Categories
လိက်ပရေၚ်

ပြသၞာပၟတ်ဍုၚ်ဂှ် ဆက်သှေ်မံၚ်ဏီ

ရုၚ်စက်ပၟတ် ္ၚောန်ဒဵု ဍုၚ်မတ်မလီု (GS)
ရုၚ်စက်ပၟတ် ္ၚောန်ဒဵု ဍုၚ်မတ်မလီု (GS)
ဝဏ္ဏမာန် – အခိၚ်အလဵုအသဳဓမံက်ဒၟံၚ် ပရေၚ်ဖေါအ်ဗြေဝ်သွာၚ်နာနာဂှ် အပ္ဍဲကဵုညးဍုၚ်ကွာန်တအ်လေဝ် အာတ်မိက် ကၠုၚ်ပရေၚ်ဖေါအ်ဗြေဝ် မပ္တံဂၠံၚ် ဍာန် ဒဒန် ပၟတ် ဍာ် နာနာနွံကီုတုဲ ဒေသလ္ၚဵုဂှ် ပ္တိုန်ဘဏ္ဍာဇရေၚ်အလဵုအ သဳတုဲ

ဓမံက်ကၠုၚ်ရုပ်ရဴနွံ၊ ဗီုဂှ်ကီု သြန်ဘဏ္ဍာဇကုဇကု ပ္တိုန်ထ်ၜးအာတ်အခေါၚ်ဇရေၚ်အလဵုအသဳတုဲ ဂွံအ ခေါၚ်တုဲ ဇြဟတ်ဇကုကဵုဇကု ကၠောန်ၜိုတ်ရေၚ်တၠုၚ်ကၠုၚ် ပရေၚ်ဖေါအ်ဗြေဝ်ကွာန်ညးကဵုညးနွံကၠုၚ်ကီုရ။

ပရေၚ်ဖေါအ်ဗြေဝ်သွာၚ်တၞဟ်ဟ်ဂှ် ပြသၞာနွံအောန်ကီုလေဝ်၊ ပ္ဍဲကဵုပရေၚ်ဖေါအ်ဗြေဝ်ပၟတ်ဍုၚ်ဂှ် ဇၟာပ် ကွာန်ဟီုကြပ်ဂွံ က္တဵုဒှ်ကၠုၚ်ပြသၞာရ၊ ပြသၞာတအ်ဂှ် ဒေသကွာန်လ္ၚဵု ဒဵုတ္ၚဲ ဏံ က္တဵုဒှ်နွံဒၟံၚ်ဖိုဟ်နွံရ၊ ကွာန်လ္ၚဵုဂှ် ပြသၞာဂှ် မၚ်ဟတိုဟ်တိတ်မံၚ်လေဝ်နွံမံၚ်ဖိုဟ်ရ။

ဆေၚ်စပ်ကဵုပရေၚ်ပၟတ်ဍုၚ်ဂှ်တုဲ ညးတာလျိုၚ်အလဵုအသဳဆေၚ်စပ်တအ် သောၚ်ပြေဟဲအာလေဝ်နွံကီုရ၊ ကွာန်လ္ၚဵုဂှ် အဃောအဟိန်သောၚ်ပြသၞာဂှ် ပြသၞာထပ်က္တဵုဒှ်ကၠုၚ်လေဝ်နွံဒၟံၚ်ရ၊ ဗီုကဵုကွာန်ယေန်ဒံၚ်ဂှ် ညး တာလျိုၚ်ဆေၚ်စပ်တအ် အဃောသောၚ်ဒၟံၚ်ပြသၞာဂှ် သၟတ်မွဲတၠကဵု ညးတာလျိုၚ်ဆေၚ်စပ်တအ် ထပ် ဒှ်ကၠုၚ်ပြသၞာရ၊ ပြသၞာဂှ် လၟုဟ်မ္ဂး စိုပ်ဒၟံၚ်ပ္ဍဲရုၚ်သၞောဝ်ဓဝ်ပွိုၚ်ဍုၚ်မုဟ်ဍုၚ်ဖိုဟ်ရ။

ဟိုတ်နူပြသၞာဒှ်ကၠုၚ်သာ်ဂှ်နွံကၠုၚ်ဂှ်တုဲ ကွာန်လ္ၚဵုဂှ် ပ္တိတ်လဝ်သြန်ကွာန်ဇကုရ ကၠောန်ဓမံက်ရုပ်ရဴပၟတ်ဍုၚ် တုဲဒှ်အိုတ်တုဲဂှ် ကမၠောန်အိုတ်သီုအပ်ဇိုန်ကဵုမဆေၚ်စပ်(အလဵုအသဳ)လေဝ်နွံရ၊ ‘ ဗီုကဵုကွာန်ကၠအ်သတ် တှေ် လၟုဟ်ညးတအ်အပ်ထောံကဵု အလဵုအသဳရ၊ စရိတ်ၚ္ၚုဟ်မဳတာလေဝ် သက်သာကဝက်၊ ယဝ်ရ နူကဵု ကမ္မတဳကွာန်တှေ် ကွာန်လ္ၚဵုတအ်ဗက်ကံက်မံၚ် ၇၀/၇၅ ဒကေဝ်၊ ပ္ဍဲအလဵုအသဳဂှ် မွဲယူနေတ်မှ ၃၅ ဒကေဝ်ရတှေ် သက်သာကဝက်၊ ပြသၞာလေဝ်ဟွံမွဲ’ ဗီုဏံ နာဲနာၚ်ဥူ နူကွာန်ဘာဒေါဝ်ဂှ် ဟီုထ်ၜးရ။

ကမ္မတဳပၟတ်နူကဵုကွာန်နာနာတအ်ဓမံက်ဒၟံၚ်ရုပ်ရဴ ပရေၚ်ကမၠောန်ပၟတ်ဍုၚ်ဂှ် နူစတမ် မဳတာဗံက်ဂွံစိုပ်သ္ၚိဂှ် မွဲသ္ၚိအကြာ ၄ ကိုဋ်၊ ၅ ကိုဋ်ဒးမံၚ်ရ၊ သီုတက်ဇုက်-ပၟတ်ပၠန်မ္ဂး ပ္ဍဲမွဲသ္ၚိဂှ် အိုတ်ကြပ်ကဵု ၁၀ ကိုဋ်ဒှ်ရ၊ တန် တဴကဵုတက်ဂၠိုၚ်အောန်ရ။

ၚ္ၚုဟ်စတမ်ဂှ် သဝ်အိုတ်ၜိုတ်ဟီုလဝ်ဂှ် ယဝ်ခါရ ညးကေတ်လက္ကရဴဂှ်မ္ဂး ထပ်ဗပဵုလဝ် နူကဵုရဲကေတ်လဝ် တမ်ကၠာဂှ်ဏီရ၊ မွဲကွာန်ကဵုမွဲကွာန်ဟွံတုပ်ရ ဗီုကဵုကွာန်ကအ်ခပဳထဝ်ဂှ်မ္ဂး ရဲကေတ်ပၟတ်လက္ကရဴဏံ မွဲသ္ၚိ ၁၀ ကိုဋ်ဒးမံၚ်ရောၚ် ရဲကွာန်ကအ်ခပဳထဝ်မွဲတၠဟီုထ်ၜးရ။

ရဲကေတ်ပၟတ်ဍုၚ်လက္ကရဴဏံတှေ် ပ္ဍဲကွာန်ကအ်ခပဳထဝ်ပိုဲ မွဲသ္ၚိ ၁၀ ကိုဋ်၊ ရဲကေတ်လဝ်တံကၠာတေံဂှ်တှေ် ၄ ကိုဋ်ဘာ်၊ ရဲကွာန်တအ်ကဵုမာန်မံၚ်ရတုဲတှေ် မုလေဝ်ဟွံဒှ်ပရောမွဲသာ်ပုဟ် နူကွာန်ကအ်ခပဳထဝ်မွဲတၠ ဟီုတုဲ ပ္ဍဲကဵုကွာန် ဘာဒေါဝ်ပိုဲဂှ်လေဝ် ၈-၉ ကိုဋ် မၞိဟ်ကေတ်နွံအောန် ၚ္ၚုဟ်ဂှ်ဂှ် ဠဂွံတက်ပၟတ်တုဲဒှ်တှေ် အိုတ်ရောၚ် ၁၂ ကိုဋ် ၁၃ ကိုဋ်ဒှ်ရောၚ် နာဲနာၚ်ဥူ ရဲကွာန်ဘာဒေါဝ်ဂှ်ဟီုထ်ၜးရ။

ပၟတ်ဍုၚ်ကွာန်ကေတ်လဝ် နကဵုဇြဟတ်ဘဏ္ဍာညးဍုၚ်ကွာန်တအ်ဗွဲမဂၠိုၚ်ဂှ် ညးကေတ်လဝ်ပၟတ်တံကၠာ ဂှ်ကဵု ရဲကေတ်ပၟတ်လက္ကရဴဏံ တက်လဝ်ၚ္ၚုဟ်ဂၠိုၚ်နူ တံကၠာတေံဖအိုတ်ရ၊ အခိၚ်စကေတ်ပၟတ်တံကၠာဂှ် ညးသှေ်လက္ကရဴဏံဂှ် ဟိုတ်နူဟွံဒုၚ်ပ္တိတ်လဝ်စရိတ်နာနာ စတမ်တေံတုဲ တက်လဝ်သၞောဝ်ကွာန်ညးကဵု ညးဂှ် ဗပဵုလဝ် ၚ္ၚုဟ်ဂှ်တုဲ ကွာန်လ္ၚဵု ဒှ်ပြသၞာနွံရ။

ပ္ဍဲကဵုကွာန်ယေန်ဒံၚ်ဂှ် ဂကောံကွာန်ရဲဟွံကေတ်ပၟတ်တအ်လ္ၚဵု ကေတ်အခေါၚ်အရာတုပ်ကဵုဗီုကဵုရဲကေတ် လဝ်ပၟတ်နူစတံတေံဂှ်ကီုတုဲ ဒှ်ပရေၚ်ပရောကဵု ဂကောံရဲကေတ်လဝ်ပၟတ်နူတံတေံရ၊ ဆဂှ်ဟွံက ရဲဂကောံ ဟွံကေတ်လဝ်ပၟတ်နူတံလ္ၚဵုတအ် ပ္တိုန်ထ်ၜးလဝ်အဆံၚ်ၚ်တုဲ နူကဵုသ္ကိုပ်အုပ်ဓုပ်ပွိုၚ်ဍုၚ်ညးတအ် ဖျေံကဵုမွဲသ္ၚိ ၂ ကိုဋ်ဘာ် နအလဵုညးတအ် ဒုၚ်ထပ်ပ္တိတ်စေက်ကဵုတုဲ ယှအ်ဖျေံထောံၚ္ၚုဟ် နူကဵုညးကေတ်လဝ်နူတံတေံ ဏီ တၠဂုဏ်အာစာ မွဲဇကု ဟီုထ်ၜးရ။

ဗီုဂှ်ကီု ပ္ဍဲကဵုကွာန်ကြုၚ်ကြုက် ဟွံလအ်တုဲကၠုၚ်ဂှ် ဂွံအခေါၚ်ပၟတ်ဍုၚ်တုဲ အဃောစဓမံက်ဒၟံၚ်ရုပ်ရဴဂှ် ဂကောံရဲကွာန်တအ်ကဵု ညးတာလျိုၚ်လ္ၚဵုတအ် ဒှ်ပရေၚ်ပရော ပရောရာန်ကပေါတ်ပၟတ်တအ်ဂှ်ရ။

တၠဂုဏ်အာစာ ပုပ္ဖဟံသာ အာပ္တိုန်ထ်ၜးပ္ဍဲ ဝန်ဇၞော်ဓါတ်လလဳ နာဲလွဳအံၚ်တုဲ အတိုၚ်အလဵုဆန္ဒရဲကွာန်တအ် ဒၞာဲဇကုဒးစိုတ် ပၟိက်ဇကုဒးစိုတ်ဂှ် ရာန်မာန်ဂွံဓဝ်ကၠိုဟ်ခၠၚ်နူဂှ်တုဲ ညးတာလျိုၚ်ပၟတ်ပွိုၚ်ဍုၚ်တအ် ဒးဗက် ကဵုရ၊ ဟွံဂံၚ်လုပ်ပထုဲပရေၚ်ကမၠောန်ကွာန်ကြုၚ်ကြုက်ဂှ်ဟဂှ်ရ။

ပရေၚ်ကမၠောန်ပၟတ်ဍုၚ်ဂှ် ကွာန်လ္ၚဵုဗွဲမအောန်ဂှ် ပြေပြံၚ် ဟွံဒှ်ပဋိပက္ခတုဲ ကွာန်ဗွဲမဂၠိုၚ်ဂှ် ကမ္မတဳပၟတ် တအ်ကဵု ခမဳသၚ်၊ ကမ္မတဳပၟတ်တအ် ကဵု ရဲကွာန်၊ ရဲကွာန်ပါ်ထ္ကးဒှ်အာၜါလ္ပာ်တုဲ ရဲကွာန် ကဵု ရဲကွာန် သာ်ဝွံ ဒှ်ပရေၚ်ပရောအိုတ်ရ။

ပ္ဍဲကွာန် တဝ်ဂူ ဂှ် ညးကေတ်လဝ်ပၟတ်နူတံကၠာတေံ မွဲသ္ၚိ ၄ ကိုဋ်ဒးတုဲ ရဲကေတ်ပၟတ်လက္ကရဴဏံဂှ် ဒး ၂ ကိုဋ်ရ၊ ရဲကေတ်ပၟတ်ပါ်လက္ကရဴဏံ ဒးကဵု ၂ ကိုဋ်ဂှ် သၠဲပဵုကၠုၚ်တုဲ သီုဂွံပါ်ပရအ်ကဵု ရဲကေတ်လဝ်နူတံကၠာ တေံဏီ ရဲဒေသတအ် ဂးရ။

‘ ကွာန်နာၚ်လှုၚ်ပိုဲဂှ်တှေ် ပြသၞာဇၞော်ဇၞော်ဂှ်ဍေံဟွံဒှ် ဆဂးတှေ် ရဲကွာန်တအ်ပ္တိုန်ထ်ၜးအာတ်မိက် သောၚ်စ ရၚ်သြန်၊ စရၚ်သြန်ဟွံကိတ်ညဳတုဲတှေ် ညးဇၞော်တအ်စှေ်ကၠုၚ် သီရုပ်ဏာကမ္မတဳတြေံ ထပ်ဒက်ကမ္မတဳ တၟိ မုလေဝ်ပရေၚ်ကေတ်အရေဝ်ဟွံမွဲ၊ ကမ္မတဳတၟိတိုန်လေဝ် ဒှ်ကၠုၚ်ဗီုတြေံဂှ်ပၠန် ဒှ်ဂွံအာဗီုဂှ် ၂ အဆက် ရရောၚ်’ နာဲဗဳ နူကွာန်နာၚ်လှုၚ်ဂှ် ဟီုထ်ၜးရ။

ဆက်တုဲ စပ်ကဵုပရေၚ်ဗက်သြန် ယူနေတ်ပ္ဍဲကွာန်နာၚ်လှုၚ်ဂှ် မဳတာဗံက်နွံကီုလေဝ် ကမ္မတဳပၟတ်တအ်ဟွံ အာကျောဝ်ပ္ဍဲကဵုမဳတာဂှ်မွဲသာ်၊ ခုတ်ဟီုကေတ်ကဵုပါၚ် သ္ၚိဇၞော်ညိမ္ဂး မွဲဂိတု ၆ လ္ၚီ၊ သ္ၚိဍောတ်တ်သုၚ်စောဲ အောန်ညိတှေ် ၃ လ္ၚီ ဗီုဏံ ချိၚ်ဆဗက်ကံက်မံၚ် ဂးရ။

ကွာန်ပြဳ ပ္ဍဲကဵုပွိုၚ်ဍုၚ်ဇြပ်ဗုဂှ် ကမ္မတဳပၟတ်တအ် ပါ်ထ္ကးတိတ်အာ ဗီုညး ဗီုညးတုဲ ညးကွာန်ခမဳသၚ်တအ် ဟွံ စှေ်စိုတ်ဒှ်ကၠုၚ်ရ၊ ကြဴအိုတ် ဂကောံခမဳသၚ် ၄ ဘာတအ်ကဵု ညးကွာန်တအ်သ္ပကောံဓရီုတုဲ သၞာံတုဲကၠုၚ် ဏံ ဂကောံခမဳသၚ်တအ်သီကေတ်အဝဵု နူကမ္မတဳပၟတ်တအ်တုဲ ခမဳသၚ်တအ်ဒးစိုတ်ဂှ် ကလေၚ်ကဵုလဝ် တာလျိုၚ် ဥက္ကဌကမ္မတဳပၟတ် ညးဗြဴ မၞုံယၟု မိထဝ်လာဲ (အာစာဂဥုဲဗော်)ရ။

ဥက္ကဌကမ္မတဳပၟတ်ညးဗြဴ မိထဝ်လာဲတအ် ဂွံလျိုၚ်ပရေၚ်ပၟတ်ဂှ်ဟွံလအ်မွဲသာ် ဒးသောၚ်ပရေၚ်ပရော ကိစ္စ သြန်ခတှ် ကာလစဓမံက်ရုပ်ရဴပၟတ်တၟိတေံ ကိုဋ် ၁၀၀ ပြၚ်ၚ်ရ၊ ကိစ္စဏံဂှ် ကာလဂကောံခမဳသၚ်တအ် ကဵု လဝ်တာလျိုၚ်ညးတအ်ဂှ် စရၚ်သြန်လေဝ်ဟွံပါတုဲ ညးတအ်ဟွံကေတ်လျိုၚ်ရောၚ် အခိၚ်ဆဵုဂဗ ကုမိထဝ် လာဲဂှ် ညးဟီုထ်ၜးရ။

ပရေၚ်ကမၠောန်ပၟတ်ဍုၚ် နအလဵုညးကွာန်တအ် ဓမံက်ဒၟံၚ်ရုပ်ရဴတ္ၚဲဏံဂှ် ကွာန်ညးကုညး ပရေၚ်ပရောနွံ ကၠုၚ်ရ၊ ဒှ်ပရေၚ်ပရောနာနာသာ်တုဲ နကဵုအလဵုအသဳညးတာလျိုၚ်တအ်ဗက်သောၚ်ကလးတုဲ ပြေပြံၚ်အာ နွံ၊ ဟွံပြေပြံၚ်တုဲ ပြသၞာဆက်ဒှ်မံၚ်လေဝ်နွံ၊ ပြသၞာဟွံဒှ်ဏီ ကွာန်လ္ၚဵုသွက်ဂွံဒှ်ပြသၞာဂှ်လေဝ် နွံမံၚ်ဖိုဟ် ရောၚ်။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.