Categories
ပရိုၚ် လ္ၚတ်မၚ်ရံၚ် ပေါဲရုဲမာဲ ၂၀၁၅

ပ္ဍဲတၞးစၟတ်တဲမာဲဂှ် အရံၚ်သၚ်္ကေတဗော် ဗၠေတ်မံၚ်တုဲ ဖန်ဇန်မံၚ် သွက်ဂွံပ္တိုန်လိက်ဒ္စဵုဒ္စး

တဆိပ်ဗော်ကောန်ဂကူမန်(Copy)
တဆိပ်ဗော်ကောန်ဂကူမန်(Copy)
အိုက်သာၚ် - ပ္ဍဲတၞးစၟတ်တဲမာဲဂမၠိုၚ် နူကမ္မယှေန်ပေါဲရုဲမာဲကၟိန်ဍုၚ် ပရးပ္တိတ်လဝ်ဂှ် အရံၚ်တဆိပ် ဗော်ကောန်ဂကူမန် သၞံၚ်ဗု ကဵု ဗီုၜိုပ်ထဝ်ဂှ် အရံၚ်ဍေံဗၠေတ် ဂတးကၠုၚ်မံၚ်တုဲ စပ်ကဵုကိစ္စဏံ သွက်ဂွံပ္တိုန်လိက် ဒ္စဵုဒ္စး ကုဂကောံ ကမ္မယှေန် ပေါဲရုဲမာဲ ကၟိန်ဍုၚ်ဂှ် ဗော်ကောန်ဂကူမန် ဖန်ဇန်

မံၚ်ဖိုဟ် ဂွံလဝ်ပရိုၚ်ရ။

ပဟိုတ်ကဵုကိစ္စဂှ်ရ ပ္ဍဲဂိတုနဝ်ဝေမ်ဗာ ၁ ဂှ် ဗော်ကောန်ဂကူမန် ကၠောန်ပေါဲသောၚ်ပရိုၚ် ပ္ဍဲရုၚ်ဗော် နွံဍုၚ်မတ်မလီုဂှ်တုဲ သွက်ဂွံပ္တိုန်လိက်ဒ္စဵုဒ္စး ကုဂကောံကမ္မယှေန်ပေါဲရုဲမာဲကၟိန်ဍုၚ်ဂှ် ညးတအ် ချပ်ဇန်ကၠုၚ်ရ။

“ပိုဲတအ်ချပ်လဝ် သွက်ဂွံပ္တိုန်လိက်ဒ္စဵုဒ္စးနွံ။ ဆ္ဂးပြဟ်ဟ်ဏံ ဟဂွံပ္တိုန်ဏီ။ မုဒှ်ရောဟီုတှေ် ဒှ်ဗီုဏံဂှ် ဗော်ပိုဲမွဲဓဝ် ဟွံသေၚ်၊ ဗော်တၞဟ်ဟ်လေဝ် ဒှ်ကၠုၚ်ဗီုဂှ်နွံ။ ဒၟါဂှ်ရ ဒးသၟာန် ဒးထ္ဍံက်ရံၚ် လညာတ်လစွံစိုတ် ဗော်တၞဟ်ဟ်ဏီ။ တုဲတှေ် ပ္တိုန်ထေက်ဟာ ဟွံထေက်ဟာဂှ် သ္ဂုတ်သွာတ်ပၠန်ဏောၚ်” နာဲလျးတၟး ညးအုပ်ကာ ဗော်ကောန်ဂကူမန် ဟီုရ။

သၚ်္ကေတ အရံၚ်တဆိပ်ဍာံဍာံ ဗော်ကောန်ဂကူမန်ဂှ် သၞံၚ် ဒှ်အရံၚ်ဗုတုဲ ၜိုပ်ဂှ် ဒှ်အရံၚ်ထဝ် (ဍာ်မိတ်) ရ။ ကာလ ဂကောံကမ္မယှေန်ပေါဲရုဲမာဲကၟိန်ဍုၚ် တက်ပ္တိတ် တၞးစၟတ်တဲမာဲဂှ် သၞံၚ်ဂှ် ဒှ်အာ အရံၚ်ဍာ်မိတ်၊ ၜိုပ်ဂှ် ဒှ်အာ အရံၚ်ဗုတုဲ အရံၚ်ဍေံဂတးမံၚ်ရ။

စပ်ကဵုဒဒှ်ဏံတုဲ လဟီုဂကောံကမ္မယှေန်ပေါဲရုဲမာဲ တွဵုရးမန်မ္ဂး “တၞးစၟတ်တဲမာဲ နူကမ္မယှေန်မာဲကၟိန်ဍုၚ် ပ္တိတ်လဝ်တအ်ဂှ် စက္ခူဂှ် ဒှ်မံၚ်အရံၚ်ဍာ်မိတ်တုဲ ဗော်စကာလဝ် သၚ်္ကေတ အရံၚ်ဗုဗုတအ်ဂှ် အတိုၚ်အရံၚ်ဒုၚ်လဝ်သၟဝ်ဂှ်ဟေၚ် ဍေံဒှ်အာ အရံၚ်ဍာ်မိတ်ကီုရ။ ဒှ်သာ်ဂှ်ရ ကိစ္စဏံ တဆိပ် ဗော် မွဲဗော်ဓဝ်ရ အရံၚ်ပြံၚ်အာဟွံသေၚ်” ဂးကၠုၚ်သာ်ဂှ်ရ။

ပ္ဍဲတွဵုရးမန်ဂှ် ဗော်ပရေၚ်ဍုၚ်ကွာန်ဂမၠိုၚ် မပ္တံ ဗော်ကောန်ဂကူမန်၊ ဗော်ဒဳမဵုကရေဇြဳအလုံရးမန်၊ ဗော် NLD၊ ဗော်ကျဖေါအ်(ပျဳခါၚ်ဖျဵု)၊ ဗော် (အမျိုးသားဒီမိုကရေစီ အၚ်အားစုပါတီ)၊ ဗော် (အမျိုးသား တိုးတက်ရေးပါတီ)၊ ဗော် တစည (တိုၚ်းရၚ်းသားစည်းလုံးညီညွတ်ရေးပါတီ)၊ ဗော် (ဖလုံစဝေါ်ဒီမိုကရက်တစ်ပါတီ)၊ ဗော် (ကရၚ်အမျိုးသားပါတီ)၊ ဗော် (ကရၚ်ပြည်သူ့ပါတီ) ကေုာံ ညးစၞးပုဂ္ဂလိက တအ်လေဝ် လုပ်ပြိုၚ်အိုတ်ဏောၚ် ဂွံတီကေတ်ရ။

အတိုၚ်စရၚ်မာဲ လလောၚ်ကၠုၚ်လက္ကရဴအိုတ် ပ္ဍဲဂိတုသေပ်တေမ်ဗာ နူ ၁၄ ဒဵုကဵု ၂ရ ဂှ်မ္ဂး ပ္ဍဲတွဵုရးမန် လၟိဟ်ညးနွံကဵု အခေါၚ်စုတ်မာဲ နွံ ၁၄ ကိုဋ်ကဵု ၄ ဠက်ပြၚ် သာ်ဝွံ ဂွံတီလဝ် နူရုၚ်ကမ္မယှေန်ပေါဲရုဲမာဲ တွဵုရးမန်ရ။

လၟုဟ်မ္ဂး မၞိဟ်ပြံၚ်ဌာန်ဒေသ လုပ်တန်တဴမံၚ် ပ္ဍဲတွဵုရးမန် တအ်လေဝ် ညးတအ် သ္ဂောံဂွံ အခေါၚ်ကဵုမာဲကီုဂှ် အာတ်မိက် ဂရၚ်ပ္တီ နကဵု တၞးလိက်ဗီုပြၚ် ၃-က ဂှ်တုဲ သီုဖ်အိုတ် ညးပ္တိုန်ကၠုၚ်လိက် (၃-က) ပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်မတ်မလီု၊ ပွိုၚ်ဍုၚ်ၜါသွာၚ် တ္ကအ်ခၟိုၚ်၊ ပွိုၚ်ဍုၚ်မုဟ်ဍုၚ် တအ် နွံၜိုတ် ၂ ဠက်ပြၚ်ပၠန်တုဲ ညးတအ်လေဝ် က္လိဂွံအခေါၚ်ကဵုမာဲကီုဏောၚ်ဂှ် ဂွံတီကေတ် နူရုၚ်ကမ္မယှေန် ပေါဲရုဲမာဲ ဒေသညးကဵုညးကီုရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.