Categories
ပရိုၚ်

ဗော်ဍုၚ်မန်တၟိတံ ကၠောန်ဗဒှ်ပေဲါသဳကၠဳ ဆေၚ်စပ်ကဵု ပရေၚ်စဵုဒၞာကောန်ၚာ်

မာံလုၚ် – စနူကဵုဗော်ဍုၚ်မန်တၟိတံ ဒုၚ်ထပက်စၟတ်တဲ ကုဂကောံ Geneva Call ဂျဳနဳဗာခဝ်တံတုဲ ကၠောန်ဗဒှ်ကၠုၚ်မံၚ် ပေဲါသဳကၠဳဂၠိုၚ်ကဵုဝါတုဲကီုလေဝ် လၟုဟ်ဏံ ဆေၚ်စပ်ကဵု ပရေၚ်ဖအိုတ်ကၠေံ ကောန်ပၞာန်ကောန်ၚာ် ကေုာံ ပရေၚ်စဵုဒၞာကောန်ၚာ်တံဂှ် ကၠောန်ဗဒှ်ဏာလဝ် ပေါဲသဳကၠဳ Workshop အလန်ကိုပ်ကၠာအိုတ်ရ သာ်ဝွံ ညးလျိုၚ်ဆက်ဆောံဍုၚ်သၟာၚ် နာဲဟံသာဗိုန်ခိုၚ် ဟီုရ။

ပေဲါသဳကၠဳ workshop ဆေၚ်စပ်ကဵုပရေၚ်စဵုဒၞာကောန်ၚာ် (BNA)
ပေဲါသဳကၠဳ workshop ဆေၚ်စပ်ကဵုပရေၚ်စဵုဒၞာကောန်ၚာ် (BNA)
နာဲဟံသာဗိုန်ခိုၚ်ဆက်ဟီုဂှ်တှေ် “စပ်ကဵုသဳကၠဳ ပရေၚ်ဖအိုတ်ကၠေံကောန်ပၞာန်ကောန်ၚာ်ဏံဂှ် အလန်ကၠာအိုတ်ရ၊ နကဵုဗော်ပိုဲတံလေဝ် ပဲါနူပရေၚ်ဖအိုတ်ကၠေံ ကောန်ပၞာန်ကောန်ၚာ် ကဵု ပရေၚ်စဵုဒၞာကောန်ၚာ်တံတုဲ ကမၠောန်တၞဟ်ဟ်မဆက်စပ်တံလေဝ် ကၠောန်မံၚ်ကီုရ၊ အခိၚ်လၟုဟ်ညးတံကၠုၚ်စိုပ် သဳကၠဳဂှ် နကဵုဗော်ပိုဲတံလေဝ် ပဵုတုဲ ကၠိုဟ်အာကီုရ၊ နကဵုလညာတ်အဲဂှ်တှေ် ဝိုၚ်သဳကၠဳဏံဂှ် ခိုဟ်မံၚ်အိုတ်စောန်” သာ်ဝွံ ညးဟီုရ။

ပေဲါသဳကၠဳဝွံ စနူဂိတု နဝ်ဝေမ်ပါ စၟတ်တ္ၚဲ ၂၆ ဒဵုကဵု ၂၇ ပွိုၚ်ၜါတ္ၚဲ ကၠောန်ဗဒှ်ဏာ အပ္ဍဲရုၚ်ဆက်ဆောံမန် အပ္ဍဲဍုၚ်ဝၚ်က မၞုံကရပ်ဍုၚ်ကျာ်ပိ ပယျဵုသေံကဵုဗၟာတုဲ ညးစၞးနူခရိုၚ်နာနာ၊ ညးစၞးနူဒပ်ပၞာန် ကေုာံ ဂကောံနာနာတံ ၜိုတ် ၃၀ တၠ တိုန်စိုပ်အိုတ်ရ။

ဂကောံ ဂျဳနဳဗာခဝ် တံဂှ် ပဲါနူပရေၚ်ဖအိုတ်ကၠေံကောန်ပၞာန်ကောန်ၚာ် ကေုာံ ပရေၚ်စဵုဒၞာကောန်ၚာ်တံတုဲ သွက်ဂွံကၠောန်ဗဒှ်အာ ပရေၚ်သဳကၠဳ စပ်ကဵုပရေၚ်မၚ်မွဲညးဗြဴတံဂှ် ကော်ဘိက်ဟီုဂးလဝ်ကဵု ဗော်ဍုၚ်မန်တၟိကီုရ သာ်ဝွံ နာဲဟံသာဗိုန်ခိုၚ် ဆက်ဟီုရ။

ပေဲါသဳကၠဳဝွံ ညးတာလျိုၚ်ကိုန်အစဳဇန်အာယှကဆံၚ်သၠုၚ် Mr. Chris Rush ကေုာံ Mr. Reno Meyer တံ က္ဍိုက်ပ်တုဲ ကၠောန်ဗဒှ်လဝ် ဂွံတီရ။

ညးကၠာဲဘာသာအပ္ဍဲပေဲါသဳကၠဳ ညးတာလျိုၚ် ဂကောံကံက်နၚ်တၚ်အခေါၚ်အရာမၞိဟ်အပ္ဍဲဍုၚ်မန် နာဲအဲမန်ဟီုဂှ် “နကဵုအဲဟီုတှေ် Workshop ဏံဂှ် စပ်ကဵုသဳကၠဳမံၚ် ပရေၚ်ကမၠောန် ဖအိုတ်ကၠေံ ကောန်ပၞာန်ကောန်ၚာ်တံဂှ် ခိုဟ်မံၚ်ရ၊ ညံၚ်ဟွံဂွံသုၚ်စောဲဒး ကောန်ၚာ်တံ အပ္ဍဲပဋိပက္ခပၞာန်ဂှ် လၟုဟ်ဏံ ဒပ်ပၞာန်ဗၠးၜးမန်ကီု ဂကောံသ္ပသဇိုၚ်ကဵုမန်တံဂမၠိုၚ်ကီု သီုကဵုဂကောံတၞဟ်ဟ်တံလေဝ် ဗိုၚ်ကဵုကသပ် ဂၠာဲမံၚ်သွဟ်အိုတ်ရ၊

စပ်ကဵုပရေၚ်ကမၠောန် ဖအိုတ်ကၠေံကောန်ပၞာန်ကောန်ၚာ်တုဲ အပ္ဍဲဒေသလ္ၚဵုတံဂှု် ပြဟ်ဟ်ဏံ ထမံက်မံၚ်ရုပ်ရဴနွံမံၚ်ယျ” သာ်ဝွံ ညးဟီုရ။
အပ္ဍဲဂိတုအဝ်ဂါတ် သၞာံ ၂၀၁၂ တုဲကၠုၚ်ဂှ် သွက်ပရေၚ်ကမၠောန်ဖအိုတ်ကၠေံကောန်ပၞာန်ကောန်ၚာ်ဏံတုဲ ဗော်ဍုၚ်မန်တၟိကဵု ဂကောံဂျဳနဳဗာခဝ် တံ တုပ်လဝ်စိုတ် ထပက်လဝ်စၟတ်တဲဂှ် ဂွံတီကေတ်ရ။

တၚ်ရန်တၟံ ဂကောံဂျဳနဳဗာခဝ်တံဂှ်ဝွံ အတိုၚ်သၞောဝ်ဗၜတ်ဂၠးကဝ် သွက်ဂွံဖအိုတ်ကၠေံ ပရေၚ်တိုပ်မိုၚ်သၟဝ်တိ၊ ပအိုတ်ကၠေံပရေၚ်ပကီုပရာပ် စပ်ကဵုပရေၚ်လိၚ်၊ ဖအိုတ်ကၠေံကောန်ပၞာန်ကောန်ၚာ် ကေုာံ ပရေၚ်ထိၚ်ဒဝ်မၚ်မွဲ ၚုဟ်မးပွဳပွူသဘာဝတုဲ ဂကောံဝွံ လောန်ကၠုၚ် ၁၃ သၞာံတေံဂှ် ဒက်ပတန်လဝ်တုဲ ဖျေံလဝ်သဇိုၚ်အပ္ဍဲဍုၚ် ဂျဳနဳဗာ ကၟိန်ဍုၚ်သဝေတ်သဠာန် ဂွံတီရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.