ဗၟာ  ၊ အၚ်္ဂလိက် ၊  Font ၊  Converter

Breaking News
Home / ဂလာန်ညးဒါန်လိက် / သွက်ဒေါအ်ပန်ပှော် အလုံဍုၚ် ဟွံလောဲသွာဏီ

သွက်ဒေါအ်ပန်ပှော် အလုံဍုၚ် ဟွံလောဲသွာဏီ

သၟာပရိုၚ်ချူ:

ပရေၚ်သဳကၠဳ ဒေါအ်ပန်ပှော် အလုံဍုၚ် အလန်ပထမဂှ် ဂိတုမာတ်နူ ၅ စိုပ် ၈ လောန်ကၠုၚ်တေံ ကၠောန်ဗ္ဒျ်ကၠုၚ်ဒၞာဲ ဌာန်ဇၞူပရေၚ်ၜိုဟ်လလောမ် MPC ဍုၚ်လ္ဂုၚ်တုဲ တၚ်တုပ်စိုတ် မူပြောံမွဲတၞး တိတ်ကၠုၚ်ကီုလေဝ် တၚ်တုပ်စိုတ်ပေၚ်ၚ် ဟွံဂွံမာန်ဏီဂှ် ဂိတုမေ ၁၉-၂၀ ဏံ ကလေၚ်ဆဵုဂဗ သဳကၠဳရေၚ်သ္ကံပၠန်ရောၚ် ဂးရ။

တၚ်နၚ်ဟွံဒှ်ထပက်စၟတ်တဲမာန်တံဂှ် ဂွံသ္ၚဳဂၠိပ်လ္ၚတ်ဆဵုလဝ်အတိုၚ်ဗွဲသၟဝ်ဏံရအဴ။

ရံၚ်အာမူဝါဒပရေၚ်ၜိုဟ်လလမ် သ္ကိုပ်က္ဍိုက်ပ်ပၞာန်အလဵုအသဳဗၟာ ၆ တၚ်မ္ဂး
(၁) ကေတ်ပရေၚ်ၜိုဟ်လလမ်ဍာံဍာံ၊ ဆန္ဒဍာံဍာံဒးနွံ။
(၂) မၚ်မွဲအတိုၚ်လိခ်ကသုက် သ္ပစွံလဝ်ဂတိတုပ်စိုတ်။
(၃) လ္ပပတိတ်ပရဲကဵု လ္တူတၚ်တုပ်စိုတ်ပရေၚ်ၜိုဟ်လလမ်။
(၄) ညးဍုၚ်ကွာန်တံ လျိုၚ်ညံၚ်ဟွံဂွံဇြိုၚ်တိုန်။
(၅) အတိုၚ်ဥပဒေဍုၚ်တန်ကြန်ဒၟံၚ်တံ ညံၚ်ဂွံဒဂေတ်ဗက်အာဍိုက်က်ပေၚ်ၚ်။
(၆) ဒုၚ်တဲအရာတာလျိုၚ်ပိုဲ ၃ တၚ်ကေုာံ ကြက်ရှ်သာဒဳမဝ်ကရေသဳ နကဵုသ္ဇိုၚ်သၞောဝ်ဥပဒေ ၂၀၀၈ ဂှ် ညံၚ်ဂွံပါလုပ်၊ ဂါံကွာ်၊ ရေၚ်တၠုၚ်အာ။

လ္တူတၚ်မူဝါဒ ၆ တၚ်ဏံ လပါ်ဂကောံကောန်ဍုၚ်အရၚ်ရပ်လွဟ် NCCT တံ ဒုၚ်တဲဟွံမာန်ဂှ် တၚ် ၅ ကေုာံ ၆ ဂးရ။

မွဲလပါ်ပၠန် အပ္ဍဲကောန်ဍုၚ်အရၚ်တံဟီုဂးသဳကၠဳဒၟံၚ် စပ်ကဵုဟီုဂးအရေဝ်ဝေါဟာ “ပၠန်ဂတး” “ဖိတ်ဒရေဝ်” “အခေါၚ်ကံကုသဵုဇကု ဇကုဖန်ဖက်ကေတ်မာန်”တံဂှ် အလဵုအသဳတံဟၟဲပၟိက် ဟီုဂးကၠုၚ်ဂွံမိၚ်ရ။

စပ်ကဵု ဖိတ်ဒရေဝ်၊ အခေါၚ်ကံကုသဵုဇကု ဇကုဖန်ဖက်ကေတ်မာန်တံ ကောန်ဍုၚ်အရၚ်တံအာတ်မိက်ကၠုၚ်မံၚ်ဆက်ဆက်ဂှ် တၚ်ဒတူလိုၚ်ညးတံသီုၜါလပါ် သ္ၚောဲခြာကၠုၚ်တုဲ သွက်ဂွံဆက်သဳကၠဳအာဂတတေံပၠန် ခက်ခုဲကၠုၚ်မာန်ရောၚ် က္ဍိုပ်သ္ကိုပ် NCCT တံ သ္ၚဳဂၠိပ်ပါ်ပါဲလဝ်ရ။

နကဵုအမိၚ်လလောၚ်ပတိတ်လဝ် ဂကောံဟွံလုပ်သၞောဝ်ကု ဂကောံရပ်လွဟ်ကောန်ဍုၚ်အရၚ်လ္ၚဵုတံနွံဒၟံၚ်ဏီဖိုအ် အတိုၚ်ဏံယဝ်ရထပက်ဏာစၟတ်တဲမ္ဂး ပၞောဝ်ကဵုမူဝါဒသ္ကိုပ်က္ဍိုက်ပ်ပၞာန်အလဵုအသဳဗၟာလၟေၚ်တၚ် ၅ တေံတုဲ ကေတ်အရေဝ်လ္တူညးပါလုပ်ဆေၚ်စပ်တံမာန်ရောၚ်ဂှ် အဓိပ္ပါယ်မံက်ဒၟံၚ်ကၠးကၠးရ။

တုပ်တဴသာ်ဂှ်ကီု သ္ဇိုၚ်သၞောဝ်အုပ်ဓုပ်ဍုၚ် ၂၀၀၈ ညးဍုၚ်ကွာန်တံထ္ၜးဒၟံၚ်ဆန္ဒတံဂှ် နကဵု NCCT ထ္ၜေက်မတ်တုဲဒုၚ်တဲဟွံသေၚ်။

ဂကောံရပ်လွဟ်ကောန်ဍုၚ်အရၚ်တံဗွဲမဂၠိုၚ် ၜိုန်ရထပက်ကၠုၚ်စၟတ်တဲတၚ်တုပ်စိုတ်ပရေၚ် ဒေါအ်ပန်ပှော်ကဆံၚ်တွဵုရး၊ ကၟိန်ဍုၚ်တံ ၂ ကဆံၚ်တုဲကၠုၚ်ကီုလေဝ် ဒၞာဲဒေသလ္ၚဵုဟိုတ်နူဒပ်ပၞာန်အလဵုအသဳတံ ထပက်ပၞာန်ပေါဲဗတိုက်ဗွဲမဂၠိုၚ်က္တဵုဒှ်ဒၟံၚ်ဂှ် ပရေၚ်တုပ်လဝ်စိုတ်သာ်လဵုရော သၟာန်နွံတိုန်ကၠုၚ်ရ။

အဃောဂစါန်ကၠောန်ဒၟံၚ် သွက်ဒေါအ်ပန်ပှော်အလုံဍုၚ်ဂွံတုဲဒှ်အာမာန်ဏံဂှ် ဒၞာဲဒေသတွဵုရးကချေၚ်ကေုာံ သေံ(သျှာန်) သၟဝ်ကျာတေံ အလဵုအသဳတံသၠုၚ်လဝ်ဇြဟတ်ထပက်ပၞာန်ဇၞော်ကဵုဇြဟတ်ဂှ်လေဝ် UNFC တံထံက်ထ္ၜးဟီုဂးကၠုၚ်ရ။

နကဵုအလဵုအသဳဗၟာမ္ဂး သၟိက်ဆန္ဒမိက်ဂွံထပက်စၟတ်တဲပရေၚ်ဒေါအ်ပန်ပှော်ဗွဲမပြဟ်ရောၚ် သမ္မတဇၞော်ဟီုဂးဒၟံၚ်ကီုလေဝ် ပရေၚ်ထပက်ဝေၚ်ဒၟံၚ်ပၞာန်တံဏံ ညးတာဒၞာဗဒေါအ်ကဵုဟွံမာန်ရဂှ် ပေါဲဗတိုက်ကချေၚ်တေံ ထ္ၜးဒၟံၚ်သက်သဳဖိုအ်ရ။

ဟိုတ်ဂှ်ရ ခြာဟွံလံကလေၚ်သဳကၠဳပရေၚ်ဒေါအ်ပန်ပှော်ဟီုဂှ် ဂၠံၚ်ဍာန်သ္ဂောံအံၚ်ဇၞး သ္ၚောဲခြာဟွံလောဲသွာဏီ နကဵုဌာန်ပရိုၚ်ဗၠးၜးမန် IMNA သ္ၚဳဂၠိပ်စၟဳညာတ်ရအဴ။

About Mon News Agency

ဗှ်မာန်မံၚ်

လိက်ဒုၚ်စဳရေၚ်အလဵုအသဳ ကဵု မှတ်ကၠတ်ထဝ်

ကောံဓရီုလၟေၚ်ဍာံအလန်စတုတ္ထ ကၠတ်ထဝ်တွဵုရးမန် အလန်ဒုတိယ ကၠောန်ကၠုၚ်လဝ် ပ္ဍဲဒဳဇြေမ်ဗာ ဒုတိယသတ္တဟ တုဲကၠုၚ်ဏံတုဲ အခါရ သ္ၚဳဂၠိပ်လိက်ဒုၚ်စဳရေၚ် ပ္တိုန်မှတ်ကဵုကၠတ်ထဝ်ဂှ် ဂွံတီကေတ် အစောံစရာဲ အဇေဟ်အမေဟ် ဍာ်သ္ကေဝ် အလဵုအသဳတွဵုရးမန်ရ။ …

Leave a Reply

%d bloggers like this: