Categories
ပရိုၚ်

ပၠံၚ်ၜးကွဳလိုန်ဓာတ်တုဲ သီုပန်စုတ်ကဵုသေနာတ်

ညးဗြဴဒဳကွဳလိုန်ဓာတ်မွဲတၠ ဒးဒုၚ်ပန်ကဵုသေနာတ်တုဲ ဒးပၠံၚ်ၜးဏာကွဳလိုန်ဓာတ် ပ္ဍဲဂိတုဂျာန္နဝါရဳ ၁၇၊ အခိၚ်လဒေါဝ်တ္ၚဲဂှ် ကတဵုဒှ်လဝ် ပ္ဍဲပွိုၚ်ဍုၚ်ရေဝ် ဗ္ဒာဲကွာန်တံၚ်မောံရ။

ညးဒးဒုၚ်ပၠံၚ်ၜး ဒးဒုၚ်ပန်ကဵုသေနာတ်ဂှ် ရဲကွာန်တံၚ်မောံ မခေန်မျဵုမျေအ်၊ အာယုက် ၃၆ သၞာံဒှ်တုဲ အာပလံၚ်ပိဏ္ဍပါတ် ဇရေၚ်အပါ ဒှ်မံၚ်ခမဳ ဒၞာဲဗဳလခါတ် အကြာကွာန်တံၚ်မောံကဵု စောဂလာ၊ လပါ်ကလေၚ်စဴ စိုပ်ဒၞာဲဇြပ်ဇူ ၜိုတ်အခိၚ် ၁၁ နာဍဳဂှ် ဒးဒုၚ်ပၠံၚ်ၜးဏာကဵု မၞိဟ်တြုံဟွံတီယၟု ၂ တၠဂှ်ရ။

အဃောပၠံၚ်ၜးမံၚ်ကွဳလိုန်ဓာတ်ဂှ် မၞိဟ်ဗြဴတၠကွဳလိုန်ဓာတ်မွဲတၠဓဝ် ကလေၚ်ပၠံၚ်မံၚ် ကွဳလိုန်ဓာတ် ဇကုပၠန်ဂှ်ရ အတေံဍေံပန်ကဵုသေနာတ်တုဲ မခေန်မျဵုမျေအ် ဒေါမ်စှေ်အာရ၊ မၞိဟ် ၂ တၠတေံလေဝ် ကေတ်ဏာကွဳလိုန်ဓာတ်တုဲ ဂြိပ်တိတ်အာရဂှ် ညးဆဵုနမတ်လ္ၚဵုတံ ဟီုမံၚ်ရ။

"သေနာတ်ဂကူလဵုလေဝ် ဟွံတီဏီပုဟ်၊ အန္တရာဲလမျီုညးလေဝ် ဒးဂွိၚ်မံၚ်ဏောၚ်၊ မကမ်ဂှ် စၚ်လုပ်အာ ပ္ဍဲပၞးတုဲ ဟွံကလေၚ်တိတ် ကၠုၚ်မ္ၚးဏံပုဟ်၊ လၟုဟ် ပလံၚ်ဏာလဝ် ရုၚ်ဂဥုဲမတ်မလီုဖိုဟ်၊ သွက်ဂွံရပ် မၞိဟ်ဒုဟ်တံဂှ် ရေၚ်တၠုၚ်မံၚ်ယျ" သာ်ဝွံ သ္ကိုပ်ဒပ်ဗၠာဲသၟိၚ် ဍုၚ်လၟိုၚ် အေညိၚ်ဇြဝ် ဟီုရ။

အတိုၚ်ဗၠာဲသၟိၚ်တံ ကေတ်လဝ်စၟတ်သမ္တီဂှ်တှေ် ကွဳလိုန်ဓာတ်ဂကူ (နာ် ) Wave 125 ကၠောန်လဝ်ဍုၚ်သေံ၊ လှာဲလဝ်ဗီုပြၚ် ဗာန်လဝ်သတေကာဗၠဲ (စၟဳစၟတ်မံၚ်လာၚ်ဇြေန်ဖိုဟ်) ရ သာ်ဝွံ ဂွံတီကေတ်ရ။

"ပန်ကဵုသေနာတ်တုဲ ပၠံၚ်ဏာကွဳလိုန်ဓာတ်ဂှ် မွဲလှေ်ဟွံကေၚ်မိၚ်ဏီပုဟ်၊ ဣဏံ အလန်ပထမရ၊ နူသၞာံတုဲတေံဂှ် တက်ကဵုၜဴသကုတ်တုဲ ပၠံၚ်ၜးဂှ်တှေ် ကေၚ်ဆဵုမံၚ် " ဗီုဏံ ရဲဍုၚ်လၟိုၚ်မွဲတၠ မာံတိၚ်ထောန်ဥူ ဟီုရ။

ဆေၚ်စပ်ကဵု ဗီုကတဵုဒှ်မံၚ်ဏံဂှ် ဒပ်ဗၠာဲသၟိၚ် ဍုၚ်လၟိုၚ်တံ ပံက်လဝ်အမှု နကဵုၝောံပိုဒ် ၃၉၄ တုဲ ကေတ်အာအရေဝ်ဏောၚ်၊ ဗီုဏံ ညးစၟဳစၟတ်အမှု သ္ကိုပ်ဒပ်ဗၠာဲသၟိၚ် အေညိၚ်ဇြဝ် ကၠောန်သ္ပမံၚ်ရ၊ သွက်ဂွံရပ်ညးဒုဟ်ဂှ် ဂၠိုက်ဂၠာဲစၟဳစၟတ်မံၚ်ဖိုဟ်ရ၊ ဒပ်ဗၠာဲသၟိၚ်ဆေၚ်စပ်တံဂှ်လေဝ် ဆက်လဝ်နွံရဂှ် သ္ကိုပ်ဒပ်ဗၠာဲသၟိၚ် ဟီုရ။

အပ္ဍဲပွိုၚ်ဍုၚ်ရေဝ်ဂှ် ထ္ၜးၜုန်ကဵု ညးဒဳတက္ကသဳတုဲ ပၠံၚ်ၜးဏာ ကွဳလိုန်ဓာတ်တံ၊ ကၠတ်ကွဳလိုန်ဓာတ်တံဂှ် ဟွံလအ်ဟွံလအ် ကတဵုဒှ်မံၚ်ရ။ ပန်ကဵုသေနာတ်တုဲ ပၠံၚ်ၜးဏာကွဳလိုန်ဓာတ်ဂှ် နူကၠာကၠာတေံ ဟွံမွဲကၠုၚ်လဝ်ပုဟ်ဂှ် ညးဒေသဍုၚ်ရေဝ်တံ ဟီုရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.