ပ္ဍဲကဵုပေါဲဆဵုဂဗဂှ် စိုပ်ဂိတုဖေဖော်ဝါ (၁၂) ပ္ဍဲကဵုတ္ၚဲကၟိန်ဍုၚ်ပံၚ်ကောံ ပေၚ် (၆၈) သၞာံဂှ် သွက်ဂွံထ္ပက်စၟတ်တဲ တၚ်တုပ်စိုတ် ညံၚ်ဂွံ ဒက်ပ္တန်ကၟိန်ဍုၚ်ဖက်ဒရယ်မာန် နူကဵုဂကောံ UNFC အာတ်မိက်လဝ်ဂှ် အလဵုအသဳတံ ဟွံကလေၚ်ပရိုၚ်ဏီပုဟ်ဂှ် က္ဍိုပ်သ္ကိုပ် (NCCT) နာဲဟံသာဟီုရ။
“စိုပ်ကဵုကိစ္စဏံတုဲ ဒုၚ်တဲဟာဟွံဒုၚ်တဲဟာဂှ် ညးတအ် (UPWC) ကဵုသ္ကုတ်သွာတ်ဟွံမာန်ပုဟ်၊ လ္ပာ်အလဵုအသဳ တံလေဝ် စိုပ်ကဵုပရေၚ် ၜိုဟ်လလမ်တုဲ ပံၚ်တောဲကၠောန်အာဏောၚ် ဖျေံသံန္ဓဌာန် ထ္ပက်စၟတ်တဲမွဲဏောၚ်ဂှ် ညးတအ်အာတ်မိက် ပတိုန်ထ္ၜးကၠုၚ်နွံ၊ ဣဏံလေဝ် လ္ပာ်ပိုဲဟွံဂွံဒုၚ်လဝ်တဲဏီပုဟ်”သာ်ဏံ နာဲဟံသာ ဟီုရ။
လ္ပာ် (UPWC) တံလေဝ် စိုပ်ဂိတုဖေဖော်ဝါရီ (၁၂) သွက်ဂွံတိုန်စိုပ် တ္ၚဲကၟိန်ဍုၚ်ပံၚ်ကောံမာန်ဂှ် ညးပလံၚ်ဗစိုပ်ကဵု လိက်ဘိက်ကီု၊ ပ္ဍဲကဵုတ္ၚဲကၟိန်ဍုၚ်ဂှ်တှေ် သွက်ဂွံထ္ပက်စၟတ်တဲ တၚ်တုပ်စိုတ် မွဲမွဲမာန်ဂှ် စၟဳမံၚ်ကီု၊ တြဴနူကဵုတ္ၚဲ ကၟိန်ဍုၚ်ဂှ်မ္ဂး သွက်ဂွံသဳကၠဳအာ ပရေၚ်ဒေါံပန်ပှော် အလုံကၟိုန်ဍုၚ်မာန်ဂှ် ဒးဂၠာဲနဲကဲ ဆက်သဳကၠဳအာပၠန်ရောၚ်ဂှ် နာဲဟံသာ ဆက်ဟီုရ။
ပ္ဍဲကဵုပေါဲဆဵုဂဗဏံဂှ် နူကဵု (UPWC) ဝန်ဇၞော်ကၟိန်ဍုၚ် ဥူအံၚ်မေန်၊ ဥူခေန်မိုၚ်သဵု၊ ဥူခေန်ရီ၊ ကေုာံ ညးတာလျိုၚ် နူကဵုဂကောံ (MPC) တအ်ပါလုပ်တုဲ နူကဵုဂကောံ (NCCT) ဂှ် ညးက္ဍိုက်က္ဍိုပ် နာဲဟံသာ၊ ဗဒိုသဝ်ကွယ်ထူဝေန်၊ သ္ကိုပ်ဗိုလ် စောလုံလုံ နာဲထောန်ဇြဝ် ဗိုလ်ဇၞော် ဆော်မန် တံဆဵုဂဗလဝ်ရ။
စိုပ်ကဵု (UNFC) အာတ်မိက်လဝ် ထ္ပက်စၟတ်တဲ တၚ်တုပ်စိုတ် ပရေၚ်ဒက်ပ္တန်ကၟိန်ဍုၚ်ဖက်ဒရယ် ပ္ဍဲတ္ၚဲ ကၟိန်ဍုၚ်ပကောံဂှ်တုဲ က္ဍိုပ်သ္ကိုပ် (UPWC) ဝန်ဇၞော်ဥူအံၚ်မေန်ဟီုဂှ် ဆန္ဒဂကောံရပ်လွဟ် ကောန်ဍုၚ်အရၚ် (၁၆) ဂကောံတံ ဟွံဒှ်မွဲဂရောံဏီပုဟ် လ္ပာ်အလဵုအသဳတံဂှ် ဂကောံနွံ (၃) ဂကောံဓရ်ရတှေ် ညးတံပ္ညဳလောဲမံၚ် လ္ပာ်ကောန်ဍုၚ် အရၚ်တံဂှ် ဂကောံဂၠိုၚ်မံၚ်တုဲ ဒှ်မံၚ်အခက်အခုဲ နွံမံၚ်ရောၚ် သာ်ဏံဓမံက်ထ္ၜး ပ္ဍဲကဵုဌာန်ပရိုၚ် DVB ရ။
“လပါ်ပိုဲဂှ်ကောန်ဍုၚ်အရၚ်ဟလိုၚ်ဟီုတှေ် လ္ၚဵုဂှ်တၚ်ဟွံတုပ်စိုတ်နွံညိညတွဵုရ လ္ပာ်အလဵုအသဳတံလေဝ် ဗီုဏံရ ဒပ်ပၞန်ဂှ်မွဲဗီု ကၠတ်ထဝ်ဂှ်မွဲဗီု ဟွံညဳညးသကအ်ပုဟ် အခက်အခုဲလ္ပာ်ပိုဲမွဲဓရ် ဍေံတံထံက်ထ္ၜးမံၚ်ဟွံဂွံပုဟ် လ္ပာ်ညးတံလေဝ် အခက်အခုဲနွံမံၚ်ကီုရ” သာ်ဏံ နာဲဟံသာ ဟီုရ။
ၜိုန်ရ အခက်အခုဲနွံမံၚ်သာ်ဏံကီုလေဝ် လက်ကြဴ တ္ၚဲကၟိန်ဍုၚ်ပံၚ်ကောံ တေံမ္ဂး (UPWC) ကဵု (NCCT) တံ ထပ်တုဲ ဆဵုဂဗ ညးသ္ကအ်မွဲအလန်ပၠန်ရောၚ်၊ အခိၚ်ဂှ်မှဂွံဖျေံတ္ၚဲ သဳကၠဳမရနုက်ကဵု (၇) ဝါ ချိုတ်ချိုတ်ပၠိုတ်ပၠိုတ်မာန်ရောၚ် ဂွံတီ ကေတ်ရ။