ကောံဓရီုဇၞော်ကၠောံသၞာံဗော်ဂှ် ကၠောန်သ္ပဏာ ပ္ဍဲၝောံခန်ဆေၚ်နယူသကိုၚ် (New Sky) မၞုံအပ္ဍဲဗွိုၚ်ဥဒျာန်တာန် လောန် လ္တူဍုၚ်မတ်မလီုတုဲ ကောန်ဗော်နူကဵုဒေသဇၞော်ရးတနၚ်သဳ (၄) ပွိုၚ်ဍုၚ်၊ တွဵုရးမန် (၇)ပွိုၚ်ဍုၚ်၊ တွဵုရး ကရေၚ် (၂) ပွိုၚ်ဍုၚ်ဂမၠိုၚ် တိုန်စိုပ်ကၠုၚ် လၟိဟ်ညးစၞး (၁၉၀) တၠပြၚ်ရ။
“ပ္ဍဲကဵုကောံဓရီုပိုဲဂှ်တှေ် ပေဲါရုဲမာဲ (၂၀၁၅) တေံ ဗီုလဵုပိုဲပတဝ်က္ဍိုပ်တုဲ အာရော၊ ပရေၚ်ဒတူဒလိုၚ်ဗော်ဂှ် ဗီုလဵုရော၊ ဗီုလဵုပိုဲဆက်ကၠောန်အာရောဂှ် မိက်ဂွံလဴထ္ၜးသောၚ် ကလးကဵု ကောန်ဗော်တံ တုဲ ကော်လဝ်ကောံဓရီုဏံရောၚ်” သာ်ဝွံ ညးအုပ်ကာနာနာဗော် ဒံက်တာနာဲမေန်နဲသဵု ဟီုပ္တိတ် ပ္ဍဲပေဲါသောၚ်က္လးပရိုၚ်ရ။
ဒေသသွက်ဗော်ပိုဲဂွံလုပ်ပေဲါရုဲမာဲဂှ် ရုဲလဝ်ဗွဲအပြောံတုဲဒှ်ယျတုဲ သွက်ဂွံစှေ်ပရေၚ်စန်ဒက် ဒေသရုဲမာဲဂှ် ပိုဲတံ ဒး ကၠောန်မံၚ် တၟာဟလိုၚ်ဏီ၊ ပ္ဍဲကဵုစှေ်ပရေၚ်စန်ဒက်ဂှ် ပိုဲတံပါ်လဝ် (၃)သ္ကုတ်၊ မွဲဂှ်တှေ် ပရေၚ်စန်ဒက်ဗော် သွက် ဇြဟတ် ကောန်ဗော်ဂွံဇၞော်တိုန်၊ ၜါဂှ်တှေ် ကၠောန် (ကမ်ပိန်) ဏောၚ်၊ မွဲပၠန်ဂှ်တှေ် ညးတၠဆန္ဒမာဲတံ ညံၚ်ဂွံစုတ် မာဲလေပ်ဂှ် ကဵုအာတန်ဗ္တောန် ကုညးဍုၚ်ကွာန်တံရောၚ်ဂှ်လေဝ် ညးဆက်ဟီုရ။
“ဗော်ဒဳမဵုကရေဇြဳအလုံရးမန်ဂှ် ဒးစိုတ်သၞောဝ် (၂၀၀၈) တုဲ ဒက်ပ္တိုန်ဗော်တုဲ လုပ်ပြိုၚ်ပေဲါရုဲမာဲဟွံသေၚ်၊ ပ္ဍဲကဵု သၞောဝ် (၂၀၀၈)ဂှ် ဒၞဲါလ္ၚဵုလ္ၚဵု အခေါၚ်သွက်ဂွံဒတုဲဖဵု သွက်ကောန်ဂကူမန်၊ သွက်တွဵုရး၊ သွက်ကၟိန်ဍုၚ်နွံမံၚ်ဂှ်ရ ဒက် ပ္တန်ဗော်တုဲ လုပ်ကၠုၚ်ပေဲါရုဲမာဲ (၂၀၁၀) ရောၚ်” သာ်ဝွံ သဘာပတိဇၞော် နာဲသိုက် ဟီုဏာဂလာန် ပ္ဍဲကဵုကောံဓရီု တ္ၚဲပထမဂှ်ရ။
အပ္ဍဲကဵုကောံဓရီုကၠောံသၞာံဗော်ဒဳမဵုကရေဇြဳအလုံရးမန်ဂှ် သွက်ဂွံစှေ်ပရေၚ်စန်ဒက်ဗော်ကီု၊ သွက်ဂွံသၠဲပ္တိတ် ဒေသ ဒၞဲါရုဲမာဲ ကေုာံ သွက်ဂွံဂၠဲါသြန်ဂအုံဗော်ကီု၊ ညံၚ်သ္ဂောံဒှ်ဗော်ပရေၚ်ဍုၚ်ကွာန်မသၟးဇ္ၚးမွဲတုဲ သ္ဂောံပလေဝ် ပလေတ်စ သွက်ပေဲါရုဲမာဲ (၂၀၁၅)ကီု ပရေၚ်ကမၠောန် စပ်ကဵုသ္ဂောံသၠုၚ်ပ္တိုန် စရာဲဍာ်ဒ္ကေဝ်ကောန်ဗော်ကီုတံဂှ် သဳကၠဳလဝ်တုဲ ဓဇက်လးဖျေံလဝ်လၟေၚ်ကမၠောန်ဗော်ဂမၠိုၚ်နွံရ။
ညံၚ်သ္ဂောံဒှ်ဗော်ပရေၚ်ဍုၚ်ကွာန်မသၟးဇ္ၚးမွဲ ရန်တၟံပ္တဝ်က္ဍိုပ်တုဲ နကဵုဗော်ဒဳမဵုကရေဇြဳအလုံရးမန်ဂှ် သၠာဲအာကဵုတၞး ကာဒ်ကောန်ဗော်တၟိကီု အပ္ဍဲကဵုကောန်ဗော်ဂမၠိုၚ် ညးနွံပၟိက်မိက်ဂွံပြံၚ်လုပ်ဗော်တၞဟ်သၟာၚ်တံဂှ် လေဝ်ကဵုအခေါၚ် နူက်တိတ်တုဲ ညးနွံပၟိက်မိက်ဂွံက္လေၚ်စဴကၠုၚ်ဗော်မိဂှ်လေဝ် က္လေၚ်ဒုၚ်အာတဲရောၚ်ဂှ် သ္ဂုက်သွာတ်လဝ် ပ္ဍဲကဵုကောံ ဓရီုဂှ်နွံရ။
ပ္ဍဲကဵုဒၞဲါတာလျိုၚ် ဥက္ကဋ္ဌဗော် မသၠးမံၚ်ဂှ် ဗပေၚ်စုတ်လဝ် (ဒု) ဥက္ကဋ္ဌ နာဲသိုက်တုဲ ပ္ဍဲကဵုပွိုၚ်ဍုၚ်လ္ၚဵု ပ္တိုန်လဝ်ဂတဵုမုက် သီုၜါဗော်ဂှ် ညံၚ်ဂွံပလှ်စွံကဵုဂတဵုမုက်မွဲဗော်ဓဝ်ဂှ်လေဝ် သ္ဂုက်သွာတ်လဝ် ပ္ဍဲကောံဓရီုတ္ၚဲဒုတိယနွံရ။
ဗော်ဒဳမဵုကရေဇြဳအလုံရးမန်ဝွံ ပ္ဍဲသၞာံပေဲါရုဲမာဲ (၂၀၁၀) ဂှ် သွက်ဂွံကၠောန်ပ္တုဲဂုဏ်ဖဵုကဵု ကောန်ဂကူမန်တံ အပ္ဍဲဗွိုၚ် သၞောဝ်မာန်၊ဗော်ပရေၚ်ဍုၚ်ကွာန်မွဲ ဒးနွံထေက်ဂးတုဲ အတိုၚ်ဆန္ဒညးဍုၚ်ကွာန်၊ ခမဳသၚ်ဂမၠိုၚ်ဂှ် ပံက်ပ္တန်ဗော်မွဲ နကဵုယၟုဗော်ဒဳမဵုကရေဇြဳအလုံရးမန်တုဲ လုပ်ဒုၚ်ရုဲမာဲ စၞးအမာတ် (၃၄)တၠဂှ် ဂွံကၠုၚ်ညးစၞးအမာတ် (၁၆) တၠမဒှ်ရ။