ပ္ဍဲကဵုဂိတုမာတ် စၟတ်တ္ၚဲ ၁၀ ဂှ် စပ်ကဵုကိစ္စ ဒးဒုၚ်ကံက်လဝ် စၟတ်တဲထံက်ဂလာန် ရုၚ်စက်တၟံချးတုဲ ကၠောန်သ္ပပေါဲသောၚ်ကလး” ပ္ဍဲဇြပ်သဘၚ်ဓရ် ဍုၚ်ရေဝ် မၞုံပ္ဍဲအရာပ်အံၚ်မေတ္တာဂှ် သာ်ဏံ ညးမပါလုပ်မံၚ် ပ္ဍဲညးဒးဒုၚ်ကံက်လဝ် စရၚ်ထံက်ဂလာန် ၃၅ တၠတံဂှ် ဟီုရ။
ဒဝ်မျေတ် နူအရာပ်အံၚ်မေတ္တာဂှ် “ကာလညးတံ ကၠုၚ်ကံက်စၟတ်တဲဂှ် ဂွံပၟတ်ဓါတ်လလဳဏာၚ် ညးတံဟီု၊ အဲသၟာန်ညးတံ နူကဵုရုၚ်စက်တၟံချးဟာ ညးဟီုဟွံသေၚ်ပုဟ်၊ ညးတံအာတ်စရၚ်မၞိဟ်တုဲ အဲလေဝ် ကဵုဏာစရၚ်ကီုရ၊ ညးတံချူဏာယၟုဖအိုတ် ပိုဲတံ ဟွံဒးထ္ပက်စၟတ်တဲပုဟ်” သာ်ဏံ ညးဟီုရ။
ကာလညးတံကၠုၚ်ကံက်စၟတ်တဲဂှ် တြးကဵုပၟတ်မွဲယူနစ် ၂၅၀ ဒကေဝ်ဏောၚ်၊ တၞးလိက်ကောန်ဍုၚ်ဟွံမွဲမ္ဂး ညးတံကၠောန်ကဵုဏောၚ်၊ ကွးဘာတံလေဝ် ဂွံအခေါၚ်ခိုဟ်တိုန်ဏောၚ်＂သာ်ဏံ ညးတံစန်ဒက်တုဲ ကံက်ဏာသီုစရၚ်ကွးဘာတံရဂှ် မၞိဟ်ယၟုပါလုပ်မံၚ် ပ္ဍဲညးဒးဒုၚ်ကံက်လဝ် စရၚ်ထံက်ဂလာန်တံ ဟီုထ္ၜးဏာ အပ္ဍဲပေဲါသောၚ်ကလးဝွံရ။
ညးကံက်စရၚ်တံဂှ် ညးဇၞော်အရာပ် အရာပ်အံၚ်မေတ္တာ ၂ တၠ ပါလုပ်တုဲ သွက်ဂွံသဳကၠဳစပ်ကဵုကိစ္စကံက်စရၚ်ဂှ် ၜိုန်ရကော်ဘိက်လဝ်ညးတံ တိုန်ရုၚ်ကီုလေဝ် ဆဂး ညးမွဲလေဝ် ကၠုၚ်စိုပ်ဟွံမာန်ရ သာ်ဏံ ဥက္ကဌ အရာပ်အံၚ်မေတ္တာ ဥူခေန်မံၚ်ညဝ် ဟီုရ။
ဥူခေန်မံၚ်ညဝ်ဂှ် “ရုၚ်စက်တၟံချးဏံဂှ် မၞိဟ်ဒစဵုဒစးလေဝ်နွံ မၞိဟ်ထံက်ဂလာန်လေဝ်နွံ ပိုဲစွံလဝ်စိုတ်ဗၠးဗၠးၜးၜးရဏောၚ်၊ မဳတာ ပၟတ် ၂၅၀ ဟီုဂှ် ပိုဲမုဟွံတီလဝ်ပုဟ် လက္ကရဴဏံမှ ဠာန်မံၚ်ကောန်အရာပ်တံဏောၚ်ဂှ် ပိုဲတီကၠုၚ် ပိုဲကော်ညးတံကၠုၚ်သောၚ်ကလး ပ္ဍဲရုၚ်ဂှ်လေဝ် ညးတံဟွံကၠုၚ်ပုဟ်” သာ်ဏံ ညးဆက်ဟီုရ။
ပ္ဍဲဂိတုဂျန်နဝါရဳဂှ် ဗက်ကံက်မံၚ်စရၚ် စၟတ်တဲမၞိဟ်ထံက်ဂလာန်ရုၚ်စက်တၟံချး ပ္ဍဲပွိုၚ်ဍုၚ်ရေဝ် မွဲၜါအရာပ်ကဵု ကွာန်ဗဒါဲတံ ၁၈ ကွာန်တုဲ စရၚ်ညးထံက်ဂလာန် ၆၂၆၅ တၠတံဂှ် ပတိုန်ဏာလဝ် ကုရုၚ်သမ္မတနေပျဳတဝ် အပ္ဍဲဂိတုဖေဖဝ်ဝါရဳ စၟတ်တ္ၚဲ ၁၁ ရဂှ် ဂွံတီကေတ်ရ။
အပ္ဍဲကဵုမၞိဟ်ကေတ်တာလျိုၚ်ပတိုန်ထ္ၜး ၄ တၠတံဂှ် ညးဇၞော်အရာပ် နူကဵုအရာပ်အံၚ်မေတ္တာ ၂ တၠ ပါလုပ်မံၚ်ကီုလေဝ် စပ်ကဵုဌာန်ဒၟံၚ်တံဂှ် စုတ်လဝ် နဒဒှ်ရဲကွာန်အၚ်ဒၚ်ဂှ် ညးအုပ်ကာ ဂကောံရၚ်တၠုၚ်ပရေၚ်မၞိဟ် (YSS) ဥူအံၚ်နာၚ်ဝေန် ဟီုရ။
ဂကောံ (YSS) ဂှ် ဒှ်ဂကောံဒစဵုဒစးကၠုၚ် ရုၚ်စက်တၟံချးအဆက်ဆက်တုဲ စပ်ကဵုကိစ္စကံက်မံၚ်စၟတ်တဲဏံတုဲ ညးတံဂၠိုက်ဂၠာဲဓမံက်ထ္ၜးအာရောၚ်ဂှ် ဖျေံလဝ်သ္ဂုတ်သွာတ် ပ္ဍဲကောံဓရီု ကၠောန်ဗဒှ်လဝ် အပ္ဍဲဂိတုဖေဖဝ်ဝါရီတုဲကၠုၚ်ဏံဂှ်ရ။