ဠေဝ် က္လေၚ်ဗ္ဂပ်ကဵုသၟးသၟး ဒၞာဲကဵုရုၚ်ဂဥုဲ ဍုၚ်ဇြပ်ဗု ပ္ဍဲသေပ်တေမ်ဗာ ၈ မံက်ဏံဂှ် ဂွံဆဵုကေတ်ရ။
ဌာန ပခိုၚ်ပခိုဟ် ပဠေဝ်ဗ္ဂပ်ဒၟံၚ် ဇိုတ်တဲပ္တောံ နူဍုၚ်ဘာအၚ်ဝွံ ဂကောံဇိုၚ်ခဍာ်ဗ္ကေတ်ဍုၚ်ဗၟာ၊ ဂကောံဇိုၚ်ခ္ဍာ်ဗ္ကေတ် ဆေၚ်ကဵုရးဍုၚ်နာနာ ကေုာံ ကမ္မတဳ ဇိုၚ်ခ္ဍာ်ဗ္ကေတ် ဆေၚ်ကဵုရးဍုၚ်နာနာ တံ ပံၚ်ကောံ ပံက်ပ္တန်လဝ်တုဲ ဂေတ်ရး ရၚ်တၠုၚ်ကဵုမံၚ် ပရေၚ်ပ္တုဲဖဵု ကုညး ဇိုၚ်တဲ ပိုတ်တ်တံရ။
“ရဲဒးအာမံၚ်ကဵု ဇိုၚ်ပ္တောံ တံဂှ် ဇိုၚ်ဂှ်လေဝ် ဇိုၚ်ပ္တောံရ၊ ဂတာဇိုၚ်ဂှ်လေဝ် ပ္တောံရ၊ ရုပ်ဇိုၚ် ပ္တောံတံဏံ ဍိုက်ဂွံ ၄ ဂိတု ၊ ၅ ဂိတုတှေ် လီုရ။ ဂတာဇိုၚ်လီုအာ ဇုက်ပိုတ်အာတှေ် ဍေံတံဒးကၠုၚ်ကၠောန် ပ္ဍဲဍုၚ်ဘာအၚ်တုဲ ခက်ကဵု ပရေၚ်စသုၚ် အာကၠုၚ် ဍေံတံရ။ ဂုန်နူဂှ်ရ လီုအာ ပိုတ်အာတှေ် ဍေံတံ ဟွံကၠုၚ်ကၠောန်ရ။ အတိုၚ် လီုလီုယောၚ်ၚ်ဂှ်ရ ဍေံတံ ဍိုက်အာ လိုန်အာမံၚ်။ ပိုဲညာတ်ကေတ် ဗီုဂှ်တုဲ ဍေံတံ ညံၚ်ဂွံသက်သာအာ သဗ္ဗအဿီုဂှ် ဂေတ်ရး ဂေတ်ဒေသတုဲ ဒးဗက်ပဠေဝ်ကဵုမံၚ်” သာ်ဝွံ နာဲသဵုထာ် ညးတာလျိုၚ်ဂေတ်ရး နူဌာနဂှ် ဟီုရ။
ပ္ဍဲပွိုၚ်ဍုၚ်ဇြပ်ဗုဂှ် လၟိဟ်မၞိဟ် ဒးဗ္ဂပ်ဇိုၚ်ပ္တောံ နွံၜိုတ် ၁၀၉ တၠတုဲ အပ္ဍဲဂှ် မၞိဟ်ပြံၚ်မံၚ် ပ္ဍဲပွိုၚ်ဍုၚ်တၞဟ်ဟ် နွံၜိုတ် (၄၀) တလရ။ ပ္ဍဲညးကၠုၚ်ပဠေဝ် ဇိုၚ်ပ္တောံတံဂှ် ရဲဝေၚ်ဒြဟတ် အဝဲဟွံခံၚ် (မသန်းစွမ်း အားကစားသမား) လ္ၚဵုလ္ၚဵုတံလေဝ် ပါကၠုၚ်ကီု ဂွံဆဵုကေတ်ရ။
ဥုမိုၚ်ထူ သၟာပြိုၚ်လိုန် ကွဳလိုန် နကဵုဇိုၚ်ပ္တောံဂှ် “ပ္ဍဲသၞာံ ၁၉၈၅ တေံ ပါအာ ပ္ဍဲပဝ်တာ လိုန်ဒးမာၚ်တုဲ ဇိုၚ်ပိုတ်အာ ဂွံၜိုတ် ၃၀ သၞာံရ။ ဆ္ဂး လၟုဟ် အဲပြိုၚ်လိုန်မံၚ် ကွဳလိုန် ကဵုရဲ ဇိုၚ်ခိုဟ်ဟ်တံဏေါၚ်။ အဲပြိုၚ်ကဵု ရဲဇိုၚ်ခိုဟ်ဟ်ဂှ် ကေၚ်ဂွံကၠုၚ် တတိယကီု၊ ပြိုၚ်ကဵု ရဲဘဝတုပ်တံဂှ် ကေၚ်ဂွံကၠုၚ် တဆိပ်ထဝ်။ ကၠာတေံလေဝ် ဇိုၚ်အဲဏံ အဲကေၚ်အာပဠေဝ် ပ္ဍဲဘာအၚ်ကီု။ လၟုဟ်ဍေံတံ ကၠုၚ်ပဠေဝ်ကဵု ဒဵုကဵုဏံတှေ် မိပ်စိုတ်ကွေံကွေံ” ဂးတဴရ။
ဇိုၚ်အဲ ၜိုန်ဟွံခံၚ်ကီုလေဝ် စၟတ်တ္ၚဲ ၁၃ ဏံ ပ္ဍဲဍုၚ်ဇြပ်ဗု ကၠောန်ပ ပေါဲပြိုၚ်လိုန် ကွဳလိုန် တရဴ ၄ရ မာၚ်ဂှ် အဲလေဝ် လုပ်ပြိုၚ်ကီုဏောၚ် ဥုမိုၚ်ထူ ဂးရ။
ဲညးဂမၠိုၚ် မကၠုၚ်ပဠေဝ် ဇိုၚ်ပ္တောံဂှ် ဗွဲမဂၠိုၚ် ညးမ္ဒးစုတ်လဝ် ဇိုၚ်ပ္တောံ ဒၟါနူကွဳယာန် ဒှ်အာမွဲသာ်ၜါရာ သၟးရ ဂွံဆဵုကေတ်။
“ ကွဳလိုန်ဓါတ်ဗကပ်တုဲ ဒးကုတ်ထောံ၊ ကုတ်ထောံ ဂွံၜိုတ်မွဲသၞာံ။ လၟုဟ် ညးတံကၠောန်ကဵု စုတ်ကဵု သီုဇိုၚ်ပ္တောံ သီုဂရောပ်ဇိုၚ်တှေ် ကွာ်လေဝ် ကွာ်ဂွံအာ၊ မိပ်လေဝ် မိပ်စိုတ်” သာ်ဝွံ ဥုအိုၚ်ကျဝ်ထောန် မကၠုၚ်ပဠေဝ်ဇိုၚ်ဂှ် ဟီုရ။
ဂကောံဝွံ ညးတံဂေတ်လန်ဒၟံၚ် ပ္ဍဲတွဵုရးမန်၊ တွဵုရးကရေၚ်၊ ရးတနၚ်သဳ၊ တွဵုရးကယာ ကေုာံ ရးဗဂေါ ကရေက်ဗၟံက် တံတုဲ ပဠေဝ်ဗ္ဂပ်ကဵုမံၚ် နကဵုၚ္ၚုဟ်သၟးသၟးဏောၚ် ဂွံတီကေတ်ရ။
ယဝ်ညးဒးက္လေၚ်ပဠေဝ်ဂၠိုၚ်ၚ်၊ ဒးက္လေၚ်လှာဲတၟိတၟိတံနွံမ္ဂး ညးတံ က္လေၚ်ပ္လံၚ်ဏာ ဌာနတေံဏောၚ်။ အစဳဇန် ဂေတ်လန်ရးတုဲ ပွမပဠေဝ်ဗ္ဂပ်ကဵု ဇိုၚ်တဲပ္တောံတံဝွံ ညးတံအာ ဇၟာပ်ပွိုၚ်ဍုၚ် မၞုံပ္ဍဲတွဵုရးမန်ဂှ် ဏောၚ်တုဲ သွက်ဂွံ ဆက်အာ ပ္ဍဲပွိုၚ်ဍုၚ် မတ်မလီုကဵု ပွိုၚ်ဍုၚ်ၜါသွာၚ် နွံမံၚ်ဏီဏောၚ် ဂွံတီရ။