ကွးဘာထ္ၜးဆန္ဒ ပရေၚ်ပညာကောန်ဂကူ ကွးဘာနူကဵုကရောၚ်ပၞန်ထ္ၜးဆန္ဒထဝါဲ ၃ တၠတံ သ္ကိုပ်ဗၠာဲသၟိၚ်ဍုၚ်ရေဝ် ပံက်အမှု ဟွံအာတ်အခေါၚ် ထ္ၜးဆန္ဒကွာ်ရေၚ် နကဵုၝောံပုဒ်ဥပဒေ ( ပုဒ်မ-၁၈) ပ္ဍဲကဵုဂိတုမာတ် ၁၆ ဒၞာဲဗဒိုပ်ဗၠာဲသၟိၚ်ဍုၚ်ရေဝ်ရောၚ် ဂွံတီကေတ်ရ။
ကွးဘာဒးဒုၚ်ပံက်လဝ်အမှု ၃ တၠတံဂှ် နူကဵုတက္ကသိုလ်နဲကဲပညာ ဍုၚ်ထဝါဲ ကိုမၚ်းလွၚ်ဦး၊ကိုဇၚ်မောၚ်ဖြိုး၊ ကဵု ကိုသူရနိုၚ် တံပ္ဍဲကဵုဂိတုဖေဖဝ်ဝါရီ ၈ ဂှ် နူကဵုထဝါဲဇက်တိုန်ကၠုၚ် စိုပ်ဍုၚ်ရေဝ်အရာပ်ရန်ကြီးအောၚ် ဂတမုက်ဆေၚ် ဍာ်လက်ဖက်စိုပြေဂှ် ဟိုတ်နူဟီုတွံကဵုညးဍုၚ်ကွာန်တံ ညံၚ်ဂွံဒစဵုဒစးအာဥပဒေပရေၚ်ပညာ ကောန်ဂကူရောၚ်တုဲ ဒးဒုၚ်ပံက်လဝ်အမှုရ။
ပ္ဍဲကဵုကရောၚ်ပၞန်ထဝါဲဇက်တိုန်ကၠုၚ်ဍုၚ်ရေဝ်ဂှ် ညးတာလျိုၚ် ပရေၚ်ၜိုပ်လလံကဵု ပရေၚ်ဆက်ဆောံမၞိဟ် ကွးဘာ ၈၈ ဍုၚ်ထဝါဲ ဦးမိုးကျော်အောၚ်ဂှ် “ကောန်ၚာ်တံဂှ် အာၜိုပ်ၜိုပ်သြို်ဟ်ဟ်ရ၊ ကဵုညးတၞဟ်မွဲလေဝ် ဟွံဒှ်ပြသၞာပုဟ်၊ စောဲအမှုဟွံထေက်ပုဟ်” သာ်ဏံညးဟီုရ။
နူကဵုဒပ်ဗၠာဲသၟိၚ်တံ အဃောကွးဘာတံထ္ၜးမံၚ်ဆန္ဒဂှ် သ္ကိုပ်အုပ်ဓုပ်ပွိုၚ်ဍုၚ်ရေဝ် ဦးမိုးဇော်ကဵု သ္ကိုပ်ဗၠာဲသၟိၚ်ဍုၚ်ရေဝ် (ရဲမှူး မြၚ့်သော်)တံဟီုလဝ်ဂှ် ယဝ်ခါရမိက်ဂွံ ကွာ်ဂေတ်ဟီုတွံဗွဲမၜိုပ်သြိုဟ်မ္ဂး အာတ်အခေါၚ်နကဵုဥပဒေတုဲ ဂွံအခေါၚ်မှ ဟီုတွံဂွံဏောၚ်သောၚ်ကလးမံၚ်ကီုလေဝ် ကွးဘာတံဏံ ဟွံဒုၚ်တဲ ဒးလဝ်ဂလာန်ညးတံရ။
ကွးဘာထ္ၜးဆန္ဒတံ ဟီုတွံပ္ဍဲဍုၚ်ရေဝ်ဏံ လအ်ပွိုၚ်မွဲဂိတု ကလေၚ်စိုပ်ဌာန်ဒၟံၚ်တုဲမှ ဂွံပံက်အမှုဗီုဏံမ္ဂး နကဵုတၚ်ရန်တၟံနွံနွံ ကၠောန်မံၚ်ရောၚ် ဂကောံမှာဇန်ညးဍုၚ်ကွာန်ဍုၚ်ရေဝ်တံ ဟီုဂးစရ။
ပ္ဍဲကဵုဂိတုဖေဖဝ်ဝါရဳ ၈ဂှ် ကွးဘာ ၈၈ နူထဝါဲကဵုကွးဘာတက္ကသိုလ်နဲကဲပညာ ၜိုတ် ၁၅ တၠတံ ဟီုတွံပရေၚ်ဗကပ်ဗဗေၚ်ဥပဒေ ပရေၚ်ပညာ ကောန်ဂကူ ဂတမုက်ဆေၚ်ဍာ်လက်ဖကတုဲ ဇက်တိုန်အာ သ္ပအဓိဌာန်လ္တူကျာ် ဓါတ်သော် ဍုၚ်ရေဝ်ရ။
ကွးဘာနူကဵုထဝါဲတံဇက်တိုန်ကၠုၚ်ဍုၚ်ရေဝ် နူကဵုဂကောံမှာဇန်ညးဍုၚ်ကွာန်ဍုၚ်ရေဝ်ကီု၊ ဂကောံကွးဘာ ၈၈ ကီု၊ ဒုၚ်တၠုၚ်တုဲ သွက်ဂွံဆက်ဇက် 
ကွးဘာဒးဒုၚ်ပံက်လဝ်အမှု ၃ တၠဂှ် ဂအုပ်ဗၠာဲသၟိၚ်ဆန်းဝၚ်း နူကဵုဒပ်ဗၠာဲသၟိၚ်ဍုၚ်ရေဝ် (မြို႕မရဲစခန်း) စၟဳစၟတ်မံၚ်ဖိုဟ်ဂွံတီကေတ်ရ။