သွက်ဂွံထံက်ထ္ၜး ကဵုကသပ် ကုဗော်ဍုၚ်မန်တၟိ – ဒပ်ပၞာန်ဗၠးၜးကောန်ဂကူမန်ဂှ် နူကဵုဌာန်ပကောံ ရမျာၚ်ညးဍုၚ်ကွာန် ပွိုၚ်ဍုၚ်ဇြပ်ဗုက္ဍိုက်ပ်တုဲ တုဲကၠုၚ်ဂိတုသေပ်တေမ်ဗာ (၁) ဂှ် စတုဲစွံလဝ်ကဠာ ရမျာၚ်ညးဍုၚ်ကွာန် အပ္ဍဲကဵုဂတမုက်ရုၚ်ဆက်ဆောံဗော်ဍုၚ်မန်တၟိ ဍုၚ်ဇြပ်ဗုဂှ်ရ။
ကဠာလိက်ဝွံ မွဲဂိတုမွဲဝါ ပံက်အာတုဲ လိက်ညးဍုၚ်ကွာန်တအ် ပ္တိုန်ထ္ၜးစုတ်လဝ်ပ္ဍဲကဠာလိက်ဂှ် နူကဵုဌာန် ပကောံရမျာၚ်ညးဍုၚ်ကွာန်တအ် ပ္တိုန်ဏာပ္ဍဲဌာန်ဂအုပ်ခရိုၚ်မတ်မလီုဖအိုတ်ရ။ ညးတာလျိုၚ်ခရိုၚ်တအ် သ္ၚဳဂၠိပ်လိက်ဂမၠိုၚ်ဂှ်တုဲ ယဝ်ရလိက်ထံက်ထ္ၜးပ္တိုန်လဝ် ကုပူဂဵုညးတာလျိုၚ်ယောၚ်ယာလုလောန်လဝ် ပ္ဍဲ ညးဍုၚ်ကွာန်တအ်နွံမ္ဂး သွက်ဂွံလ္ၚတ်တုဲ ထေက်ကဵုဒးကဵုဒုဟ်မ္ဂး ကဵုအာဒုဟ်ရ။ လိက်ထံက်ထ္ၜးကဵု လဝ်ကသပ် ကုဗော်ဍုၚ်မန်တၟိ စပ်ကဵုပရေၚ်ဍုၚ်ကွာန်တအ်နွံမ္ဂး နူကဵုခရိုၚ်ဂှ် သွက်ဂွံဆက်ပ္တိုန်အာကဵု ဗဟဵုရောၚ် ဥက္ကဌခရိုၚ် နာဲဗညာလဴ သောၚ်ကလးလဝ် ပ္ဍဲကာလပံက်လဝ် ဌာန်ပကောံရမျာၚ်ညးဍုၚ် ကွာန်ဂှ်ရ။
ပ္ဍဲကဵုတ္ၚဲစစွံကဠာလိက် ရမျာၚ်ညးဍုၚ်ကွာန် ပွိုၚ်ဍုၚ်ဇြပ်ဗုဂှ်မ္ဂး ကော်ဘိက်လဝ် ညးစၞးဂကောံရေၚ်တၠုၚ်ဖဵု ဗော်၊ ညးစၞးဂကောံသ္ဂံၚ်တြေံ၊ ညးစၞးဂကောံအ္စာဘာမန်ကီု၊ ညးစၞးဂကောံထတ်ယုက်ကီုရ။ ပ္ဍဲဂှ် ညးတာလျိုၚ်တအ် သောၚ်ကလးကဵု ဟိုတ်ဂကောံဌာန်ပကောံရမျာၚ်ညးဍုၚ်ကွာန် ဂွံမံက်တိုန်ကၠုၚ်ကီု၊ ဗီုပြၚ်ဂွံချူပ္တိုန်ထ္ၜးလိက်ဂှ်ကီု ဥက္ကဌပွိုၚ်ဍုၚ် နာဲရာဇာ သောၚ်ကလးဏာရ။
ကြဴနူကဵု ညးတာလျိုၚ်ကဆံၚ်ခရိုၚ်မတ်မလီုတအ် ပံက်လဝ်ဌာန်ပကောံရမျာၚ်ညးဍုၚ်ကွာန်မန် ပွိုၚ်ဍုၚ်နာ နာတုဲ ပ္ဍဲဂိတုသေပ်တေမ်ဗာ (၁) ဂှ် ဂကောံပွိုၚ်ဍုၚ်ဇြပ်ဗုတအ် စစွံကဠာရမျာၚ်ညးဍုၚ်ကွာန် ဂတမုက် ရုၚ်ဆက်ဆောံဗော်ဍုၚ်မန်တၟိဂှ်ရ။
နူကဵုဌာန်ပကောံကလၚ်ရမျာၚ်ညးဍုၚ်ကွာန်မန်ဂှ် သီုကဵုကၠောန်ပ္တိတ် လိက်လိက်ဆဝ်မ္ၚုဟ်ပိသၠပ်ကီုတုဲ သီုတြးလဝ်လၟေၚ်ကမၠောန် သွက်ဂွံပ္တိုန်ထ္ၜးကဵုကသပ် ကုဗော်ဍုၚ်မန်တၟိကီု သီုကဵုဒပ်ပၞာန်ဗၠးၜးကောန်ဂ ကူမန်ကီု နွံရ။
ညးက္ဍိုပ်ဂကောံဌာန်ဂကောံရမျာၚ်ညးဍုၚ်ကွာန် ပွိုၚ်ဍုၚ်ဇြပ်ဗုဂှ် ‘ဗော်ဍုၚ်မန်တၟိဂှ် ဒှ်ဗော်မၞုံကဵုသြဇာသၠုၚ် အိုတ် အပ္ဍဲကဵုပရေၚ်ကောန်ဂကူပိုဲတအ်ရောၚ်၊ ဟိုတ်ဂှ်ရ နကဵုဗော်ဂှ် လၟုဟ်အဃောသဳကၠဳတက်ဒၟံၚ်ကျာ ကဵု အလဵုအသဳ သွက်ဂွံထ္ပက်စၟတ်တဲ ဒေံါပန်ပှော်အလုံကၟိန်ဍုၚ်ဂှ် ကရောံဒပ်ပံၚ်ကောံကောန်ဂကူ ဂမၠိုၚ်ဂှ်ရ၊ ပ္ဍဲကဵုအဃောတက်ဒၟံၚ်ကျာဏံကီု၊ ဂၠံၚ်တရဴဗော်ဍုၚ်မန်တၟိကွာ်ဒၟံၚ်ဂှ်ကီု၊ လ္တူဒပ်ပၞာန်ဗၠးၜးကောန် ဂကူမန်ဂှ်ကီု ညးဍုၚ်ကွာန်တအ် ဘိုၚ်ထံက်ထ္ၜးကဵုကသပ် ဗၠးဗၠးၜးၜးညိ’ သာ်ဏံ ပ္ဍဲကဵုတ္ၚဲစစွံကဠာ ရမျာၚ်ညးဍုၚ်ကွာန်ဂှ် ညးက္ဍိုပ်ဂကောံ နာဲဗညာ ဟီုရ။
ဌာန်ပကောံရမျာၚ်ညးဍုၚ်ကွာန်ဂှ် ကၠောန်ပ္တိတ်လဝ်တၞးလိက် ဗီုပြၚ်သွက်ဂွံပ္တိုန်ထ္ၜးကီု သွက်ဂွံကဵုကသပ် ကီုနွံတုဲ ဗက်တြးလဝ် အကြာညးဍုၚ်ကွာန်တအ်နွံရ။ ညးဍုၚ်ကွာန်မဟာဇန်တအ် ပ္တိုန်ထံက်ထ္ၜး ပရေၚ် အပ္ဍဲညးတာလျိုၚ်ဗော် / ဒပ်ကီု၊ သွက်ဂွံချူပ္တိုန်ကသပ် စပ်ကဵုပရေၚ်ဍုၚ်ကွာန် လ္တူဂၠံၚ်တရဴ ဗော်ဍုၚ်မန်တၟိ မကွာ်ဒၟံၚ်တ္ၚဲဏံဂှ်လေဝ် ပၟိက်စိုတ်ထံက်ထ္ၜး / ကဵုကသပ်မာန်ရောၚ်ဂှ်လေဝ် ပ္ဍဲတၞးလိက်ပိသၠပ် ဆဝ်မ္ၚုဟ် လဝ်ဂှ် ချူဓမံက်ထ္ၜးလဝ်ကီုရ။