အလန်တတိယ က္ဍိုပ်သ္ကိုပ်ကဆံၚ်သၠုၚ် ဂကောံပၠန်ဂတးရပ်လွဟ်ကောန်ဍုၚ်အရၚ်တံ ကၠောန်ဗဒှ်ကောံဓရီု ဒၞာဲဍုၚ်လာၚ်ဇြာ ဖျေံလဝ်မူစၞောန်ပညုၚ် ၁၀ တၚ်တံဂှ် စွံအဓိက သဳကၠဳအာရောၚ် သာ်ဏံ ညးဆက်ဟီုရ။
သ္ကိုပ်ဗိုလ်ဇၞော်ခေါန်ဥက္ကာဂှ် “အပ္ဍဲကဵုမူ ၁၀ တၚ်ဂှ်တှေ် လၟုဟ်ဏံ တက်ကျာဗီုပြၚ်ပိက္ဍိုပ်ဖဴပိမ ဗီုပြၚ်တၟိ ကော်စဂွံရ၊ တၞဟ်ခြာအာနူကဵု ဗီုပြၚ်က္ဍိုပ်ဖဴပိမ ဂကောံကုလသမဂ္ဂတံ ဟီုလဝ်ကၠာကၠာတေံရောၚ်၊ ပရေၚ်တက်ကျာဗီုပြၚ်က္ဍိုပ်ဖဴပိမ လၟုဟ်ဏံဂှ် စွံအဓိကဂကောံဇြဟတ်ဇၞော် ပိသွာၚ်တံဂှ်ရ၊ အပ္ဍဲကဵု ပိဂကောံပိသွာၚ်ဏံဂှ်ရ ဇြဟတ်ဂကောံဒးပါလုပ်ထေက်တံဂှ် ကလေၚ်ဗဗေၚ်အာပၠန်ဏောၚ်” သာ်ဝွံ ဟီုရ။
ဂကောံဇြဟတ်ဇၞော် ပၟိက်ဇၞော် ပိဂကောံ ပါလုပ်ထေက်တံဂှ် ဂကောံအလဵုသဳ၊ ဂကောံရပ်လွဟ်ကောန်ဂကူကောန်ဍုၚ်အရၚ် ကဵု ဂကောံဗော်ပရေၚ်ဍုၚ်ကွာန်အလုံသီုဖအိုတ်ဂှ် ညံၚ်ဂွံပါလုပ်အာ အပ္ဍဲပေဲါသဳကၠဳမာန်ဂှ် ချူဓဇက်ပညဳပညပ်လဝ် အပ္ဍဲကဵုဗီုတိထ္ၜးဂၠံၚ်တရဴပရေၚ်ဍုၚ်ကွာန်ကီုရ ညးဆက်ဟီုလဝ် သာ်ဏံရ။
တုဲပၠန် ပေဲါသဳကၠဳပရေၚ်ဍုၚ်ကွာန်အနာဂတ်ဂှ်မ္ဂး သ္ဘၚ်သဳကၠဳကဆံၚ်သၠုၚ်အိုတ်ဂှ် နကဵုသ္ဘၚ်သဳကၠဳပရေၚ်ၜိုဟ်လလမ်ကၟိန်ဍုၚ် ညံၚ်ဂွံကော်ခဴခုတ်အာယၟုကီု တၚ်နၚ်တၞဟ်သှေ်မံၚ်တံဂှ် ဆေၚ်စပ်ကဵုနဲကဲပရေၚ်ပညာဂမၠိုၚ် ပါလုပ်ရောၚ် ဂွံတီကေတ်ရ။
ကြဴနူအလဵုသဳကဵု ဂကောံရပ်လွဟ်ကောန်ဍုၚ်အရၚ်တံ ထပက်စၟတ်တဲလိက်ကသုက် ပရေၚ်ဒေံါပန်ပှော်အလုံကၟိန်ဍုၚ်မွဲတုဲ ဂွံဆက်ကၠောန်ကၠုၚ်အာ သ္ဘၚ်သဳကၠဳပရေၚ်ၜိုဟ်လလမ်ကၟိန်ဍုၚ် (ဝါ) ပေဲါသဳကၠဳပရေၚ်ဍုၚ်ကွာန်ဟီုမ္ဂး ညးတၠပညာကဵု ဂကောံမှာဇန်တံ ဂွံပါလုပ်အာဂှ် ဒုၚ်တဲဟွံမာန် သာ်ဝွံ က္ဍိုပ်သ္ကိုပ်ဂကောံ NCCT နာဲဟံသာ ဟီုဏာလဝ် အပ္ဍဲပေဲါသောၚ်ကလးပရိုၚ် ဒၞာဲလာၚ်ဇြာ အပ္ဍဲဂိတုဂျုလာၚ် ၂၉ တေံဂှ်ရ။
လပါ်အလဵုအသဳတံ အာတ်မိက်ပတိုန်ထ္ၜးလဝ် ညးစၞး ၈ သွာၚ်ပါလုပ်သဳကၠဳ ပရေၚ်ၜိုဟ်လလမ်အလုံဍုၚ်ဂှ် နကဵု NCCT ဒုၚ်တဲဟွံမာန် တးပါဲလဝ်ဂးရ။
တုဲပၠန် အပ္ဍဲလိက်လလောၚ်တြးဂိတုဂျူလာၚ် ၃၁ ကောံဓရီုက္ဍိုပ်သ္ကိုပ်ကဆံၚ်သၠုၚ် ဂကောံပၠန်ဂတရပ်လွဟ်ကောန်ဂကူ ကောန်ဍုၚ်အရၚ်တံ လလောၚ်တြးလဝ် “ တၚ်ရန်တၟံပရေၚ်ဍုၚ်ကွာန်ကောန်ဂကူ အလုံကောန်ဍုၚ်အရၚ်တံ ဒုၚ်ကေတ်လဝ် “ကၟိန်ဍုၚ်ဖေက်ဒရေဝ် ဍိုက်ပေၚ်ကဵုအခေါၚ်ဒဳမဝ်ကရေဇြဳ၊ အခေါၚ်အရာတုပ်သၟတ် ကဵု ကၟိုန်ဍုၚ်ဖိတ်ဒရေဝ်ဒုၚ်လျိုၚ်ကု အခေါၚ်အရာဖန်ဖက် ကံကုသဵုဇကုဇကုမွဲ ဂွံဒက်ပတန်အာမာန်ဂှ် ဆက်တုဲဂစာန်အာရောၚ်”ဂှ် ချူထမံက်ထ္ၜးလဝ်ရ။
သွက်ဂွံထပက်စၟတ်တဲတၚ်တုပ်စိုတ် ပရေၚ်ဒေံါပန်ပှော်အလုံကၟိန်ဍုၚ်ဂှ် ညးက္ဍိုပ် ကမ္မတဳထမံက်ရုပ်ရဴ ပရေၚ်ကမၠောန် ပရေၚ်ၜိုဟ်လလမ်ကၟိန်ဍုၚ်အလဵုသဳ (UPWC) ကဵု ဂကောံပညဳပညပ်ပရေၚ်ၜိုဟ်လလမ်အလုံကၟိန်ဍုၚ် (NCCT) တံ အပ္ဍဲဂိတုအဝ်ဂါတ် ဒုတိယသတ္တဟတေံ သွက်ဂွံဆဵုဂဗတက်ကျာသဳကၠဳ ဒၞာဲဍုၚ်လ္ဂုၚ် နွံမံၚ်ရောၚ် ပရိုၚ်တိတ်မံၚ်ကီုရလေဝ် ပရိုၚ်ဏံ သ္ပဒတန်ဟွံမာန်ဏီရ။