တၠကမၠောန်ဖဴၜဵု မိနှေန်ညောအ်ဂှ် “ ဂၠာဲကောန်ကမၠောန် ဝါတ်ကွေံကွေံ၊ သၟာကမၠောန် ရဲဒေသဇကုတံဂှ် လုပ်အာဍုၚ်သေံအိုတ်ရ၊ ဟိုတ်ဂှ်ရ ဒးအာ ကော်နၚ်သၟာကမၠောန် နူကွာန်ပလုၚ်တေံ” သာ်ဝွံ ညးဟီုလဴဏာကီုရ။
သၟာကမၠောန်ဗွဲမဂၠိုၚ်တံဂှ် ဒးအာကော်နၚ်နူရးဒေသဇၞော်ဗဂေါ၊ ရးဒေသဇၞော်ဧရာဝတဳတေံတုဲ သွက်သ္ဂောံကၠုၚ်ကၠောန် ကမၠောန်ကၠအ် ထၜိုဟ်၊ ၜဵုဂးတုဲ ပြံၚ်လုပ်ကၠုၚ်မံၚ် မွဲအိန်ထံၚ်တုဲ မွဲအိန်ထံၚ်တံဂှ် ဂွံဆဵုညာတ်မံၚ်ရ။
ၜိုန်ဂှ်လေဝ် ဒၟာနူအနှေန်ၚုဟ်ၜဵုစှေ်မံၚ်ဂှ်တုဲ သ္ဂောံသၠုၚ်ပ္တိုန်ကဵုၚုဟ်သၟာကမၠောန်တံဂှ် ဒှ်ဟွံမာန်ဏီ၊ ဟိုတ်နူ ဂွံၚုဟ်အောန်မံၚ်ဂှ်ရ ကိစ္စဂၠာဲသၟာကမၠောန်တံ ဒှ်တၚ်ဝါတ်ဂါတ်ကောန်ကမၠောန်တံတုဲ ဖဴၜဵုလ္ၚဵုတံဂှ် စဵုကဵု သ္ဒးကၟာတ်ထောံကီုဂးရ။
ညးကူသာန်သွံရာန်ၜဵု နာဲခေန်မိုၚ်ထောန်ဂှ် “ သွက်ညးက္ဍိုက်ပ်ကမၠောန်ၜဵု (ဖိုသူကြီး) မွဲဂှ် မွဲသၞာံတှေ် သ္ဒးကဵုၚုဟ်လိၚ် လယျိုၚ်ၜဵုၜိုတ်(၃) လက်ပိဿာကဵုအကြာ (၅) လက်ပိဿာနွံရ၊ ၚုဟ်ၜဵုဂမျိုၚ်ဂှ်တှေ် မွဲပဿာ ၜိုတ်(၅၀) ဒကေဝ်ဓဝ်ရနွံ၊ ၚုဟ်ၜဵု ဒှ်မံၚ်လၟုဟ်ကဵု ၚုဟ်သၟာ ကမၠောန်ဂှ်တော်စဟွံကိတ်ရပုဟ်” ဂှ် သာ်ဏံ ညးဟီုသောၚ်ထ္ၜးကဵု ဌာန်ပရိုၚ်ဗၠးၜးမန် IMNA ရ။
ကမၠောန်ၜဵုစဲတ္ၚဲတံမ္ဂး အခိၚ်ဗြဲအိုတ် စနူဂိတုဘတ်အိုတ် စပံက်ဖဴကၠောန်ကမၠောန်ၜဵုတုဲ စဵုကဵုစိုပ် ဂိတုပသာ် အခိၚ်ဗြဴဂူတေံ အပ္ဍဲကဵုပွိုၚ် (၁) သၞာံမ္ဂး ၜဵုတိတ် (၁၂) ဝါ၊ ၜဵုဂွံတိတ် (၁) ပဿာဂှ် စရိတ်အိုတ်ၜိုတ် ၃၅ ကဵုအကြာ ၆၀ ဒကေဝ်ရောၚ် ဂးရ။
ခံက်ၜဵုမၞုံအပ္ဍဲကွာန်ပ္ၚ အပ္ဍဲကဵုဧက (၁၀၀၀) လ္ၚီဂှ် ဖဴၜဵုပူဂဵုနွံၜိုတ်(၄၀) မ၊ ဖဴၜဵုအလဵုအသဳတံလေဝ်နွံမံၚ်တုဲ စပ်ကဵုပရေၚ်ကၠောန်ၜဵုအပ္ဍဲတွဵုရး မန်မ္ဂး ကွာန်ပ္ၚဝွံဂှ် ဒှ်ဒၞာဲ ကၠောန်ပတိတ်ၜဵု ဂၠိုၚ်အိုတ်ဂးရ။
သအာၚ်နူဂှ်ပၠန် ပ္ဍဲကဵုပွိုၚ်ဍုၚ်ဇြပ်ဗုဂှ် ကွာန်ကြုက်ပိ၊ ဝါဂၠံၚ်၊ စက်စာဲ၊ ကျာ်ခမီ၊ ပ္ဍဲပွိုၚ်ဍုၚ်ပံၚ် ကွာန်ဝါကပိုဟ် ပ္ဍဲပွိုၚ်ဍုၚ်ရေဝ် ကွာန်သၞေဟ် ခြေၚ်၊ ကွာန်ပလိုၚ်ဂြဳတံဂှ်လေဝ် ကၠောန်ပတိတ်မံၚ်ၜဵုကီုတုဲ ၜဵုတိတ်မံၚ်တွဵုရးမန် ဂှ်တၟော်ကဵုအလုံဍုၚ်ဗၟာမ္ဂး မၞုံ ၂၀%ရောၚ် တော်ဆလဝ်ရ။