Categories
ပရိုၚ်

ဗော်ဍုၚ်မန်တၟိ ပအပ်ကောန်ဒုဟ် ဂဥုဲၜူမာဲ ကုဒပ်ဗၠာဲသၟိၚ်မုဟ်ဍုၚ် (၂) တၠ

သၟတ်သုၚ်စောဲသွံရာန်ဂဥုဲၜူမာဲ ၂ တၠ(GS)
သၟတ်သုၚ်စောဲသွံရာန်ဂဥုဲၜူမာဲ ၂ တၠ(GS)
သၞံၚ်တိုၚ် – နူကဵုဗော်ဍုၚ်မန်တၟိ ရပ်ဂွံသၟတ်သုၚ်စောဲ သွံရာန် ဂဥုဲၜူမာဲ ၂ တၠဂှ် ဂိတုအဝ်ဂေတ် ၂ရ ဏံ ကလေၚ်ပ်အပ် ကဵု ဒပ်ဗၠာဲသၟိၚ် အလဵုအသဳ ဍုၚ်မုဟ်ဍုၚ် ပ္ဍဲရုၚ်ဆက်ဆောံ ဍုၚ်မုဟ်ဍုၚ်ရ။

တုဲကၠုၚ်ဂိတုအဝ်ဂေတ် ရ ဂှ် သၞေဟ်ကၚ်ဗော်ဍုၚ်မန်တၟိ ဖျေံလဝ်ဗၟံက်ကွာန်အၜေတ် (သၞေဟ်ကၚ်တၞံ ပၞဟ်) ပ္ဍဲပွိုၚ်ဍုၚ်မုဟ်ဍုၚ်ဂှ် ရပ်ဂွံသၟတ်သုၚ်စောဲ-သွံရာန် ဂဥုဲၜူမာဲ ၂ တၠတိတ်ကၠုၚ် နူကွာန်(ၚြိမ်းချမ်းမြိုၚ် ရွာ) ဗၟံက်ကွာန်အၜေတ်ဂှ်ရ။

သၟတ်မၞုံအာယုက် (၁၉) သၞာံကဵု (၂၂) သၞာံ ၜါတၠဂှ်ဝွံ မဒှ်နူဍုၚ်ဇြပ်ဗု သီုၜါတၠတုဲ ရပ်ဂွံမဂဥုဲချေံ သာ် ပ္ကဴ (ပန်ရောၚ်) တဆိပ် (WY) ၂၈ မကဵု ကွဳဗဳယေက်နာမ် မွဲဖ္ဍိုက်ရ။

‘ပိုဲဂှ်တှေ် ရံၚ်ကေတ်ပရေၚ်ဆက်ဆောံကဵုအလဵုအသဳကီု၊ အဃောကေတ်မံၚ်အသိၚ်ပရေၚ်ၜိုဟ်လလမ် တုဲတှေ် ကောန်ဒုဟ်ဏံဂှ် ပိုဲပ်အပ်ကဵုအလဵုအသဳလေဝ် ဒုဟ်ဒန်ဂှ်တှေ် ဗီုလဵုညးတအ်ကေတ်အာ ဒုဟ်ဒန် ဂှ်တှေ် ဆေၚ်ကဵုသွာၚ်အလဵုအသဳရောၚ်’ သာ်ဏံ ဥက္ကဌခရိုၚ်မတ်မလီု နာဲဗညာလဴ ဟီုထ်ၜးရ။

ပ္ဍဲကဵုလိက်စၟဳစၟတ်လဝ်ဂဗုတ်သၟတ် ၂ တၠဂှ် လောန်ကၠုၚ် ၃ သၞာံတေံရ ကေၚ်သုၚ်စောဲကၠုၚ်မံၚ်၊ မွဲမတှေ် န ကဵုၚ္ၚုဟ် ၅၀၀၀ ဒကေဝ်ဂှ် ရာန်သုၚ်ကၠုၚ်မံၚ်၊ ပ္ဍဲကဵုကၟာဝက်ဂှ် ကေၚ်ရာန်လဝ် ၂ ဝါ၊ တုဲကၠုၚ် ၂ သၞာံတေံ ရ ရဲကသေအ်တုဲတှေ် အာရာန်မံၚ် ပ္ဍဲကဵုကွာန် (ၚြိမ်းချမ်းမြိုၚ်) ဂှ် အလန်ကၠာအိုတ်ဂှ် ၁၀ မ၊ အလန် ဒုတိယ ဂှ်တှေ် ၁၂ မ၊ အလန်လက္ကရဴဠဒးဒုၚ်ရပ်ဏံ ရာန်နၚ် ၃၀ မ၊ ပိုဲညးၜါသုၚ်ထောံ ၂ မတုဲတှေ်သှေ် ၂၈ မ၊ အဃောလ္ပာ်ကလေၚ်ဂှ် ဒးဒုၚ်ရပ်ပ္ဍဲကဵုသၞေဟ်ကၚ် ပါၚ်ဂၠံၚ်အၜေတ်ဂှ်ရ သာ်ဏံ သၟတ်ဒးဒုၚ်ရပ် တအ် ဟီုဓမံက်ပ္တိတ်လဝ်ရ။

ဗၟံက်ကွာန်အၜေတ်ဂှ် ဒှ်ဂၠံၚ်ပၞော်သၟတ်တအ် အာသုၚ်ဒၟံၚ်ဂဥုဲၜူမာ ဲ(ဂဥုဲချေံ) မွဲတုဲ ညးတာလျိုၚ်ဒေသ နူ ဗော်ဍုၚ်မန်တၟိတအ်လေဝ် မၚ်ရပ်စၟဳစၟတ်ဒၟံၚ် သၟတ်တအ်လုပ်တိတ်အာကၠုၚ် နူဂၠံၚ်ဂှ်နွံတုဲ ရပ်ဂွံဒၟံၚ်သၟတ် သုၚ် စောဲ-သွံရာန် မဂဥုဲဂှ် မွဲဏှေအ်မွဲဏှေအ်နွံရ။

သၞောဝ်ဥပဒေဒုဟ်ဒန်ဂဥုဲၜူမာဲ နူဗော်ဍုၚ်မန်တၟိ ချူဓဇက်လဝ်ဂှ် ၝောံပိုဒ်(၁) ယြဴပူဂဵုမွဲသုၚ် စောဲဂဥုဲၜူမာဲ ထေၚ်လဵုကၠးဖ္ဍးမ္ဂး ဒဏ်ထံၚ်နူ(၂)ဂိတု ဒဵုကဵု(၆)ဂိတု၊ ၝောံပိုဒ်(၂) ယြဴပူဂဵုမွဲ ယဝ်ရကၠောန်တဵုလွဳဂဥုဲၜူမာဲ ရန်တၟံကဵုသွံရာန်မ္ဂး ဒဏ်ထံၚ်နူ(၁)သၞာံ ဒဵုကဵု(၃)သၞာံ၊ ၝောံပိုဒ်(၃) ယြဴပူဂဵုမွဲ ယိုက်ပလံၚ် ဒေပ်စွံ ကၠောန် ဗဒှ်ဂဥုဲၜူမာဲမ္ဂး ဒဏ် ထံၚ်နူ(၂)သၞာံ ဒဵုကဵု(၅)သၞာံတုဲ ကပေါတ်ဆက်စပ်ကဵုဂဥုဲၜူမာဲဂှ် သြန်ကီု ယာန်ကီု သီ ကေတ်နဒဒှ်ဘဏ္ဍာ ဗော်၊ ၝောံပိုဒ်(၄) ယြဴပူဂဵုမွဲ ရန်တၟံကဵု ပရေၚ်သွံရာန်တုဲ ဒေပ်စွံ ယိုက်ပလံၚ် ဂဥုဲၜူမာဲမ္ဂး ဒဏ်ထံၚ်နူ(၃)သၞာံ ဒဵုကဵု(၇)သၞာံတုဲ ကပေါတ်ဆက်စပ်ကဵုဂဥုဲၜူမာဲ သြန်ကီု ယာန်ကီု သီ ကေတ်နဒဒှ်ဘဏ္ဍာဗော်၊ ၝောံပိုဒ် (၅) ယြဴပူဂဵုမွဲ ကၠောန်ဗဒှ် တြးဂဥုဲၜူမာဲမ္ဂး ဒဏ်ထံၚ်နူ(၇)သၞာံ ဒဵုကဵု (၁၀)သၞာံတုဲ ကပေါတ်ဆက်စပ်ကဵုဂဥုဲၜူမာဲဂမၠိုၚ် သြန်ကီု ယာန်ကီု သီကေတ်နဒဒှ်ဘဏ္ဍာဗော်ရောၚ် သာ်ဝွံ ချူလဝ်နွံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.