ခတ္တာနန် – ညးတၠရမျာၚ်သၟာဒယှေ်ဒွက်မန် “လွဳ” ဝွံ ကဝးဒွက်ဘာသာဗၟာ အလန်ကိုပ်ကၠာအိုတ် မၞုံယၟု “နိဒါန်” ဂှ် ပ္ဍဲဂိတုဖေဖဝ်ဝါရဳ (၂၃) ဏံ စသွံတြးပ္တိတ်မံၚ်ရောၚ် ဂွံတီကေတ်ရ။
လွဳ ဂှ် “သၟာဒယှေ်ဒွက် အံၚ်ဇၞးမံၚ် ပ္ဍဲဗွိုၚ်ဂဳတဗၟာ လၟုဟ်ဏံဂှ်တှေ် ကောန်ဍုၚ်အရၚ်တံ ဗွဲမဂၠိုၚ် မဒှ်ကီုရ။ ဟိုတ်ဂှ်ရ အပ္ဍဲဂှ် ဂကူမန်လေဝ် ညံၚ်ဂွံပါလုပ်ကီု ရန်တၟံတုဲ ဒှ်ပ္တိတ်ကဝးဒွက်ဗၟာ သာ်ဏံရ” သာ်ဝွံ ဟီုရ။
ဆက်တုဲပၠန် နကဵုကောန်ဂကူမန်မွဲ စရာဲဍာ်ဒကေဝ်ဇကုဇကုတံဂှ် ဒးဓမံက်ထ္ၜးထေက်ကီု၊ ကၠောန်သ္ပရေၚ်တၠုၚ် နကဵုအဆံၚ်ကၟိန်ဍုၚ် ဗွဲမအံၚ်ဇၞးမာန်မ္ဂး ဂုန်စရာဲဂကူဇကု သၠုၚ်တိုန်အာရောၚ်ဂှ်လေဝ် ညးဆက်ဟီုရ။
ကဝးဒွက် “နိဒါန်” ဝွံ နကဵုဂကောံ IRON CROSS တိၚ်တက်ပၠောပ်လဝ် ပ္ဍဲ PTL Studio တုဲ ယၟုက္ဍိုပ်ဒွက်ဂမၠိုၚ်တံဂှ် “ဒီလိုနဲ့၊ ရှင်ကွဲ၊ ဂျေတော့ပ်၊ နေ့စွဲဟောင်း၊ မြို့ပြ၊ အလွမ်းတေးကဗျာ၊ သူငယ်ချင်းများ၊ အသည်ကွဲည၊ နိဒါန်း၊ မိုးမုန်တိုင်း၊ ဘဝ နှင့် ဆေးကြောလိုက်” တံ ပါလုပ်ကီုရောၚ် ဂွံတီကေတ်ရ။
အပ္ဍဲကဵုကဝးဒွက် “နိဒါန်” (၁၂) ဒွက်ဏံဂှ် နကဵုဇကု”လွဳ” ချူကေတ်လဝ် (၉) ပိုဒ်၊ ညးချူဒွက် သဠာယှူဖာန် ချူလဝ် (၃) ပိုဒ်တုဲ သွက်ကဝးဒွက်ဏံ ဂွံတိတ်မာန်ဂှ် ဒးကေတ်လဝ်အခိၚ် ဗၞတ် (၃) သၞာံရောၚ် သဂးရ။
လွဳ ဂှ် “ပတိတ်ကဝးဒွက်ဗၟာတုဲ ကၠဟ်ထောံကဝးဒွက်မန်လေဝ် ဟွံသေၚ်ရ။ သီုၜါဂကူဂှ် အဲဆက်ကၠောန် အာရောၚ်” သာ်ဝွံ ဟီုရ။
လောန်ကၠုၚ် (၃) သၞာံတေံဂှ်ဝွံ “လွဳ” ပ္တိတ်လဝ်ကဝးဒွက်မန် Rock ညးမွဲဓဝ် မၞုံယၟုကဝးဒွက် “ဇဵုတပ်” ဂှ် ဟိုတ်နူဂွံကၠုၚ်ပရေၚ်အံၚ်ဇၞးတုဲ ပ္ဍဲဗွိုၚ်ဂဳတမန်တံဂှ် ညးတီကၠုၚ် “လွဳ” ဂၠိုၚ်ကၠုၚ်ရ။
နကဵုသၟာဒယှေ်ဒွက်မန်မွဲ ဒယှ်တှ်ကၠုၚ် ပ္ဍဲဗွိုၚ်ဂဳတဗၟာမ္ဂး ဂုဏ်စရာဲဂကူဇကု သၠုၚ်တိုန်အာရောၚ်ဂှ်လေဝ် ညးမဒှ်တၠပညာသၟာဂဳတမန် “နာဲအာဲမန်” ဟီုရ။
နာဲအာဲမန် ဂှ် “ကဝးဒွက်ဏံ ဒယှ်၊ ဟွံဒယှ် ဟီုဂှ် အခိၚ်တံ ကဵုဏာသ္ဂုတ်သွာတ်ရ။ ဆဂး ဗီုခေတ်တဴတက်မံၚ်လၟုဟ်ဏံ နကဵု “လွဳ” ဒယှေ်ဒွက်ဗၟာမာန် ဗီုလၟုဟ်ဏံဂှ် သတ္တိဍေံဟေၚ်ရ။ အဲဂှ်တှေ် ကဝးဒွက်ဏံ ဒယှ်ရောၚ် ပတှေ်ကေတ်ရ” သာ်ဝွံ ညးဆက်ဟီုရ။
နကဵုသၟာဒယှေ်ဒွက်မန်ဂမၠိုၚ်တံဂှ် ညးပ္တိတ်ကဝးဒွက်ဗၟာ ဟွံဂၠိုၚ်ကွေံရ။ လောန်ကၠုၚ်ၜိုတ် (၁၀) သၞာံဂှ်ဝွံ သၟာဒယှေ်ဒွက်မန် မၞိက်ဆာန် “ငြိမ်းစည်သူ” ကေၚ်ပ္တိတ်လဝ် ကဝးဒွက်ဗၟာကီု၊ လောန်ကၠုၚ်ၜိုတ် (၃၀) သၞာံတေံဂှ် သၟာဒယှေ်ဒွက်မန် ဟံသာမာန် “ဇော်လတ်” ဂှ် ကေၚ်ပ္တိတ်လဝ် ကဝးဒွက်ဗၟာ မၞုံယၟု “မမေ့ပန်း” မွဲအလန်ကီုဂှ် ဂွံတီကေတ် ဇရေၚ်သၟာဂဳတမန်ဂမၠိုၚ်ရ။