Categories
ပရိုၚ်

ပေါဲထ္ပက်စၟတ်တဲ NCA ညံၚ်သ္ဂောံဒှ်ဂှ် ဂကောံမဟာဇန်တံလေဝ် ဘိုၚ်ကဵုကီုညိ အလဵုအသဳ ဖ္တိုက်ဖၟောဝ်

ညးစၞးအလဵုအသဳ ဃောဆဵုဂကောံမဟာဇန်(MPC)
ညးစၞးအလဵုအသဳ ဃောဆဵုဂကောံမဟာဇန်(MPC)
အိုက်သာၚ် – ပေါဲထ္ပက်စၟတ်တဲ NCA သွက်ဂွံပဒိုအ်ထောံ ပဋိပက္ခလွဟ် အကြာအလဵုအသဳကဵု ဂကောံရပ်လွဟ် ကောန်ဍုၚ်အရၚ်တံ သ္ဂောံဒှ်ပြဟ်ဟ်ဂှ် ဂကောံမဟာဇန် မချဳဒရာၚ်မံၚ် ပရေၚ်မၞိဟ် နာနာတံလေဝ် ဗိုၚ်သဳကၠဳ ဗိုၚ်ဂစာန်ကဵုကီုညိ နူအလဵုအသဳ ဖ္တိုက်ဖၟောဝ် ဆဝ်မ္ၚုဟ်လဝ်ရ။

ဥုအံၚ်မေန် ဝန်ဇၞော်ကၟိန်ဍုၚ် ဒုဥက္ကဌ UPWC (ကမ္မတဳ ဓမံက်ရုပ်ရဴ ပရေၚ်ၜိုဟ်လလံကၟိန်ဍုၚ်) ကဵု ဥုသဵုတိၚ် ဝန်ဇၞော်ကၟိန်ဍုၚ် ဌာနဝန်ဇၞော် ရုၚ်သမ္မတ တံ နူဏေံ သေပ်တေမ်ဗာ ၂၀ ဂှ် ဆဵုကဵု ညးစၞးဂမၠိုၚ် ဗၞတ် ၃၀ တလ နူဂကောံ လ္ပာ်အရာပ်တံ ပ္ဍဲဌာနပရေၚ်ၜိုဟ်လလံဗၟာ MPC ဂှ်တုဲ ပံက်ဟီုဏာ ဂလာန်ဖ္တိုက်ဖၟောဝ် အတိုၚ်ဗွဲလ္တူတေံဂှ်ရ။

ဝန်ဇၞော် ဥုအံၚ်မေန်ဂှ် “လိက်ကသုက် NCA ဂှ် အလဵုအသဳ မွဲဓဝ်ရ ပိုၚ်ဟွံသေၚ်၊ ပိုၚ် သီုညးဖၟိုတ်ရ။ ဒှ်သာ်ဂှ်ရ ညံၚ်ဂွံဒှ် ပရေၚ်ထ္ပက်စၟတ်တဲပြဟ်ဟ် ပ္ဍဲလ္တူလိက်ကသုက်ဏံဂှ် နကဵုဂကောံ မဟာဇန် မချဳမံၚ်သွာၚ်နာနာ တံလေဝ် ဘိုၚ်ဂစာန်ကဵု ကီုညိ ဖ္တိုက်ဖၟောဝ်ဏာရ။ အခန်ကဏ္ဍ ဂကောံညးတံဂှ် ဇၞော်မံၚ်ကွေံကွေံရ။ ဒၟါနူဂှ်ရ မိက်ဂွံကဵုဗိုၚ်ကၠောန် ပ္ဍဲပရေၚ်ထ္ပက်စၟတ်တဲ NCA ဏံကီု” ဂးတဴရ။

အစဳဇန် ထ္ပက်စၟတ်တဲ လိက်ကသုက် NCA (လိက်ကသုက်ဒိုအ်ပန်ပှော် အလုံမွဲဍုၚ်) ဂှ် လ္ပာ်အလဵုအသဳ ၜိုန်စဳဇန်လဝ် သွက်ဂွံထ္ပက် ပ္ဍဲဂိတုအံက်တဝ်ဗာ ပထမသတ္တဟ ဂှ်ကီုလေဝ် ပၞောဝ်ကဵု ဂကောံရပ်လွဟ် ၁၅ ဂကောံ မကော်ဘိက်လဝ် ဗဗွဲသၞောဝ်ဂှ် ဂကောံလဵုမွဲ လုပ်ထ္ပက်စၟတ်တဲ ရောဂှ် ဟီုကဵုကၠးကၠးလေဝ် ဟွံမာန်ဏီ သာ်ဝွံ ညးမၞုံတာလျိုၚ်ဂမၠိုၚ် နူရုၚ် MPC ဂှ်ဟီုရ။

“ဂကောံ အလဵုအသဳ ပိုဲမွဲဓဝ် ပဆုဲပချဳ NCA ဏံဟွံမာန်။ ဇြဟတ်ဓရိုဟ် နူဂကောံ ညးတံလေဝ် ပိုဲမိက်ဂွံဂွံကီု။ ကလောန် NCA ညံၚ်ဂွံစိုပ်ဒတုဲဂှ် ဂကောံညးတံ ပမာန်မံၚ်ဏောၚ်။ ဂုန်နူဂှ်ရ ညးတံလေဝ် ဗိုၚ်ဂစာန်ကဵုကီုညိဂှ် ပိုဲဒးကသေအ်” သာ်ဝွံ ဥုသဵုတိၚ် (ဝန်ဇၞော်ကၟိန်ဍုၚ်) ဟီုရ။

စပ်ကဵုကိစ္စ ပရေၚ်ၜိုဟ်လလံ ဍုၚ်ဗၟာဏံတုဲ ဂကောံလ္ၚဵုလ္ၚဵုတံ ဟွံပေၚ်စိုတ် ဟီုဂးပါ်ပါဲ ဂွံမိၚ်မံၚ်ကီုရ၊ ဆ္ဂး လ္တူကိစ္စဏံ ညးညးအဲအဲ အေၚ်ဒုၚ် ဂလိၚ်စိုတ်တုဲ ဗိုၚ်ကၠောန်အာအို်တ်ညိ ဝန်ဇၞော်ကၟိန်ဍုၚ်တံ ဟီုဖ္တိုက်ဖၟောဝ်ကၠုၚ်ရ။

ကိစ္စလိက်ကသုက် NCA (လိက်ကသုက်ဒိုအ်ပန်ပှော် အလုံမွဲဍုၚ်) ဏံဂှ် ဂစာန်ကၠုၚ်မံၚ် နူသၞာံ ၂၀၁၁ တေံရတုဲ အခါစိုပ် သၞာံ ၂၀၁၅၊ ဂိတုအဝ်ဂါတ်ဏံဂှ် စိုပ်ကၠုၚ်အဆံၚ် ဒဵုကဵုတုပ်စိုတ် နဒဒှ် မူဒ္တန် ကီုလေဝ် ဟိုတ်နူ ထ္ပက်စၟတ်တဲ ဟွံမာန်ဏီဖိုဟ်ဂှ်ရ ဗီုအလဵုအသဳ ဖန်ဖက်ပြုပြေၚ်မံၚ်ဏံ ညးဂမၠိုၚ် ဟီုပါ်ပါဲမံၚ်အိုတ်ရ။

ပ္ဍဲကဵု မူဒ္တန် NCA နွံမံၚ် ၃၃ တၚ်ဂှ် ၜိုတ် ၃၂ တၚ်ဂှ် တုပ်စိုတ် တုဲဒှ်မံၚ်အိုတ် ကီုရလေဝ်၊ သှေ်မံၚ်မွဲတၚ် စပ်ကဵုဂကောံ ဂွံအခေါၚ် လုပ်ထ္ပက်စၟတ်တဲ တံရ။ စပ်ကဵုတၚ်ဏံတုဲ လ္ပာ်ကောန်ဍုၚ်အရၚ်တံ အာတ်မိက်ဂှ် ဇၟာပ်ဂကောံ ရပ်လွဟ် ဖၟိုတ် ညံၚ်ဂွံ ကဵုအခေါၚ် လုပ်ထ္ပက်စၟတ်တဲ NCA ၊ ဆ္ဂး လ္ပာ်အလဵုအသဳဂှ် ဟွံဒုၚ်တဲ၊ ပါဲတးကၠေံ ဂကောံလ္ၚဵုလ္ၚဵုရ၊ ဒၟါနူဂှ်ရ ကိစ္စပေါဲထ္ပက်စၟတ်တဲ ဒိုအ်ပန်ပှော် အလုံမွဲဍုၚ် ကော်ဂး NCA ဂှ် ဍေံဒးခက်ခိုအ် ဆိုအ်ဗမံၚ်ဖိုအ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.