မူပၞောန်ပရေၚ်ဍုၚ်ကွာန် မပဠေဝ်လောဲလောဲဂွံဂှ်ဟေၚ် ချူခၞံအာညိ ဝန်ဇၞော် ဥုအံၚ်မေန် မဒှ် ဒုဥက္ကဌ ကမ္မတဳ ဓမံက်ရုပ်ရဴ ကမၠောန်ပရေၚ်ၜိုဟ်လလံ ကၟိန်ဍုၚ် (UPWC) ဟီုဖ္တိုက်ဖ်ေအာဝ်လဝ်ရ။
ပ္ဍဲဂိတုနဝ်ဝေမ်ဗာ ၂၄၊ အ္ခိၚ်နူဂယး ၉ နာဍဳဂှ် ကမ္မတဳပံၚ်တောဲ ပ္ညဳပ္ညပ်သဳကၠဳ ကိစ္စပရေၚ်ၜိုဟ်လလံ ကၟိန်ဍုၚ် (UPDJC) ဒက်ပ္တန်လဝ် နကဵုညးစၞး ပိက္ဍိုပ် မတွံဂး အလဵုအသဳ၊ ဂကောံရပ်လွဟ်၊ ဗော်ပရေၚ်ဍုၚ်ကွာန် ဂလိုၚ် တအ်ဂှ် ကၠောန်သ္ပကောံဓရီု ပ္ဍဲဌာနပရေၚ်ၜိုဟ်လလံဗၟာ MPC တုဲ ဝန်ဇၞော် ဥုအံၚ်မေန် ဟီုဂးဏာ ဂလာန်ဖ္တိုက်ဖ်ေအာဝ် သာ်ဂှ်ရ။
“ပ္ဍဲကလောန် ပရေၚ်ၜိုဟ်လလံ ပိုဲကၠောန်မံၚ်ဏံဂှ် အခက်ခုဲနွံဏောၚ်၊ အ္ခိၚ်လေဝ် နွံကဵု အပိုၚ်အခြာတုဲ အခါကၠောန်မ္ဂး တၚ်ဍိုန်လျတအ်၊ တၚ်ယုတ်ဒေက်တအ် နွံတွဵုရ။ ဆ္ဂး ကၠိုဟ်ကေတ်ညးသ္ကအ်တုဲ ညံၚ်ဂွံ ကၠောန်အာ။ ပိုဲလေဝ် မုဟွံကၟာတ်လဒဵုလဝ်ရ။ NCA ဂှ် ပိုဲဂွံနၚ် လောဲလောဲ ဟွံသေၚ်ရဂှ် အဲထပ်ဟီုဏာရ။ NCATimeline မကၠုၚ်နူ ပရေၚ် NCA ဂှ် မၚ်မွဲဒ္ဂေတ်ဗက်အာ ဒဵုကဵုညးဂလိုၚ် ဒုၚ်တဲမာန်တုဲ ညံၚ်ဂွံ ဆက်ဇက်အာ ဂတတေံမာန်ဂှ် ညံၚ်ဂွံဗိုၚ်အာညးသ္ကအ်၊ မူပၞောန် ဂှ်လေဝ် မိက်ဂွံကဵုချူခၞံလဝ် ညံၚ်ဂွံပဠေဝ်လောဲ လှာဲလောဲရ။ ကာလဂှ်မ္ဂး အလဵုအသဳ တၟိတေံ ဖန်ဇန်လောဲဏောၚ်” ဥုအံၚ်မေန်ဂးရ။
ပ္ဍဲစၟတ်တ္ၚဲ ၁၅၊ ဂိတုအံက်တဝ်ဗာ၊၂၀၁၅ တုဲကၠုၚ်ဏံ ဂကောံရပ်လွဟ် ကောန်ဍုၚ်အရၚ် ၈ ဂကောံကဵု အလဵုအသဳ တအ် ထ္ပက်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် ကော်စ NCA ဂှ်တုဲ အတိုၚ် မတုပ်စိုတ် ပ္ဍဲလိက်ကသုက်ဂှ်ရ အပ္ဍဲပွိုၚ် ၃၀ တ္ၚဲဂှ် ဒးဒက်ပ္တန်ဂကောံ JMC (ကမ္မတဳ ပံၚ်တောဲ သွက်ဂွံမၚ်ရံၚ် ဆေၚ်ကဵုအရာမဒိုအ်လဝ်ပန်ပှော်) ကေုာံ ဂကောံ UPDJC (ကမ္မတဳပံၚ်တောဲ ပ္ညဳပ္ညပ်သဳကၠဳ ကိစ္စပရေၚ်ၜိုဟ်လလံ ကၟိန်ဍုၚ်) ဏောၚ်တုဲ အပ္ဍဲပွိုၚ် ၆၀ တ္ၚဲဂှ် မူပၞောန် ပရေၚ်ဍုၚ်ကွာန်မွဲ ချူညံၚ်ဂွံတုဲ၊ အပ္ဍဲပွိုၚ် ၉၀ တ္ၚဲဂှ် ညံၚ်ဂွံစကၠောန် ပေါဲသဳကၠဳပရေၚ်ဍုၚ်ကွာန် နမပ္တံသာ်ဏံ တုပ်စိုတ်လဝ်ရ။
“ရန်ကဵု သွက်ဂွံဓမံက်ရုပ်ရဴ အတိုၚ်တၚ်တုပ်စိုတ် လိက်ကသုက်ဂှ်ရ ပ္ဍဲနဝ်ဝေမ်ဗာ ၂၁ ဂှ် ပိုဲဒက်ပ္တန်ဂကောံ UPDJC (ကမ္မတဳပံၚ်တောဲ ပ္ညဳပ္ညပ်သဳကၠဳ ကိစ္စပရေၚ်ၜိုဟ်လလံ ကၟိန်ဍုၚ်) တုဲအာတုဲရ။ လိက်ကသုက် NCA မ္ဂးဂှ် ညံၚ်ရဴ ဒးဖန်ဇန် ကိစ္စဒိုအ်ပန်ပှော်ကီု ပေါဲသဳကၠဳပရေၚ်ဍုၚ်ကွာန် ညံၚ်ဂွံဒှ်ဂှ်လေဝ် ဒးဖန်ဇန်အာကီုရ။ ဒှ်သာ်ဂှ်ရ ဗိုၚ်ကၠောန် ဗိုၚ်ဂစာန် သီုညးဖ်အိုတ်ညိဂှ် ဖ္တိုက်ဖ်ေအာဝ်ဏာရ” ဂှ်လေဝ် ပဒေါသဝ်ဂွါထူဝေန် ဒုဥက္ကဌ UPDJC ဟီုဂးဏာရ။
လၟုဟ်မ္ဂး အလဵုအသဳ၊ ဂကောံရပ်လွဟ်၊ ဗော်ပရေၚ်ဍုၚ်ကွာန်တအ် ပိက္ဍိုပ် စုတ်လဝ်လၟိဟ်ညးစၞး ဗွဲမဗွဲ ဗ်ၜတ်ညးကဵုညးတုဲ ဒက်ပ္တန်လဝ် ဂကောံ UPDJC ကဵု ဂကောံ JMC တုဲဒှ်မံၚ်ကီုရ။
အတိုၚ်တၚ်တုပ်စိုတ် လိက်ကသုက် NCA ဂှ်မ္ဂး မူပၞောန်ပရေၚ်ဍုၚ်ကွာန်ဂှ် ဒဳဇြေမ်ဗာ ၁၄ စွံကြဴအိုတ်တုဲ ချူခၞံညံၚ်ဂွံတုဲဒှ်။ ပေါဲသဳကၠဳပရေၚ်ဍုၚ်ကွာန်ဂှ် လ္ပကဵုလ္ဇုဲနူ ဇာန်နဝါရဳ ၁၄ ဂတတေံတုဲ ညံၚ်ဂွံစကၠောန်အာ ဂးလဝ်သာ်ဂှ်ရ။
မူပၞောန်ပရေၚ်ဍုၚ်ကွာန် ချူဓဇက် ညံၚ်ဂွံဂတာပ်အ္ခိၚ်မာန် (အတိုၚ်မဟီုလဝ် လ္ပကဵုလ္ဇုဲနူ ဒဳဇြေမ်ဗာ ၁၄) ဂှ် (၁) လၟိဟ်ညးစၞး (ပံၚ်သီုဖ်အိုတ်) မူစိ ဒးပါလုပ် ပ္ဍဲပေါဲသဳကၠဳပရေၚ်ဍုၚ်ကွာန်၊ (၂)ဗ်ၜတ်မၞိဟ်စၞး ညးမပါလုပ် (နူဂကောံ မပါလုပ်တအ် ဗ်ၜတ်ညးစၞး မူစိ ဂွံတိုန်စိုပ်) ၊ (၃) အစဳဇန် သ္ဒးသဳကၠဳ Agenda ကေုာံ (၄) စေဝ်ပၞောန် သဳကၠဳ၊ (၅) စေဝ်ပၞောန် နဲကဲ သွက်ဂွံဖျေံသ္ဂုတ်သွာတ် တအ်ဂှ် ဆန်ဇန် ဖန်ဗဒှ်လဝ်မာန်မ္ဂး မူပၞောန်ပရေၚ်ဍုၚ်ကွာန်ဂှ် ချူဓဇက်မာန်ဏောၚ် ဝန်ဇၞော် ဥုအံၚ်မေန် ဟီုဂး ကဵုဏာလညာတ်ရ။