Categories
ပရိုၚ်

ညးစၞးဒုၚ်ရုဲစှ်မာဲ ဗော်(ပြည်ခိုၚ်ဖြိုး) တွဵုရးဍုၚ်မန် ရုဲစှ်တုဲဒှ်အာ ၉၀%

သွက်ပေါဲရုဲစှ်မာဲ သၞာံ ၂၀၁၅ ဏံ ဗော်(ပြည်ခိုၚ်ဖြိုး) USDP တွဵုရးဍုၚ်မန်တံရုဲစှ်လဝ် ညးစၞးဒုၚ်ရုဲစှ်မာဲ ၉၀% တုဲဒှ် အာယျဂှ် ညးအုပ်ကာ USDP တွဵုရး (ဦးသန့်စၚ်) ဟီုရ။

“ပ္ဍဲကဵုအလန်ပထမဏံဂှ် မၞိဟ်ဇၞးမာန်ဏောၚ်ထေၚ်ကေတ်ဂှ်ရုဲစှ်လဝ်ကၠာ၊ အလန်ဒုတိယတေံမှ ရုဲစှ်အာစဵုကဵု ၁၀၀% ဏောၚ်၊ ပ္ဍဲကဵု ညးစၞး စၠတ်ထဝ်နူကဵုဗော်ပိုဲဂှ်လဝ် ၁၀% ဂှ် ပါလုပ်ဟွံချိုတ်ပၠိုတ်ဏီပုဟ်၊ ပရေၚ်ပြံၚ် သၠာဲနွံမံၚ်ဏီ”သာ်ဏံညး ဆက်ဟီုရ။

ပေါဲရုဲမာဲသၞာံ ၂၀၁၅ ဏံဂှ် ပ္ဍဲကဵုဂိတုအံက်တဝ်ပါ သတ္တဟလကရဴအိုတ်တေံဟွံသေၚ်မ္ဂး ဂိတုနဝ်ဝေၚ်ပါပထမ သတ္တဟတေံတှေ် ကၠောန်အာ ရောၚ်ဂှ် နူကဵုကမ်မယှေန် ပေါဲရုဲမာဲဟီုပတိတ်လဝ်ကီုလေဝ် တ္ၚဲကၠောန် ချိုတ်တ်ပၠိုတ်တ်ဂှ် ဂိတုအဝ်ဂေါတ်တေံမှ ထပ်လလောၚ်အာရောၚ် သာ်ဝွံ နူကဵုကမ်မယှေန်ရုဲစှ် ကၟိန်ဍုၚ်တံလလောၚ်လဝ်နွံရ။

တုပ်ကဵုသာ်ဏံကီု ညးစၞးလုပ်ပြိုၚ်ပေါဲရုဲမာဲ ဗော်ဒဳမဵုကရေဇြဳအလုံရးမန်တံဂှ် ပွိုၚ်ဍုၚ်ညးကဵုညး နနဲညးကဵုညးရုဲစှ်တုဲ စရၚ်ဂှ်ပ္တိုန်ထ္ၜးကု ဌာန်ဂအုပ်ဗဟဵုတေံရောၚ် အမာတ်စၠတ်ထဝ်တွဵုရး ဒံက်တာအံၚ်နာၚ်ဥူ ဟီုရ။

“နူကဵုဌာန်ဂအုပ်ဗဟဵုတေံ အာတ်မိက်လဝ်ဂှ် နနဲညးကဵုညးဒးရုဲစှ်အာဏောၚ်၊ တုဲတှေ်နူကဵုဗဟဵုမွဲကဆံၚ် သွက်ပွိုၚ် ဍုၚ်ၜါသွာၚ်ဂှ် ပ္ဍဲကဵုဂိတုမေ တေံမ္ဂး ညံၚ်ဂွံရုဲစှ်ဒတုဲအာမာန်ဂှ်စဳဇန်လဝ်” ဂးရ။

ဒၞာဲပွိုၚ်ဍုၚ်သဓီု၊ ၜဳကလေၚ်၊ ကျာ်ထောဝ် ကဵု ပွိုၚ်ဍုၚ်လှာဒကှ်တံဂှ် ဟွံဒှ်လုပ်ပြိုၚ်ပေါဲရုဲမာဲ၊ ကိစ္စပရေၚ်စန္ဒက်မာဲဂှ် နကဵုအစဳအဇန်ညးကဵုညး ကၠောန်အာဏောၚ်ညးဆက်ဟီုရ။

တုပ်သာ်ဂှ်ကီု ဗော်ကောန်ဂကူမန် MNP ဂှ် ပ္ဍဲကဵုပေါဲရုဲမာဲသၞာံ ၂၀၁၅ ဏံ ရန်တၟံလဝ်လုပ်ပြိုၚ်မာဲဟီုကီုလေဝ် ဒဵုလၟုဟ်ပရေၚ် ပလေဝ်ပလေတ် လဝ် မွဲသာ်လေဝ်ဟၟဲဏီ၊ စိုပ်ဂိတုမာတ် ၁၇ တေံမ္ဂး ကၠောန်ကောံဓရီု ကမ္မတဳဗဟဵုတုဲ ဖျေံဗီုပရေၚ်ဒုၚ်ရုဲစှ်မာဲရောၚ် ဖက်ဆောညးအုပ်ကာ(၂) အစာသဝ်ဟံၚ်ဍုၚ် ဟီုရ။

စရၚ်ညးဂွံအခေါၚ်ကဵုမာဲ သွက်ပေါဲရုဲမာဲ ၂၀၁၅ ဏံဂှ် ဂိတုမာတ် ၃ ဏံ စကံက်အာစရၚ် အလုံတွဵုရးဍုၚ်မန်ရောၚ် ဂွံတီကေတ် နူကမ်မယှေန် ရုဲစှ်မာဲ တွဵုရးဍုၚ်မန်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.