နာဲဟံသာဂှ် “ဂကူမွဲမွဲဂကူမ္ဂးတှေ် ဒးနွံကဵုအၚ်္ဂလကျှန် ၄ သာ်ဏောၚ်၊ အရေဝ်၊ ဘာသာ၊ လိက်ပတ်ကဵု ဝၚ်ဒးနွံ၊ ဗီုကဵုအရေဝ်ဘာသာကီု ဆေၚ်ကဵုအာဲကၟာဲယေန်သၞာၚ် မပတံကဵု ဂဳတ၊ လှေ်ဒယှေ်၊တံဂှ် သၟတ်တံဒးလ္ၚတ်လဝ်ထေက်မံၚ်ဏောၚ်၊ သွက်ဂကူမွဲမွဲတှေ် ကဆံၚ်ၜိုတ်လဵုသၠုၚ်ဂှ် ၜတ်ကၞာတ်ကဵု ပရေၚ်ယေန်သၞာၚ်တံရ” သာ်ဏံညးဟီုရ။
တုပ်သာ်ဂှ်ကီု ဂကူမန်သွက်ဂွံတန်တဲအာဍာ်ဇမၠိုၚ်မာန်ဂှ် အရေဝ်ဘာသာကဵု လိက်ပတ်တံဂှ် ဇၟာပ်သၟတ်တံ ဟီုဂးသုၚ်စောဲမှ တန်တဲအာဍာ်ဇမၠိၚ်မာန်ဏေၚ် ညးကဵုဏာ ဥပမာသာ်ဏံရ။
“အရေဝ်ဘာသာ၊ လိက်ပတ်၊ ယေန်သၞာၚ်ဂှ် ပြဟ်ဟ်လၟုဟ်ဏံဟွံကၠေံကီုလေဝ်၊ အရေဝ်ညးတၞဟ်သၟောၚ်၊ လိက် ညးတၞဟ်သၟောၚ်၊ ယေန်သၞာၚ်ညးတၞဟ်သၟာၚ် လုပ်နှဴရဴကၠုၚ်တုဲ ပိုဲတံသုၚ်စောဲအာတှေ်၊ ဂကူတၞဟ်သၟောၚ်တံ ညံရဴၚိုတ်ထောံဂကူပိုဲကီု ဂကူပိုဲကၠက်အာမာန်မံၚ်ဏောၚ်”သာ်ဏံ နာဲဟံသာဆက်ဟီုရ။
ပ္ဍဲကဵုတန်ဗတောန်ဏံဂှ် ကွးဘာတိၚ်တိုက် ကွိၚ်ကွိုက်ကျာံ၊ ဗါတ်ကိုၚ်၊ တလောတ်၊ ဗတ်ကဠာ၊ ထဗိုန်တံ ၁၃ တၠ၊ ဒယှေ်ဒွက်ဇၞော် ၂တၠ၊ လှေ်ကွာဲ ၈ တၠ ပါလုပ်တုဲ အ္စာကဵုဘာ နာဲထဝ်ပေၚ်( အစာဘာတြေံတက္ကသိုလ်ယေန်သၞာၚ်-ဍုၚ်လ္ဂုၚ်)၊ နာဲထောန်သိၚ်ကဵု မာံတိုန်နန် တံ ၃ တၠ ဗ္တောန်ထ္ၜးလဝ် ဗွိုၚ် ၃ ဂိတုရောၚ်ဂွံတီ ကေတ်ရ။
နာဲထဝ်ပေၚ်ဂှ် “အဓိကပိုဲဗ္တောန်ကဵုကောန်ၚာ်တံဂှ် အခိၚ်လေဝ်ဂွံအိုတ်အောန်၊ ဂွံလေပ်ပြဟ်ပြဟ်မာန်တှေ် ပိုဲဗ္တောန်ကဵုဍေံတံ Music Notation သၚ်္ကေတ ဂဳတကၠာ၊ လၟုဟ်ကောန်ၚာ်တံဏံ ဆဵုNote တှေ် တိၚ်တိုက်ဂွံမံၚ်ယျ၊ ယဝ်ခါရ ဍေံတံဆက်လ္ၚတ်အာတှေ် ပဵုနူဏံဍေံတံ တိၚ်တိုက်ခိုဟ်အာဏောၚ်” ဟီုကဵုဌာန်ပရိုၚ်ဗၠးၜးမန်ရ။
ပ္ဍဲကဵုသဘၚ်စှေ်ဘာဏံဂှ် ရဲကွာန်ဝၚ်က ဗွဲမဂၠိုၚ်၊ ကမ္မတဳလိက်ပတ်ယေန်သၞာၚ်ပွိုၚ်ဍုၚ်ကျာ်ပိ၊ မိမကွးဘာတံကီု အပံၚ် ပူရိသာတ်ၜိုတ် ၁၀၀တိုန်စိုပ်ရောၚ်ဂွံဆဵုကေတ်ရ။
ဌာန်ဒတန်ယေန်သၞာၚ်မန်ဏံဂှ် နူကဵုသၞာံ ၂၀၁၁ ဒါရိုက်တာ နာဲကသုမန် စဒက်ပ္တန်လဝ်တုဲ ပံက်ကၠုၚ်လဝ်ဘာတန်ဗတောန် ကွိၚ်ကွိုက်ယေန်သၞာၚ် ၂ အလန်၊ တန်ဗ္တောန်လှေ် ၃ အလန်ဂှ် ကွးဘာ ၆၀ တၠ ပြၚ်တိုန်စိုပ်ကတ်လ္ၚတ်ကၠုၚ်လဝ်ရောၚ်ဂွံတီကေတ်ရ။