Categories
ပရိုၚ်

ပ္ဍဲပေဲါရုဲမာဲဏံ တဆိပ်ၜိုပ်ဂၠိုၚ်ဒၟံၚ်ဂှ်တုဲ ညးဍုၚ်ကွာန်သ္ဇိုၚ်သၟဝ်တံ သွက်ဂွံထုဲထံၚ်ကဵုပရေၚ်စုတ်မာဲနွံ

 ဗီုပြၚ်တဆိပ်ဗော်နာနာ(Copy)
ဗီုပြၚ်တဆိပ်ဗော်နာနာ(Copy)
သၞံၚ်တိုၚ် – ပ္ဍဲကဵုပေဲါရုဲမာဲနဝ်ဝေန်ဗါ ၈ ဏံဂှ် တဆိပ်ညးစၞးနူဗော်မန်တံကီု တဆိပ်နကဵုပူဂဵုတံကီု သုၚ်စောဲလဝ် တဆိပ်ၜိုပ် ဖအိုတ်တုဲ ညးဍုၚ်ကွာန်သ္ဇိုၚ်သၟဝ်တံ သွက်ဂွံထုဲ

ထံၚ်အာကဵုပရေၚ်စုတ်မာဲနွံဒၟံၚ်ရ။

သ္ပစၞးမန်တုဲ တဆိပ်ရုပ်ၜိုပ်ဂှ် နူဗော်ပရေၚ်ဍုၚ်ကွာန်ပိဗော်ဂှ်ကီု၊ နကဵုပူဂဵုလေဝ်ကီု သ္ပသမ္တီ လဝ်ကဵုဗီုရုပ်ၜိုပ် ကီုတုဲ မွဲမွဲပွိုၚ်ဍုၚ်မ္ဂး တဆိပ်ၜိုပ်ဗီုပြၚ်နွံဗၞတ်အောန်အိုတ်(၅)ဗီုတုဲ ဂၠိုၚ်မ္ဂး ဒဵုကဵု(၇)ဗီု နွံဒၟံၚ်ရ၊ ဟိုတ်နူဂှ်တုဲ ညးဍုၚ်ကွာန် သ္ဇိုၚ်သၟဝ်တံ ရုဲစှ်ညးစၞး ဟွံဒးတုဲ သွက်ဂွံထုဲထံၚ်အာနွံရောၚ် ရဲဒေသတံဟီုဂးကၠုၚ်နွံရ။

‘ဗွဲမဂၠိုၚ်ပ္ဍဲကွာန်ပိုဲတှေ် ညးလေပ်လိက်အောန်ကွေံကွေံ၊ ညးတီလဝ်ပရေၚ်ဗော်တံလေဝ်နွံအောန်ကွေံကွေံ မွဲတဲ ဗော်ဏံဂှ် ရုပ်ၜိုပ်ဏံ စနူပိုဲလေဝ်ဟွံတီပုဟ်တှေ် ဗီုလဵုဂွံရုဲစုတ်အာမာဲ ဗီုလဵုလေဝ်ကေတ်ဟွံဒးပုဟ်’ သာ်ဏံ နာဲထောန်နာၚ် နူကဵုပွိုၚ်ဍုၚ်ဇြပ်ဗုဂှ် ဟီုရ။

ရုပ်တဆိပ်ၜိုပ်ဝွံ ကာလပေဲါရုဲမာဲ ၂၀၁၀ တုဲကၠုၚ်တေံမ္ဂး စၞးဂကူမန်ဂှ်ရုပ်ၜိုပ်မွဲဗီုပြၚ်ဟေၚ်နွံတုဲ ပ္ဍဲကဵုပေဲါရုဲ မာဲ နဝ်ဝေန်ဗါ ၈ ဏံဂှ် ရုပ်ၜိုပ်ဂၠိုၚ်ကဵုဗီုတိတ်ကၠုၚ်နွံရ၊ ‘ညးဍုၚ်ကွာန်လ္ပာ်ရေဝ်ပိုဲဏံဂှ်တှေ် ဗော်လေဝ်ညး တအ်ဟွံတီ ပုဟ် မၞိဟ်တေံၜိုပ်ဏံလေဝ်ညးတအ်ဟွံတီပုဟ်၊ ညးတအ်ဂွံရုဲစုတ်ကဵုမၞိဟ်ဍာ်ဒကေဝ်ဂှ်တှေ်ပ ဟီုရ၊ မၞိဟ်ညးတအ် ဍုက်ကေဝ်တီညာတ်ဂှ်ရ ညးတအ်ဒးစုတ်ဗီုဂှ်’ သာ်ဏံ နာဲဥုလေဝ် သၟတ်ပွိုၚ်ဍုၚ်ရေဝ် ဟီုရ။

နာဲယှုၚ်လေန် နူကဵုဍုၚ်လၟိုၚ် ပွိုၚ်ဍုၚ်ရေဝ်ဂှ်လေဝ် “ ကာလ ဇကုစုတ်မာဲတှေ် ညံၚ်ဟွံစုတ်ဒး ရုဲဒး မၞိဟ်ဗၠေတ်ဂှ် ဒးရံၚ်ဂၠိုက်ဂၠာဲထေက်ဏောၚ် ဇကုဂကူမန် ဒးစုတ်မာဲကဵုညးစၞးအလံၚ်အမာတ်မန်ပိုဲတံရ နကဵုအလဵုဇကုအဲ အဲမိက် ဂွံဒှ်ဂှ်တှေ် ပူဂဵုဍိုက်ဒကေဝ်ခိုဟ်ဟ် မၞိဟ်ရေၚ်တၠုၚ်သွက် ပရဟိတ အရၚ်မၞိဟ်ဂမၠိုၚ်ဇေတ်တ်ဂှ် မိက်ဂွံကဵု ဇြဟတ်ရ” ညးဟီုရ။

လၟုဟ်မ္ဂး စပ္တံနူသေပ်တေန်ဗါ ၈ ဂှ်စတုဲ ညးစၞးအလံၚ်အမာတ်တအ် စစှေ်ဒၟံၚ်ပရေၚ်စန်ဒက်မာဲ အကြာညး ဍုၚ် ကွာန်တအ်နွံရ၊ ၜိုန်ဂှ်လေဝ် စပ်ကဵုပရေၚ်ကဵုပညာဂွံစုတ်မာဲဂှ် ညးဍုၚ်ကွာန်တအ်ဗွဲမဂၠိုၚ်ဟွံတီကၠိုဟ် လဝ်ပရေၚ် စုတ်မာဲနွံဒၟံၚ်တုဲ ညးဍုၚ်ကွာန်လ္ၚဵု အာစုတ်မာဲညိဟာဂှ် ဒးတံၚ်မံၚ်ခယျဏီရောၚ် သၟတ်ဂှ်ဆက် ဟီုထ်ၜးအကာဲအရာ ဒေသညးတအ်ရ။

‘ဗီုလဵုပိုဲဒးစုတ်မာဲရော အမာတ်လေဝ်မွဲဟကအ်၊ ၜိုပ်လေဝ်မွဲဟကအ်တှေ် ဗီုလဵုဒးစုတ်ရော ပိုဲဟွံကၠိုဟ်ပုဟ် ဒးစုတ် တွဵုတှ် စုတ်ဂွံၜိုပ်မွဲတှေ်တုဲရ’ သာ်ဏံ ဝုတ်ဇၞော် မိပေဝ်နူကဵုပွိုၚ်ဍုၚ်ဇြပ်ဗုဂှ် ဟီုရ။

ပ္ဍဲကဵုပွိုၚ်ဍုၚ်မွဲပွိုၚ်ဍုၚ်မ္ဂး ကဠာမာဲကၠတ်ထဝ်ညးဍုၚ်ကွာန်၊ ကဠာမာဲကၠတ်ထဝ်ညးဍုၚ်ကွာန် ကဵု ကဠာမာဲ ကၠတ်ထဝ် တွဵုရးဍုၚ်မန် နွံတုဲ မွဲတၠမ္ဂး ဂွံအခေါၚ်စုတ်မာဲ ကၠတ်ထဝ်ပိဗၠိုၚ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.