တ္ၚဲဂျူလာၚ် ၁၉ ဝွံ တ္ၚဲလုပ်ဝၚ်ဍုၚ်ပိုဲမွဲတ္ၚဲရောၚ် စၟတ်သမ္တီလဝ်အိုတ်ရ။ သွက်ဂကူဗၟာတံမ္ဂး ဆလံလေဝ် တ္ၚဲဝိုတ်ကၠေံဟွံမာန်ဂွံဒှ်ကၠုၚ်ဟီုဂှ် သ္ကိုပ်ပၞာန်အံၚ်သာန် ကေုာံ က္ဍိုပ်သ္ကိုပ်လ္ၚဵုတံ သ္ဒးဒုၚ်သ္ပကာဂစိုတ် တ္ၚဲစုတိချိုတ်အာဏံ စၟတ်ကၠုၚ်တ္ၚဲအာဇာနည်တုဲ ကၠောန်သ္ပကၠုၚ်လဝ်အခန်ကၞာလၞီဗှ်သၞာ တ္ၚဲဏံပေၚ်အာ ၆၆ သၞာံရအဴ။
ဗွဲတၟေၚ် ဟိုတ်နူသ္ကိုပ်ပၞာန်အံၚ်သာန် ဒးဒုၚ်ကာဂစိုတ်ကၠေံအာတုဲ ဍုၚ်ဗၟာဂွံသၠးပွးဟီုဗက်ဟွံဂတာပ် ပၞာန်အပ္ဍဲဍုၚ်က္တဵုဒှ်ကၠုၚ် ဒဵုကဵုတ္ၚဲဏံဏီရ။ သ္ၚဳဂၠိပ်ရံၚ်မ္ဂး က္ဍိုပ်သ္ကိုပ်ကောန်ဍုၚ်အရၚ်တံကဵု သ္ကိုပ်ပၞာန်အံၚ်သာန်တံ အတိုၚ်တုပ်ကၠုၚ်လဝ်စိုတ် လိက်ကသုက်ပေန်လုၚ် ဂှ် ဟိုတ်နူက္ဍိုပ်သ္ကိုပ်ဗၟာတံ ဟွံစွံဂရု၊ ဟွံထမံက်ကၠုၚ်လဝ်ရုပ်ရဴရ။
ဗီုတေံကီု အပ္ဍဲဝၚ်ကောန်ဂကူမန်တံဟီုမ္ဂး တ္ၚဲဂျူလာၚ် ၁၉ ဂှ် တ္ၚဲဝိုတ်ကၠေံထောံဟွံမာန် ဒှ်မံၚ်ကီုရ။ မန်တံရပ်လွဟ်တဝ်စၞေဟ်ကၠုၚ် ပေၚ် ၁၀ သၞာံ ၁၀ ဗြဲတုဲ စိုပ်သၞာံ ၁၉၅၈ ဂိတုဂျူလာၚ် ၁၉ ဂှ် ဗော်ပၠတရဴဍုၚ်မန် သၠာဲနဲကဲဗျူဟာပရေၚ်ဍုၚ်ကွာန် သၠာဲကၠေံလွဟ်ကဵုပရေၚ်ၜိုဟ်လလမ် ကုဇရေၚ်အလဵုအသဳဝန်ဇၞော် ဥူဏုတံရ။
ဂွံပရေၚ်ၜိုဟ်လလမ်ဍာံဍာံ၊ ဒက်ပ္တန်သၞောတ်ဒဳမဝ်ကရေသဳမာန်ရောၚ် ဟိုတ်နူဗော်ပၠတရဴဍုၚ်မန် ပတှေ်ကေတ်ကၠုၚ်လဝ်ပေၚ်ၚ်တုဲ ဥက္ကဌနာဲအံၚ်ထောန် က္ဍိုက်ပ်ပအပ်ဖျေံကၠုၚ်လွဟ် သီုကောန်ပၞာန်လၟိဟ် ၁၁၁၁ ပေၚ်ၚ်ရ။ ပ္ဍဲကာလတေံ နကဵုက္ဍိုပ်ညးပါလုပ်ကၠုၚ်ဗော်ပၠတရဴဍုၚ်မန် သှေ်တဴမံၚ်လၟုဟ် ၂ တၠဂှ် အစာနာဲထောန်တိၚ် ကေုာံ နာဲၚိုဲတိၚ်တံ ဆက်ယိုက်ဂၠေၚ်ဒၟံၚ်တာလျိုၚ်ဂကူ အပ္ဍဲဗော်ဒဳမဝ်ကရေသဳမန်ဖိုအ်ရ။
နဲကဲပြံၚ်သၠာဲဗျူဟာ သၠာဲပအပ်လွဟ်ကဵု ပရေၚ်ၜိုဟ်လလမ်ဂှ် နာဲယှိုဲကျေန် ဒုၚ်ကေတ်ဟွံမာန်တုဲ တ္ၚဲယး ပ္ဍဲဂျူလာၚ် ၂၀ ဂှ် ပကောံဂွံဇြဟတ်သၟေဟ်ညိည ဒက်ပ္တန်ဗော်ဍုၚ်မန်တၟိ ဆက်ဇက်တိုန်ကၠုၚ်တရဴပၠန်ဂတးမန် လၟုဟ်ပေၚ်စိုပ်အာ ၅၅ သၞာံရအဴ။
ကၟိန်ဍုၚ်ဗၟာၜိုန်ရဂွံကၠုၚ်ဗၠးၜး ပေၚ်အာ ၆၅ သၞာံဟီုကီုလေဝ် ဒဵုလၟုဟ်သိုဟ်ပလိုတ်ကၠေံပၞာန်အပ္ဍဲဍုၚ်ဟွံမာန်ဏီ။ အကြာ ရဲအလဵုအသဳဂွံလဝ်အဝဵုကဵု ဂကောံကောန်ဍုၚ်အရၚ်ရပ်လွဟ် ရဲပၠန်ဂတးဂမၠိုၚ်တံဂှ် အဃောကာလ ဒက်ပ္တန်မံၚ် ဂလာန်ပတှေ်သ္ဂောံနွံသ္ဂးရ။ ဆဂးဂှ် ပရေၚ်အလဵုအသဳဗၟာတံ ဟွံထမံက်ကၠုၚ်ရုပ်ရဴ တၚ်နၚ်ပါလုပ်တုပ်လဝ်စိုတ်လိက်ကသုက်ပန်ေလုၚ် ကဵု ပရေၚ်ဇူလာၚ် ၁၉ မန်တံဖျေံကၠုၚ်လဝ်လွဟ်တေံဂှ် ညံၚ်ရဴသၞိၚ်အတိက် ဗက်စိုပ်ကၠုၚ်မံၚ် ပစ္စုပ္ပန်ဏံဖိုအ်ဏောၚ်။
ဖဵုဂကူမန်တံ ဂွံဒုၚ်စသိုၚ်ကၠုၚ် သၠာဲကၠေံလွဟ်ကဵုပရေၚ်ၜိုဟ်လလမ်သၞာံ ၁၉၅၈ ဂျူလာၚ် ၁၉ ဟီုမ္ဂး ဗွဲကြဴ စိုပ်သၞာံ ၁၉၆၂ အပ္ဍဲသ္ကိုပ်ပၞာန်နေဝေန် သီကေတ်အဝဵုဍုၚ်တုဲဂှ် က္ဍိုပ်သ္ကိုပ်မန် ၁၀ တၠပြၚ်ၚ်ကေုာံ သ္ဂံၚ်ဆာန်ဂကူရိုဟ်လၟိဟ်ဟွံမာန်တံ ဒးဒုၚ်ဖျေံစုတ်ထံၚ်သၞာံဇမၠိၚ်ရ။ ဟိုတ်ဂှ်တုဲ ခန်လ္ၚတ် ဂျူလာၚ် ၁၉ ဂှ် ကောန်ဂကူမန်ပိုဲတံကီု သီုကဵုကောန်ဍုၚ်အရၚ်ဘဝတုပ်သၟဟ်တံ သ္ဂောံစွံသတိပၠန်ဂတးမာန် ဖ္တိုက်ဖၟောဝ်ကဵုဏာရအဴ။