Categories
လိက်ပရေၚ်

ညးၜက်မံၚ်တရဴဍုၚ်မ္ၚးတအ် ညံၚ်ဂွံစုတ်မာဲမာန် ဗော်မန်တအ်ဆဝ်ဗ္ၚုဟ်ထေက်

သၟာကမၠောန်စိုပ်ဍုၚ်မ္ၚး(Internet)
သၟာကမၠောန်စိုပ်ဍုၚ်မ္ၚး(Internet)
ဝဏ္ဏမာန် – ညးနွံဍုၚ်မ္ၚးတအ်ညံၚ်ဂွံစုတ်မာဲမာန်ဂှ် နူကဵုညးတာလျိုၚ်တအ် ဖန်ရေၚ်တၠုၚ်မံၚ်နွံတုဲ ရဲညးဟွံလုပ် သၞောဝ် တအ်ဂှ် ယဝ်ရဗော်ပရေၚ်ဍုၚ်ကွာန်မန်တအ် ဟွံချဳဒရာၚ်

ပရေၚ်ဆဝ်ဗ္ၚုဟ်ဟွံမွဲမ္ဂး မာဲမန်တအ် ဆောံ လေၚ်အာနွံဂၠိုၚ်ရောၚ် ဂကောံမန်စိုပ်ဍုၚ်မ္ၚးတအ် ဟီုထ္ၜးရ။

အတိုၚ်ညးတာလျိုၚ် နူဂကောံပံၚ်ကောံမန်မလေဝ်ယှာ မွဲတၠဟီုထ္ၜးမ္ဂး ‘အပ္ဍဲကဵုဍုၚ်မလေယှာပိုဲဏံဂှ် မန် ပိုဲနွံ မံၚ်ၜိုတ်(၅) လက်ဒှ်မံၚ်၊ ပ္ဍဲဂှ်တှေ် ၜိုတ်(၃)လက်ပြၚ်ဂှ်တှေ် ရဲမံၚ်ဒၟံၚ်ကဵု ကာဒ်ဟံၚ်ပြာ်ဍုၚ်မလေဂှ် ရဲ ဟွံလုပ်သၞောဝ်ရ၊ ရဲလုပ်သၞောဝ်ဂှ်တှေ် ၜိုတ်မွဲလက်ပြၚ်ညိရ၊ သှေ်နူဂှ်ၜိုတ်(၂)လ္ၚီပြၚ်ၚ်ဂှ်တှေ် ရပ်လဝ် ကာတ် UN နွံ၊ ရဲလုပ်သၞောဝ်တအ်ကီု၊ ညးဟွံလုပ်သၞောဝ်တအ်ကီုယဝ်ရဗော်မန်တအ်ဟွံချဳဒရာၚ် ပရေၚ် ဆဝ်ဗ္ၚုဟ်ဟွံမွဲမ္ဂး ဒှ်မာဲဆောံလေၚ်ဂၠိုၚ်ရောၚ်’ ညးအုပ်ကာနာနာ ဂကောံပံၚ်ကောံမန်ဍုၚ်မလေယှာ ရာမညအီဆာဲ ဟီုထ္ၜးရ။

ပ္ဍဲကာလအကြာဏံဂှ် ညးစိုပ်မံၚ်ဍုၚ်မ္ၚးတအ်နလုပ်သၞောဝ်တအ် ညံၚ်ဂွံပ္တိုန်စရၚ်ဇရေၚ် နူကဵုရုၚ်ကလုတ် ဗၟာဂှ် ညးနွံတာလျိုၚ်တအ် ရေၚ်တၠုၚ်ဒၟံၚ်နွံရ။

အဆက်ဂှ်လလောၚ်တြးပ္တိတ်ဒၟံၚ်စရၚ်ညးဂွံအခေါၚ်စုတ်မာဲဂှ် ညးလ္ၚဵု စရၚ်တၚ်နၚ်ဗၠေတ်နွံ၊ ညးလ္ၚဵု စရၚ် ညးချိုတ်ပါမံၚ်ဂှ်ကီု၊ ညးလ္ၚဵုစရၚ်ကၠေံမံၚ်ကီုနွံရ၊ ပြသၞာတအ်ဏံဂှ် နူကဵုဗော်မန်တအ်ဒှ်ဓဝိၚ်တုဲ ဆဝ်ဗ္ၚုဟ် လဝ်ကဵုဗော်ပွိုၚ်ဍုၚ်နာနာတအ် ညံၚ်ဂွံရေၚ်တၠုၚ်စၟဳစၟတ်စရၚ်ဗၠေတ်မံၚ်တအ်ဂှ် နွံရ။

ဗော်ကောန်ဂကူမန်ဂှ် ‘ နကဵုဗော်ပိုဲဂှ်တှေ် ဇၟပ်ပွိုၚ်ဍုၚ် ဇၟာပ်ကွာန်ဂှ်ပိုဲဖျေံလဝ်ဗီု တိုန်မွဲသ္ၚိစှေ်မွဲ သ္ၚိတုဲတှေ် ကလးကဵုညးတအ် စရၚ်မာဲပါ ဟွံပါ၊ စရၚ်ညးသှေ်မံၚ် ရဲတိတ်မံၚ်ဍုၚ် မ္ၚးတအ်ကီုနွံတှေ် ညံၚ်ဂွံအာဗပေၚ် ပ္ဍဲကဵုရုၚ်ကမ္မယှေန်ဂှ် ကာလစိုပ်အခိၚ်ပေဲါရုဲမာဲတေံတှေ် ညံၚ်ဂွံစဴစုတ်မာဲ ပိုဲဆဝ်ဗ္ၚုဟ်လဝ်ၜိုတ်ဂှ်နွံ လၟုဟ် တှေ်ကၠောန်မံၚ်ဖိုဟ်’ သာ်ဏံ ညးအုပ်ကာနာနာ နာဲလျးတၟး ဟီုထ္ၜးရ။

သွက်ရဲနွံဍုၚ်မ္ၚးတအ်ဂှ် ညးဒၟံၚ်ကဵုပရေၚ်လုပ်သၞောဝ်တအ်သၟးဟေၚ် နူကဵုရုၚ်ကလုတ်ဆေၚ်စပ်တအ် ရေၚ်တၠုၚ်ဖန်ဇန်ဒၟံၚ်တုဲ သွက်ရဲညးဟွံလုပ်သၞောဝ်တအ် သာ်လဵုဂွံဒှ်ကဵုအာမာန်ကီုဂှ် ပရေၚ်ဖန်ဇန် ဟွံမွဲ မွဲသာ်ရ၊ ဟိုတ်ဂှ်တုဲ ဂကောံချဳဒရာၚ်မန်စိုပ်မံၚ်ဍုၚ်မ္ၚးတအ် ဒှ်ကၠုၚ်ဓဝိၚ် သွက်မာဲမန်နွံရ။

လ္တူညးၜက်မံၚ်တရဴဍုၚ်မ္ၚးညးလုပ်သၞောဝ်တအ်ဂှ်ကီု၊ ညးဟွံလုပ်သၞောဝ်တအ်ဂှ်ကီု ခိုဟ်အိုတ်ဂှ်မ္ဂး နကဵု ဗော်မန်တအ် ဍုၚ်မလေယှာမ္ဂး ဆက်စၠောံကဵု ဂကောံပံၚ်ကောံမန်မလေယှာ၊ ဍုၚ်သေံမ္ဂး ဆက်စၠောံ ကဵု ဂကောံပံၚ်ကောံမန်ဍုၚ်သေံတုဲ ညံၚ်ဂွံဆဝ်ဗ္ၚုဟ်အာမန်တအ် ရဲလုပ်သၞောဝ်မ္ဂး ဗီုပြၚ်လုပ်သၞောဝ်၊ ရဲ ဟွံလုပ်သၞောဝ်မ္ဂး ဗီုပြၚ်ညံၚ်ဂွံစုတ်မာဲပ္ဍဲဌာန်ဇကုမာန်ဂှ်တှေ် ဗော်မန်တအ်ဒးဖန်ဇန်ကဵုမွဲမွဲမာန်မှ ယဝ်သာ် ဂှ်ဟွံသေၚ်မ္ဂး မာဲမန်တအ်ဆောံလေၚ်ဂၠိုၚ်ကွေံကွေံရောၚ်ဂှ်လေဝ် ညးအုပ်ကာနာနာ ဂကောံပံၚ်ကောံမန် ဍုၚ်မလေဝ်ယှာဂှ် ဆက်ဟီုရ။

အပ္ဍဲကဵုဍုၚ်သေံ Thailand ဂှ် ကောန်ဍုၚ်မန်ဗၟာဗၞတ်(၅)တာန်နွံတုဲ ပ္ဍဲဂှ် မန် ကဵု သေံ(ယှာန်)ဂှ်ဂၠိုၚ်အိုတ်ရ၊ ညးဒၟံၚ်နလုပ်သၞောဝ်ဂှ်နွံလၟိဟ်အောန်တုဲ ညးဒၟံၚ်ဟွံလုပ်သၞောဝ်ဂှ် နွံဂၠိုၚ်ရ။

ထံက်ရံၚ်ကဵုကမ္မယှေန်တအ်လလောၚ်တြးပ္တိတ်ကၠုၚ် စရၚ်ညးဂွံအခေါၚ်ကဵုမာဲဂှ်မ္ဂး ညးစိုတ်လုပ်စကဵုပေဲါရုဲ မာဲဂှ်အောန်ကွေံကွေံရ၊ ရဲစိုပ်မံၚ်ဍုၚ်မ္ၚးတအ်ဂၠိုၚ်ဂှ် ဓဝ်ပတှေ်လ္တူပေဲါရုဲမာဲဏံ ဇြိုၚ်ဒၟံၚ်စိုတ် ပဵုနူ နူညးမၞုံအပ္ဍဲ ဍုၚ်တအ်ဏီတုဲ ညးတအ် ဂွံသ္ပကမၠောန်ဂွံအာစုတ်စရၚ်မာဲညးတအ်ပ္ဍဲရုၚ်ကလုတ်ဂှ်ကီု၊ အခိၚ်စိုပ်တေံ ညးတအ်ဂွံစဴစုတ်မာဲပ္ဍဲကဵုဌာန်ညးတအ်ကီုဂှ် ဇြိုၚ်မံၚ်စိုတ်ရောၚ် ရဲစိုပ်မံၚ်ဍုၚ်မ္ၚးတအ်ဂးရ။

‘လၟေၚ်သၞာံတုဲကၠုၚ်တေံတှေ် ညးဂွံအခေါၚ်စုတ်မာဲတအ်ဂှ်တှေ် ကာလစိုပ်အခိၚ်တှေ် စဴကၠုၚ်ဂှ် ဒးဟီုဗီုဂှ်ရ၊ ရဲနွံဒၟံၚ်ဍုၚ်မ္ၚးတအ်ဂှ် စိုပ်အခိၚ်တှေ်လေဝ် ညံၚ်ဂွံစဴကၠုၚ်စုတ်မာဲပ္ဍဲသ္ၚိ ဇကုမာန်ဂှ်တှေ် ယျးကလဳတှေ် ပိုဲသ္ပ ကောံဓရီုတုဲတှေ် ပိုဲဖျေံအာဗီုချပ်ဇန်အာကိစ္စဂှ်နွံရောၚ်’ သာ်ဏံ ဒုဥက္ကဌဗော်ဒဳမဵုကရေဇြဳအလုံရးမန် နာဲ ဆာန်တိ ဟီုရ။

ကြဴနူကဵုကမ္မယှေန်တအ်လလောၚ်ပ္တိတ်စရၚ်ညးဂွံအခေါၚ်ကဵုမာဲတုဲဂှ် ရဲညးစရၚ်ဗၠေတ်ဗၠေၚ်ဒၟံၚ်နွံတအ် ညံၚ်ဂွံကလေၚ်ပ္တိုန်ထ္ၜးဂှ် နကဵုဗော်ပရေၚ်ဍုၚ်ကွာန်လ္ၚဵု ဖျေံကၠုၚ်ဗီုချဳဒရာၚ်နွံကီုလေဝ် မန်စိုပ်မံၚ်ဍုၚ်မ္ၚး ဟွံလုပ်သၞောဝ်ဂၠိုၚ်ကဵုလက်ကိုဋ်တအ် ဂွံကဵုအာမာန်ကီုဂှ် ညးဂွံဖျေံလဝ်ဗီုချိုတ်တ်ပၠိုတ်တ်ဟွံမွဲဏီရအဴ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.