Categories
ပရိုၚ်

သွက်ဂွံပဠေဝ်ၝောံပိုဒ် ၄၃၆ LND ကဵု ကွးဘာ ၈၈ တံကၠောန်ပေဲါဟီုတွံ ပ္ဍဲဍုၚ်မတ်မလီု

မန်ထဝ် – ပ္ဍဲကဵုသ္ဇိုၚ်သၞောဝ်အုပ်ဓုပ်ဒက်ပ္တန်ဍုၚ် (၂၀၀၈) ဂှ် ကိုပ်ကၠာအိုတ်ၝောံပုဒ် ၄၃၆ ဂှ် မုဟိုတ်ဒးပဠေဝ်ထေက် ဗော် (LND) ကေုာံ ဂကောံကွးဘာ (၈၈) တံ ပံၚ်တောဲ ကၠောန်ပေဲါဟီုတွံ ကေတ်ဆန္ဒညးဍုၚ်ကွာန် ပ္ဍဲဂိတုဂျောန် (၁၄)၊ ဒၞဲါၝောံခန် New Sky လ္တူဍုၚ်မတ်မလီုရ။

ပ္ဍဲကဵုပေဲါဟီုတွံဂှ် ကမ္မတဳကေၚ်ကာဗဟဵု ဗော် (LND) ဥူဉာဏ်ဝေန်၊ စၞးဂကောံကွးဘာ (၈၈) ကိုဝ်ဋ္ဌေကျဲ၊ ဥက္ကဋ္ဌ ဗော် (LND) တွဵုရးမန် ဒံက်တာဥူခေန်သံၚ် ကေုာံ ညးစၞးကၠတ်ထဝ် ဗော် (NLD) ဒဝ်ခေန်ဋ္ဌေကျဲတံ ထံက်ထ္ၜးသောၚ်ကၠးကဵု ဟိုတ်ပွမမ္ဒးပဠေဝ်ၝောံပုဒ် (၄၃၆) ဂှ် ညးဍုၚ်ကွာန်တွဵုရးမန်တံ တိုန်စိုပ်လၟိဟ် ၜိုတ် (၁၀၀၀) တၠ ဂွံဆဵုရ။

“ညံၚ်ဍုၚ်ကွာန် ဂွံကၠိုက်ကၟဵုဂှ် ပိုဲတံကၠောန်မံၚ်ဟွံသေၚ်၊ ညံၚ်ဂွံပဠေဝ်သၞောဝ်ဍုၚ်မာန်ဂှ် ပိုဲကွာ်ဂၠံၚ်တရဴ ၜိုဟ်ဟ် သြိုဟ်ဟ် နကဵုဆန္ဒညးဍုၚ်ကွာန်တံရောၚ်၊ စၟတ်တဲကံက်လဝ်တုဲတံဂှ်တှေ် ပိုဲပ္တိုန်အာကဵု ကၠတ်ထဝ်ဏောၚ်၊ စၟတ် တဲဏံ ဒှ်ဆန္ဒညးဍုၚ်ကွာန်၊ ဒှ်ရမျာၚ်ညးဍုၚ်ကွာန်တံရရောၚ်၊ အေဂှ်ရ ညးစၞးကၠတ်ထဝ်တံလေဝ် ၜိုတ်လဵုက္လၚ် ရမျာၚ်ညးဍုၚ်ကွာန်၊ ၜိုတ်လဵုကၠောန်ကဵုသွက်ညးဍုၚ်ကွာန်ရောဂှ် သွဟ်ဍေံတိတ်ကၠုၚ်ကေတ်တ်ရ” သာ်ဝွံ ဥူဉာဏ်ဝေန် ဟီုရ။

အပ္ဍဲသၞောဝ် (၂၀၀၈)၊ ချူဓမံက်လဝ် ၝောံပိုဒ် (၄၃၆) ဂှ် သွက်ဂွံပဠေဝ်သၞောဝ် (၂၀၀၈) မာန် လၟိဟ်ညးစၞးကၠတ် ထဝ်တံ ထံက်ဂလာန်ပေၚ် (၇၅) က္ဍိုပ်ကၠံပြၚ်တုဲကီု ဒုၚ်ကေတ်ဆန္ဒမာဲ နူကဵုညးဍုၚ်ကွာန် နွံကဵုအခေါၚ်စုတ်မာဲ မာန်တံတုဲ ညးဍုၚ်ကွာန်တံဂှ် ထံက်ဂလာန်ကဵုဆန္ဒမာဲ ပေၚ်လၟိဟ်ကဝက်ပြၚ်မှ ပလေဝ်သၞောဝ်ဂှ် ဒှ်ဒ္တန်ရောၚ် ဂးရ။

ကေၚ်ကာဗဟဵု ဗော် (NLD) ဂှ် “ဂွံပဠေဝ်ၝောံပိုဒ်ဂမၠိုၚ် မပါလုပ်မံၚ်အပ္ဍဲသၞောဝ် (၂၀၀၈) မာန်ဂှ် မၞိဟ်နွံအခေါၚ် ကဵုမာဲ အာယုက် (၁၈) သၞာံပေၚ်တုဲတံ ပ္ဍဲအလုံမွဲကၟိန်ဍုၚ် နွံလၟိဟ် (၆၀) ပြကောဋိကိုဋ်တှေ် မၞိဟ်ကၠုၚ်စုတ်မာဲ ပေၚ် (၃၀) ပြကောဋိကိုဋ်ပြၚ်မှ ပဠေဝ်သၞောဝ်ဂှ် ဒှ်ဒ္တန်ရောၚ်” သာ်ဝွံ ဟီုရ။

ဆက်စပ်ကဵုကဏ္ဍဒပ်ပၞာန် လုပ်ကေတ်လဝ်ဒၞဲါ ပ္ဍဲကၠတ်ထဝ် (၂၅) က္ဍိုပ်ကၠံဂှ်တုဲ နကဵုခေတ်ဒဳမဵုကရေဇြဳမ္ဂး အာဟွံဂွံ ရောၚ်ဂှ်လေဝ် ဂကောံမဇတၞောဝ်ကွးဘာ (၈၈) ကိုဝ်ဋ္ဌေကျဲ ထံက်ထ္ၜးကဵုရ။

“ဂွံဒှ်ပရေၚ်ဂီုကၠီုဍုၚ် ကဵု ဂွံဒှ်ပရေၚ်စဵုဒၞါဍုၚ်ဂှ် ပ္ဍဲဒပ်ပၞာန်တံ တာလျိုၚ်နွံမံၚ်ရ။ ဆဂး သွက်အခန်ကဏ္ဍဒပ်ပၞာန်ဂှ် ဒးကဵုမံၚ်ဒၞဲါ ပ္ဍဲကဵုကၠတ်ထဝ်ကီု၊ ပ္ဍဲကဵုကံၚ်ဇြဳ ပရေၚ်ဂီုကၠီု ကေုာံ ပရေၚ်စဵုဒၞါဂှ် ဒးကဵုလဝ်ဒၞဲါ သွက်ဒပ်ပၞာန်တံ ဗွဲတၟေၚ်ဂှ် နကဵုခေတ်ဒဳမဝ်ကရေဇြဳမ္ဂး အာဟွံဂွံရောၚ်” သာ်ဝွံ ဂးရ။

သၞောဝ် (၂၀၀၈) အခိၚ်တ္ၚဲဏံဂှ် အမာတ်စၞးညးဍုၚ်ကွာန်ဂွံလဝ်ဇၞးမာဲ ပ္ဍဲသၞာံပေဲါရုဲမာဲ (၁၉၉၀) တေံ မွဲတၠလေဝ် ဟွံပါလုပ်တုဲ ဓဇက်သ္ပလဝ်ဒ္တန်ရ။

ဟိုတ်ဂှ်ရ နူကဵုစကၠောန်သၞောဝ်တေံဂှ် သ္ပလဝ်စၞးကဵု ညးဍုၚ်ကွာန်တံ ဇေတ်တ် ဟွံသေၚ်ဂှ်ရ နကဵုပိုဲထံက်ဂလာန်ဟွံမာန်ရောၚ်၊ တုဲပၠန် သၞောဝ် (၂၀၀၈) ဒှ်မံၚ်ဒ္တန်လၟုဟ်ဂှ် ညးဍုၚ်ကွာန် မၞိဟ်နွံ ကဵုအခေါၚ်စုတ်မာဲမာန်တံ လုပ်စုတ်မာဲသီုဖအိုတ်လေဝ် ညံၚ်ပဠေဝ်ဟွံဂွံဂှ် ဓဇက်ဓရတ်လဝ်ရောၚ်ဂှ်လေဝ် ညးဆက်ဟီုရ။

သွက်ဂွံပဠေဝ်ၝောံပိုဒ် (၄၃၆) ပ္ဍဲသၞောဝ်သ္ဇိုၚ်ဒက်ပ္တန်ဍုၚ် (၂၀၀၈) မာန်ဂှ် ဗော် (LND) ကဵု ဂကောံမဇတၞောဝ် ကွးဘာ (၈၈) တံ ပံၚ်တောဲသောၚ်ကၠးကဵုမံၚ်ညးဍုၚ်ကွာန်တံ အလုံမွဲကၟိန်ဍုၚ်ဗၟာတုဲ စၟတ်တဲကံက်ဂွံလဝ် နူဆန္ဒညး ဍုၚ်ကွာန်တံဂှ် ပ္တိုန်ထ္ၜးကုဇရေၚ်ကၠတ်ထဝ်ရောၚ် ဂွံတီကေတ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.