“ဒၞါဲ ကဵုပရေၚ်ဂီုကၠီုဟွံမာန်၊ ဒၞါဲခါန်စွံ မၞိဟ်က္ဍိုပ် ဖအုံကွာန်ဟွံမာန်၊ ဒၞါဲပံက်စွံ ကမ္မယှေန်ပေါဲရုဲမာဲ အဆံၚ်ဖအုံကွာန် ဟွံမာန်ဏီတံဂှ် အခေါၚ်ကဵုမာဲ ဟွံမွဲရ” ရဴဝွံ သၟာန်ဏာ ဂကောံကမ္မယှေန်ဍောတ်တ် အဆံၚ်ဖအုံကွာန်ဂှ် ညးတံလဴက္လးကဵုဗီုဂှ် လၟောဝ်အမာတ်ဂမၠိုၚ် နူဗော်ကောန်ဂကူမန် ဟီုထ္ၜးကဵု ဌာန်ပရိုၚ်ဗၠးၜးမန်ရ။
“ပ္ဍဲပွိုၚ်ဍုၚ်လှာဒကှ်ဏံ ဖအုံကွာန် နွံ ၅၁ ဖအုံ၊ အရာပ်လ္တူဍုၚ် နွံ၁၆ အရာပ်ရ။ အပ္ဍဲဂှ် ဖအုံကွာန် ၜိုတ် ၁၀ ဖအုံ ကဵု အရာပ်လ္တူဍုၚ်တံဂှ်ရ အခေါၚ်ကဵုမာဲနွံ၊သှေ် အရာပ်/ကွာန် ၄၁ ဒၞါဲဂှ် အခေါၚ်ကဵုမာဲဟွံမွဲ” ဥုကျဳလွေန် ဥက္ကဌ ကမ္မယှေန်ပေါဲရုဲမာဲ အဆံၚ်ကွာန်အရာပ် ပွိုၚ်ဍုၚ်လှာဒကှ်ဂှ် ပ္ဍဲတ္ၚဲဏံရ ဟီုသ္ပဒ္တန်ကဵု ဌာန်ပရိုၚ်ဗၠးၜးမန်ရ။
ပ္ဍဲပွိုၚ်ဍုၚ်လှာဒကှ်ဝွံ ဒၞါဲလဵု ဟွံဂွံအခေါၚ်ကဵုမာဲရောဟီုမ္ဂး ကွာန်မန် ဒေသဒဵုထောၚ် ၃၄ ကွာန်သၟးဟွံက သၟာၚ်နူဂှ် ပ္ဍဲဇရေၚ်ဇရေၚ်ဂၠံၚ်ကွဳစက် ဇြပ်ဗုကဵုကျာ်ပိဂှ်မ္ဂး ဖအုံကွာန် မပ္တံကဵု ကြုၚ်ခဝန်၊ဖါဗြ၊ ရတ်ယှာန်၊ ဝါဂၞာၚ်၊ ဝၚ်ခၞ၊ ကျိုက်ဗလူ၊ကဝ်မာ၊ကျောန်ချိုၚ် တံပါလုပ်တုဲ ပါဲနူဂှ် အပၠုၚ်၊တာဒိန်၊ ထဳဖဍောအ်၊ ထဳဖဍိုအ်၊ ဗလးဒုန်ဖါ်၊ ခလံက်ဂနဳ တံလေဝ် လုပ်အဝေါၚ် ဒၞါဲဟွံမွဲကဵု အခေါၚ်ကဵုမာဲကီုရ သာ်ဝွံ သဝ်ဝါဂေ (ညးမၚ်ရံၚ် အကာဲအရာပေါဲရုဲမာဲ ဒေသဍုၚ်ကျာ်ပိ) ဟီုလဴကဵု ဌာန်ပရိုၚ် ဗၠးၜးမန်ရ။
“ဒေသဖအိုတ်ဏံဂှ် ပ္ဍဲသၞာံ ၂၀၁၄ တေံ ကၠုၚ်ကေတ်လဝ် စရၚ်လၟိဟ်မၞိဟ်တုဲမံၚ်ရ။ သွက်ဂွံကေတ်စရၚ်မၞိဟ်ဂှ် နူဌာန လဝက တေံ နကဵုအစဳဇန်တၟေၚ် (မိုးပွၚ့်အထူးစီမံချက်) ကေတ်အရီုဗၚ်ကဵု ဗော်ဍုၚ်မန်တၟိ ကေုာံ ဗော် ကေအေန်ယူ တုဲ ဍေံတံကၠောန်ကဵု စရၚ်သ္ၚိကၟိန် သီု (မှတ်ပုံတၚ်) ရ။ သွက်ဂွံ ခါန်စွံ မၞိဟ်ဇၞော်အုပ်ဓုပ်ကွာန်ဂှ် တာလျိုၚ် အလဵုအသဳရ” သဝ်ဝါဂေ ဂး။
ဗွဲတၟေၚ် ဒၞါဲဟွံမွဲကဵု အခေါၚ်ကဵုမာဲ တံဏံဂှ် ၜိုန်ဒှ် ဒေသ ရဲဗော်ဍုၚ်မန်တၟိ ကေုာံ ဗော်ကေအေန်ယူ တံ ချဳဒရာၚ်အာကၠုၚ်မံၚ်ကီုလေဝ် ဟိုတ်နူ ဒိုအ်လဝ်ပန်ပှော် ကုအလဵုအသဳ သီုအဆံၚ်တွဵုရး၊ သီုအဆံၚ် ကၟိန်ဍုၚ်ကီုဂှ်ရ ပေါဲဗ္တိုက်လဵုလေဝ် ဟွံမွဲကၠုၚ်တုဲ ၜိုဟ်သြိုဟ် တန်ကြန်မံၚ်ဂှ် ဂွံဆဵုကေတ်ရ။
“ပ္ဍဲပွိုၚ်ဍုၚ်လှာဒကှ်ဂှ် မန်၊ဗၟာ၊ကရေၚ် ကောန်ဂကူပိဏံရ တန်တဴမံၚ်တုဲ၊ ဒၞါဲကဵုမာဲဟွံဂွံ လၟုဟ်ဂှ် ဒှ်ဒၟံၚ် ကွာန်မန်ကဵု ကရေၚ်တံရ။ ကောန်ဍုၚ်ဇကု ကောန်ဍုၚ်ပိုဲ ဟွံဂွံအခေါၚ်ကဵုမာဲ ဗီုဏံဂှ် ဒှ်အရာဆောံဗြံ သွက်ပိုဲရ” သာ်ဝွံ မေန်ထောန်လွေန် လၟောဝ်အမာတ် ကၠတ်ထဝ်ကောန်ဍုၚ် ၊ လှာဒကှ်လၟိဟ် (၂) နူ MNP ဟီုရ။
ဆ္ဂး အခါကောန်ကလောန် မဟွံမွဲကဵုစရၚ်အၚ်သ္ၚိကၟိန် လၟိဟ်ဂၠိုၚ်ကဵုလ္ၚီ မံၚ်ဒၟံၚ်ပ္ဍဲဍုၚ်ကျာ်ပိတုဲ လုပ်ကၠောန်မံၚ်ကလောန် ပ္ဍဲရုၚ်စက်ကုန်သေံ ကျာ်ပိဂှ်ဂှ် ဂွံမံၚ် အခေါၚ်စုတ်မာဲဖိုဟ် လ္ၚတ်ဂွံလဝ်ရ။