပံၚ်ကောံပရေၚ်ဂကူမန် ကၠောန်ပေဲါကောံဓရီု ကမ္မတဳကေၚ်ကာသမၠဲတုဲ သီုကဵုဘိက်ပၠောပ်ဏာ က္ဍိုပ်သ္ကိုပ်ဗော် အပ္ဍဲဍုၚ်ၜါဗော်ဂှ် ပ္ဍဲရုၚ်ဆက်ဆောံဝၚ်္က ကီုရ။
ကောံဓရီုဂှ် ချိၚ်ရန်လဝ် ပွိုၚ် (၂) တ္ၚဲရ။ ဆဂး သ္ဂုတ်သွာတ်ပရေၚ်ကမၠောန်ဂမၠိုၚ် ဟွံတုဲဒှ်တုဲ ဒှ်အာပွိုၚ် (၃) တ္ၚဲရ။ ပ္ဍဲဂှ် က္ဍိုပ်သ္ကိုပ်ဗော်ဍုၚ်မန်တၟိ ဥက္ကဌနာဲထဝ်မန်၊ ညးအုပ်ကာနာနာ နာဲဟံသာ၊ က္ဍိုပ်သ္ကိုပ် ဗော်ဒဳမဵုကရေဇြဳအလုံရးမန်ဂှ် ဥက္ကဌနာဲၚိုဲတုၚ်(အ္စာဇၞူမန်)ကဵု ဒုဥက္ကဌနာဲလှအံၚ်၊ က္ဍိုပ်သ္ကိုပ်ဗော်ဒဳမဝ် ကရေသဳမန်ဂှ် ဖက်ဆောညးအုပ်ကာ အ္စာသဝ်နာဲဟံၚ်ဍုၚ်ကဵု ကေၚ်ကာနာဲသိုက်ဆီ သၟေဟ်နူဂှ် နူကဵုဂကောံပံၚ်ကောံပရေၚ်ဂကူမန် ညးစၞးဗွိုၚ် (၄) ဗွိုၚ် ဗၞတ် (၃၀) တၠတံ တိုန်စိုပ်သဳကၠဳရ။
ပ္ဍဲဂကောံပံၚ်ကောံပရေၚ်ဂကူမန်ဂှ် အဓိကက္ဍိုပ်သ္ကိုပ်ဗော်ဍုၚ်မန်တၟိ က္ဍိုက်ပ်ပါလုပ်တုဲ ပံၚ်ဗစပ်လဝ် ဂကောံမဟာဇန် ဗွိုၚ် (၄) ဗွိုၚ်ဂှ်ရ။ က္ဍိုပ်သ္ကိုပ်ဗော်ပရေၚ်ဍုၚ်ကွာန်ပိဗော် ပါလုပ်ပ္ဍဲဝိုၚ်သဳကၠဳ ပ္ဍဲဂကောံပံၚ် ကောံပရေၚ်ဂကူမန်ဂှ် ဒှ်အရာတၟေၚ်တၟဟ် ဗွဲမလောန်ရ၊ ဗွိုၚ်အပ္ဍဲဍုၚ်တုဲကၠုၚ်တေံ သဳကၠဳဆာၚ်မုက် ဗီုဏံ နွံကၠာလေဝ် ဒုၚ်သ္ဇိုၚ်လ္တူတၚ်နၚ်မွဲမွဲသာ် ဟိုတ်ကတဵုဒှ်တုဲ ဆဵုဂဗညးသ္ကံရ၊ တ္ၚဲဂျောန် (၂၃-၂၄-၂၅) ဂှ် ဒှ်အရာသွက်ဂွံလးမဟာဗျူဟာ ပရေၚ်ကောန်ဂကူဗွဲတၟေၚ်ရ။
ဝိုၚ်သဳကၠဳဂှ် ဟိုတ်နူက္ဍိုပ်သ္ကိုပ်ဗော်တံ စုၚ်လေၚ်တုဲ လးဖျေံဏာ ပရေၚ်ကမၠောန် သွက်ဂွံကၠောန်သဘၚ်သဳ ကၠဳကောန်ဂကူမန်ကီု သီုကဵုလးဖျေံလဝ် မူဝါဒ သွက်ဗော်အပ္ဍဲဍုၚ်ၜါဗော်ဂှ် ဗွဲအပြောံကီုရ။
သွက်ဂွံကၠောန်သဘၚ်သဳကၠဳကောန်ဂကူမန် သၠဲသၠဲလးလးမွဲဂှ် သီုပိဗော်ကီု သီုဂကောံမဟာဇန် ဗွိုၚ်နာ နာတံ တုပ်စိုတ်သွက်ဂွံကၠောန်ရ။ ဆဂး လလံဂွံကၠောန်သဘၚ်သဳကၠဳကောန်ဂကူမန်ဂှ် ဒးကၠောန်ကောံ ဓရီုဇၞော် ပရေၚ်ဂကူမန်ကၠာရောၚ်ဂှ်လေဝ် သ္ဂုတ်သွာတ်လဝ်ရ။ တၚ်သ္ဂုတ်သွာတ်ဂမၠိုၚ်ဂှ် ဓမံက်ထ္ၜး ဏာရ။
၁။ ဂွံကၠောန်ဗဒှ်သဘၚ်သဳကၠဳ ကောန်ဂကူမန်ဂှ် ကျဝ်ဒုၚ်ပဠေဝ်ပဠေတ်လဝ် က္ဆံၚ်ၚ်အတိုၚ်ဗွဲသၟဝ်ဏံရ။
(က) ဂွံဒှ်သ္ဇိုၚ်ကၠောန်ဗဒှ် သ္ဘၚ်သဳကၠဳကောန်ဂကူမန်ဂှ် ဒးကၠောန်ဗဒှ် ကောံဓရီုဇၞော်ပရေၚ်ဂကူမန်ကၠာ ရောၚ်။
(ခ) ကောံဓရီုဇၞော် ပရေၚ်ဂကူမန်ဂှ် ကၠောန်ဗဒှ်လဇုဲအိုတ် ပ္ဍဲဂိတုသေပ်တေန်ဗာတုဲ သဘၚ်သဳကၠဳကောန်ဂ ကူမန်ဂှ် ကၠောန်ဗဒှ်အာ ပ္ဍဲဂိတုဒဳဇြေန်ဗာ၊ သၞာံ (၂၀၁၃) ဏံရောၚ်။
(ဂ) ကမၠောန်အိုဿီုဂှ် နကဵုဗော်ဍုၚ်မန်တၟိ၊ ဗော်ဒဳမဵုကရေဇြဳအလုံရးမန် ကေုာံ ဗော်ဒဳမဝ်ကရေသဳမန်တံ က္ဍိုက်ပ်ကၠောန်အာရောၚ်။
(ဃ) ဂွံကၠောန်ဗဒှ် ကောံဓရီုဇၞော်ပရေၚ်ဂကူမန်ဂှ် ဒးပံက်ပ္တိုန်ဂကောံကမၠောန်မွဲ ကော်ခဴယၟု “ ကမ္မတဳ ကၠောန်ဗဒှ် ကောံဓရီုဇၞော်ပရေၚ်ဂကူမန်” ရောၚ်။
(ၚ) ပ္ဍဲကဵုကမ္မတဳကၠောန်ဗဒှ် ကောံဓရီုဇၞော်ပရေၚ်ဂကူမန်ဂှ် ဒးရုဲစှ်ဂကောံနာယက (၅) တၠရောၚ်။ နူဗော်ဍုၚ် မန်တၟိ (၁) တၠ၊ နူဗော်ဒဳမဵုကရေဇြဳအလုံရးမန် (၁) တၠ၊ ဗော်ဒဳမဝ်ကရေသဳမန် (၁) တၠ ကေုာံ ဂကောံသၚ် (၂) ဇကုရောၚ်။
(စ) ဂကောံကမၠောန်ဂှ် ဒးရုဲစှ်ကမ္မတဳတိုၚ် (၁၅) တၠရောၚ်။ နူဗော်ဍုၚ်မန်တၟိ (၂) တၠ၊ နူဗော်ဒဳမဵုကရေဇြဳ အလုံရးမန် (၂) တၠ၊ ဗော်ဒဳမဝ်ကရေသဳမန် (၂) တၠ ကေုာံ နူဂကောံပံၚ်ကောံပရေၚ်ဂကူမန် (ဂကောံ နာနာ) ၉ တၠ မဒှ်ရောၚ်။
(ဆ) ယၟုညးစၞးရုဲစှ်လဝ်တံဂှ် ဒးပလံၚ်ဗ္စိုပ်ရုၚ်တိုၚ် ဂကောံပံၚ်ကောံပရေၚ်ဂကူမန် ပယျဵု (ဟွံသေၚ်) ရုၚ်ပါ် အပ္ဍဲဍုၚ်တုဲ တ္ၚဲဒးပလံၚ်ဗ္စိုပ်လက္ကရဴအိုတ်ဂှ် ဂိတုဂျူလာၚ် (၇)၊ သၞာံ ၂၀၁၃ ဏံရောၚ်။
(ဇ) ဒၞာဲကၠောန်သ္ပ ကောံဓရီုဇၞော်ပရေၚ်ဂကူမန်ဂှ် ရုဲစှ်လဝ်ဗွဲအပြောံ ဒးဒှ်ဍုၚ်မတ်မလီုရောၚ်။
(စျ) တၚ်ပတဝ်က္ဍိုပ် ပေဲါကောံဓရီုဇၞော်ဝွံ ရုဲစှ်လဝ် (၅) တၚ် အတိုၚ်ဗွဲသၟဝ်ရ။
- သွက်ဂွံကၠောန်သဘၚ်သဳကၠဳကောန်ဂကူမန်
- အလုံကောန်ဂကူမန် ဂွံညဳသာဒှ်မွဲဇြဟတ်
- ဍုၚ်ပိုဲ ညံၚ်ဂွံၜိုဟ်သြိုဟ် တန်ကြန်ဖောအ်ဗြေဝ်တဴတက်တိုန်
- သွက်ဂွံဒက်ပ္တန်ဓဝ်ၜိုဟ်လလမ်ဍာ်ဇမၠိၚ် ပ္ဍဲဍုၚ်ပိုဲ
- သွက်ဂွံဓဇက်အာ မဟာဗျူဟာပရေၚ်ဂကူမန်
သာ်ဝွံ ဖျေံလဝ်တၚ်သ္ဂုတ်သွာတ် ပရေၚ်ကမၠောန် သွက်ဂွံကၠောန်သဘၚ်သဳကၠဳကောန်ဂကူမန် ဂှ်ရ။
ဒုၚ်ဂိုၚ်ကေတ် ပဠေဝ်သၞောဝ် တုပ်ပ်ရ
စပ်ကဵုဗော်ပရေၚ်ဍုၚ်ကွာန် အပ္ဍဲဍုၚ်ၜါေဗော်ဂှ် ဖျေံလဝ်သ္ဂုတ်သွာတ် တၚ် (၆) ဂှ် ဓမံက်ထ္ၜးလဝ် သာ်ဝွံရ၊
(၆) ဗော်ကောန်ဂကူမန် MDP ကဵု AMDP ၜါဗော်ဝွံ အခါလညာတ်တုပ် ပရေၚ်ကမၠောန်တုပ်မ္ဂး ညံၚ်ဂွံဒှ် ပံၚ်ဒှ်မွဲဗော်ဂှ် ညးဂမၠိုၚ်စှေ်စိုတ် လညာတ်တုပ်သၟဟ်ရ။ အခါလညာတ်ဟွံတုပ် ပရေၚ်ကမၠောန် ဟွံတုပ် ဏီမ္ဂး ညံၚ်ဂွံကၠောံက္ဍကြပ်ကၠုၚ်ညးသ္ကံကီု ကမၠောန်ပရေၚ်ဂကူ ညံၚ်ဂွံစိုပ်တရဴဂၠိုၚ်ကီု ပံက်ဂကောံ “ပံၚ်တောဲဓမံက်ရုပ်ရဴကမၠောန်”တုဲ ဆက်စပ်ကၠောန်ၜိုတ်အာရောၚ်။ ပ္ဍဲဂကောံပံၚ်ကောံပရေၚ်ဂကူမန် (MAU) လေဝ် ပံၚ်တောဲကၠောန်အာရောၚ်ဂှ် သာ်ဏံဖျေံလဝ်နွံရ။
ဂကောံပံၚ်တောဲဓမံက်ရုပ်ရဴကမၠောန် ဗော်ၜါဂှ် ညးဂှ်ပါ၊ မွဲဗော်မုစိတၠပါ၊ တ္ၚဲလဵုပံက်ဂှ် ဟွံစၟတ်ပိုၚ်ခြာလဝ် ပ္ဍဲကောံဓရီုဂှ်ရ။ သွက်ပေဲါရုဲမာဲဂတ (၂၀၁၅) ဂှ် နဲကဲပံၚ်တောဲဗော်ၜါ ဗွဲအပြောံ ဖက်ဆောညးအုပ်ကာ ဗော်ဒဳမဝ်ကရေသဳမန် အ္စာသဝ်နာဲဟံၚ်ဍုၚ် သဳကၠဳပ္တိုန်ထ္ၜးလဝ်ကီုရ။
ညးဟီုဂှ် “အခါစိုပ် အခိၚ်ပေဲါရုဲမာဲတှေ် ဗော်ၜါဂှ် ပြေပြံၚ်ညးသ္ကံတှေ် ပံၚ်တွဵုရ၊ ယဝ်ဟွံဒှ်ပံၚ်တွဵုတှေ် သၞောဝ် (၂၀၀၈) ဂှ် ဗီုဗော်ပိုဲကြိုက်စိုတ် အလဵုအသဳ ဟွံပဠေဝ်ကဵုရောၚ် ဟီုတှေ် သောၚ်ၚ်ရ၊ ယဝ်ရဗော်ပိုဲ ဆက်တန်တဴအာ နကဵုဗော်လုပ်သၞောဝ်မွဲတှေ် ဒၞာဲဒေသ ဗော်ဒေသ AMDP လုပ်ဟွံစိုပ် ဒၞာဲခက်ခုဲနွံဂှ် ဗော် MDP ပိုဲအာဒုၚ်ရုဲတှေ် ကျကျ၊ ဇၞးဇၞး အဓိပ္ပဲါသွက်ဗော်ဂွံဂျိုၚ်ရ၊ သွက် AMDP မုပြသၞာဟွံမွဲပုဟ်၊ သာ်ဂှ်ဟွံသေၚ် ယဝ်ရဟွံဒှ်ပံၚ်တွဵု လုပ်ပြိုၚ်ပေဲါရုဲမာဲသီုၜါဗော် ယဝ်ဒှ်တှေ် ဥပမာဍေံ – ပ္ဍဲမွဲပွိုၚ်ဍုၚ် ဒးရုဲမာဲၜါသ္ကုတ်ရောၚ်တှေ် မွဲသ္ကုတ်ဂှ် AMDP ရုဲ၊ မွဲသ္ကုတ်ဂှ် MDP ရုဲတှေ် ပြေပြံၚ်မာန်ရောၚ် အဲစှေ်စိုတ်” သာ်ဏံ နာဲဟံၚ်ဍုၚ် ပ္တိုန်ထ္ၜးရ။
ဒု – ဥက္ကဌ နာဲလှအံၚ် AMDP ဟီုဂှ် “သာ်လဵုဒှ်ဒှ်ရ ဂွံဇၞးမာဲ (၂၀၁၅) တေံတှေ် ဟဒိဇကု ဟဒိသြိုဟ် (ကိုယ်ဖိရၚ်ဖိ) တုဲတှေ် ပံၚ်ရောၚ်၊ ယဝ်ဟွံဒှ်ပံၚ်တှေ် မန်ပိုဲ ကျမာဲဍာံဍာံရောၚ်၊ ပံၚ်ဂှ် ဒးပံၚ်တွဵုရရောၚ်” သာ်ဏံ ဒု – ဥက္ကဌဂှ် ဟီုရ။
ဗော်ပရေၚ်ဍုၚ်ကွာန်မန်ၜါဗော်ဂှ် ဂၠံၚ်တရဴဟွံတုပ်တုဲ ဂွံပံၚ်ဗစပ်သ္ပမွဲဗော်ဓဝ်ဂှ် ဒှ်ပရေၚ်ဆိုအ်ဗညိရ၊ ပရေၚ် ကမၠောန်ဗော် ၜိုန်ရဆိုအ်ဗကၠာလေဝ် ပရေၚ်ကမၠောန်ကောန်ဂကူတှေ် သွက်ဒးဆိုအ်ဗ ဟွံမွဲမွဲသာ် ရောၚ်။
“ဟိုတ်နူဂၠံၚ်တရဴဟွံတုပ်တုဲ မွဲတဲဓဝ် ဂွံပံၚ်ဗစပ်ဂှ် ဍေံဝါတ်ညိရောၚ်၊ ၜိုန်ပံၚ်ဗစပ်ဟွံဂွံ ဒှ်ကၠာလေဝ် နဲကဲဂွံကၠောန်ဓမံက်ရုပ်ရဴကမၠောန်ဂှ် ချပ်သဳကၠဳစညးသ္ကံတုဲ ကၠောန်အာမ္ဂး ဒှ်မာန်ရောၚ်၊ ဟိုတ်ဂှ်ရ ပံက်ထောံကမ္မတဳပံၚ်တောဲဓမံက်ရုပ်ရဴကမၠောန် မွဲတှေ် ဍေံကၠောန်လောဲအာရောၚ်” သာ်ဏံ ညးအုပ် ကာနာနာ NMSP လေဝ်ဒှ်၊ ညးအုပ်ကာနာနာ UNFC လေဝ်ဒှ် နာဲဟံသာ ပၠုပ်လညာတ်ရ။
ပရေၚ်ဂၠံၚ်တရဴဗော် ဟွံဒှ်ပံၚ်ဗစပ်ကီုလေဝ် ပရေၚ်ကမၠောန်ပံၚ်တောဲဂွံဂှ် ပံၚ်တုဲကၠောန်အာ ပရေၚ်ကောန် ဂကူမွဲစွံမ္ဂး ပြသၞာဟွံမွဲရ၊ ညးဍုၚ်ကွာန်ကောန်ဂကူမန်ဂမၠိုၚ်လေဝ် စှေ်စိုတ်ထံက်ဂလာန်ရ၊ ပကတိ ဗော်မန်ၜါဗော် လုပ်ဒၟံၚ်ပေဲါဗ္တိုက် တ္ၚဲဏံဂှ် ကေတ်အခေါၚ်အရာကောန်ဂကူ သီုၜါဗော်ရ၊ နဲကဲရ တၟေၚ်ခြာနွံညိရ၊ ဗော် AMDP ဂှ် ဂစာန်ပဠေဝ်သၞောဝ် ပ္ဍဲစၠတ်ထဝ်၊ MDP ဂှ် ဂစာန်ပဠေဝ်သၞောဝ် မ္ၚးစၠတ်ထဝ် ဟီုလဝ်သာ်ဂှ်ကီုလေဝ် သီုဗော်ၜါဂှ် ဒုၚ်ဂိုၚ်ကေတ် ပဠေဝ်သၞောဝ် ၂၀၀၈ တုပ်ပ်ရ၊ ဒက်ပ္တန်ဍုၚ်မန် ဇကုဇကု (ကံကုသဵုမန် မန်ဖန်ဖက်ကေတ်တ်) တုပ်ပ်ရ၊ ရန်တၟံသွက်ဂွံဒက်ပ္တန် ကၟိန်ဍုၚ် ပံၚ်ကောံဇေတ်တ် (မူဖေဝ်ဒရေဝ်) တုပ်ပ်ရရောၚ်။ ။
(တၚ်သမ္တီ - ဗီုဝွံ အဃောက္ဍိုပ်သ္ကိုပ်ပိဗော် ချပ်သဳကၠဳ ပရေၚ်ဂွံကၠောန်သဘၚ်သဳကၠဳကောန်ဂကူမန် ရုၚ်ဆက်ဆောံဝၚ်က ဂျောန် ၂၂-၂၃)