Categories
ပရိုၚ်

ထ္ပက်စၟတ်တဲပရေၚ်ဒါအ်ပန်ပှော်ပ္ဍဲတ္ၚဲကၟိန်ဍုၚ်ဂှ် ဒှ်ဟွံမာန်ဏီ နာဲဟံသာဟီု

သွက်ဂွံကၠောန်ပေဲါသဳကၠဳပရေၚ်ဍုၚ်ကွာန်အဌာန်ဂတဏံ တၚ်တုပ်စိုတ်ဟၟဲဏီကီု၊ ဒပ်ပၞာန်အလဵုအသဳကဵု ဂကောံရပ်လွဟ်ကောန်ဍုၚ်အရၚ်ၜါလ္ပာ်တံ စေဝ်ပၞောန်ဒပ်ပၞာန်သွက်ဂွံဒဂေတ်ဗက် ဟွံချိုတ်ပၠိုတ်ဏီကီုတုဲ သွက်ဂွံထ္ပက်စၟတ်တဲ ပရေၚ်ဒေါအ်ပန်ပှော် အလုံဍုၚ်မွဲ ပ္ဍဲတ္ၚဲကၟိန်ဍုၚ်တေံဂှ် ဒှ်ဟွံမာန်ဏီ ညးအာက္ဍိုပ် NCCT နာဲဟံသာ ဟီုရ။

နာဲဟံသာ သီုကဵုဒှ် ဒု-ဥက္ကဌဗော်ဍုၚ်မန်တၟိ ကၠာဟွံဂွံသ္ပပေဲါသောၚ်ကလး ကုဂကောံမဟာဇန်မန်တံ ဒၞာဲတိုက်ရံၚ်လိက် နာဲယှိုဲကျေန် ဍုၚ်မတ်မလီုဂှ် ဆဵုဂဗလဝ်ကဵု ညးဒါန်လိက် ဌာန်ပရိုၚ်ဗၠးၜးမန် IMNA တုဲ ဟီုလဝ်ရ။

“စေဝ်ပၞောန်ဒပ်ပၞာန်တံ သွက်ဒးဒ္ဂေတ်ဗက် code of conduct ဂှ် သီုၜါလ္ပာ်ညံၚ်သ္ဂောံဂွံ တၚ်တုပ်စိုတ်ဂှ် နွံမံၚ်ပၟိက်ဏောၚ်၊ ထပက်စၟတ်တဲတုဲ ရမျှာၚ်လွဟ်ညံၚ်ဟွံဂွံဗြုဂှ်တှေ် ဒပ်လ္ၚဵုတံဂှ် ဒးပဆုဲပြံၚ်ထောံဒၞာဲဏောၚ်၊ ထပက်စၟတ်တဲတုဲလေဝ် ရမျှာၚ်လွဟ်ဆက်ဗြုမံၚ်ဏီတှေ် မုတၟေၚ်တိုန်ရော” သာ်ဝွံ နာဲဟံသာဟီုရ။

ဂကောံရပ်လွဟ်ကောန်ဍုၚ်အရၚ်ဗွဲမဂၠိုၚ်တံဂှ် ထပက်လဝ်စၟတ်တဲတၚ်တုပ်စိုတ် ပရေၚ်ဒေါအ်ပန်ပှော် ကဆံၚ်တွဵုရးညးကဵုညးတံသၟးဟွံက သီုဂွံလဝ်တၚ်တုပ်စိုတ် ၜိုန်ရထပက်လဝ်စၟတ်တဲကဆံၚ်ကၟိန်ဍုၚ်တုဲကီုလေဝ် ပဲါနူတွဵုရးဍုၚ်မန်မ္ဂး ဒၞာဲဒေသတၞဟ်ဟ်တံဂှ် ဒပ်ပၞာန်အလဵုအသဳကဵု ဒပ်ပၞာန်ကောန်ဍုၚ်အရၚ်တံ ဒှ်မံၚ်ပေဲါပတိုက်ဖိုဟ်ရ။

နာဲဟံသာ ဂှ် "တၚ်ပၟိက်ဇၞော်မွဲပၠန်ဂှ် ထပက်စၟတ်တဲတုဲတှေ် ပေဲါသဳကၠဳပရေၚ်ဍုၚ်ကွာန်ဂှ် ဗီုလဵုဂွံကၠောန်သ္ပအာရော၊ ညံၚ်သ္ဂောံဂွံ တၚ်သ္ဂုတ်သွာတ် တၚ်တုပ်စိုတ်တံ ချိုတ်တ်ပၠိုတ်တ်ဂှ် ကိစ္စဇၞော်မံၚ်ဏောၚ်" သာ်ဝွံ ဟီုရ။

အကြာအလဵုအသဳကဵု ဂကောံရပ်လွဟ်ကောန်ဍုၚ်အရၚ်တံ ပညဳပညပ်ဟွံပြေပြံၚ်ဂှ်ရ အခိၚ်လၟုဟ် ဂွံထပက်စၟတ်တဲဂှ် ဒှ်ဟွံမာန်ဏီ ညးဆက်ဟီုလဝ်အတိုၚ်ဏံရ။

ပေဲါသဳကၠဳ က္ဍိုပ်သ္ကိုပ်ပရေၚ်ဍုၚ်ကွာန် ၄၈ တၠတံ ဆဵုဂဗသဳကၠဳလဝ် ကုသမ္မတဥူတိၚ်သိၚ်ဂှ် “ဂိတုဖေဖဝ်ဝါရဳ ၁၂ စိုပ်တ္ၚဲကၟိန်ဍုၚ်တေံမ္ဂး ထပက်စၟတ်တဲ ပရေၚ်ဒေါအ်ပန်ပှော်အလုံဍုၚ်ထေက်ဏောၚ်" ပ္ဍဲဌာန်ပရိုၚ်ဂမၠိုၚ် ဓမံက်ထ္ၜးလဝ်ရ။

ပ္ဍဲနေပျဳတဝ် ဒၞာဲသ္ၚိသမ္မတဂှ် ဥူတိၚ်သိၚ်၊ သ္ကိုပ်က္ဍိုက်ပ်ဒပ်ပၞာန်အလဵုအသဳ၊ ဥက္ကဌကၠတ်ထဝ် ၂ တၠ၊ ဥက္ကဌ ဗော် NLD၊ က္ဍိုပ်သ္ကိုပ်ပရေၚ်ဍုၚ်ကွာန်ဂမၠိုၚ်ကေုာံ ဝန်ဇၞော်ကောန်ဍုၚ်အရၚ်ဂမၠိုၚ် သီုဖအိုတ် ၄၈ တၠ ဆဵုဂဗ သဳကၠဳလဝ်ရ။

ဒၞာဲပေဲါသဳကၠဳဂှ် (က) ပရေၚ်အပြံၚ်သၠာဲဒဳမဝ်ကရေဇြဳ ညံၚ်ဂွံဆက်မံက်ဂတဝ်အာ (ခ) ဒုၚ်သ္ဇိုၚ်ကဵု ပရေၚ်ၜိုဟ်လလမ်တုဲ ညံၚ်ဂွံကၠောန်သ္ပအာပေဲါသဳကၠဳပရေၚ်ဍုၚ်ကွာန် ဂွံဒက်ပ္တန်ပရေၚ်ညဳသၟဟ်ကောန်ဂကူမာန်၊ (ဂ) ဂွံကၠောန်သ္ပအာပေဲါရုဲစှ်မာဲ ၂၀၁၅ ဗွဲမဓရ်ယာတပ်တးဗၠးၜးမာန်၊

လၟေၚ်ကမၠောန် အပြံၚ်သၠာဲပရေၚ်ဍုၚ်ကွာန် ဗွဲမဍိုန်ဍောတ်ညံၚ်ဂွံမံက်ဂတဝ်ကၠုၚ်မာန်၊ အခိၚ်ကာလသှေ်မံၚ်တံဂှ် ပ္ဍဲဍုၚ်ကွာန်ညံၚ်ဂွံ ညိၚ်ဝပ်ကေုာံ ကိစ္စပရေၚ်ဍုၚ်ကွာန်တံဂှ် ကဏ္ဍနာနာ ဟီုဂးသဳကၠဳလဝ်နွံ သာ်ဝွံ ဝန်ဇၞော်လလောၚ်ပရိုၚ် ဥူယျေဝ်ထောတ် ဟီုလဝ်ပေဲါသောၚ်ကလးပရိုၚ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.