ပ္ဍဲကဵုဂိတုဏံ စၟတ်တ္ၚဲ (၉) ဂှ် ညးစၞး (UNFC) ကဵု ညးစၞးဗော်ရပ် လွဟ်ကောန်ဍုၚ်အရၚ်တၞဟ်တၞဟ်တံ ကမ္မတီ ဓမံက်ပ္တိုန် ပရေၚ်ၜိုပ်လလမ် အလုံကၟိန်ဍုၚ် (UPWC) တံ ကိစ္စဆဵုဂဗ ပ္ညဳပ္ညပ်ဂှ် ဟွံဒုၚ်တဲပုဟ်ဂွံတီကေတ်ရ။
“လ္ပာ်ပိုဲဂှ် အာနကဵု (UNFC) ဏောၚ်ပိုဲရန်လဝ် ဆဂးလ္ပာ်ညးတံဂှ် နကဵု (UNFC) ဂှ်ညးတံဟွံဘိက်ပုဟ် ညးတံဘိက်နကဵု ကောန်ဂကောံမွဲမွဲဏောၚ်တှေ် ပိုဲအာစၞး (UNFC) တုဲအာသဳကၠဳဂှ် ညးတံဟွံဒုၚ်တဲပုဟ် ညးတံကလေၚ်နၚ်ပရိုၚ်” သာ်ဏံ နာဲဟံသာဟီုရ။
ဂွံဒက်ပ္တိုန်ကၟိန်ဍုၚ် ဖက်ဒရယ်ဂှ် တၚ်တုပ်စိုတ်ပရေၚ်ဍုၚ်ကွာန် နကဵုမူ ဒုၚ်လဝ်တဲ တုဲမံၚ်ရဏောၚ် လ္တူသမ္မတ ဟီုလဝ်ဂှ် သွက်ဂွံသ္ပဒတန်ကီု၊ ကၟိန်ဍုၚ်ဖက်ဒရယ်ညးတအ်ဟီုဂှ် မုတၚ်တအ်ပါလုပ်မံၚ်ကီု ပိုဲမိက်တီတုဲ သွက်ဂွံအာသၟာန်လဝ်ဂှ် လ္ပာ်အလဵုအသဳတံ တးပါဲထောံကီု၊ ဂွံဒက်ပ္တိုန်ကၟိန်ဍုၚ်ဖက်ဒရယ်ဂှ် အလဵုအသဳတံ ပ္တိက်လဝ်မူ ချိုတ်တ်ဗၠိုတ်တ်ဟၟဲဏီကီု ဒုၚ်သ္ဇိုၚ်ကဵု တၚ်သ္ဂုတ်သွာတ် ပေါဲသဳကၠဳဂတတေံတုဲမှ ဒက်ပ္တိုန်အာဏောၚ် လ္ပာ်အလဵုအသဳတံ ကလေၚ်လဝ်ပရိုၚ်သာ်ဏံဏောၚ်ဂှ် နာဲဟံသာ ဆက်ဟီုရ။
စိုပ်ကဵုကိစ္စဝွံတုဲ ပ္ဍဲကဵုဂိတုဖေဖဝ်ဝါရီဂှ် နူကဵုဂကောံညဳသၟဟ် ကောန်ဍုၚ်အရၚ် (ဖက်ဒရယ်ကောၚ်စီ-UNFC) ပ္တိက်လဝ်လိက်လလောၚ်တြးမွဲရောၚ်ဂွံတီကေတ်ရ။
ပ္ဍဲကဵုလိက်လလောၚ်တြးဂှ် ဂကောံ (UNFC) တံပ္တိုန်ထ္ၜးအာတ်မိက်လဝ် သမ္မတဂှ် “သမ္မတ ကၟိန်ဍုၚ်ဗၟာဂှ် ပရေၚ် ဒီမဝ်ကရေစဳ ၊ ပရေၚ်တုပ်သၟဟ်ကောန်ဂကူကဵု (ကိုယ်ပိုၚ်ပြဌာန်းခွၚ့်) ဒုၚ်သ္ဇိုၚ်ကဵု အခေါၚ်အရာ တွဵုရး ဍိုက်ဍိုက်ပေၚ်ပေၚ်တုဲ ဂွံဒက်ပ္တိုန်ကၟိန်ဍုၚ်ဖက်ဒရယ် ဇေတ်ဇေတ်ဂှ် တုပ်စိုတ်ဏောၚ်ဟီုတှေ် လ္တူတၚ်တုပ်စိုတ်ဂှ်ရ ဆက်ဓမံက်အာ ရုပ်ရဲပရေၚ်တုပ်စိုတ် ဒေါံပန်ပှော်အလုံကၟိန်ဍုၚ်ဂှ် ဂစာန်အာရောၚ်ဖျေံလဝ်သန္ဓိဌာန်ရောၚ် ဓမံက်ထ္ၜးလဝ် ပ္ဍဲလိက်လလောၚ်တြးဂှ်ရ။
လၟဟ်ပ္ဍဲကဵုနေပျဳတဝ်တေံ (UPWC) ကဵု ဂကောံရပ်လွဟ်ကောန်ဍုၚ်အရၚ်တအ် မွဲဂကောံတုဲ မွဲဂကောံ ဆဵုဂဗ သဳကၠဳမံၚ်ကီု ပေါဲဆဵုဂဗဏံဂှ် ပ္ဍဲကဵုတ္ၚဲကၟိန်ဍုၚ်ပေၚ် (၆၈) သၞာံတေံတှေ် သဳကၠဳအာ ပရေၚ်ထ္ပက်စၟတ်တဲမွဲမွဲ ရောၚ်ဂွံတီကေတ်ရ။
ဗီုဂှ်ကီု ပ္ဍဲကဵုဂိတုဏံ စၟတ်တ္ၚဲ (၃ စဵုကဵုစိုပ် ရ) ပ္ဍဲကဵုကောံဓရီု ကမ္မတီဗဟဵု ဗော်သွးကောန်ဂကူကရေၚ် (KNU) ဂှ် သွက်ဂွံထ္ပက်စၟတ်တဲ ဒေါံပန်ပှော်အလုံဍုၚ်ဂှ် ဒှ်ဟွံမာန်ဏီသ္ၚဳကၠိုပ်လဝ်ရ။
ဆဂး (UPWC) ကဵု (NCCT) တံ စိုပ်တ္ၚဲကၟိန်ဍုၚ်ပံၚ်ကောံတုဲ လကြဴတေံတှေ် သွက်ဂွံကၠောန် ပေါဲသဳကၠဳ ပရေၚ်ဒေါံပန်ပှော် ညံၚ်ဂွံဒှ်မာန်ဂှ် ဂစာန်အာမံၚ်ဖိုဟ်ရောၚ် ဂွံတီကေတ်ရ။