ဗော် KNU တိတ်အာနူသဘၚ်သဳကၠဳ UNFC

ဂကောံညဳသၟဟ်ကောန်ဍုၚ်အရၚ် ဖက်ဒရေဝ်ကံၚ်သဳ UNFC အလန်ပထမ ကၠောန်ဗဒှ်လဝ် ဒၞာဲဍုၚ်ဇၚ်မာဲဂှ် ကၠာကောံဓရီုဟွံတုဲဒှ်ဏီ ပ္ဍဲအဝ်ဂါတ် ၃၁ ဂှ် က္ဍိုပ်သ္ကိုပ်ညးစၞး KNU တံ နုက်တိတ်အာရ သာ်ဝွံ ညးအုပ်ကာနာနာ UNFC နာဲဟံသာ ဟီုရ။

နာဲဟံသာဂှ် “ တၚ်လညာတ်ဟွံတုပ်ဂှ် ညးတအ်ကလေၚ်ချပ်စ ပ္ဍဲကဵု ဂကောံညးတအ် ပ္ဍဲဗဟဵုကမ္မတဳညးတအ်ပၠန်ဏောၚ်” သာ်ဝွံ ဟီုရ။

တၚ်နၚ်တၚ်ပံၚ်ဗစပ် ဒပ်ပံၚ်ကောံ ကေုာံ တၚ်နၚ်သၠဲပတိတ် ဒပ်ပံၚ်ကောံတအ်ဂှ် ဗော် KNU တံ ဟွံစှေ်စိုတ်တုဲ ကၠာသဘၚ်သဳကၠဳ UNFC ဟွံစိုပ်ဒတုဲဏီဂှ် ညးစၞးညးတံ နုက်တိတ်ကလေၚ်စဴအာယျ သာ်ဝွံ နာဲဟံသာ ဆက်ဟီုရ။

နကဵု KNU ဂှ် နုက်တိတ်နူဂကောံ UNFC ဟွံသေၚ်ကီုလေဝ် မူဝါဒသဇိုၚ်သၞောဝ်ဥပဒေ UNFC လ္ၚဵု တၚ်လညာတ်ဟွံကိတ်ညဳကဵုဂကောံ KNU တံနွံမံၚ်တံဂှ် သွက်ဂွံသဳကၠဳအပ္ဍဲဗော်ညးတံနွံမံၚ်တုဲ ညးစၞးညးတအ် နုက်တိတ်အာ နူသဘၚ်သဳကၠဳ UNFC ဂှ်ရ၊ သာ်ဝွံ ဒု-ဥက္ကဌ UNFC လေဝ်ဒှ် (ညးလျိုၚ်ပရေၚ်ဆက်ဆောံမဟာမိတ် KNU) ဒေဗေစ်တာကပဝ် ဟီုရ။

ဒေဗေစ်တာကပဝ်ဂှ် “ပရိုၚ် KNU နုက်တိတ်ဟီုမံၚ်ဂှ် ဒှ်ပရိုၚ်ဗၠေတ်တ်ဏောၚ်၊ ညးစၞး KNU တံဂှ် ပ္ဍဲတၚ်ပလေဝ် သဇိုၚ်သၞောဝ်ဥပဒေ UNFC ဏံ ဒၞာဲလ္ၚဵုဒးကလေၚ်သဳကၠဳကီု၊ ဒၞာဲပညဳဂွံလေဝ်နွံ ဒၞာဲပညဳဟွံဂွံလေဝ်နွံဏောၚ်၊ ဒၞာဲဟွံဂွံတံဂှ် ပိုယ်တံ သွက်ဂွံကလေၚ်သဳကၠဳကဵု ကမ္ပတဳပိုဲတုဲ ကလေၚ်စဴအာရ” သာ်ဝွံ ညးဟီုရ။

သၞောဝ် UNFC ကၠာတေံဂှ် နကဵုဂကောံ KNU ဒုၚ်တဲမာန်ကီုလေဝ် အပ္ဍဲပရေၚ်ပြံၚ်သၠာဲ ကာလဒၟံၚ်လၟုဟ်ဏံဂှ် သၞောဝ်လ္ၚဵုတံ ဒုၚ်တဲဟွံမာန်ဂှ်ရ ဗော် KNU တံ ဒးကလေၚ်သဳကၠဳအာပၠန် သာ်ဝွံ ညးဆက်ဟီုရ။

သဘၚ်သဳကၠဳ UNFC အလန်ပထမဂှ် စကၠောန်ကၠုၚ်လဝ် ဂိတုအဝ်ဂါတ် ၂၅ တုဲ ပ္ဍဲအဝ်ဂါတ် ၂၉ ဂှ် ဟိုတ်နူဒးဆဵုဂဗကဵု ဂကောံဇြဟတ်ပရေၚ်ဍုၚ်ကွာန်အပ္ဍဲဍုၚ်တံတုဲ ဒေံါဇူအာ ၂ တ္ၚဲ ပ္ဍဲအဝ်ဂါတ် ၃၁ ကလေၚ်ဆက်ကၠောန်အာ သဘၚ်သဳကၠဳပၠန်ဂှ် ဗော် KNU တိတ်အာနူကောံဓရီုရ။

နကဵုကောန်ဗော် KIO,KNU, KNPP,NMSP,CNF,SSPP,PNLO,PSLF,LDU,ANC,WNO,MNDAA,တအ် ဒက်ပ္တန်လဝ် ဂကောံ UNFC ပ္ဍဲသၞာံ ၂၀၁၁ တေံရ။