တ္ၚဲရောၚ် ညးအုပ် ကာနာနာ (UNFC) နာဲဟံသာ ဟီုရ။
“ဆဵုဂဗသဳကၠဳအာကဵု ဂကောံဇြဟတ်ပရေၚ်ဍုၚ်ကွာန် ပ္ဍဲဍုၚ် ပွိုၚ် ၂ တ္ၚဲဏောၚ် တုဲမှ ပိုယ်ကလေၚ်စ ကောံဓရီုအာပၠန်ဏောၚ်၊ စနူအဝ်ဂါတ် ၂၉ စိုပ် ၃၀ ဂှ် ဆဵုကဵု ဂကောံဇြဟတ်ပ္ဍဲဍုၚ်တုဲတှေ် ၃၁ ကဵု ၁ ဂှ် အောန်အိုတ် သွက်ဂွံသဳကၠဳအာ ပိုဒ်ဟွံတုဲတံဂှ် ၜိုတ်ပွိုၚ် ၂ တ္ၚဲပၠန်ဏောၚ်” သာ်ဝွံ နာဲဟံသာ ဟီုရ။
ဂကောံဇြဟတ်ပရေၚ်ဍုၚ်ကွာန် ပ္ဍဲဍုၚ် မစိုပ်ဒၟံၚ်ဍုၚ်သေံ ဍုၚ်္ၚၚ်မာဲတအ် မပ္တံ ကောန်ဂကောံ ဂအုပ်ဗော်ဒဳမဵုကရေဇြဳ ကောန်ဂကူ (NLD)၊ ကောန်ဂကောံ UNA ဂမၠိုၚ်ကီု အမာတ်ဇၞးလဝ်မာဲ သၞာံ ၁၉၉၀ ဂမၠိုၚ်ကီု တၞောဝ်ဒတောဝ်ကွးဘာ ၈၈ ကဵု ကမ္မတဳ ထ္ၜးရုပ်ရဴ စှေ်နူတၚ်သ္ဂုတ်သွာတ် ကောံဓရီုကၠောံသၞာံတအ်ဂှ် ဆဵုဂဗအာရောၚ် နာဲဟံသာ ဆက် ဟီုရ။
သ္ပမံၚ်ကောန်ဓရီု UNFC လၟုဟ်ဏံလေဝ် ပ္ဍဲလိက်သဝဏ် ဒဝ်အံၚ်သာန်သုဂျဳဂှ် သွက်ဂွံဒက်ပ္တန်အာပရေၚ် ၜိုဟ်လလံဍာ်ဇမၠိၚ် ဗိုန်န်ခိုၚ်ၚ်မာန် ပေဲါသဳကၠဳပရေၚ်ဍုၚ်ကွာန် သ္ဇိုၚ်မူမွဲ သဳကၠဳပညဳပညပ်အာမာန်ဏောၚ်ဂှ် အလဵုဇကုဒဝ်အံၚ်သာန်သုဂျဳ ပတှေ်တုဲ သီုထ္ပက်လဝ်စၟတ်တဲ ပ္ဍဲလိက်သဝဏ်ဂှ်ရ၊
ဆက်တုဲ မွဲအခိၚ်တေံ ပ္တိတ်မံၚ်ဇြဟတ် သွက်ဂှ်ထ္ပက်စၟတ်တဲ တၚ်တုပ်စိုတ်ဒေံါပန်ပှော် အလုံကၟိုန်ဍုၚ်မာန်ကီု သွက်ဂွံပညဳပညပ်အာ ပြဿနာပရေၚ်ဍုၚ်ကွာန် အလုံကၟိန်ဍုၚ်မာန်ဂှ် ကော်ကောံဓရီုဗီုဏံ ထေက်ကြိုက်ဍာံစၟတ်မံၚ်ရောၚ် သာ်ဝွံ ပ္ဍဲလိက်သဝဏ်ဂှ် ဆက်ချူလဝ်ရ။
ပ္ဍဲကောံဓရီု ပိသၞာံမွဲအလန် ဂကောံ UNCF ကၠောန်ဒၟံၚ်လၟုဟ်ဂှ် ဒှ်ပေဲါကောံဓရီုဇၞော် အလန်ပထမတုဲ လက္ကရဴ သွက်ဂှ်ရုဲပ္တိုန် က္ဍိုပ်သ္ကိုပ်တၟိဂမၠိုၚ်ကီု၊ ပဲါနူကောန်ဂကောံ မနွံပ္ဍဲဂကောံတုဲ သွက်ဂွံဒုၚ်တဲ ကောန်ဂကောံတၟိဂှ်လေဝ် ဒးသဳကၠဳအာနွံ မံၚ်ဏီရောၚ်ဂှ် ဂွံတီရ။
လၟုဟ် ဂကောံရပ်လွဟ် “ကိုဝ်က” ဂှ် နဒဒှ် ကောန်ဂကောံ UNFC တၟိ ဒုၚ်လဝ်တဲ ယာယဳတုဲ သွက်ဂွံဒုၚ်အာတဲ နဒဒှ် ကောန်ဂကောံလေဝ် ဆက်သဳကၠဳအာလၟိုန်ရောၚ် နာဲဟံသာ ဟီုရ။
သ္ပမံၚ်ကောံဓရီုဇၞော် အလန်ပထမလၟုဟ်ဏံ ညးမလုပ်ဂကောံ UNFC ပေၚ်ၚ်ဂှ် ဂကောံ KIO, KNU, KNPP,NMSP,CNF,SSPP,PNLO,PSLF,LDU,ANC,WNO,MNDAA,ကဵု ဂကောံမဆက်စပ်ဂမၠိုၚ် ALP, AA, DKBA,KNU/KNLA-PC,ABSDF တအ်ဂှ် သီုဖအိုတ်ညးစၞး ၜိုတ် ၁၀၀ တၠပြၚ် တိုန်စိုပ်သဳကၠဳလဝ်ရ။
ဆဂးဂှ် ဂကောံဒပ်မဟာမိတ် ဒဳမဵုကရက်တေတ်(မိုၚ်းလား)NDAA ကဵု UWSA “ဝ”တအ် တို်န်စိုပ်ကောံဓရီု UNFC ဟွံမာန်ရ။
ဂကောံ UNFC ဂှ် စနူပေဲါကောံဓရီုဇၞော်ကောန်ဍုၚ်အရၚ်မွဲကဆံၚ် ဒက်ပ္တန်လဝ် ပ္ဍဲဂိတုဖေဖဝ်ဝါရဳ သၞာံ ၂၀၁၁ တေံတုဲ စိုပ်ကၠုၚ်ဂိတုဖေဖဝ်ဝါရဳ သၞာံ ၂၀၁၄ ဏံ ပေၚ်အာပိသၞာံကီုလေဝ် လၟေၚ်ကမၠောန် ပရေၚ်ၜိုဟ်လလံဂှ် ဟိုတ်နူပေဲါသဳကၠဳဆက်ဂၠိုၚ်ဒၟံၚ်တုဲ အခိၚ်လ္ဇုဲလဇအာ ၆ ဂိတုတုဲမှ လၟုဟ်ဂွံသ္ပပေဲါကောံဓရီုမာန်ဂးရ။