လၟုဟ်ပြဟ်ပြဟ်ဏံ စပ်ကဵုဗၠာဲသၟိၚ်တံ တာဒၞာမံၚ် ၝောံကရောၚ်ပၞာန်ကွးဘာဗကပ်ဗဗေၚ်နူကဵု (လက်ပန်တန်း) တံ နကဵုဇြဟတ်ပေၚ်ၚ်ရဂှ် က္ဍိုပ်သ္ကိုပ်ကွးဘာနူတွဵုရးမန်ဟီုရ။
“အဓိက မိက်ဂွံဟီုကဵု အလဵုအသဳတံမွဲဂှ် ယဝ်ခါရပရေၚ်ပကီုပရာပ်လ္တူကွးဘာတံ ဆက်နွံမံၚ်ဗီုဏံပၠန်တှေ်တာ လျိုၚ်အလဵုအသဳတံရ၊ ကွးဘာတံ ယဝ်ခါရ ဒးဒုၚ်ပကီုပရာပ်မံၚ်ဏီတှေ် ပရေၚ်ထ္ၜးဆန္ဒဏံ ပဵုတုဲအသိၚ်ဍေံ သ္ကာတ်မြဟ်တိုန်ဏောၚ်၊ ကွးဘာအလုံမွဲဍုၚ်တံကီု သီုကဵုညးဍုၚ်ကွာန်တံ ပံၚ်တောဲအာဂှ် နနဲပရေၚ်ပကီုပရာပ်ဟွံသေၚ် သုၚ်စောဲတုဲ စန်ဒက်အာဏောၚ်” သာ်ဏံ ကိုဘုန်းမြတ်မိုး ဟီုရ။
အပ္ဍဲဂိတုမာတ်ချ် စၟတ်တ္ၚဲ ၃ ဂှ် ဗၠာဲသၟိၚ်ၜုၚ်တက်လဝ်ကွးဘာတံတုဲ ကရောၚ်ပၞန်ကွးဘာဗကပ်ဗဗေၚ်တံလေဝ် ဒုၚ်အေၚ်စၞစ ထပ်ထ္ၜးဆန္ဒပၠန်ရ။
နူကဵုအလဵုအသဳတံ ပကီုပရာပ်မံၚ်လ္တူကွးဘာတံဗီုဏံဂှ် ဗီုလဵုမှဒုၚ်တဲဟွံမာန်ပုဟ်ဂှ် က္ဍိပ်သ္ကိုပ်ကွးဘာ (မြေလတ်) ကိုချစ်ဝၚ်းဟီုရ။
“အပ္ဍဲပိုဲဂှ် စိုတ်ဓာတ်ကွးဘာနွံမံၚ်၊ မၞိဟ်ပိုဲယှအ်အာမွဲတှေ် ကလေၚ်ဗပေၚ်စုတ်မွဲပၠန်ရ” သာ်ဏံညးဆက်ဟီုရ။
သွက်ဂွံဆဵုဂဗသဳကၠဳသၞောဝ်ဥပဒေပရေၚ်ပညာ ကောန်ဂကူတုဲ အပ္ဍဲဂိတုမာတ်ချ် စၟတ်တ္ၚဲ ၅ ဂှ် နူကဵုကၠတ်ထဝ် ကော်ဘိက်လဝ် က္ဍိုပ်သ္ကိုပ်ကွးဘာဗကပ်ဗဗေၚ်တံဂှ် ဂွံတီကေတ်ရ။
တုဲပၠန် စပ်ကဵုကိစ္စက္တဵုဒှ်မံၚ်လၟုဟ်တုဲ သမဂ္ဂကွးဘာမန်၊ ကရေၚ်ဍာဲ၊ သေံ၊ ကချေၚ်တံ ကောံဓရီုညးသကအ်တုဲ အခိၚ် ရ နာဍဳ သဝ်တ္ၚဲဂှ် ပတိတ်လဝ်လိက်လလောၚ်တြးမွဲတၞးရ။
ပ္ဍဲကဵုလိက်လလောၚ်တြးဂှ် အလဵုအသဳတံ ဖံက်ပကဝ်မံၚ်ကတိပါၚ် အတိုၚ်ဟီုလဝ် အပ္ဍဲပေဲါသဳကၠဳ ပရေၚ်တက်ကျာဗီုပြၚ်က္ဍိုပ်ဖဴ ၄ မ တေံ ၊ ဒစဵုဒစးအာ ပရေၚ်ပကီုပရာပ်လ္တူကွးဘာရောၚ်၊ ညံၚ်အလဵုသဳတံ ဟွံဂွံကၠောန်သ္ပပရေၚ်ပကီုပရာပ် ဖတိုက်ဖအောဝ်အာရောၚ်၊ သွက်ဂွံသၠုၚ်ပ္တိုန်လိက်ပတ်ကောန်ဂကူကောန်ဍုၚ်အရၚ် စဵုကဵုဒှ်ပရေၚ်ပညာ ဒဳမဝ်ကရေဇြီဂှ် နကဵုသမဂ္ဂကွးဘာညးတံလုပ်အာပေါဲဗတိုက်ကီု၊ အခါရကွးဘာဗကပ်ဗဗေၚ်တံ အာတ်မိက်လုပ်မံၚ်ပေဲါဗတိုက်ဂှ် ညံၚ်ညးဍုၚ်ကွာန်ကောန်ဍုၚ်အရၚ်တံ ဂွံပါလုပ်ကီုဂှ် ဖတိုက်အာရောၚ် သာ်ဏံအာတ်မိက်လဝ် ၅တၚ်ရ။
ပ္ဍဲဂိတုမာတ်ချ် စၟတ်တ္ၚဲ ၃ အခိၚ် ၆နာဍဳ သဝ်တ္ၚဲဂှ် ကွးဘာဗကပ်ဗဗေၚ် (လက်ပန်တန်း) ကဵု ဝန်ဇၞော်ဂီုကၠီနူဗဂဵုတံ သဳကၠဳလဝ်ဂှ် နကဵုကွးဘာ တံဂွံလုပ်ဍုၚ်လ္ဂုၚ်ဂှ် ကွးဘာတံအာတ်မိက်လဝ် တၚ် ၈ တၚ်တုဲ အခိၚ်ဗ္တံဂှ် ကွးဘာတံကဵု ဗၠာဲသၟိၚ်တံ ဒၞာဲစိုပ်ဂှ် ဇူအာရောၚ်ဂှ်လေဝ် ဂွံလဝ်တၚ်တုပ်စိုတ်ရ။