အခန်ကၞာ တ္ၚဲသၟတ်မန် အလန်တတိယဝွံ ကၠောန်ဗဒှ်လဝ် ဒၞာဲကွာန်သၞေဟ်ဗ္ဒဝ် ပွိုၚ်ဍုၚ် မုဟ်ဍုၚ် တွဵုရးဍုၚ်မန်မဒှ်ရ။
ပ္ဍဲလ္တူစၚ်တ္ၚဲသၟတ်မန် အလန်တတိယဏံဝွံ ကော်ဘိက်လဝ် က္ဍိုပ်သ္ကိုပ်မန်လ္ၚဵု နဒဒှ်သဘာပတိတုဲ ဟိုတ်နူက္ဍိုပ်သ္ကိုပ်မန်တံ ဟွံတိုန်စိုပ်ဂှ်ရ ခုၚ်ရန်လဝ်ဒၞာဲက္ဍိုပ်သ္ကိုပ်တံ သၠးမံၚ်တုဲ ခုၚ်ဏံဂှ် ရန်လဝ် သွက်က္ဍိုပ်သ္ကိုပ်တံဏောၚ် ရန်လဝ်သွက်သၟတ်တံ ဟွံသေၚ်ပုဟ် သာ်ဝွံ သဘာပတိ ကမ္ပတဳကၠောန်ဗဒှ် တ္ၚဲသၟတ်မန် အလန်တတိယ ကျာ်ဇၞော်သဳဟ (တၠဂုဏ်ချေတ်) မြော်ကဵု ဌာန်ပရိုၚ်ဗၠးၜးမန်ရ။
ကျာ်ဇၞော်သဳဟ ဂှ် “က္ဍိုပ်သ္ကိုပ်မန်လ္ၚဵုတံ ၜိုန်ရတိုန်စိုပ်ဟွံမာန်ကီုလေဝ် ဂကောံသၟတ်ပိုယ်ဟွံစွံလဝ်စိုတ်ပုဟ်၊ အရၚ်ညးတအ် ပိုယ်စဳရေၚ်လဝ်ခုၚ်ဟတုဲရ ညးတအ်ဟွံတိုန်စိုပ်တှေ် ခုၚ်သဘာပတိပိုယ်သၠးအာရ” သာ်ဝွံ မြော်ရ။
တ္ၚဲဏံ အလန်ဏံ ၜိုန်ရတိုန်စိုပ်ဟွံမာန်ကီုလေဝ် အလန်ဂတနူဏံ ညးတံ ညံၚ်ဂွံတိုန်စိုပ် ကောံကောံဓရီုဓရီုမာန်ဂှ် နူကဵုဂကောံသၟတ်မန်တံ မၚ်ဒုၚ်တၠုၚ်မံၚ်ဏောၚ်ဂးတုဲ ညးတံတိုန်စိုပ်ဟွံမာန်ဂှ် တာလျိုၚ်ညးတံဟေၚ် တာလျိုၚ်သၟတ်တံဂှ် သၟတ်မွဲကဵုမွဲ ညံၚ်ဂွံပံၚ်တောဲညးသ္ကအ်ရောၚ် သာ်ဝွံ ကျာ်ဇၞော်အ္စာ ဆက်မြော်ရ။
ပဲါနူက္ဍိုပ်သ္ကိုပ်လ္ၚဵုတံ တိုန်စိုပ်ဟွံမာန်ဂှ် သၟတ်နူပွိုၚ်ဍုၚ်နာနာတံလေဝ် လၟိဟ်မၞိဟ်တိုန်စိုပ် အောန်နူသၞာံ ကၠာကၠာတေံဏီရောၚ် သာ်ဝွံ ညးအုပ်ကာကာနာနာ နာဲဇာနဲဥူ ဟီုရ။
နာဲဇာနဲဥူ ဂှ် “တော်ကဵုပွိုၚ်ဍုၚ်တှေ် တိုန်စိုတ်မံၚ် အတိုၚ်ဗီုတြေံရ နူကဵုရးဒဂုၚ် စိုပ် ပွိုၚ်ဍုၚ်ရေဝ်၊ ဆဂး ဇြဟတ်မၞိဟ်တှေ် အောန်နူအရိုဟ်သၞာံဏီ ဣဏံဂှ် အခက်အခုဲညး ကဵုညးလေဝ် ဟိုတ်မၞိဟ်အောန်ဂှ် ပိုယ်လေဝ် ဟီုဟွံဒးပုဟ်” သာ်ဝွံ ဟီုရ။
ဇြဟတ်မၞိဟ်ၜိုန်အောန်ကီုလေဝ် အစဳဇန်တၟေၚ် မပ္တံဗက်ကံက်အာစၟတ်တဲ ရဲဒစဵုဒစး ကိုန်အစဳဇန် ရုၚ်စက်တၟံချးလေဝ် ပါလုပ်ရောၚ် သာ်ဝွံ ညးဆက်ဟီုရ။
“တၚ်ပတဝ်က္ဍိုပ်ပိုယ်ရန်လဝ်နတဲဂှ် ရုၚ်စက်တၟံချးကဵု စဵုဒၞာဂဥုဲၜူမာဲရ သွက်ရုၚ်စက်တၟံချးအၚ်ဒၚ်တေံ နူကဵု ဒၞာဲကၠောန်တ္ၚဲသၟတ်မန်ပိုယ် ဗက်ကံက်မံၚ်စၟတ်တဲ ရဲဒစဵုဒစးတံတုဲ သီုစရၚ်ဒစဵုဒစးကွာန်အၚ်ဒၚ် သီုစရၚ်ပိုယ်ဗက်ကံက်လဝ်ဏံ ပံၚ်တုဲ ပိုယ်ပတိုန်ဏာ ကၠတ်ထဝ်ကၟိန်ဍုၚ်တေံဏောၚ်” သာ်ဝွံ နာဲဇာနဲဥူ ဆက်ဟီုရ။
တ္ၚဲသၟတ်မန်ဝွံ ဒုၚ်လဝ်သ္ဇိုၚ်ကဵု ပေဲါသဳကၠဳသၠာဲဂတးလညာတ်သၟတ် အလန်ပထမ ကွာန်ပြၚ်ဍာဲ၊ အလန်ဒုတိယ ကွာန်ကွိက်ခွိ၊ အလန်တတိယ ကွာန်ဝါဗိုၚ်တုဲ ပ္ဍဲသက္ကရာဇ် ၂၀၁၂ ဂိတု April ဂှ် ညးဂမၠိုၚ်တုပ်စိုတ် ဖျေံကၠုၚ်သ္ဂုတ်သွာတ် ဂိတုဒဳဇြေန်ပါ ၂၈ ဂှ် စၟတ်သမ္တီ နဒဒှ်တ္ၚဲသၟတ်မန်ရ။
တ္ၚဲသၟတ်မန် အလန်ပထမဂှ် ကၠောန်သ္ပလဝ်ပ္ဍဲကွာန်ဒဵုထောၚ် ပွိုၚ်ဍုၚ်လှာဒကှ်၊ အလန်ဒုတိယဂှ် ကၠောန်သ္ပလဝ်ကွာန်တၟံကၞေၚ် ပွိုၚ်ဍုၚ်လၟိုၚ်ပါ်၊ အလန်တတိယဏံ ကၠောန်သ္ပဏာ ပ္ဍဲကွာန်သၞေဟ်ဗ္ဒဝ် ပွိုၚ်ဍုၚ်မုဟ်ဍုၚ် မဒှ်ရ။